Pages

Subscribe:

Thursday, August 30, 2007

معسكر القادة المتميزين وجمال مبارك

اهلا اصدقائي وصدقاتي المدونين والمدونات

البنين منكم والبنات

اما بعد


طبعا انتوا عارفين اني كنت في الاسكندرية

عشان لقاء الريس



طبعا انتوا عارفين دلوقتي ان فيه اوشاعه كبيرة جدا

ماليه البلد وهي ان الريس

بعافية حبتين

وطبعا كان وجود الريس في المعسكر دا

هينفي اي اوشاعه م الاساس

ولكن




اللي حصل ان جيمي هو اللي جه ومش الريس

ولكن




في الجرايد بتاعت ذات نفس اليوم

بتقول ان الريس كان مجتمع مع شوية قاده عرب

والله اعلم





المهم بدل ما ابدا معاكم من الاخر

تعالوا نبتدي الحكاية من الاول




صلوا ع النبي

في البداية .. اتصلت بيا مشرفة الجامعه عشان اطلع لقاء الريس .. للعلم اللي يطلع لقاء الريس هي الناس المتميزين فقط الي طلعوا معهد اعداد القاده اللي في حلوان.. وبما اني ما روحتش اعداد القاده .. فانا طلعت لقاء الريس كوسة


يوم السبت والحد والاتنين كنا بناخد فترات ما قبل الغدا في ورش عمل وحلقات نقاش في مواضيع سياسية مختلفة .. هما فقط محددين راس الموضوع ياعني العنوان ... وبعد كدا احنا بنتاقش ونتحاور ونسجل الحوار ونسلمه لادارة المعسكر اخر الندوة

.


طبعا مش عايز امدح في نفسي

لاني رجل افعال لا اقوال





اختاروا من كل جامعة عشرة .... هما اللي هيقابلو الشخصية المهمة اللي جاية .... كان فيه تعتيم تام علي اسم الشخصية دي .... احنا ماعرفناش ان اللي جاي هو جمال مبارك الا قبل القاء بيوم ... طبعا بالليل كنا بنقضيها ندوات مع شخصيات سياسية


ياعني مرة استاذ اقتصاد وعلوم سياسية معرفشي من جاعة ايه

ومرة عادل لبيب محافظ الاسكندرية

ومرة هاني هلال وزير التعليم العالي


نيجي بقي ليوم اللقاء 00 من العشرة اللي اختاروهم من كل جامعه... خدوا تمانية ، ياعني المجموع في الاخر وصل لحوالي ميه وعشرين طالب من اصل الف وخمسميت طالب حاضرين المعسكر ... اختيار الطلبة كان مسؤلية مشرف الجامعه علي اساس القدرة علي الحوار والنقاش ودا اللي كان ظاهر واحنا بنعمل ورش العمل



الميه وعشرين طالب قسموهم نصين ستين طالب كانوا قاعدين علي المنصة ورا جمال مبارك للي فيكم شاف اللقاء وكان مهمتهم هي القاء الاسئلة علي سمع سيادة ابن السيد الرئيس ( طويل العمر يطول عمره ) والستين التانين اللي انا كنت منهم قاعدين مخفيين ورا لحد ما الندوة خلصت اربع سعات ندوة مع السيد جيمي طبعا انا كنت بنام واصحي وانام واصحي .... فما حدش يتوقع مني اني اقول لكم ايه اللي حصل في الندوة



المهم بعد ما خلصت الندوة خدوا الستين المخفيين اللي انا كنت منهم ونزلنا من ورا علشان نتغدي مع سيادة ابن السيد الرئيس ( طويل العمر يطول عمره ) ومش عايز يا جماعه اقولكم علي اللي حصل ... كافة انواع الاكل واللحوم اللي ما اعرفشي اسمها واللي اعرف طبعا الاكل كان اوبن بوفيه والعصائر كلها فريش بالاضافة الي الاحجة الساقعه واللي عايز شي او نسكافيه برده كان موجود

بس طبعا مش دا المهم .... المهم انك واقف بتاكل مع اهم شخصيات في البلد
جمال مبارك
رشيد محمد رشيد وزير الصناعه
وهاني هلال وزير التعليم العالي
محمد هيبه امين شباب الحزب الوطني
د محمد كمال مش عارف بتاع ايه
د عبد الحي عبيد رئيس جامعتنا سابقا (حلوان ) ورئيس معهد اعداد القاده حاليا
غير طبعا اهم ناس وهما الحرس الشخصي لسيادة ابن السيد الرئيس ( طويل العمر يطول عمره )

كان محشور في حلقي سؤال
روحت بصراحه رابط النية وشادد العزم وتوجهت الي سياده ابن الرئيس (طويل العمر00 الخ ) وقولت له




انا قولت :لوسمحت يا استاذ جمال ... ع النت مؤخرا فيه مدونة ظهرت كان اسمها الوريث صاحبها كان بيمضي باسم حضرتك وكان بيكتب بلسان حضرتك

قالي : دا مزور بقي

قولت له: والله الشباب محتارين ... سيادتك فعلا ناوي تنزل لمستوي الشباب وتاطبهم بلغتهم وتكسبهم في صفك ولا دا كان واحد بيحاول انه يبحث عن الشهرة

قالي : اظن انت دلوقتي عرفت هتقولهم ايه ؟

قولت له : اه طبعا خلاص بس هل حضرتك عندك وسائل الخاصة في التقرب للشباب ومخاطبتهم غير الندوات والمعسكرات دي طبعا واللي هي بالتاكيد قاصرة علي فئة معينه من شباب الجامعة اللي هما بالطبع مش بيمثوا كل شباب المجمتع ؟

قالي : والله انا كل اخباري موجوده علي موقع الحزب ... لكن انا مش هاعمل حاجة اتكلم فيها بشخصي وعن شخصي ... لازم يكون الحديث من خلال قناة حزبية

طبعا وهنا الكلام وقف باوامر من ناس كتيرة عشان ناس كتيرة تانية تعرف تتكلم

المهم بقي انا وقفت مع المذيع عبد اللطيف المناوي .. والدكتور محمد كمال .. وكنت باسالهم عن بعض المواد اللي اتغيرت في الدستور وفجاه كل الناس المهمين دول اختفوا فجاة

وفضلت علي الترابيزة اللي كنت واقف عليها انا عبد اللطيف المناوي ود محمد كمال
نــــــضـــــــارة شـــــــــمـــــــــــــس


في احقة القادمة انشاء الله ... هابقي احكي لكم ... النضارة دي بتاعت مين

Saturday, August 25, 2007

وصلت

الحمد لله وصلنا
اه وصلنا اسكندرية
ايوة احنا المفروض نكون رايحين بورسعيد
واتاريه كان تمويييييييييييييييييييييييه
عشان الريس هيقابلنا هناك
علاي العموم الي كل البورسعيدية
لو حسيتو ان الشمس ماطلعتشي يوم
لو حسيتوا ان فيه برق ورعد
فدا عشان الدنيا زعلانه اني ماجيتشي بور سعيد
علي العموم
اسكندرية برده عروس البحر الابيض
وسنبقي نوافيكم بالاخبار ف حال حدوث ما هو جديد

Friday, August 24, 2007

اني قاااااااااااادم
اني قااااااااااااادم
من ارض المحروسة
من تحت التراب
قادم يا بور سعيييييييييييييييييييييييييييييييد

Thursday, August 16, 2007

في العتمة

في العتمة هنور شعر
.
.
بلوج جماعي
في مرحلة الانشاء
ندعوكم للمشاركة
.
.

Wednesday, August 08, 2007

سعات

سعات احس ان الحياة
.
متفصلة ليا
.
وسعات احس ان القدر
.
دايما يعاند فيا
.
وسعات احس بخوف
ورعب وقلق
.
وسعات احس بفرحه
.
وسعات احس بزهق
.
وسعات اموت
.
وسعات باعيش
.
وسعات احس اني ما يهمنيش
.
وسعات احس اني ما بنتهيش
.
وسعات باكون
.
وسعات ما كنش
.
وسعات باطير
.
وسعات ما طيرش
.
وسعات باحش
.
ف قلبي حش
.
وسعات بارمي في قلبي قش
.
وسعات ابني في قلبي عش
.
وسعات اخرج م الدنيا ديا
.
وسعات كتيرة بارجع
واخش
.
وسعات تعدي وسعات تفوت
.
وحياتنا سكة
طوييييييييلة دايما
اخرها موت
.
ناس تموتها وهي عايشة
.
وناس تعيشها ف عز موت
.
وناس لا من دا ولا حتي من دا
ف غاية الغرابة
و عايشة ف سكوت