Pages

Subscribe:

Thursday, December 29, 2005

وطي راسك يا ابن الكلب ... انت في عهد الاستعمار



صحيح أنا من ساعة أول يوم في الثورة بنت الاحبه دي وأنا ماسمعتش انه عدي علينا يوم حلو ... زى ما تقول كده مصر خلصت من احتلال الإنجليز علشان ربنا يبتليها باحتلال المصريين

من يوم ما ربنا خلق مصر دي واحنا كشعب ما كانش لينا أي راي في اللي يحمكنا ...... الفرعون كان أله ابن اله ...... دخل الهكسوس مصر واستعبدوا أهلها
خَلصّنا عم أحمس منهم علي خير ...... واستعبدنا هو

جات الإغريق هنا ....... ما عرفش أحمس وولاده يعملوا حاجه ........ لحد ما جه الرومان وطلعوا دين ابونا في البلد الكفرانة دي

جالنا عمرو بن العاص وقلنا اهو احسن م اللي قبله ......... وتوالت الخلافات ...... الأموية ع العباسية ع الفاطمية ع الأيوبية ع المماليك
ع الطولونية أهي من ضمن المماليك برده ... ع حبه فرنسويين ع شويه عثمانيين علي إنجليز علي أسرة محمد علي ... علي ثورة يوليو

بصراحة البلد دي تعبت قوي وطلع ميتين أبوها
كفاية عليها كده سبوها تستريح بقي
والله حرام حرام حراااااااااام
الشاعر الكبير امل دنقل من حوالي اكتر من تلاتين سنه قالنا كل الكلام اللي بيحصل ده ...... ولا واحد فينا سمع هو بيقول ايه .... اسمعوا انتو كده

أمل دنقل في قصيده بعنوان : تعليق علي ما حدث في مخيم الوحدات

(1)

قلت لكم مرارا
أن الطوابير التي تمر
في استعراض عيد الفطر والجلاء
( فتهتف النساء في النوافذ انبهارا )
لا تصنع انتصارا
إن المدافع التي تصطف علي الحدود
لا تطلق النار ... إلا حين تستدير إلي الوراء
إن الرصاصة التي ندفع فيها ....... ثمن كسرة والدواء :
لا تقتل الأعداء
لكنها تقتلنا .. إذا رفعنا صوتنا جهارا
تقتلنا .. وتقتل الصغارا !
(2)

قلت لكم في السنة البعيدة
عن خطر الجندي
عن قلبه الأعمى ، وعن همته القعيدة
يحرس من يمنحه راتبه الشهري
وزيه الرسمي
ليرهب الخصوم بالجعجعة الجوفاء
والقعقعة الشديدة
لكنه إن يحن الموت
فداء الوطن المقهور والعقيدة :
فر من الميدان
وحاصر السلطان
واغتصب الكرسي
وأعلن (( الثورة )) في المذياع والجريدة

(3)

قلت لكم كثيرا
إن كان لابد من هذه الذرية اللعينة
فليسكنوا الخنادق الحصينه
( متخذين من مخافر الحدود .. دورا )
لو دخل الواحد منهم هذه المدينة :

يدخلها .. حسيرا
يلقي سلاحه علي أبوابها الأمينة
لأنه لا يستقيم مرح الطفل
وحكمه الأب الرزينة
مع المسدس الملي من حزام الخصر
في السوق
وفي مجالس الشورى
قلت لكم ...
لكنكم .. لم تسمعوا هذا العبث
ففاضت النار علي المخيمات
وفاضت ... الجثث !!
وفاضات الخوذات ... والمدرعات
كتبت في سبتمبر 1970

Wednesday, December 28, 2005

لقد فازت مصر



" لقد فازت مصر
اليوم هو يوم عيد كل المصريين . افرحوا وهيصوا لقد فازت مصر "
كلمه سمعتها وانا قاعد باستمع للراديو مش فاكر بصراحه امتي .. قعدت بصراحه اخمن ... لكن غلب حماري

الكورة صعب ... ده احنا حمير كورة ××
كارتيه .... ده الشعب بتاعنا غلبان ... لو نفخت فيه يطير ××
شطرنج .... بس ده بتاع الناس اللي بتفهم ××
التنس ........ بس دي رياضه فيها رفاهيه كده والشعب بتاعنا مطحون ××
حاولت استبعد فكرة الرياضه خالص واشوف مجال تاني ممكن مصر تكسب فيه

قولت يبقي اكيد عملوا مسابقه احسن فيلم ××

لكن انتابتني موجه من الاسي ... لان كل افلامان هابطه .... ومستهيئلي ان في عام 2005 لم نقم بعمل فيلم واحد عليه القيمه

استبعدت هذا المجال ايضا ... وقلت اكيد يبقي الغنا ××

ولكن موجه الاسي ذادت وصاحبتها موجه من الاحباط ...... فكل اغانينا طخ ودش مفهاش كلمه عدله ولا لحن عدل كل اللي فيها مزز وبس

ولكن نطت في راسي فكرة ممكن تكون بجد هي الفكرة البريمو ... وهي ليه ما تكنش مصر فازت في مسابقه اكثر البلاد احتواء للمزز
وعندها اصابتني نشوة فرح زي ما تقول غرقان واتعلق بقشايه ... وقربت ودني من الراديوا يمكن اسمع أي حاجه
ولكن فاقت الحقيقه كل التوقعات

"بالفعل لقد فازت مصر " _
ده الراديو بيقول لانه كان واثق اني مش هصدق

"ولكنها لم تفز في مسابقات رياضيه .... أو حتى مسابقات فنيه كالتمثيل أو الغناء "

وانا عمال اقول ياعم خلص قول فازت بايه

راح مكمل
" بالفعل ايها المصرين فازت مصر لم تفز من النوع التافه وانما مسابقات خطيرة " _
ابن الرخمه ده مش عايز ينطق المهم كمل الراجل حديثه في الراديوا وقال
" ايوه فازت في مسابقات لم يعرف لها التاريخ مثيل " _

بصراحه شوقني اعرف ايه المسابقات .... راجل ابن رخمه عمال ينقطني بالكلام .... المهم فضل يرغي تاني ويقول

" انه عيد لكل المصريين .. لقد فازت مصر في مسابقه اكثر البلاد استخداما للعنف " _

صدمت طبعا .. خدت الكلمه من هنا وكأنها مدفع وضرب في وداني .. ده بدل من خيارات السلام اللي صدعت دماغنا ليل نهار
ثم اخد الراجل مرة اخري في عد المسابقات

" فازت ايضا في مسابقه احسن دوله تعمل تعتيم سياسي " _

وانا بضرب كف علي كف مش مصدق لقيته بيقول تاني

" لقد فازت مصر ايضا في مسابقات كبح جماح المعارضه واخراس أي صوت يتكلم بلسان الشعب " _

طبعا ما هو بلا دمقراطيه بلا نيله وخلي شجاعه ايمن نور تنفعه

" لقد فازت مصر ايضا في مسايقه احسن نظام حكم فاشل " _

قال فكر جديد قال

" لقد فازت مصر ايضا في تصفيات الدول التي استطاعت اصابه شعبها بالملل " _

سلملي عل جمعيه جيل لمستقبل ..... ثم اخذ الحديث في الراديوا بشكل هذلي يتداول الموقف

لقد فازت ايضا مصر في مسابقة اجريت اخيرا علي اختيار اكثر الدول معاناة من البطاله .... لدرجه ان موسوعه جينيز العالميه طلبت ان تدرج اسم مصر ضمن اكثر دول العالم التي يعاني شبابها البطاله
لقد فازت مصر في مسابقه ... افشل اداره لكل مؤسسسات الدوله
ايضا لقد فازت مصر في مسابقه الاهمال الكبري ... والتي كان ترتيب مصر فيها الاول بين اقرانها من الدول التي تتفشي فيها اهمال وسائل المواصلات

ثم اخذ المذيع يضيف كلاما من عنده وانا كلي زهول واستغراب

" طبعا هذا يدعو لان يعتز كل مصري بنفسه ... فها هي مصر تحقق المراكز الولي في كل المسابقات ... اخيرا بقي ترتيبنا الاول
مش مهم في ايه المهم ان احنا كسبنا هيه هيه ... فالتحيا مصر فاتحيا مصر
والان مع تقرير مراسلتنا ام المريله الكحلي لمعرفه حال الشارع المصري ... الي هناك

ام المريله كحلي : اهلا كل المصريين ... اليوم هو حدث غير عادي فقد طاعتنا الصحف الاجنبيه بالخبر ...ولم نستطيع ان نتمالك انفسنا من الفرحه ولذلك قررنا النزول الي الشارع المصري لمعرفه الحاله هناك

وبسؤال احد المواطنين
ايه رايك في النتيجه التي حصلت عليها مصر في مسابقات عام 2005 ؟ فأجاب راسما علي
وجهه ضحه غامرة وكان وشه هيتقطع من كتر الفرحه
انا رايي مش مهم المهم راي الكبار و الحمد لله برده لان مصر كسبت ... المهم انها كسبت في ايه مش مهم

و ظلت تعلوا الهتافات
" المصريين اهما حيويه وعزم وهمه "

ونظمت بعض الجمعيات الخيريه بعض مظاهرات تأيد واحتفال بالنصر العظيم الذي حققه ابطال مصر
والذين ساعدوا علي رفع اسم مصر عاليا وقال احد المواطنين
والله أنا مش عارف اوصف فرحتي دولقتي .. أنا كنت فاكر ان العيب فينا من ساعه ما خدنا صفر المونديال لكن الحمد لله المصريين بخير والحمد لله ....... وديما رافعين راسنا يا راب

وقال أخر
والله كمان كان ممكن ناخد مراكز في مسابقات كتير بس مش عارف ليه ما اشتركناش بكل قوتنا الفاسده في مثل هذه المسابقات الرائعه المخلده لمصر والمصرين

وبسؤاله عن مثل هذه المسابقات اجاب

والله كان ممكن مثلا نخش مسابقات اكتربلد تحتوي علي عشواقيات بعد عام 2005 _
أو حتى مسابقه اكترالبلاد التي تحتوي علي القري التي لم يصل لها الماء ولا الكهرباء بعد مضي عام 2005
أو حتى اكثر الدول التي تحوي اكبر مؤسسه تعليميه فاشله وهكذا ... اظن انه لو كانت مصر تنبهت الي تلك المجالات لكانت حصدت مراكز اكثر

وبالنظر الي كلام هذا المواطن نجد ان كلامه في الصميم جدا
ومعقول جدا ... ومن موقعي هذا ادعوا كل المسئولين بالاخد بهذه النصيحه وعدم تفويت الفرصه علي المصريين
في حصد مراكز اكثر
ومن هنا ينتهي تقريرنا الاخباري عن حال الشارع المصري وموجه الفرح العارم التي اجتاحت جميع طوائف الشعب المصري

من امام احدي الخرابات في احدي المستنقعات بمصرنا المحروسه ***
ام المريله .. ياااااه نسيت لونها م الفرحه ***
قناة الحقيقه للاخبار ***
القاهرة ***
مصر ***

بصراحه أنا مكنتش مصدق نفسي هو أنا مجنون ولا الناس اتجننت ..... وبعد كده رجع الراجل بتاع اراديوا تاني

" وقد صرح مصدر مسؤل امس باحدي سفارات الدول العالميه المتخصصه في عالم المسابقات ...... ان مصر أدت أداء جيدا للغايه .. في مسابقات
اهدار المال العام **

والاضرار بصحه الشعب **

والسماح للفيروسات الضار ة بالقضاء علي نسبه كبيرة **
من الناس بالاضافه الي قيام المستشفيات العامه بالقضاء علي الباقي
وكذلك في اهدار حقوق الانسان **

وعمليات التعذيب داخل السجون **
ولكن للاسف جاء رتيبها الثالث فقط

ووصف احد المسئولين الخبر بانه ظالم وطمئن سيادته المصريين بان مصر تستحق المركز الاول بجدارة وعندنا الدليل والبراهين التي تؤكد احقيه مصر في المركز الاول
بدايه بقضيه الاسمده المسرطنه بتاعت يوسف ×××
والي طبعا دي مسمعه في كل دول العالم وتجاهل مثل هذه القضيه يعد تشويه لسمعة النظام

وكذلك السماح للطيور المهاجرة الحامله لفيروز انفلونزا الطيور ×××
بالخدول الي البلاد بالاضافه الي سن القوانين التي تيسر علي الصيادين صيدها

وكذلك تهريب الاطنان من اللحوم مجهوله المصدر داخل البلاد ×××
بالاضافه الي عدد كبير ممن لم يموتوا بكل ذلك مات اثناء دخوله المستشفي

وبالنسبه لاهدار المال العام _
أكد سياده المسؤل الكبير علي ان مصر من اكبر الدول التي يتم فيها تهريب المليارات سنويا عن طريق رجال الاعمال اصحاب الضمائر الخربانه
و لدي الحكومه بيانا كاملا بكل المبالغ التي تم سرقتها من البلاد ......مرفق معه اسماء الذين قاموا بالسرقه بعناوينهم ونمر تليفوناتهم في البلاد التي سافروا اليها بعد اتمام عمليه السرقه ولمزيد من التأكد يمكن سؤالهم

اما بالنسبه لاهدار حقوق الانسان فحدث ولا حرج .حيث قال سيادته
ان ففي مصر وحدها يوجد ما يزيد عن حاجه العالم من السجون _
والتي تمتلئ عن اخرها بالمعتقلين من كافه الانواع والتي يمارس فيها جميع انواع التعذيب التي يعرفها العالم

وقد قام احد الضباط العام الماضي بتوثيق خمس طرق تعذيب جديده في الشهر العقاري ابتكزهم هو وبعض
من اقرانه الضباط ... مما يدل علي كبر النشاط الفاسد داخل السجون

وجاء علي لسانه ايضا مطمئنا كل المصريين

"ولن نسكت علي هذا بل سوف نتقدم بشكوي الي المجلس الاعلي لمسابقات العالم الثالث _
.... ونتظلم من هذا المركز المتدني ان مصر لا تستحق هذا المركز المتأخر"

بصراحه بعد كل هذا الكلام لم استطيع سوي ان اقوم من جانب الراديو .... وجيب حتتين جاتوه .. وازازة بيبسي واحتفل أنا وزمايل علي هذا الانتصار العظيم

Saturday, December 24, 2005

بصراحه ..كنت غيران من ام الفيونكات الحمرا

الصراحة .. زى ما بيقولوا .. راحة
وأنا بصراحة لما قريت البلوج بتاع البت دي اللي اسمها أم الفيونكات الحمرا ... واستفزني حلاوة وجمال وروعه الأسلوب
بصراحة أنا غيرت ... وقولت الله هو يا عني أنا ما اقدرش اكتب زيها وأحسن منها كمان

وقولت انهارده أنا لازم اكتب

وفتحت الكومبيوتر
واستنيت
لحد ما حمل الويندوز وفتح
فضلت قاعد مستني شويه لحد ما الجهاز ياخد نفسه
اصل أنا جهازي خنيق .. المهم
الجهاز خد نفسه واستريح ..... بعد المجهوووووود اللي بذله وهو بيفتح
فتحت ماي كومبيوتر
فتحت البارتشن بتاعي
فتحت الفولدر اللي باكتب فيه اشعاري
فتحت القالب اللي أنا عامله لكل القصايد
وقلت اما اكتب بقي
ولكن هبطت علي الصاعقه من السماء
مش عارف اكتب ايه
يا انهار ابيض ؟! .. يا ابني اعمل حاجه
البت اللي اسمها ايه دي أم الفيونكات الحمرا هتفرح فيك ياد يا ادم اعمل حاجه ...! يا ابني اعمل حاجه
ولا حاة لمن تنادي
وقفلت الجهاز .. وانا اجر اذيال الخيبه وراء ظهري .... واقول ان اكيد ام الفيونكات الحمرا عملالي عمل علشان ما اعرفش اكتب
ماهو مش معقول انا اللي ما عنديش كلام اقوله
المهم قفلت الجهاز وانااجز علي اسناني غيظا من هذه الام .. ام الفيونكات الحمرا طبعا

Thursday, November 17, 2005

يا تري ربنا بيحب مين ...... حد يعرف

هنقول مثلا .. إن ربنا خلق الناس ... طبعا علشان يعبدوه .. علشان كده
ربنا خلق لهم ناس تانيه ... هو علمهم ... يعلموا الناس ... إزاي يعبدوه .. وطبعا الناس دي .. هي الرسل ولانبيا .. ولا حد عنده اعتراض ؟؟!! طب حلو .. نكمل بقي
اولا .. في البداية
ربنا حب شويه ناس معينين يعبدوه بطريقة معينه .. فأرسل ليهم واحد معين يعلمهم الطريقة دي .. الراجل ده كان اسمه موسي عليه السلام واتسمت الطريقة بتاعت باليهودية .. علشان تبقي يهودي لازم تتبع طريقة موسي فس عبادة ربنا
ثانيا .. لسبب احنا ما نعرفوش
ربنا حب ناس تانيه ... تعبدوه بطريقة تانيه .... علشان كده بعت لهم واحد تاني .. يعلمهم الطريقة الجديدة .. النبي ده كان اسمه عيسى عليه السلام والطريق بتاعته اسمها المسيحية
ثالثا .. ولسبب تاني إحنا برده ما نعرفوش
ربنا حب الناس كلها تعبده بطريقة واحدة .. فأرس للناس كلها نبي تاني .. يعلم الناس كلها الطريقة الجديدة اللي ربنا عايزها .. واانبي ده كان اسمه محمد علية الصلاة والسلام .. واطريقة بتاعته اسمها الاسلام
خد بالك
ربنا عرفنا .. إنه عايز الناس كلها تعبدوا بالطريقة دي .. حتي أصحاب الطرق الاخري .. واعتمد علينا إحنا .. في توصيل الطريق الاخيرة دي لكل الناس
لانه خلاص مش هيبعت انبيا تاني .. وعايز يشوف مين يقدر يحافظ علي وعده مع ربنا
فرضا
إننا ما قدرناش نقنع أصحاب الطرق الاري بالطريق بتاعتنا .. في عبادة ربنا هل معـني ده
إننا نكرهم .. 1
إننا نعاديهم ..2
إننا نبعد عنهم خالص ..3
خد بالك
إن الطرق التلاته مستخدمه في عباده ربنا ... وربنا هو اللي قال للناس عليهم .. وهو اللي طلب من الناس يعبدوه بيها
لكن الناس بدل ما تتحزب لربنا .... تحزبت لكل صاحب طريقة المسلمين لمحمد .. والمسيحيين لعيسى .. واليهود لموسى
وكلهم نسيوا ... الناس التانيه .. اللي ما بتعبدش ربنا خالص .. ولا تعرف إن للكون ده إله لازم نعبده إسمه ربنا وبقي همّ كل واحد من التلاته إن مين هيفرض طريقته علي التاني وما فيش حد فيهم تنبه ... إن التلاته بيعبدوا ربنا
وإن واجبهم .. يقولوا للناس اللي ما تعرفش ربنا ... إن فيه إله إسمه ربنا .. لازم نعبده .. بطريقة محمد .. بطريقة موسي .. بطريقة عيسى إختار ياعم الطريقة اللي تعجبك .. المهم إنك تعبد ربنا
اختار الطريقة اللي أنت شايف إنها صادقة .... واللي اهلها صادقين .... وبيحبوا بعض ..... وبيحبوا كل الناس ... وهو ده فعلا اللي بيعملوه مش مجرد كلام بيقلوه
وساعتها الواحد اللي ما يعرفش ربنا .. هيعرف ربنا وكمان هيعبده بالطريقة اللي هو شايف إنها الصح
ويوم القيامه لما نروح لربنا نشتكيلوا ... وهو اعلي واعلم .. وهو اللي هيفصل بينا في النهاية ويدي لكل واحد حقه علي قد عمله لإن ربنا مش بيظلم حد
خد بالك
مش معني إنك عارف إن طريقتك في عباده ربنا هي الصح ... يبقي تكفر الناس التانيه ... وتقول إنهم مش هيخشوا الجنه .. لا يا استاذ .. لان الكلام ده غلط .. ليه بقي ؟؟!! اقولك انا
لإننا ما نعرفش ربنا يوم القيامه ممكن يحاسب الناس إزاي
هل ممكن يعفوا عن ناس م اللي كانوا بيعبدوه بطريقة عيسي او موسى ××
الله أعلم ----
طب هيعفوا عنهم ليه ××
الله أعلم ----
طب ربنا ممكن يغضب علي ناس م اللي كانوا بيعبدوه بطريقة محمد ××
الله أعلم ----
طب ويغضب عليهم ليه ××
الله أعلم ----
لكن كل اللي انا عارفه إن ربنا ... ما بيغضبشي علي حد .... او بيحب حد ... إلا بسبب عمل الــ ( حد ) ده

Wednesday, November 09, 2005

جردل .. لكل مواطن عربي

بصراحه ... جردل لكل مواطن عربي .. هو حلم لكل مواطن عربي
نتخيل اننا فعلا تم التوحد بيننا في كل شئ ... وان الوطن العربي كله بقي حته واحده ... مش لازم سياسيا او جغرافيا في حجان كتيير بتربطنا ببعض
احنا لغتنا واحده
احنا دينا واحد
احنا تاريخنا مشترك
اجنا فكرنا متقارب
احنا عادتنا متطابقه الي حد ما
كلها عوامل مساعد لتمكنا من التوحد داخل قالب كامه عربيه لكن لا ادري لماذا لم نحسن استغلال ذلك ونستفيد منه قدر استطاعتنا ....
لماذا اصبحنا اضحوكه العالم ....
جردل لكل مواطن هو حلمي وارجوا ان يحلم به كل مواطن عربي اخر
بكل بساطه لو تم تجميع عملات الوطن العربي او تقريبا اشهر العملات وهي ( الجنيه _ الريال _ الدينار _ الليرة ) وتم عمل عمله موحده صالحه لكل ابناء الوطن العربي في كل الاقطار .. سوف تحل جميع مشاكلا الاقنصاديه
والنمو الاقتصادي يتبعه نمو في حميع المجالات
ولكن يبقي السؤال اي العملات نختار ؟
بدون تعقيد سو نأخد اول حرف من كل كلمه لنكون كلمه جديده .... ولتصبح العمله الجديد هي
الــــجـــــــــــــــــردل
ويصبح الشعار من الان
جـــــــردل لـكــل مــواطــن عـربـي

Friday, October 21, 2005

النكســــــــة

شيلت نكسة
فوق كتافي
سنين طويلة
بالف بيها
في البلاد
لحد ما إتكسرت ودابت
تحت رجلك يا وداد
وأمريني
اجيب عناقيد الليالي
احطهالك فاكهة
في طبق الزمان
انا اصلي حبة
لولي واقعة
من جبال الذكريات
مستعده تخلي بكرة
يبقي احسن م اللي فات
لكن في حاله
واحده هي
إن بكره يبقي فات

لإن نكستنا اللي عاشت
شايلة لينا عار ودم
لإن نكستنا ما ماتت
و النتيجة الظلم عمّ
ما بخفش من نكسه جمال
مع إنها كانت بدم
انا خفت من نكسه أبويا
لما كان عايش صنم
لما كان راضي بعيشتنا
وهي حتى مش عَدم

لما خاف من بدله سودا
في الشتا
او بيضا لما الشمس حارقة الكون ساعات
لما كان واخد قرار
إن نكستنا إختبار
واجبه يصبر للنهاية
عشان نهايته ما تبقي نار


ما خفتش من نكسة جمال
مع إن لينا فيها طار
ألف طار

إنما .. مين يا عالم إنهارده .. يجيله خاطر الانتصار
مين يا عالم إنهارده .. عنده حلم للسنين
مين يا عالم إنهارده .. فاكر إنه شيء خطير
مين يا عالم إنهارده .. رافض إنه يعيش حقيـر
و ياخد .. حق أبويا اللي إتحرم
حق تقرير المصير

Wednesday, October 19, 2005

ليه محطات المترو بالالوان دي

لم يلتفت احد منا إلي إلي الوان محطات المترو .. وخصوصا الموجودة تحت الارض
لماذا تم أختيار هذه الالوان ؟
لماذا لم يتم أختيار غيرها فالالوان علي قفي من يشيل ؟
ولماذا كان الخمس محطات النفق ( اللي موجودين تحت الارض ) بألوان مختلفة .. علي الرغم انه قد تتشابه محطات بأكملها علي السطح ؟
هل هناك علاقة بين الشخصيات اصحاب هذه المحطات .. وألوان هذه المحطات أم لا ؟

كل هذه الاسئلة أخذت تصول وتجول داخل رأسي ... واخذت أبحث وافحص وامحص وادور إلي ان هداني الله إلي الاتي
هناك علاقة وطيدة جدا ما بين الشخصيات أصحاب هذه المحطات و الوان هذه المحطات وان دل ذلك فانما يدل علي مدي العبقريه المستخدمه والتخطيط والدقه الشديدين واليكم البيانات بالتفصيل
اولا محطة سعد زغلول
لون المحطه أصفر .... لون الكراسي .. ولون الحيطان .. وبعد الفحص والتمحيص وجد أن سعد زغلول كان يحب الليمون لذلك تم الدهان بالون الاصفر

ثانيا محطة انور السادات
لون المحطة بني غامق ... أو اسمر .. وهو لون بشرة الرئيس الراحل .. محمد انور السادات . وإن دل ذلك فانما يدل علي الاخلاص والوفاء الشديدين

ثالثا محطة جمال عبد الناصر
لون المحطة برتقالي .... طعا أكيد توقعتم سبب اخيار هذا اللون لهذه المحطة .. أحب ان أطمأنكم إجاباتكم صحيحة ..لانه فعلا بيحب البرتقال

رابعا محطة أحمد عرابي
لون المحطه أخضر .. أو اخضر فاتح وطبعا مش ممكن نقول ان سبب اختيار اللون ده هو ان عرابي كان بيحب الخيار .. أو حتي الزتون أو حني البرسيم .. طبعا ده كلام مجنون واللي اجن منه اننا نقول اصل عينه كانت خضرا طبعا العلاقة اكبر من كمدة بكتيير .. والكلام الحقيقي المظبوط ان عرابي كان فلاح وكان واخد علي منظر الخضرة حواليه .. علشان كده محبش المسئولين يحرموه من حاجة بعد ما مات.. والله كتر خيرهم ــ

خامسا محطة حسني مبارك
لون لمحطة ازرق ... بصراحة خد مني وقت كتيير اللون ده ــ اللون الازرق لا هو لون اكلة معينه نقول عليه بيحبها ...
ولا هو لون بدلة يكون الريس بيحب يلبسها
ولا حتي لون جزمة .. أو لون شراب بيلبسه ولا حتي شيء له اصل عند المنوفيين ... علشان نـلـــزقه في اهلـــــه ونقــــول وفــــاء واخــلاص وحجـــات كده
بصراحة كان لون غبي واخد مني وقت كتييير في البحث والتدوير وفي النهاية وجدت علاقة فعلا ما بين اللون الازرق .. وشخصية الرئيس مبارك .. طبعا مش السما والتطلع للمستقبل ولاحجات دي ... العلاقة اكبر بكتييير ... الون الازرق ده لون نابه
ابن الذين( نابه ) أزرق

Sunday, October 16, 2005

الي كل من اراد ان يعرف

... إلي كل من أراد أن يعرف ..
شخصية المهندس الفنان / الأستاذ فلان الفلان
إليكم هنا ... ســطـور أخـطــهــا بـيـداي
أرشـف مـعـهـا كوب الشاي
كـمـا اكـتـب عـلـي نغم الناي
واســـمــع الـــحـــــانــي .. ولا
أدعي ركوب الطرماي

كلام مش مهم يتفهـم
الـمهـم انه كلام مرصوص
وان كـان تـمـر .... أو عـرق سوس
أو حتى قصب ..... مليان بـســــوس
فـكـلامـي كـده .... كـلامـ غـتـيـــت دايــمــا يـخــلي الـوش عـبـوس

Friday, October 14, 2005

احلي وقت

بدون شك كل يوم يمضي يأخذ منا أحلي وقت .. صدفه كئيبة او خبر سعيد هو احلي وقت .. عندما نتذكره ونضحك عليه بعد ان يمضي ويمضي عليه الوقت

نـفـسي اعرف الحقـيـقـه

من منا كان يجرؤ أن يتخيل ربع ما نراه حقيق الآن ....!! الحقيقة لا احد
بعض البشر يقولون أن الجن له حضارة تسبق البشر بألف عام .... وتفسيرهم لذلك أن الجن مخلوق اعتق من البشر بألف عام
ولكن ألا يعلم هؤلاء البشر سر تقدم الإنسان علي أخيه الإنسان ؟؟!!

اخبــار الـتـرجـمة

متي نستطيع ان نترجم كل الأحاسيس البشرية إلي واقع
الحــب
هل ترجمنا الحب إلي واقع فعلا نعيش به وداخله ونتعامل معه .. أم ترجمنا الحب علي انه شهوة إنسانية زائفة

الإنسانية
هل ترجمت الإنسانية بمعناها الحقيقي .. قد يتساءل البعض .. و ما معناها الحقيقي ؟! .. الحقيقية أني لا اعرف ولكن ما أنا متأكد من معرفته أن مفهوم الإنسانية الآن يجعل أي إنسان يخجل جدا أن يوصف به

الضمير
أين الضمير داخل قاموسنا الآن ... وما تفسيره عند أهل البشر .. لقد سمعت بعض الأصدقاء يقول لي انه قرأ في صفحة الوفيات خبر مؤسف عن موت الضمير الإنساني في حادث أليم علي الطريق الصحراوي الواصل بين مجتمعنا هذا يوطوبيا ومازال المسئولين يبحثون عما إذا كان الحادث مدبر أم قضاء وقدر .... ومازال البحث جاريا

يا رب نلحق نترجم كل المعاني قبل ما تغتال

سمعتهم قالوا ...!!! مش كلامي


محمد صبحي في مسلسل .. أنا وهؤلاء
أنا شايف إنه من رجولتي إني لازم أثق في الانسانه اللي بحبها ولازم أديها حريتها في التعامل مع الاخرين

في نفس المسلسل علي لسان احد الشخصيات
دايما الناس بتفكر غلط ... لو خفت منهم يبقي أنت أكيد بتفكر زيهم

ألبرت أينشتين
لا يمكن حل مشاكلنا بنفس مستوي التفكير الذي أدي إلي وجودها

وليام شكسبير
علي المرء أن ينتظر حلول المساء ليعرف كم كان نهاره عظيما

أنا
علي المرء أن يختار إما أن يعيش إنسان .. وإما أن يعيش حمار