Pages

Subscribe:

Monday, January 22, 2007

صدقيني الفرق صعب

صدقيني
بجد صعب نكون لبعض
الفروق اللي ما بينا
مش فروق يمحيها وعد
والحياة دي اللي احنا فيها
مش حيات ترفيه ورغد
انزلي بقلبك لتحت
عيشي واقع للحياة
وافهمي ان الفرق صعب
ماعيش اجيب لك
كل مرة نلتقي
ارنب ودب
فمنين هناخد بعضنا
ونروح نحب
اوعي احسك ..بتلوميني
و فاكرة اني ماعندي قلب
انا كل مرة اتصل
الاقي قلبي يرتجف بين الضلوع
مش رهبة منك
ومش عشان من عيني يبكي سيل دموع
دا بيبقي خوفا ع الرصيد
العالم الله .. هاشحن امتي من جديد
لعنة الله م السما
ع الفودافون
ينخرب محمول جميع العاشقون
والمغرمون
والحالمون
وكل شيء ينتهي بواو ونون
صدقي قلبي الرهيف
ارحمي دمع العيون
الفرق صعب
ف كل مرة تكلميني
تصغر الاحلام ف عيني
والهلاوس بتناديني
فاحلم اني .. فوق جبيني
انكتب ... هنكون لبعض
وف النهاية
لاشعوري ومش باحس باعمل ايه
اجري ع الكول ريجستر
لما اشوفهم كام دقيقة
باعرف ان قلبي يخسر
اوعاكي مني تزعلي
لاني مش زيك .. غني
ولا اقدر اخدك فوق جزيرة
يبقي فيها النخل طارح لك دهب
او نطير مع بعض فوق
ونعدي من فوق السحب
بقولك ايه ؟!!!ز
هل ممكن اني اطلب طلب ؟؟؟!!!ز
ارجوكي تنسيني وخلاص
وماتساليش ايه السبب ؟

Saturday, January 20, 2007

ولا ف الخيال

انهاردة كان عاندي المادة اللي قبل الاخيرة
هانت وقربت اخلص والحمد لله
.
كانت مادة اللي حد ما سهلة
كنت فرحان قوي لاني كنت باحضر
محاضراتها بانتظام
.
اصل دكتور المادة دي غلبان وعلي نياته
وكان اقصي عدد ممكن يحضر له
في اي محاضرة هو تلاتين
اربعين من اصل
300
.
للاسف كان واخد من وقت المادة دي
اني بذاكر مادة التخلف اللي عندي
اول مرة اشيل مادة في حياتي
احساس وحش جدا جدا جدا
.
بس الحمد لله
حضوري للمحاضرات
وللسكاشن في المادة دي بالذات خلاني اقدر الم المادة
.
انا بصراحه المادة دي بس
تقريبا اللي كنت باحضرها بانتظام
عشان كدا الحمد لله ما تعبتنيش
وكمان مزيدا من الهمة والنشاط
روحت لواحد صاحبي بيته
اصور منه السكشن الاخراني اللي ما حضرتوش
عشان احل المسائل كلها
والواد بصراحه طلع جدع معايا
لاشتكي من عطلة ولا حاجة
.
اما المادة اللي جاية يا ساتر يارب
مواصفات قياسية دي
عمري ما حضرت ولا محاضرة
اصلها مادة كلام
وكانت اختياري
بس الدفعة الغبية اختارتها
واضطر الدكاترة في القسم
انهم يعمموها .. علشان لازم يكون فيه نسبة معينه
للدارسين المواد الاختيارية
واضطريت اخدها غصب عني
فقررت عندا فيها ما احضرشي خالص
وانشاء الله التلات ايام دول هبقي احفظ الدش دا
وخلاص
.
المهم جه يوم الامتحان
اللي هو انهارده
نزلت بدري من بيتنا وعلي غير عادة
ركبت من محطة الحدايق
اصلي انا في حدايق المعادي
قابلت واحد صاحب م الدفعة
اعرفه شكلا بس
وهو كمان يعرفني شكلا بس
.
سلمنا علي بعض
بس لقيت حاجة غريبة جدا
..
..
لقيته فاتح ورق المواصفات وبيذاكر فيه
بيني وبين نفسي
قولت هي الباور سيستم سهلة
بس مش لدرجة ان الواحد يذاكر المادة اللي بعدها
قبل الامتحان بساعتين ولا حاجة
.
لقيته بيكلمني وبيقول ايه الاخبار
ما تعرش اي حاجة
قولت له لا والله مافيش اي اخبار
ودا ر بينا الحوار دا
...
...
ما تعرفشي شكل الاسأله ممكن يكون ازاي ؟
بيني وبين نفسي قولت ياسلام .. لو كنتوا بتحضروا المحاضرات زيي ما كانش بقي دا حالكوا المهم رديت عليه وقولت لا والله الدكتور ما قالش حاجة
طب ما تعرفشي هيجيب كام سؤال ؟
بيني وبين نفسي برده .. اه ما انا لقطه واحد حاضر المحاضرات كلها بقي وبتسأله ... المهم قولت له لا ياسيدي بس اتطمن كل امتحانات السنه اللي فاتت اربع اسئلة بس .. وكمان امتحان السنه اللي فاتت تلات اسئلة بس
ياسلام .. وممكن يسأل في ايه في اول سؤال ؟
انا رديت عليه باستغراب شديد جدا .. ازاي واحد ما بصش في ولا امتحان من بتوع السنه اللي فاتت وقولت له اكيد فـ
sending end
او الـــ
raseaving end diagram
فرد عليا بكل استغراب ودهشه برده ... ايه ؟ ودي فيها مسائل ؟
فرديت عليه بكل استغراب ودهشه برده .. دي تلت المنهج
قالي لا اصل انا ما اعرفشي غير الــــ
thermal
فرديت عليه بكل استغراب ودهشه برده .. ايه ؟
فقالي هو مش انهاردة مواصفات برده ؟
قولت له .. مين ؟ لا انهارده
power system
قالي لا لا انهارده مواصفات انزل معايا المحطة الجاية تعالي انا مستني صحابي
اظاهر اني صوعبت عليه ولا حاجة
.
.
المحطة اللي نزلنا فيها كانت المعادي
فيها اكشاك تليفونات كدا
اتصلت بصاحبي اللي روحت له امبارح
وقلت له ياحمد هو انهارده مواصفات
قالي اه هو انت ما تعرفشي
قولت لا مااعرفشي
.
قمت راجع للواد اللي من شوية كنت برد عليه
بعجرفة كدا
قولت له
والنبي انا واقع ف عرضك ابوس ايدك
اعمل ايه
طبعا الواد بصراحه ما اتاخرشي
.
هو وصحابة قعدوا يقولوا عناوين مهمة كدا
والحجات اللي ركز عليها الدكتور
والمسالة الوحيدة اللي في المنهج
وافتكرت اني ما حضرتش محاضرات لام المادة دي خالص
.
روحت اللجنه .. والخبر اتنشر
كل اللي يعرف
يقولي معلشي هدي نفسك
وانا اللي طالع عليا هيسرية ضحك
فقول له وانت شايفني زعلان ؟
ما انا باضحك اهوه
.
دخلت الامتحان اللي مدته تلات سعات
خلصت في ساعة
الدكتور كتر خيره
حاطط علي كل سؤال درجته
الحمد لله ..حليت اللي ينجحني
لما دخل الدكتور في اللجنه
في عيال سالته علي مساله صعبة كدا
فقال هي المساله دي بكام درجة
قلنا عشر درجات
قال خلاص ما تحلهاش
حل اول سؤالين وهتنجح
ههههههههههه
طبعا
انا ما صدقت
وخرجت من اللجنه بدري ساعتين
ولحد دلوقتي مش مصدق

Thursday, January 18, 2007

عيل شقي

عــــــيــــل شــــقــــي
..
..
..
..
بصراحه محتار جدا جدا جدا
اكتب ايه
.
هو بيقول علي نفسه
اصغر المدونين - وتحدي
.
انا شخصيا واثق من كدا
.
وواثق كمان انه هيكون
فاكهة المدونين كلهم
بالرغم من كونه كان عايز يدمرهم
زي ما قال في البوست الاول له
.

Tuesday, January 16, 2007

سفاح المعادي بين الحقيقة والخيال


سفاح المعادي .. بين الحقيقة والخيال
..
..
..
صحيت الصبح علي صوت امي وهي بتصحيني بالعافية
.
اصحي يا ادم
ليه يامه .. انا امتحاني الساعة واحده هتصحيني ليه دلوقتي
ياد اصحي عشان عايزاك
والله انا حاسس انه مقلب وهطلع حاجة هايفة
لا والله دا شيء مهم
ايه ياستي اديني قمت
مش توصل اختك المحطة ؟
نعم يا روح .... قصدي بتقولي ايه ما سمعتش ؟هي مش عارفه المحطة لا سمح الله
اصل والله امبارح قالولي حاجة خطيرة قالقاني والنبي يادام
ياعني امه لا الله الا الله اللي ماشية دلوقتي ورايحه الامتحان الراجل مش هينقي منهم غير بنتك ؟
معلشي يابني عشان خاطري
حاضر يامه انا عارف هي ليله مقندلة
.

واحنا في الشارع وبجر ناعم وقلبي بيقع في رجليا
سالت اختي
.

هي ايه الحاجة الخطيرة اللي سمعتها امك
بيقولوا ان السفاح قتل واحده علي كوبري المطبعة امبارح .. شق ضهرها بالسكينه
ياسلام
اه .. انا مش عارف هو كوبري المطبعه ولا الكوبري الحلزوني اللي عند جامع الفتح
اه ..وبعدين
لا .. هي ماما قلقانه وخلاص
طيب
مش امبارح العيال الصغيرين بتوع ابتدائي مشيوا ورا ( فلانه ) وجريوا وراها وقعدوا يقولوا السفاح اهوه هههههههه
ههههههههههه .. بجد مش معقول ؟ تلاقيهم افتكروها السفاح بس متنكر اكمنها منقبة ياعني
.

كملنا في طريقنا للمحطة
واحنا ماشيين
عدي من جنبنا موتوسيكل
لقيت اختي انفضت كدا واتخضت فسالتها فيه ايه

.
في ايه يا بنتي
اصلهم بيقولوا ان السفاح بيركب موتوسيكل .. انا لو كنت لوحدي والله كنت صرخت
هما مين اللي قالوا انه راكب موتوسيكل
الناس طبعا .. ايه الزكاوة دي
طب احترمي نفسك انا اخوكي الكبير
اه معلشي .. لا ماخذة
طب والناس بقي شافته علي كدا ؟
مش عارفه والله اهي الناس بتقول
طيب
.

وصلنا قرب المحطة كدا
فكنت بصراحه كسلان جدا وسقعان جدا
فكنت عايزها تمشي لوحدها تكمل دول خطوطين

.

بقولك ايه الناس اهيه امم كملي بقي
يادم انت اتجننت استني هتسيبني هنا ... لالالالا
طب طب خلاص .. اهوه يلا يا عبيطة يا خوافه
اه يا خويا خوافه بس اعيش
طب مع السلامه يا ستي
ايه مش هتدخلني المحطة
انتي شكلك بترسمي اني ادفعلك حق التذكرة صح
هههههه .. ياعني لو تحب
لا كفاية لحد هنا يلا حلي حلو في الامتحان بقي
.

الغريب في الامر بقي اني روحت امتحاني
وجيت ع الساعة خمسة كدالقيت اختي في البيت
طب ما هي جت م المدرسة لوحدها اهيه
ولا شافها سفاح ولا نيلة

Wednesday, January 10, 2007

تهيييييييس

معقولة الدنيا هي اللي كدا ؟
ولا احنا اللي اصلا نستاهل كدا ؟
ان بصراحه مش متاكد من الحكاية دي
لكن لو جينا للحق
فاحنا من جوة
مش قد كدا
ياعني كل واحد فينا
فيه كدا وكدا وكدا
بس بالرغم من كل دا
احنا برده ما نستاهلش يحصل فينا كدا
ايه دا ظلم دا
ماهي ناس كتير عايشين كدا
اشمعني احنا اللي بنشتكي بقي
ولا عشان احنا عالم خيخية كدا
بصراحه انا لافاهم ولا عارف ولا داري باي شيء
.
.
.
.
انا عارف دوايا
انا ممكن اقول شعر ؟
ياعني هاكتب كتير المرة دي
اصلي بصراحه لما اكون مش عارف اعمل حاجة
باقول شعر
يؤسفني ... اني اقولكم شعر
حلوة يسفني دي
اه حلوة
اذن .. قشطة
.
.
.
احساس عقيم
احساس عقيم
احساس عقيم صاب البشر
احساس بخنقه بتخنقك
وتشل قلبك .. بين ضلوعك
تسجنك
وتسد جوعك بكام آهايه صغيره
وشندوتش من سد الحنك
احساس عقيم
احساس متخبي جوه جلد وشنا
جوه الجوانتي
في ساعه برد والشتا
عمال يقرص في الجتت
قال ياعني الجوع ما بيعضش جسمنا
لا في حتت ... ولا في حتت
.
.
مبروك .. غيرنا الدستور
مبروك ياخوانا الدستور
مبروك يا خوانا .. ودستور
يجعــل كلامنــــــــا خفيـــف
لا كلام بيلف
ولا بـيــــدور
ولا يتكلــــــم
ولا بيثــــــور
كــلام جامــد
كلام محصور
جوة قلوب ... ومقفولة
الناس عشقت الأولـــي
بعد ما فهمــت الفولـــه
بلا جزيرة بلا نيلة
تعالوا نغير السيرة
قوم يابا وطفــي النور
كفايانا كلام مأثـــــور
ويلا ننـام بلا رجعــــة
أمانيكـم أوام رجعــــة
وباين عليها مذهولــة
بعد ما شافت الصورة
وهزمها علــو الســور
مبروك يا خوانا الدستور
.
.
من ضمن الفنون
بـقــول الـرقـــص عـيــــــب
قـــالــــو لــي الـرقـص فــن
قـــولــــت لــهـــم فـــن إيــه
وده كــلـــه هــــز وســـــط
.
قــالــو لـــي الـهـــــــز برده
مــــن ضـمــــن الـفـنــون
إزاي تــعـــرف تــــهـــــــز
بـيــحـكــمــهـــا الـقـانــــون
إزاي تــعـــــرف تــلاغــي
وتــديـــــــــــر الـشـئـــــون
و إزاي تـبـقـــي صــايــــع
تــاكــــــــل الـزبــــــــــون
كــــــــــــل ده أســــــــاس
مـتـظـبــــــــط ... مـــــوزون
و مــا فـيــش مـكــان لــزيـك
يــغـيـّــر الـمـفــهــــــــــــــوم
.
أذهـلــنـــــي هــــذا الــحــــال
كــــلام عـبـيـــط مــجـنـــــون
ده بـــايــــنـــه واد مــحـتـــال
ســوابـــق ورد ســـجـــــــون
.
عـمـــال يــألـــــــف عـبــّــــر
كـــلام مـريـــــض وسـقـيــــم
و عــايــــزنــا نـكـــون بــقـــر
نســـمـــــع ونـقــول أمـيـــــن
.
لاه ... و ألــــــــــــــــــــف لا
و إنـشــالـــه تــبـقــي مـيــن
أنا هـرفـض أعـيـش في شـق
و مــعــايـــا الـبـنـــي أدمـيــن
.
ولازم تـعــــــــرف إنـــــــك
راجــل مــريـــض غـلـبـــــان
هــحـتــرمــــك لاجــل سـنـــك
اكـــمـــــن أنــــــا إنـســـــــان
.
لـكــن تــقــــــولـــــي رقـــص
و كــــلام مـا هـوش مـوزون
فانا هرفض أعيش في هجص
وهــارفــض ألـبــس قـــــرون
.
.
.
اي خناقة .. انا دلوقتي ممكن اكون الي حد ما
نوعا ياعني
حبة كدا متظبط
معلشي
حاول يابني تاخد مضاد حيوي علشان البرد ما يبوظشي دماغك
حاضر
علي فكرة ؟
ايه ؟
وتحت فكرة ؟
الله ؟
وجنب فكرة و وراها
انت بتهيس بقي
اه .. اشمعني انت
طب انصحك انا كمان تاخد مضاد حيوي
حاضر

Tuesday, January 09, 2007

لا لا ثم لا ولا

.














..






.
.
احه للضغط الامتحاني
.
احه للصداع
.
احه للبرد
.
احه للمذاكرة
.
احه للنت اللي بيقطع
.
احه للكليه
.
احه لملازم المراجعات
احه للمعيدين

Tuesday, January 02, 2007

قولي قبلة

قـــــولـــــي قـــبــلــــة
.
عندك استعداد تحبي
حد مش هيقول بحبك
عندك استعداد تحبي
حد طالع دين ابوه
يكون في علمك
مش لوحده
هو واللي خلفوه ؟
حد بائس
حد يائس
حد كاره للحياة
حد لما يـيـجي يفرح
يملي كل الدنيا اه
حد لما يـيـجي يبكي
الدموع مغرقاه
حد واقف بين نارين
حد قلبه بين وبين
ومستحيل هيبدي بين من البنين
مستحيل
مسنحيل يقدر يغشك
عندك استعداد تحبي
حد مش هبقول بحبك
بصي انا .. حد طيب
مرة قالوا اني وسيم
كتير قالوا لي اني كريم
وصحابي ياما اتمألسوا
وقالوا عليا .. شاعر عظيم
كل دول ناس طيبين
ناي من زمان
ناس كدابين
يخدعوكي في الكلام وملونين
اسمعي مني الحقيقة مجردة
انا .. مش كدا
انا حد عادي جدا
حد خلقة ربنا
لما ييجي الصبح باصحي
ولما الليل بنام
وشعري دا .. مش حاجة ذرة
دا كلام زي الكلام
والحب عندي .. حاجة مرة
فيه اسية .. وفيه الام
قال لازم اضحك لما اشوفك
تـنسي فيا معني خوقك
وابقي بردك
وابقي حرك
وابقي تحت الشمس ضلك
وابقي دم بيمشي فيكي
وتبقي دم بيمشي فيا
ولو تغمض يوم عنيكي
يبقي لازم حلم فيا
ولو اغمض يوم اشوفك
ماليا كل الكون عليا
لا
مين هيضمن كل دا
صعب جدا اضمنه
عايز اقولك .. اني مش مالك مصيري
عاز اقولك .. ان كلي ملك غيري
عايز اقولك
اني مستحيل هافكر
يوم اقولك قلبي حبك
عندك استعـداد تحبي
حد مش هبقول بحبك
هاه سمعيني الوقتي ردك
ولا اقولك
شاوري قلبك
وابقي قولي بكرة ردك
عندك استعداد تحبي
حد مش هيقول بحبك

Monday, January 01, 2007

حالات

حـــــــــــــــــالات
.
_1_
.
عندما يتملكك شعور طاغي بالكتابة ثم تشرع في مسك الورقة والقلم .. ثم تغلق عينك اليمين وتسرح الي اعلي ثم لاتجد شيئا تكتبه .. فهي بلا شك حالة فراغ دماغي
نصيحة مني اوعي تحشيها
.
_2_
.
عندما تريد ان تذهب الي السنيما اليوم من شلة من الاصدقاء .. باعتبار ان اليوم هو ضمن ايام العيد ويجب عليك الفرحة ثم ما تلبس ان تتذكر انك لا تملك حق التذكرة .. فهي بلا شك حالة فراغ جيبي
ونصيحة مني اتلم واقعد في البيت
.
_3_
.
عندما تذهب الي اقرب سنترال ثم تشري كارت شحن محترم ابو عشرة جنية او تكون اكثر شياكة وتحول لنفسك خمسة جنية رصيد .. لترسل بهم رسائل قصيرة ورنات .. ثم تجده فجاة في عز الحاجة ان رصيدك خلص .. فهذه وبلاشك حالة نحس شديدة
ونصيحة مني .. بيع الموبايل لاتنحس الشركة
.
_4_
.
عندما تتذكر ان خامس يوم العيد هو عيد ميلادك .. وان عليك الذهاب الي الكلية لحضور بعض المحاضرات وشراء مع المذكرات .. وانك لازم تذاكر حتي في عيد ميلادك تبقي دي حالة رخامة
نصيحة تدعي علي امك وابوك انهم خلفوك في اليوم دا