Pages

Subscribe:

Saturday, February 25, 2006

هزيـــــــــــان

مش هنتكلم عن العبارة ... الناس اتكلمت كتييييير
مش هنتكلم عن انفلونزا الطيور ....... مافيش اكتر من الكلامفي الموضوع ده
مش هنتكلم عن تلوت النيل بالفراخ الميته ......... هو اصلا متلوث خلقة
طب امال هنتكلم عن ايه ؟
سؤال مهم ... في سؤال اهم منه هو احنا لازم واحنا بنحط موضوع جديد في البلوج نتكلم ؟!
ييجي واحد و يقولي لا يا عبيييط ...
وانت بتحط موضوع جديد في البلوج انت بتكتب ... وهناك فرق
مع احترامي لسيادته ... وانت بتكتب لازم هتكون بتتكلم ... او ع الاقل اللي انت بتكتبه هو عبارة عن خلاصة الكلام اللي داوش بيه اللي حواليك ليل ونهار
طب ايه الحل .... الحل ان احنا نحط موضوع جديد في البلوج من غير ما نتكلم ... بس نسمع
طب هنسمع مين ؟
سؤال مهم برده .. انا احب الناس اللي بتسأل ..
ايه رايكوا نسمع جمال الدين الافغاني مثلا !! شخصية يقال عنها في زمنها انها محترمه
السجن في طلب الحق من الظالمين العتاه رياضة .... والنفي في ذلك السبيل سياحة ..... أما القتل فهو الشهادة ..... وهي اسمي المراتب
فأنا غير راض عن نفسي ذلك لان الخمول قد اقعدني فلم يوصلني الي اسمي المراتب
ييييي ده كلام نيله قوي
ياعم رياضة ايه وسياحة ايه يا عم روح اتنيل ..... بقي بالذمة ده اسمة كلام
طب هنعمل ايه ياخوانا لا الكلام نافع ولا الكتابة نافعة ولا السمع نافع ... نعمل ايه
الله يخرب بيوت كل اللي عملوا فيا كده

Wednesday, February 15, 2006

في رسم الرسول اتكلم

كنت افضل السكوت ولكننا وصلنا الي حد .. لا يجدي معه اي فعل مهما عظم شأنه
ولهذا اتحدث
كلنا عارفين ان دي مش اول مرة يرسم الغرب صور زي دي
التتار رسموها الاول
بعدهم رسمها الفرس اللي هما الايرانيين دلوقتي
فكرة السخرية من الاديان دي حاجة متأصلة اصلا في الثقافة الغربية ، يا عني دي مش جديده انا شايف من رايي ان اللي حصل من المسلمين في الوطن العربي ده فوضي بصراحه كده وبدون مجاملات ولا تزويق كلام
احنا صورنا نفسنا كأننا مجموعة قبائل غجريه غوغائية لا تعلم عن العلم شيئا
اساسا الصحيفة الدنماركية دي مش معروفه ولا حد سمع عنها قبل كده .. وبدل ما احنا نعمل حاجة ننتصر بيها لرسولنا خلينا كل صحف الاتحاد الاوربي تنشر الصور دي لا وايه تشجع رسميها علي ابتكار صور جديده
من ضمن الدول اللي نشرت صور
فرنسا
انجلترا
اسبانيا
ايطاليا
النرويج
وماذا بعد .. لماذا لا ننادي بمقاطعتهم هم الاخرين ولماذا لم نقاطع امريكا مثلا بعد حدوث فضائح ابو غريب او حتي بعد تدنيس المصحف في جوانتانامو
احنا كشعب عربي .. لا ينتج شيئ
الاكل
اللبس
السكن
الدوا
العلم السلاح
الرفاهيه
كلها اشياء نستوردها من الغرب اي انهم اذا فكروا ولو خاطرة ان يحاربونا لن نصمد ولو لليله ولن تنفعنا اموالنا شيء
اي اننا نملك فقط المقاطعه كسلاح وحيد اوحد وفعال ولكن كيف يصبح سلاح المقاطعة فعال .. اذا قام به مجوعه من الغوغاء لا يعرفون ابسط القواعد العلميه البسيطة لنجاح اي حركة شعبية
عندما نودي بالمقاطعه في ارجاء الوطن العربي ... باتت الناس ترفض ان تشري ما مموجود منها في المحلات بالفعل وهي بضائع دنماركيه تم دفع ثمنها .. وبات الخسران الوحيد هو الرجل الغلبان صاحب محال البقاله الذي لا يملك سوي بعض البضائع التي دفع تمنها بالفعل
ثم هناك بعض المتطرفيين الذين باتوا يحرقون سفارات ويدمرون شركات ويعدون هذا نصرا
حاشي لله من ذلك او ذاك .. ليس من هذا من تعاليم الاسلام من شيء
الاسلام الذي اوصانا انه اثناء الحرب وفي خضم المعركة
لا نقطع شجرة
ولا نجني علي طفل
او عجوز
او امراة
ما بالنا علي ناس امناهم علي ارواحهم واولادهم واموالهم في بلادنا
لقد اثبتنا للغرب اننا قوم جاهلون وان كانوا متشككين في الدين الاسلامي من كونه دين يدعوا الي القتل والتدمير فهم الان باتو متأكدين من ذلك مليون بالمائه
كلنا نعلم ان العدو الاساسي لامريكا الان هما الصين واوربا الموحده ولذلك تستغل امريكا ذلك في الضغط علي الدول الاوربيه بحجة انها تسخر من الدنيات وانها اخطئت وانها وانها .. لعلها تستطيع ان تعركل تقدمها ولو شيئا يكفي امريكا ان تحرم الدول الغربية من السوق العربية والتي هي اكبر سوق شرائيه في العالم

Tuesday, February 07, 2006

انت اكيد ..اكيد في مصر

لما تبقي ماشي خايف
في الشوارع والحارات
لما يبقي عادي جدا
هتك عرض السيدات
لما تلقي واحد يقولك
ان ابوك السقا مات
وانك وارث عنه قصر
تبقي اكيد .... اكيد في مصر
*************
لما تبقي الدنيا ليل
والشوارع تبقي فاضية
وتبقي خايف تمشي وحدك
حتي لو في وسط لمه
ويرفعك واحد جبان
وتترعب من بس كلمة
وتحس انك اسير في اسر
يبقي انت اكيد ..... اكيد في مصر
***************
لما تبقي شاب رائع
واخد شهادة م الكبار
حلمك تلاقيلك وظيفة
تبقي فيها م الكبار
بس لكنك تفاجئ
بعد سنين ان انت فار
وانك قبله كنت عايش
طور في ساقيه او حمار
وان جبت مرة كيلو لحمة
يبقي في بيتكوا اليوم ده نصر
ويبقي انت اكيد ...... اكيد في مصر
****************
لما تبقي شاب مسلم
ماسك في ايده سنجتين
وواقف له صاحبه القديم
المسيحي بخنجرين
وتقوم خناقة جامده جدا
يتعصروا فيها شبابنا عصر
يبقي انت اكيد ....... اكيد في مصر
اقدم اليكم اضافات القراء
****************
لما تلقى الناس ماشيه تكلم نفسها
وتلقى تلفزيون يقول كل تمام ياريس
والناس اخر روقان
ومحدش يسأل عليك ياعينى يا غلبان
وتعيش وكأنك مش عايش
ولا فرقه معاهم تداس بالاقدام
يبأنت اكيد اكيد فى مصر
بلد الامن والروقان
لما تلقي ناس كتيرة عايزة وبترفض تعوز
لما نضحك للزمان والزمان يلويلنا بوز
لما حلم يضيع بصحبه وسط يمكن " أو يجوز
لما يبقي الحر حافي والحرامي عنده قصر
يبقي انت اكيد ... اكيد في مصر
يبقي انت اكيد ... اكيد في مصر
لما تلاقي النار والعة حواليك
و لا تلاقي غير البحر مستنيك
تغرق ولا حد سائل فيك
و اهلك يتضربوا لو قلقوا عليك
و الناس سايباك و بتشجع مصر
يبقى انت اكيد,, اكيد في مصر
لما تبكى فى يوم بجد
وتلاقى الف ايد تتمد.........................مش عارف بصراحه
تطبطب على كتفك وتمسك ايديك............جايبه الكلام ده منين
وتمسح لك دموع الخد..............................لكن اهوه
وتبقى فرحتك محبه .........................احنا بلوج ديموقراطي
ومش فلوس ولا قصر
يبقى انت أكيد فى مصر
لما تيجى فى يوم يا صاحبى
وتقول الزمن ده طاح بى ...................... نفسي في صاحب
وآخد ايدك فى ايدى ونعدى ......................... يكون
ونجيب العزة والنصر ............................. شبه الاخ ده
يبقى انت أكيد فى مصر
لما تفتح باب عربيتك
وترمى ورقة كانت فى ايدك
تبهدل بيها شارع نضيف ...................... ابتدت تعدل في الكلام
وتبقى دى سمة العصر
يبقى انت أكيد .. أكيد فى مصر
لما تدخل بلوج آدم
وتقرا كلامه الجميل
وبعدين تبعت له تعليق .............................. حبه تسجيد
علشان مايقولش عليك بخيل ........................ ماشي متشكر
وتكتب له فى حب مصر
يبقى انت أكيد فى مصر
لما تلاقى العربيات بتزمر بعد ماتش مصر وكوتى فوار
يبقى انت اكيد اكيد بقى فى مصر
لما تلاقى سوزى بتبوس مبارك بعد الماتش
يبقى انت اكيد اكيد فى مصر
لما يبقى الكاس في ايدك
و الحريم بتقول حسام
و الرئيس يدّي و يزيدك
الف بوسة من المدام
والعيال بتقول نشيدك
والشيوخ تهديك مقام
عام بحاله يبقى عيدك
ما انت ناصر الانام
ايه زويل قصاد مفيدك
مين حسين و فين الايام
كورة واحدة من عديدك
تسوى نجم و شيخ امام
والكلام مش رح يفيدك
ده انتها الوقت الكلام
والكلام من فضة.
يبقى لو سكتنا
نبني قصر
و القصور مش من مقامنا
لو مقامهم يبقى قصر
الكاسات يملاها نيلنا
في الحواري نلقى نصر
لو كلامنا انت فاهم
يبقى اكيد انت في مصر
لما تلاقي الطفل في إيده حديدة
و الناحية الثانية سنجة شديدة
و يقف وسط الطريق و يزق في جده
و على رجليه بيمده
و يقول له أنا عايز اتغدى
و يقول له بلاها نصلي العصر
يبقي انت أكيد ...عبيط
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
وعدت ووفيت بوعدي مستني باقي القراء
منتظر اضافات القراء ... وعلي وعد بالنشر كتكملة مع الحفاظ علي الملكية الفكرية لكل مبدع