Pages

Subscribe:

Thursday, November 30, 2006

بعض مني اثناء ضيقي

بعض مني اثناء ضيقي
.
.
ـ1ـ
طلعت الاول علي جامعة حلوان في مسابقة الزجل
ياعني اللي هيروح اسبوع شباب جامعات المنوفية هيلاقيني هناك
.
.
ـ2ـ
قاعد في امان الله .. باتفرج انا والحاج علي التلفزيون
يا حاج : مش ادم طلع الاول في الجامعة في الشعر
الحاج : ممم
ياحاج : مش تقوله حاجة كده .. دا هيسافر المنوفية
الحاج: اه .. انا كل ما اقوله يروح مشوار تبقي حجته المذاكره
انما للجامعة حلو .. ماشي ماشي
.
.
.
ـ3ـ
اعتقد ان جميع المؤشرات تنبئ بان حالة الشعر المصري
او الشعر عامة في الحضيض والحمد لله
لما واحد زيي ياخد اول جامعة
تبقي الحكاية كووووووسه
.
لما واحد زيي يمثل جامعة حلوان
في اسبوع شباب الجامعات
تبقي جامعة حلوان دي
مافهاش رجالة
.
.
ـ4ـ
انهارده الخميس
اخر امتحانات الميد ترم
اتخانقت خناقتين لحد دلوقتي
وربنا يستر
عشان الرابعه بتولع خلاص
ايه ؟
التالته ؟
لا دي ولعت من زمان .. وانا رايح اشعللها بقي
.
.
ـ5ـ
بكرة الجمعة
اعتقد ان بكرة هيكون يوم مهم جدا
الساعة اتناشر تقريبا
هيكون فيه حدث مهم .. جدا
بيستعد الناس تقريبا
للصلاه
.
.
تحياتي القلبية للجميع .. اتمني للمتزوجين يوم خميس رائع .. من دون حسد ولا قر .. يارب كل واحدة متجوزة تصحي تلاقي نفسها الصبح حامل ، حامل ، حامل .. ولا عزاء للمقاتلين

22 comments:

توهة said...

ممممممممممممممم


الإعتراف بالحق فضيحه



ههههههههههههههههههه


فانتازياااااااااا
فانتازيااااااااااااااااااا

Anonymous said...

يا عم سيبك ....حد يطول يطلع الأول ...
الأول على الوحشين ...الأول على الكويسين ...أهوا الأول و خلاص ...
بس إزاى تقول كده ...أصل أنا من نظرتى لكتاتك ...أكيد لازم تطلع الأول .....
و لو أنت مش مقتنع أنك الأول ,,,روح أقرأ حجاتك تانى يا باشا ....
,,,,,,
وبعدين كفاية أنك أدم
المصرى ...اليمثل أم حلون نفسها
:)

voice of love said...

مبروك مبروك مبروك
مبروك يا ناسنا وأهالينا
مبروك عليكم وعلينا
مبدع والله يا واد

FrEe.PhArAoH said...

ايه الجمال دا

الف الف مبروك ياباشا

نصيحة من اخ : ابقى روح مشاوير للبيت ومتتحججش بالمذاكره عشان الكلام دا مفعوله سحر بعد كدا ;)

خالص مودتى

saso said...

طيب مبروك الاول..بس ليه مخنوق كده ده انت اللي طلعت..بتضايق في نفسك ليه
مانت اكيد كنت احسن واحد في الموجودين او ماكانش في حد موجود تاني المهم انك احسن واحد

الخناق في الامتحانات ده النشاط الوحيد الممكن..وبعدين النكد مفيد في الامتحانات ماتقلقش يعني

change destiny said...

ادم انا حاسة انك لو كسبت مليون جنيه دلوقتي حتقعد تقول يوه لسة حفك الرزم

في ايه يا ابني ما تسيب نفسك تتبسط شوية

كراكيب نـهـى مـحمود said...

اولا الف مبروك المركز الاول
ثانيا حد يكون ملخبط ومخبوط على دماغه وبيهذي كده في مناسبة زي دي
يا عم روق
تحياتي لك

إيمــــان ســعد said...

ههههه

مبروك يا ادم

بجد تستاهلها و بطل نظام انقاص الذات ده

و بعدين بطل موضوع القرّ بتاعك ده

:)

و منتظرة اسمع عنك بعد الخناقة العاشرة


تحياتي

Anonymous said...

مبروك
الف مبروك
وخف شويه خنقات
بعدين يقولوا
شاعر الخنقات

Tamer Nabil Moussa said...

مبروك اخى ادام

ايوة كدة ياريس فرحنا شوى

تحياتى

Anonymous said...

ألف مبروك يا باشا .....بس انت ايه اللي مزعلك ........وايه الحقد ده على التزوجين......اول مره أشوف واحد واخد جايزه زعلان .....

aMiR-El ZaLaM said...

مبروك يا حج آدم

(f)

admelmasry said...

فانتازيا
اذن انا رجل فاضل طب والله كتر خيرك

نوران
مش واسعة قوي منك .. بس ع العموم متشكرين جداجدا ع الواجب ده


صوت الحب
الله يبارك فيكي يا احلي صوت في الدنيا


فري فاروه
اوعدك اني اسمع النصيحة .. لحسن انا تعبت قوي والواحد كبر بقي ومش مل مناهده


ساسو
انتي شايفة كده يا جميل .. خلاص ولع خناقة دلوقتي فيها اتنين قتله واحد انعاش وصلحه


راح اغير المحتوم
طب انتي اديني المليون جنيه كده وانا اوريكي هعمل ايه


كراكيب
هروق حاضر .. بس مش هروق الكراكيب لانها بقت جزء لا يتجزاء م روح المكان
اعقد اني ممكن اروق السرير


بنت سعد
ماتسمعيش وحش ياختي ... ساعتها مش هيبقي فيها حس عشان تسمعيه


ليال
يا للي انتي اكترمن الف ليله وليله
لي اللي يفول يقول
ما ياما اتقال علينا
مبسوط جدا انك لسه فاكراني .. ومابتكتبيش بالانجليزي اللي ما يتقريش ده



تامر
الحمد لله اني قدرت ابسطك .. لحسن دا انا في حاله صعبه قوي



انسان
اديك شوفت يا سيدي .. ثم ان مش باحقد ولا حاجة دا انا بادعيلهم من قلبي



اميرالظلام
الله يبارك في اللورد فولدمورت اميرالظلام والسحر الاسود في عالم السحرا

المواطن المصري العبيط said...

مبروك يا سيدي، يا ريت تنشر بقى القصيدة اللي كسبت المركز الأول على الجامعة علشان ندلو بدلونا احنا برضه

تحياتي بالتوفيق

admelmasry said...

المواطن الجميل
*************

اليك والي جميع القارئين
القصيدة الفائزة
هي بالفعل القصيدة المنشورة في بوست سابق
تحت عنوان
" ادراك ماهيه "

Unknown said...

آدم
مبروك
أولا
ثانيا
الجوائز مش مهمة
على قد ما مهم
انك توصل للناس
وتلمس لقلوبهم
وانت
بتوصل بعمق للقلب

ثالثا
اهو الحقد بتاعكم
سبب لحالة النيلة اللى بتجرا للمتجوزين
ليلة الخميس
وعشان كده
تمويهاً لأمثالك
من الحاقدين
من العزاب
قررت انى اقاطع ىليلة الخميس
واشتغل صباحى


تحياتى

smraa alnil said...

ههههههههههههه وبتضحك عليا انا
عامة يا سيدي مبروك ليليلليليليلل
دي زغروطة مني
فكرتني لما طلعت الاولي برضه في مسابقة دون ذكرها وكنت مش الاولي بقي علي حلوان لا دة نا كنت الاولي علي مستوي الجامعات كلها
ورايحة لبابا قوله
قالي اللي يشوفك وانتي داخلة يقولي ال يعني معاها شهادة البكالوريوس
ولملمت اذيال خيبتي ودخلت اودتي واتكتمت
ناس يحبطوا بعيد عنك
ههههههههه بس انت خليك واثق في اللي بتكتبه اكيد اللي رشحك للمركز دة كان بيحس واشايف حاجة انت كنت اتكلمت عنها قبل كدة جواك
خسارة انا مش طالعه المنوفية كنت هشوفك هناك
اصل عقبال عندك بطلع اشراف علي البنات الي عندي في الكلية بس للاسف مفيش العاب قوي في المنوفية
والعاقبة في المسرات

محمد أبو الفتوح said...

الله أكبر
ألف مبروك يا كبيييير
و انا برضه شايف إن حاله شعر العاميه فى الحضيض
لما محمد أبو الفتوح ما يدخلش مسابقة الكليه أصلا عشان الدكتور بيوزن القصيده بالفصحى
:)
أحلى سلاااااااام

Anonymous said...

لا عليك ياصديقي؛ يظهر انو احنا جماعة
آدم كل زي بعض؛ الحالة عامة
:))

سابرينا said...

مبروووووووووك
أنت تستحقها

Anonymous said...

انت كويس يابني ..فيه ايه بس؟كويس جداااااا :D
الف مبروك...و جامدة الحتة بتعت المتجوزين دي يا سهن :D

Anonymous said...

هههههههههههه

عارف اكتر فقرة عجبتنى
بتاعة باباك لما مسك فى حكاية انك رايح المنوفية و قارنها بالمشاوير اللى بترفضها

باباك ده عسل
بس ليه الأهلى كده بيلزقوا حاجات فى حاجات و ياخدوا بالهم من قصص تانية غير اللى بنقولهم عليها ؟



اخبار الخناقة الرابعة ايه صحيح ؟ فى ضحايا ؟