Pages

Subscribe:

Sunday, December 02, 2007

مسكنات وجع من النوع الخطير جدا


اضبط منبه حالك اللي
جنب منك
ع السرير
ادخل لحلمك مرة بدري
عيش طريقة حب تانية
يمكن الاحلام تفيد
خلي روحك تستفيض
قول لقلبك ينشغل
واحلم بصورة حلم نوبة ملونة
علي صوت الراديو ع الاخر وشغل
كل الاغاني الممكنة
خلي الشجر في الحلم يطرح امنيات
خلي الربيع يبقي بديع
خلي الخريف يعشق الورق اللي مات
خلي الشتا يغرق دفا
اخلق حياتك من عدم
خلي الحجات المستحيلة
تبقي مكان الممكنات
اوصل اللي نبعه منك
جوة فيها
شوف الحقيقة لو تبان من عنيها
احلم بنفسك وانت ماسك يوم ايديها
والشوارع .. والزحام
كتفها المشتاق لحضنك
خدها الستني منك
تلمسه
روح يا بطل
اقطف الورد اللي طارح
واهمسه
وشوشة
بوح باللي فيك
خلي عنيك
تعرف معاني .. غير معانيك اللي باشت في الكلام
خلي عنيك
مرة تتكلم غرام
عيش مرة حلمك
دا اللي نفسك
يوم تعيشه
كون الجناح
لطير صغير
لسه ما نبتش ريشه
واسرح قوي
اخر ما يقدر بيك خيالك يبعدك
لحد ما تشوف السراب
قدام عنيك
بينك وبينه .. خطوتين
حاول بايدك تمسكه
خلي عنيها
تبقي الدليل
خلي القمر
يبقي الخليل
ارسم سحابة بالطريق
وابدا الرحلة الطويلة
من قبور السجن فيك
سهي خوفك
واجري منه
واعبر القضبان وعدي
م السياج اللي ف عنيك
اخترق كل الدفاعات اللي فيك
من جوة منك عدي ليها
طير عليها
بس .. حاسب
ب س
ح
ا
س
ب
الطريق مش سهل خالص
ياما ناس قضت حياتها
وهي بتحاول وصول
كل مرة
وقبل ما توصل وفجاه
يخلص الحلم الجميل
يضرب منبه حالهم اللي
جنب منهم
ع السرير
ناس بتفهم ايه الحكاية
وناس بتتحول سراب
اوعاك لتتحول سراب
مجذوبين احلام ووهم
كل مرة يناموا فيها
يظبوا منبه الحال القبالهم
ع السرير
وفي كل مرة ياخروا
لحظة الرن وعسي
يكمل الحلم الجميل
1/12/2007

12 comments:

شجره الدر said...

الايقاع السريع
المواضيع المتنوعه
الانتقال السريع بين المواضيع وبعضها
انا مش عارفه اذا كان ده وحش ولا حلو
انا حسيت انى باخد نفسى بسرعه جدا وانا بقراها
بس عجبتنى اوى
ومن النهارده هاظبط المنبه واحاول الحق الحلم بدرى بس يارب يارب
مايتحولش فى الاخر لسراب

shayma said...

ياااااااااااه
تحفه يا ادم
بجد كلامها حلو اوىىىىىىىى
وهجرب ادخل الحلم بدرى ويارب الحقه واحققه وميبقاش سرااااااب


خلي الشجر في الحلم يطرح امنيات
خلي الربيع يبقي بديع
خلي الخريف يعشق الورق اللي مات
خلي الشتا يغرق دفا
اخلق حياتك من عدم
خلي الحجات المستحيلة
تبقي مكان الممكنات

جميييييله
:))))))))))
سلامى

يا مراكبي said...

بحجد جميل لأن فعلا فكرته جميلة ومبتكرة للغاية

أنا بحب الأفكار المبتكرة جدا

والأحلى إن الواحد حس وكأنه في سباق مع الزمن .. أنا حسيت إني بأنهج وأنا بأقرأ على فكرة

تحياتي ليك

يا مراكبي said...

بحجد جميل لأن فعلا فكرته جميلة ومبتكرة للغاية

أنا بحب الأفكار المبتكرة جدا

والأحلى إن الواحد حس وكأنه في سباق مع الزمن .. أنا حسيت إني بأنهج وأنا بأقرأ على فكرة

تحياتي ليك

حــلم said...

ادم
من اجمل ما قرأت مؤخرا
رائعة و منسابة ومتماسكة وجذلة الألفاظ وجديدة المعاني
تحياتي

صاحب البوابــة said...

خلي عنيك
مرة تتكلم غرام
عيش مرة حلمك
دا اللي نفسك
يوم تعيشه
كون الجناح
لطير صغير
لسه ما نبتش ريشه
واسرح قوي
اخر ما يقدر بيك خيالك يبعدك

رائعة أخي آدام

Hegazy 82 said...

الله عليك يا مان أكثر من رائع أنا هشيل بطاريه المنبه علشان ميرنش وأكمل حلمي علي فكره أنا حلواني بردو و مدونتي أسمها نفسي أفهمها بس تعبانه أنا لسه بلوجر مبتديء ياريت تزورها وتديني رأيك في قصايدي النص كم

فى القلب said...

خلي الخريف يعشق الورق اللي مات
خلي الشتا يغرق دفا
اخلق حياتك من عدم
خلي الحجات المستحيلة
تبقي مكان الممكنات


يعنى أقل وصف أنتى متمكن بروووووعه

أنت لخصت محاضرات و محضرات بأسلوب سهل عميق متدفق ممتع

ليه بتحرمنا من الروائع دى

dramaqueen said...

انا دراما كوين بس برضة مكسلة ادخل باسمى

المهم جدا
ان كلامك تحفة بجد جميل كعادتك يا ادم
والايقاع حلو اوى
تحياتى

احـمـد عصـام said...

صديقي الندل مش هقول حلو ولا هايل ولا عبقري ولا هايل لأن الكلام ده مبيوصفش اللي عايز أقوله ولكن معرفتي لقدراتك وحبي لشعرك يخلوني أستنى قصايد أقوى من كده
تحياتي لك أيها الصعلوك العبقري

أنونيمس said...

صديقي
مسكناتك جامدة خالص
وأثرها من النوع الجامد جداً
كمل كمان شوية عشان الوجع يخف كمان وكمان

يسلم ها القلم وتسلم ها اللأدين اللي بتكتب
:))

يالا ياعم حتتين لبناني اهم

ادم المصري said...

اشكركم كثيرا
اتمني ان اكون بالفعل جدير باطرائكم الذي اسعدني كثيرا
.
.
.
تحياتي للجميع
والسلام