Pages

Subscribe:

Wednesday, January 10, 2007

تهيييييييس

معقولة الدنيا هي اللي كدا ؟
ولا احنا اللي اصلا نستاهل كدا ؟
ان بصراحه مش متاكد من الحكاية دي
لكن لو جينا للحق
فاحنا من جوة
مش قد كدا
ياعني كل واحد فينا
فيه كدا وكدا وكدا
بس بالرغم من كل دا
احنا برده ما نستاهلش يحصل فينا كدا
ايه دا ظلم دا
ماهي ناس كتير عايشين كدا
اشمعني احنا اللي بنشتكي بقي
ولا عشان احنا عالم خيخية كدا
بصراحه انا لافاهم ولا عارف ولا داري باي شيء
.
.
.
.
انا عارف دوايا
انا ممكن اقول شعر ؟
ياعني هاكتب كتير المرة دي
اصلي بصراحه لما اكون مش عارف اعمل حاجة
باقول شعر
يؤسفني ... اني اقولكم شعر
حلوة يسفني دي
اه حلوة
اذن .. قشطة
.
.
.
احساس عقيم
احساس عقيم
احساس عقيم صاب البشر
احساس بخنقه بتخنقك
وتشل قلبك .. بين ضلوعك
تسجنك
وتسد جوعك بكام آهايه صغيره
وشندوتش من سد الحنك
احساس عقيم
احساس متخبي جوه جلد وشنا
جوه الجوانتي
في ساعه برد والشتا
عمال يقرص في الجتت
قال ياعني الجوع ما بيعضش جسمنا
لا في حتت ... ولا في حتت
.
.
مبروك .. غيرنا الدستور
مبروك ياخوانا الدستور
مبروك يا خوانا .. ودستور
يجعــل كلامنــــــــا خفيـــف
لا كلام بيلف
ولا بـيــــدور
ولا يتكلــــــم
ولا بيثــــــور
كــلام جامــد
كلام محصور
جوة قلوب ... ومقفولة
الناس عشقت الأولـــي
بعد ما فهمــت الفولـــه
بلا جزيرة بلا نيلة
تعالوا نغير السيرة
قوم يابا وطفــي النور
كفايانا كلام مأثـــــور
ويلا ننـام بلا رجعــــة
أمانيكـم أوام رجعــــة
وباين عليها مذهولــة
بعد ما شافت الصورة
وهزمها علــو الســور
مبروك يا خوانا الدستور
.
.
من ضمن الفنون
بـقــول الـرقـــص عـيــــــب
قـــالــــو لــي الـرقـص فــن
قـــولــــت لــهـــم فـــن إيــه
وده كــلـــه هــــز وســـــط
.
قــالــو لـــي الـهـــــــز برده
مــــن ضـمــــن الـفـنــون
إزاي تــعـــرف تــــهـــــــز
بـيــحـكــمــهـــا الـقـانــــون
إزاي تــعـــــرف تــلاغــي
وتــديـــــــــــر الـشـئـــــون
و إزاي تـبـقـــي صــايــــع
تــاكــــــــل الـزبــــــــــون
كــــــــــــل ده أســــــــاس
مـتـظـبــــــــط ... مـــــوزون
و مــا فـيــش مـكــان لــزيـك
يــغـيـّــر الـمـفــهــــــــــــــوم
.
أذهـلــنـــــي هــــذا الــحــــال
كــــلام عـبـيـــط مــجـنـــــون
ده بـــايــــنـــه واد مــحـتـــال
ســوابـــق ورد ســـجـــــــون
.
عـمـــال يــألـــــــف عـبــّــــر
كـــلام مـريـــــض وسـقـيــــم
و عــايــــزنــا نـكـــون بــقـــر
نســـمـــــع ونـقــول أمـيـــــن
.
لاه ... و ألــــــــــــــــــــف لا
و إنـشــالـــه تــبـقــي مـيــن
أنا هـرفـض أعـيـش في شـق
و مــعــايـــا الـبـنـــي أدمـيــن
.
ولازم تـعــــــــرف إنـــــــك
راجــل مــريـــض غـلـبـــــان
هــحـتــرمــــك لاجــل سـنـــك
اكـــمـــــن أنــــــا إنـســـــــان
.
لـكــن تــقــــــولـــــي رقـــص
و كــــلام مـا هـوش مـوزون
فانا هرفض أعيش في هجص
وهــارفــض ألـبــس قـــــرون
.
.
.
اي خناقة .. انا دلوقتي ممكن اكون الي حد ما
نوعا ياعني
حبة كدا متظبط
معلشي
حاول يابني تاخد مضاد حيوي علشان البرد ما يبوظشي دماغك
حاضر
علي فكرة ؟
ايه ؟
وتحت فكرة ؟
الله ؟
وجنب فكرة و وراها
انت بتهيس بقي
اه .. اشمعني انت
طب انصحك انا كمان تاخد مضاد حيوي
حاضر

21 comments:

aMiR-El ZaLaM said...

ياسلامـ عليك وإنت مهيس

البرد شكله عامل شغل ف دماغك

بطل يابنى كلام ف السياسه :D

هنتشد :d

Dr. Tantawy said...

ايه يا عم دكتور احه دي :)) هوه ده تأثير امتحانات ولا ده الطبيعي

انا اعرف ان الطب بلوى بس مش للدرجه دي هههههه

عموما ربنا ينتعك بالسلامه و تعدي على كل خيييير

تحياتي

أنـــا حـــــــــرة said...

تهييسك حلو اوى
اكتر نص عجبنى الأولانى
بس خلى بدل شندويتش ساندويتش
احسن الكلمة دى بتعصبنى
:)

لو عايز حاجة للبرد اقولك
امال انا بتدرب فى صيدلية ع الفاضى

ادم المصري said...

امير الظلام
ــــــــــ
هي السياسة تحلي الا وانت مهييس


د. طنطاوي
ـــــــــــ
ربنا ينتعني ؟
ماشي ياعم
بس الدكتوراه بتاعت احه مالهاش علاقة بالطب ازيك بقي
دي تاثير ضغوط الحياة سيادتك
الهي ما يجرالك اللي جرالي




انا حرة
ــــــــــ
ياريت يابنتي وحياتك تقولي حاجة للبرد لحسن انا خلاص استويييييييت
ومن عيوني هابقي اغير الكلمة




تحياتي للجميع

tamer said...

ماشى يا عم ادام هيس ياريس

وبراحتك خالص

اهم حاجة يكون عندك امل فى بكرة وان فية تهيسة جديدة

ومش عايز اشوف عندك بوست زى اللى فات انت حر

هيس تكسب

تيأس تخسر

ماشى ياصاحبى

ادم المصري said...

تامر

حاضر ياصاحبي

ياجميل جدا

moorgen said...

اااااااادم
:):)
احنا وصلنا لهز الوسط
ماكنتش اعرف البرد والسخونيه يعملوا كدا
وهو سد الحنك بيتعمل سندوتش فى الحاله دى انت ادرى
وليس على المريض حرج

شربات said...

الفن احترام

الفنان المحترم هو اللى يقدم فن محترم يفيد الناس

يقدم ويكشف المشاكل والثغرات الموجودة فى اى مجتمع وممكن يقدم حلول

او يعرض ويبحث ونبحث معاة عن الحل

بوست لذيذ

Ma-3lina said...

loooool

بتاعة التهييس دى جامدة اوى

بس ايه الاسهال الفكرى ده

كل ده مرة واحدة

ادم المصري said...

مورجن
ـــــــ
هههههههههه
اه ياستي سدالحنك بيتعمل ساندويتش
ايه رايك بقي
ايه اعملي قي انك ماكلتيهوش قبل كدا ههههههههههه


شربات
ــــــــ
احنا كدا ممكن نختلف علي تعريف الفن
الفن اصلا له بعدد الناس تعريف
انا شخصيا احب الفن للامتاع
واكيد الامتعا علي مستوي درجاته
ياعني فيه امتاع فكر وحسي وسمعي واحيانا لبعض المريدين امتاع جنسي
كل حسب هواه
اما اللي يقدم ويكشف المشاكل والثغرات الموجودة فى اى مجتمع وممكن يقدم حلول
او يعرض ويبحث ونبحث معاة عن الحل
انا شايف ان دي مهمة ظابط البلويس او الاحصائي الاجتماعي


ماعليها
ـــــــــ
هو انتي مش دكتورة ... ادينا ياستي وصفة للاسهال دا
لاجل ما نرحكم برده هههههههههههه

الوردة السوداء said...

لا حول ولا قوة الا بالله
معلش
امشى ياحفريت
هو هيبقى كويس دلوقتى

بس هو عامة اكتر حاجة عجبتنى بداية البوست

Epitaph said...

ههههه يا شديد انت

عجبتني بتاعة الدستور

حابس حابس
اشتاتا اشتووووت
ههههههههههه
( مش بتتقال كدة برضه هههههه

بس ايه شندوتش سد الحنك دي

مفيش شندوتش هبورجر و بنطلون استريتش
) جاءنا البيان التالي هههههه

ادم المصري said...

الورده السودا
ــــــــــ
اه والنبي قولي للحفريت يمشي بقي لحسن انا خايف
هههههههههه
وبداية البوست بتقولك ميرسي
هههههههههههههه



ابيتاف
ــــــــ
اهلا اهلا يا جميلة الجميلات ابيتاف
والله انا كل يوم عندك بس انتي اللي بوستك بايت
هههههههههه
انا مستعد اجيلك واجيبلك معايا الهمبورجر والاستريتش .... قاله صحيح ؟
تحبي الاستريتش بالشطة ولا من غير شطة ؟
ههههههههههههه






تحياتي

Memo said...

ايه البوست الرائع دة و الكلام الجميل ده
رائع رائع رائع رائع رائعععععععععع استمر
و الف سلامه

ادم المصري said...

شكرا جدا جداجدا جدايا ميمو

ادم المصري said...

):

smraa alnil said...

صباحك تهييس يا ريس
هي الامتحانات بتعمل كدة
شدة وتزول يابا
بس انت جامد والله
مش هقولك اكتر من كدة
سي يو مااااااان

ادم المصري said...

سمرا النيل
ـــــــــــ
والله يابنتي انتي كلامك عامل زي السحر
روحي ياشيخي
وتعالي بسرعه

ذو النون المصري said...

بصراحه انا قرات لكن مش فاهم قصدك ايه مما كتبت
يعني !!!!!!!!!!!ممممممممم كل واحد له اتجاه معين فيما يقرا و لم اتوافق معك لكن رايت ان هناك لك اصدقاء معجبين عموما بالتوفيق و الي الامام
انا علقت لاني كل ما ازور اي مدون امدح قلت اكون حيادي المره دي
لك تحياتي

ذو النون المصري said...

علي فكره انا نزلت للارشيف و عجبني جدا الكاريكاتيرات الموجوده تحت بتاع احه
خلاص ياسيدي كده انا عجبني بوست عندك قصاد بوست متجاوبتش معاه لو مش مشغول كنت قضيت وقت اطول هنا اتابع فيه القديم عندك لكن مره نانيه
سلامي لك و لجميع الزملاء
حلوه
ارفض
حدوث
هذا
دي فكرتك انت؟

ادم المصري said...

ذو النون المصري
ـــــــــــــــــــ
اولا شكرا هنا لتشريفك الجميل واسلوك الراقي جدا حتي في الموضوع اللي معجبكشي
اما بالنسبة لموضوع احه فانا مقدرشي ابدا اجزن ان كلمة ارفض حدوث هذا تاليفي انا

لكن الدكتوراه هي اللي تاليفي ممكن تقراها

شرفي جدا وجودك واوعدك اني انا بقي ياسيدي اللي هرالك ارشيفك كله

تحياتي