Pages

Subscribe:

Tuesday, January 16, 2007

سفاح المعادي بين الحقيقة والخيال


سفاح المعادي .. بين الحقيقة والخيال
..
..
..
صحيت الصبح علي صوت امي وهي بتصحيني بالعافية
.
اصحي يا ادم
ليه يامه .. انا امتحاني الساعة واحده هتصحيني ليه دلوقتي
ياد اصحي عشان عايزاك
والله انا حاسس انه مقلب وهطلع حاجة هايفة
لا والله دا شيء مهم
ايه ياستي اديني قمت
مش توصل اختك المحطة ؟
نعم يا روح .... قصدي بتقولي ايه ما سمعتش ؟هي مش عارفه المحطة لا سمح الله
اصل والله امبارح قالولي حاجة خطيرة قالقاني والنبي يادام
ياعني امه لا الله الا الله اللي ماشية دلوقتي ورايحه الامتحان الراجل مش هينقي منهم غير بنتك ؟
معلشي يابني عشان خاطري
حاضر يامه انا عارف هي ليله مقندلة
.

واحنا في الشارع وبجر ناعم وقلبي بيقع في رجليا
سالت اختي
.

هي ايه الحاجة الخطيرة اللي سمعتها امك
بيقولوا ان السفاح قتل واحده علي كوبري المطبعة امبارح .. شق ضهرها بالسكينه
ياسلام
اه .. انا مش عارف هو كوبري المطبعه ولا الكوبري الحلزوني اللي عند جامع الفتح
اه ..وبعدين
لا .. هي ماما قلقانه وخلاص
طيب
مش امبارح العيال الصغيرين بتوع ابتدائي مشيوا ورا ( فلانه ) وجريوا وراها وقعدوا يقولوا السفاح اهوه هههههههه
ههههههههههه .. بجد مش معقول ؟ تلاقيهم افتكروها السفاح بس متنكر اكمنها منقبة ياعني
.

كملنا في طريقنا للمحطة
واحنا ماشيين
عدي من جنبنا موتوسيكل
لقيت اختي انفضت كدا واتخضت فسالتها فيه ايه

.
في ايه يا بنتي
اصلهم بيقولوا ان السفاح بيركب موتوسيكل .. انا لو كنت لوحدي والله كنت صرخت
هما مين اللي قالوا انه راكب موتوسيكل
الناس طبعا .. ايه الزكاوة دي
طب احترمي نفسك انا اخوكي الكبير
اه معلشي .. لا ماخذة
طب والناس بقي شافته علي كدا ؟
مش عارفه والله اهي الناس بتقول
طيب
.

وصلنا قرب المحطة كدا
فكنت بصراحه كسلان جدا وسقعان جدا
فكنت عايزها تمشي لوحدها تكمل دول خطوطين

.

بقولك ايه الناس اهيه امم كملي بقي
يادم انت اتجننت استني هتسيبني هنا ... لالالالا
طب طب خلاص .. اهوه يلا يا عبيطة يا خوافه
اه يا خويا خوافه بس اعيش
طب مع السلامه يا ستي
ايه مش هتدخلني المحطة
انتي شكلك بترسمي اني ادفعلك حق التذكرة صح
هههههه .. ياعني لو تحب
لا كفاية لحد هنا يلا حلي حلو في الامتحان بقي
.

الغريب في الامر بقي اني روحت امتحاني
وجيت ع الساعة خمسة كدالقيت اختي في البيت
طب ما هي جت م المدرسة لوحدها اهيه
ولا شافها سفاح ولا نيلة

19 comments:

Epitaph said...

هههههههههه

بعد الشر عنها
وحمد لله علي سلامتها
و ياتري هي عملت ايه في الامتحان؟
وانت عملت ايه في الامتحان؟
و السفاح عمل ايه في الامتحان؟

هههههههه


كانوا بيتكلموا في الموضوع ده في البيت بيتك
بس بيقولوا مش اشاعة
حكيككة واكعة
علي رأي ست المذيعة


الهم بس حرص و خد بالك من اختك
ماهو اشي توربيني
اشي سفاح
بالشفا
:)

Sampateek said...

ازيك يا ادم
ايه صحيح حكاية السفاح دي
معنديش تفاصيل
هو بيعمل حاجات اياه لكسكلياه يعني و لا قتل بس؟
متقلقش كلها يومين و يقبضوا على واد معتوه و يقولوا ده اللي عملها و الإمن مستتب


اتدارى بس انت الومين دول
ليلبسوهالك
هههههههههههه
سلامي
:)

mano said...

طبعا مامتك عندها حق تخاف على اختك
و للأسف الاشاعات ماليا الدنيا
و محدش عارف فين المعلومات الصحيحه
و فين الغلط
و المشكله ان المسؤولين مبيقولوش غير مفيش مشكله و كله تمام
ربنا يستر
تحياتى

طارق مكى said...

حمدالله على سلامتك اختك
وحمدالله على سلامت اخوتنا الى فى المعادى

بس انا سمعت حاجة غريبة
فى لواء طلع فى العاشرة مساء قال
ان مفيش سفاح بس بنحاول نقبض عليه
وهوة شاب متخلف عقلاين
وانا طلعت من الحلقة مش فاهم حاجة!!!!!

cat_eyes(همس الليل) said...

اول مره ادخل عندك بصراحه
بس طلعت دمك زى السكر والله
بعدين الحمد لله احنا من اسكندريه مش من مصر
معندناش الا سفاح كرموز اما الباقى دول تقليد متخفش يعنى

tamer said...

حكاية السفاح دى فعلاا حقيقية

انا قرات عنها وقتل حوالى 4 لحد الان دة اللى تنشر والباقى الله اعلم

والاسباب مازالت مجهولة لان جميع البنات اللى صابها بالسكين لايربط بينهم حاجة سوى انهم بنات

تحياتى

ادم المصري said...

ابيتاف
ـــــــــ
ازيك يا جميل
علي فكرة انا بشغل اغنية فيروز حبو بعضون كل شوية دي طلعت اغنية خرافة
واختي يا ستي ههههههه عالمة زي حلاتي كل ما اقول لها عملتي ايه
تقولي الحمد لله
وتضحك
فافهم علي طول انا طبعا
بالنسبة للسفاح بقي .. فانا واخد احطياطي تمام
هو بس يقولوا مين وانا اروح ابوسه في كل حته في وشه



السمباتيك
ـــــــ
ازيك ياختي حمد لله ع السلامة ليكي وحشة والله
انا قاعد في حته مكن اهه مستخبي
وربنا يستر لحين انا ف الشارع بكون زي العبيط
ياعني زبون وانفع تمام



مانو
ـــــــــ
هي دي مشكلتنا في مصر
للاسف مش عارفين امتي الحال هيتصلح
لو كان فيه معلومات اكيدة فعلا ماكنتش ظهرت الاشعات
ربنا يستر علي ولايانا



طارق مكي
ـــــــــ
ازيك يا استاذ طارق
انا ما عرفش انت منين عشان كدا مش عارف اسلم علي منطقتك
ههههههههه
لكن ملحوقه
اللواء دا ياسيدي من النوع اللي بتصدره الداخلية علشان تلوي الحقيقة
ويفضل المعني في بطن الشارع



عيون القطة الجميلة
ـــــــــــــــــ
اهلا اهلا بيكي يا جميل
طب والله كوس اننا اطمنا علي اهل اسكندرية
وسمعني يابني احلي سلام
ويا جملة يا اسكندرية
يا ححلوة يا مرية
احمدي ربونا بقي ان انتوا في اسكندرية والسفاحين الخيخة دول مش عندكوا
شوفتي يابنتي اخر زمن ؟
سفاح بيركب موتوسيكل
هههههههههههههه
سفحاين صناعة صيني صحيح



تامر
ــــــــ
العزيز والصديق تامر
اه فعلا يا سيدي هو اسمه هنا في المعادي
سفاح البنات
لكن بره المعادي اسمه سفاح المعادي متخصص البنات
ههههههههه
لكن ياريت بعد اذنك تقولي الكلام اتنشر فين علشان اقراه انا كمان




الي كل الناس واحشيني جدا وليكم مني احلي سلام
تحياتي

طارق مكى said...

اول حاجة احب اقوللهلك
شكرا جدا على الأهتمام بشخصى الضعيف

تانى حاجة انا من مصر ومن الحلمية الذتون

وتحياتى لجميع زوار مدونتك الغلين

الوردة السوداء said...

ههههههههههه
بقى كنت عايز تسيب اختك تكمل لوحدها
هى دى الرجالة
اه
على فكرة انا عندى امتحان بكرة؟؟
يعنى افتكر تيجى توصلنى

tota said...

العزيز ادم
قريت التدوينة السابقة لقيتها تهييس معرفتش اعلق بصراحة المود مكنش على قناه التهييس

بس السفاح للاسف واقع وغير معلوم عنه اى شىء والقلق كتير وطبعا انت مش قلقان لانه بيضرب البنات مش الولاد
بس اسمحلى انا عارفة انك مع نفسك لو تخيلت لحظة انه لمس طرف اختك هتتجنن وده اللى خلاك تضحى بنومك وراحتك مش بس علشان خاطر ماما طلبت كده لانك جواك القلق اللى خلاك تحس انك عايز تحمى اختك
برغم كلماتك بس متأكدة ان ده دار فى فكرك
هى رجعت لوحدها لانها لا تملك غير كده برغم رعبها
وربنا يحميها هى وغيرها من اصحاب الخلل النفسى
قريبا القبض على السفاح المختل بدون لقب مختل مش هينفع اصل اللقب ده تمنحه الداخلية حديثا لكل الذين يتم القبض عليهم من 2006 ومستمر معانا فى 2007
تحياتى

hend said...

المهم ان مامتك اطمنت عليها معاك والبنت حست بالامان

raspoutine said...

لا يا ادم الموضوع ده بجد وخلى بالك من اختك السفاح ده موجود انا من سكان المعادى والقصه حقيقيه مش هزار وربنا يسترها على اخواتنا كلنا يا رب



دى القيامه قامت يا جدعان والقطه كلت عيالها والحدايه مبتحدفش كتاكيت
انا كده دخلت فى موضوع تانى خالص
سلام بقى

المدونه بتاعتى باظت ودى الاسبير انا ايمن فاروق يا ادم

smraa alnil said...

هههههههههههههه
اشوعات اشوعات اشوعات
بيقولي في عصابات بتخطف في الستات اشوعاااات

بس لاسف هي مش اشاعات يا ادم
دي حقيقة واضحة
وخلي بالك من اختك
وبعدين انا ارضي ذمتك لما قلتلها احترمي نسك انا اخوكي الكبير
بذمتك قلتلك اه معلشي ولامؤاخذه

اطلع من دول يا ادم
عامة انا عارفة هي قلتلك ايه

المهم اخبارك ايه في الامتحانات

خلي بالك من اختك بجد يا ادم
مامتك مش في منها قلق هو بيدور علي الصغنتاتين
يعني الحق استخبي انت كمان هههههههه
سلاحف

Nouran said...

حرام عليك يا ادم دي فايدة ان يبقى لينا اخوات صبيان ههههههه
واحدة صحبتي كل يوم تقولي انا خايفة انزل لوحدي علشان السفاح بقولها ده ف المعادي يا حاجة بعيد عننا تقولي مهو ممكن يجي الهرم ههههههه
اصلا مكنتش اعرف الموضوع غير منها وقعدت اتريق عليها معرفش حكيكو واكعة زي ما ابي بتقول ولا ايه ؟؟

ادم المصري said...

طارق مكي
ــــــــ
ولا يهمك يا استاذي
وكل التحيات لقاطني حلمية الزيتون


الوردة السودا
ـــــــــ
ههههههه
انتي تامري يا جميل من عيوني
هي ديتها فركة كعب لحد عندك
اجي اوصلك وامشي
ابقي قولي عملتي ايه في الامتحان


توتا
ـــــــ
بالنسبة للتدوينه السابقة انا فعلا اعتذر بسببها لانها فعلا كانت تهييس
بالنسبة للسفاح بقي يا ستي .. انا طبعا ما اعرفشي ممكن اعمل ايه لو بس حد لمس طرف فستان اختي
وانتي عندك حق فعلا .. هو دا اللي خلاني اصحي من نومي بالعافية
تحياتي ليكي ولزيارتك



هند
ــــــــ
اه هي حست بالامان ..وانا حسيت بالبرد


ايمن فاروق
ـــــــــــ
معلشي يا عم تعيش وتاخد غيرها .. لا اراكم الله مكروها في بلوج لديكم ههههههه
ثم انت طلعت م الجيران ياعم ؟
اهلا بيك والله منور



سمرا النيل
ــــــــــــ
ياعني لازم احراج ياعني
ما هي عدت علي الناس كلها .. اشمعني انتي ايه ما بتفوتيش حاجة ابدا هههههههه
انا ياستي حلو في الامتحانات .. بس ربنا يستر
كل ما واحد يسالني بقوله انا اول واحد .. يقولي قول انشاء الله .. اقوله لا انا قصدي انا اول واحد خرجت م اللجنه هههههههههه
تحياتي



نوران
ــــــــ
بقي هي الحكاية كدا .. انتوا واخدينا مقاولة بقي .. انا لو كنت اعرف ان البنات هيعملوا فينا كدا .. كنت قولت لامي تغير رايها ههههههههه
وقولي لصاحبتك بقي ما تخافش ادم سهران ليل نهار يحمي المنطقة باللي فيها ههههههه





تحياتي للجميع

طارق مكى said...

اخر حاجة عن السفاح انو بطل يستعمل السكينة وبقا يستعمل مياة النار
وهو التجديد لزم برضو
الموضوع دة سمعتو من ناس سكنا فى المعدى

طارق مكى said...

اخر حاجة لسة سمعها ان السقاح يطل يضرب بلسكينا
وبقة يستخدم مياة نار
والتجديد مطلوب برضو

saso said...

امال محدش بيوديني في حتة لية اية الاخوات البايخة دي
كل اللي حصل ان الانتقالات بقت تاكسيات كلها ومحدش فكر في موضوع الفلوس دة خالص كلها حاجات ثانوية انت عارف المرتب وفوقة مية وخمسين جنية يتصرفوا تاكسيات وكماااااان اتفرج ع البيت بيتك
مش مصيبة واحدة تكفي
وصل اختك ولو في وقت تعالي وصلني بقي
:P

rokaaa said...

ورجعت نمت تاني ساعتها ولا رحت امتحانك على طول