Pages

Subscribe:

Saturday, January 20, 2007

ولا ف الخيال

انهاردة كان عاندي المادة اللي قبل الاخيرة
هانت وقربت اخلص والحمد لله
.
كانت مادة اللي حد ما سهلة
كنت فرحان قوي لاني كنت باحضر
محاضراتها بانتظام
.
اصل دكتور المادة دي غلبان وعلي نياته
وكان اقصي عدد ممكن يحضر له
في اي محاضرة هو تلاتين
اربعين من اصل
300
.
للاسف كان واخد من وقت المادة دي
اني بذاكر مادة التخلف اللي عندي
اول مرة اشيل مادة في حياتي
احساس وحش جدا جدا جدا
.
بس الحمد لله
حضوري للمحاضرات
وللسكاشن في المادة دي بالذات خلاني اقدر الم المادة
.
انا بصراحه المادة دي بس
تقريبا اللي كنت باحضرها بانتظام
عشان كدا الحمد لله ما تعبتنيش
وكمان مزيدا من الهمة والنشاط
روحت لواحد صاحبي بيته
اصور منه السكشن الاخراني اللي ما حضرتوش
عشان احل المسائل كلها
والواد بصراحه طلع جدع معايا
لاشتكي من عطلة ولا حاجة
.
اما المادة اللي جاية يا ساتر يارب
مواصفات قياسية دي
عمري ما حضرت ولا محاضرة
اصلها مادة كلام
وكانت اختياري
بس الدفعة الغبية اختارتها
واضطر الدكاترة في القسم
انهم يعمموها .. علشان لازم يكون فيه نسبة معينه
للدارسين المواد الاختيارية
واضطريت اخدها غصب عني
فقررت عندا فيها ما احضرشي خالص
وانشاء الله التلات ايام دول هبقي احفظ الدش دا
وخلاص
.
المهم جه يوم الامتحان
اللي هو انهارده
نزلت بدري من بيتنا وعلي غير عادة
ركبت من محطة الحدايق
اصلي انا في حدايق المعادي
قابلت واحد صاحب م الدفعة
اعرفه شكلا بس
وهو كمان يعرفني شكلا بس
.
سلمنا علي بعض
بس لقيت حاجة غريبة جدا
..
..
لقيته فاتح ورق المواصفات وبيذاكر فيه
بيني وبين نفسي
قولت هي الباور سيستم سهلة
بس مش لدرجة ان الواحد يذاكر المادة اللي بعدها
قبل الامتحان بساعتين ولا حاجة
.
لقيته بيكلمني وبيقول ايه الاخبار
ما تعرش اي حاجة
قولت له لا والله مافيش اي اخبار
ودا ر بينا الحوار دا
...
...
ما تعرفشي شكل الاسأله ممكن يكون ازاي ؟
بيني وبين نفسي قولت ياسلام .. لو كنتوا بتحضروا المحاضرات زيي ما كانش بقي دا حالكوا المهم رديت عليه وقولت لا والله الدكتور ما قالش حاجة
طب ما تعرفشي هيجيب كام سؤال ؟
بيني وبين نفسي برده .. اه ما انا لقطه واحد حاضر المحاضرات كلها بقي وبتسأله ... المهم قولت له لا ياسيدي بس اتطمن كل امتحانات السنه اللي فاتت اربع اسئلة بس .. وكمان امتحان السنه اللي فاتت تلات اسئلة بس
ياسلام .. وممكن يسأل في ايه في اول سؤال ؟
انا رديت عليه باستغراب شديد جدا .. ازاي واحد ما بصش في ولا امتحان من بتوع السنه اللي فاتت وقولت له اكيد فـ
sending end
او الـــ
raseaving end diagram
فرد عليا بكل استغراب ودهشه برده ... ايه ؟ ودي فيها مسائل ؟
فرديت عليه بكل استغراب ودهشه برده .. دي تلت المنهج
قالي لا اصل انا ما اعرفشي غير الــــ
thermal
فرديت عليه بكل استغراب ودهشه برده .. ايه ؟
فقالي هو مش انهاردة مواصفات برده ؟
قولت له .. مين ؟ لا انهارده
power system
قالي لا لا انهارده مواصفات انزل معايا المحطة الجاية تعالي انا مستني صحابي
اظاهر اني صوعبت عليه ولا حاجة
.
.
المحطة اللي نزلنا فيها كانت المعادي
فيها اكشاك تليفونات كدا
اتصلت بصاحبي اللي روحت له امبارح
وقلت له ياحمد هو انهارده مواصفات
قالي اه هو انت ما تعرفشي
قولت لا مااعرفشي
.
قمت راجع للواد اللي من شوية كنت برد عليه
بعجرفة كدا
قولت له
والنبي انا واقع ف عرضك ابوس ايدك
اعمل ايه
طبعا الواد بصراحه ما اتاخرشي
.
هو وصحابة قعدوا يقولوا عناوين مهمة كدا
والحجات اللي ركز عليها الدكتور
والمسالة الوحيدة اللي في المنهج
وافتكرت اني ما حضرتش محاضرات لام المادة دي خالص
.
روحت اللجنه .. والخبر اتنشر
كل اللي يعرف
يقولي معلشي هدي نفسك
وانا اللي طالع عليا هيسرية ضحك
فقول له وانت شايفني زعلان ؟
ما انا باضحك اهوه
.
دخلت الامتحان اللي مدته تلات سعات
خلصت في ساعة
الدكتور كتر خيره
حاطط علي كل سؤال درجته
الحمد لله ..حليت اللي ينجحني
لما دخل الدكتور في اللجنه
في عيال سالته علي مساله صعبة كدا
فقال هي المساله دي بكام درجة
قلنا عشر درجات
قال خلاص ما تحلهاش
حل اول سؤالين وهتنجح
ههههههههههه
طبعا
انا ما صدقت
وخرجت من اللجنه بدري ساعتين
ولحد دلوقتي مش مصدق

15 comments:

soosa el-mafroosa said...

أكتر من كده و يزيح ربنا

Ma 3lina said...

]خرب عقلك انت يا ابنى نايم على ودانك مش عارف عندك مادة ايه؟؟؟؟

يعنىنقلت المادة غلط فى الجدول و لا ايه

المهم انك عديت يالا غلطة تفوت و لا حد يموت

Memo said...

ههههههههههههههههههه
ههههههههههههه
ضحكتني و انا فى مود امو الفصاد \
و اللهي دمك زي العسل
وربنا معاك

مُزمُز said...

انت بتدرس إيه با ابني؟

قول بس عشان انا معرفش خاجة من اللي انت قلتها دي

وبعدين لازم تاخد علاج للنسيان وأنا رأيي إن عليك وعلى عسل السدر الجبلي الأصلي بتاع ميلودي أفلام مش بتاع الناس
وعلى رأي المثل القديم
عليكم بالشفاءين العسل والقرآن
نياهاهاهاهاه نياهاهاهاهاهاهاهاه

admelmasry said...

سوسا
ـــــــــ
علي رايك اهو كلوا بيطلع ي الغسيل


ما علينا
ــــــــــ
ههههههههه
شوفتي حد بالخيبة دي بذمتك
ههههههه
انا لحد دلوقتي مش مصدق والله


ميمو
ــــــــ
احم احم
دا كلوا من زوقك يا فندم
ههههه
ومتشكرين جدا


ابيتاف
ـــــــــ
ههههههههههههه
اهلا شكلك عملتي زي حلاتي ومنقلتيش الجدول بنفسك واستكفيتي بالتليفون
هههههههههههههههههه
اذن قشطة
ههههههههههههه
ماتخافيث ماتخافيث
انثاء الله ربنا يثتر وتبقي الحكاية ثهلة ههههههههه



مزمز
ـــــــــ
اهلا يابني والله ليك واحشة
فينك وفين قاعدتنا زمان ولمتنا حوالين احه
ههههههههههه
بص يا سيدي انا بادرس الهندسة قسم الكهربا وليعوذبالله



تحياتي للجميع

محمد عبد الغفار said...

ربنا يعينك ويوفقك

طارق مكى said...
This comment has been removed by the author.
طارق مكى said...

واله يهمك المهم انك عرفت المداة
وعشان ربنا بيحبك بعتلك واحد ذى صحبك الى متعرفشى غير شكلو

وبلنجح انشا الله

admelmasry said...

محمد جعفر
ــــــــــ
الله يخليك متشكر


طارق مكي
ــــــــــ
اهلا بك صديقي العزيز
فعلا وقتها بس حسيت ان ربنا بيحبني فعلا


تحياتي للجميع

Anonymous said...

لا يا عم
انا كنت انصح

انا عشان موسوسة
وقفت قصاد الجدول
و مليته لصاحبتي

و بعدين بعد ما روحت
و بعدها بكتير
رحت اتصلت بيها
اقولها
مليني الجدول اللي مليتهولك
هههههههههههههه

شجره الدر said...

ادم يامصيبه
عارف انا اكبر خوف عندى وكان كل كوابيسى وانا لسه فى الجامعه والثانويه العامه
انى اروح الامتحان متأخره
او اروح امتحان غلط
الحمد لله محصلتش
لكن ده بالنسبه لى كان كابوس
احمد ربنا انها عدت منك على خير
على فكره انا كمان من المعادى
يالا بقى ادينا طلعنا جيران

تحياتى
وتمنياتى بالنجاح الدائم

يا مراكبي said...

أنا لما كنت في الكلية برضة كنت بأصحى من النوم مفزوع لحسن أكون ذاكرت مادة تانية غير اللي في جدول الإمتحانات

من غير ما أسألك .. دي أعراض كلية الهندسة يا عزيزي

admelmasry said...

ايبي
ـــــــ
طب والله جدعة .. واجدع من ميت راجل
هههههههههههه
ع الاقل انا ما عملتش كدا
انا كل يوم واحنا ماشيين من الامتحان كنت اسال هي المادة اللي جاية ايه
اليوم دا الوحيد اللي مسالتش ههههههه
يلا واهي جات سليمة



شجرة الدر
ــــــــــــ
شوفتي يا ختي اللي جرا
اهيء اهيء اهيء
هههههههههههههعلي فكرة انا خدت الموقف بهيسرية ضحك متواصل لدرجة ان صحابي افتكروني اتجننت




يا مراكبي
ــــــــــ
تخمينك صح يا عزيزي
انها فعلا الهندسة اقصد الهلوسة




تحياتي للجميع

.:.-=- ELGaZaLy-=-.:. said...

جميل اوى بوستك يا ادم بجد...

وعاجبنى جداا ربنا يكرمك

اول مرة ازورك واكيد مش الاخيرة

admelmasry said...

الجزالي


اشكرك كثيرا
واتمني ذلك بالطبع