Pages

Subscribe:

Sunday, November 12, 2006

ادراك ماهية

ادراك ماهيــــــة
.
.
شايل فوق جبين القلب
حلمي اللي متزين رقع
كان نفسي اتحول بطل
وازاي وانا عمال اقع ؟
كان نفسي اجيب الشمس .. من قلب السما
تشرب الضلمة
تحول
كل ايامك نهار
كان نفسي اجيب الملح .. من كل حبات العرق
وارسم فوق جبين الشط
قلب اخضر م الخضار
بس كونك كان معاند
عِنده كان واقف قصادي
دمي سال فوق جبينك
شق نهره في الاراضي
كل نبته بــتتولد
شاربه من دمي بكفاية
وانتي لازم تعرفي
من معايا ومش معايا
بلدي يا جناح الحمام
فين بيتربي حمامك
ما بقتش شايف غير زحام
وانطرشت
فين كلامك
بلدي يا حبل اللجام
اسالي راكب حصانك
ليه انخرس صوت اللسان
ليه كبح باديه لجامك
بلدي يا بستان شرار
فين جحيمك
فينها نارك
بلدي ياللي ليلها طال
اسالي راح فين نهارك
بلدي .. اوعاكي الدموع
قلبي مستحيل يوافق
روحي ليكي .. كلي عاشق
قلبي ياما شال بنادق
واسالي الارض الابية
مين بيحفر في الخنادق
واسالي الشمس العاتية
مين معلق في المشانق
واسالي نارك عليا
مين وقودها في المحارق
يا نسايم مستحية
اتقابلنا في المفارق
اقبلي مني الهدية
جبت لك قلبي اللي راشق
فيه رصاص البندقية
جبت لك كل الحقايق
ازعلي مني عليا
واعزريني الظلم حارق
بس اوعاكي الدموع
افضلي دايما قوية
وان نصيبك كان خنوع
واتغصبتي ع البكا
فابكي دمعي من عنيا
ابكي دمعي
من عنايا

14 comments:

إيمــــان ســعد said...

الله الله يا ادم

جميييييلة جدااااااا

بجد عجبتنى اوىىى

ان شاء الله نشوف ديوانك الاول قريبا جدا

تحياتي و استمر

eman said...

بلدي يا جناح الحمام
فين بيتربي حمامك
ما بقتش شايف غير زحام
وانطرشت
فين كلامك
بلدي يا حبل اللجام
اسالي راكب حصانك
ليه انخرس صوت اللسان

معبر جدا وجميل
مقهورين على الغلط اللي بيصير
بييجي يوم واحنا اللي منعمل التغيير

ان شاء الله

Anonymous said...

ماشاء الله على الاسترسال

صراحة باغبطك على الكلام اللى بيطلع لواحده

الواحد لما يكون جواه احساس وعايز يكتبه بيقعد متوتر لحد مايطلع بيعبر عن اللى جواه ويكون بصورة مرضيه


بس انت باحس ان الكلام بيزق نفسه على لسانك وبيطلع قهرا:]

عشت ياغالى جبينك عالى :]
ربنا يخليك لمصر
بس المهم ربنا يخليها هى ليك على قد حبك

Anonymous said...

حلوة لغتك يا آدم

بالتوفيق

daktara said...

ممممممممممم
جميل يا مصر
بس تصور لسه واخد بالي انك
عديت المية سنه

admelmasry said...

بنت سعد
شكرا يا فندم
ادعيلنا بس

ايمان
بالظبط
لكن لو فضلنا مستينين اليوم ييجي لوحده مش هييجي


زعرورة
الله يخليكي كفاية حسد مش ناقصة هي
ههههه
ومتشكر جدا
يا احلي زعرورة
ياللي جمالك فاق
مليون صورة
ع الكلمتين الجامدين دول


تامر العفيفي
لك اتكلم بشكل جدي
لا اعرف لماذا شعرت في تعليقك السابق وحتي هذا التعليق ان القصيدة لم تعجبك ولكنك فقط اردت ان تثبت وجود
اسف علي تجراي .. ولكني لا اعترف بنقد شاعر مهم مثل ان يقول لقصيدة ما حلوة
فهي كلمة نقولها لمن لا نريد ان نكسفه .. قد يليها لذيده ومدها خفيف وقد يسبقها برافو
لكني اريد منك اكثر من ذلك
هل استطعت ان اوضح وجهة نظري؟


الدكترة
انا كبيييير قوي
انا من زمان يابني
بس انت مش واخد بالك

We2am said...

7elwa gedan tab3an..w kalmha 2oryeb ll2lb..balash ya adm haws enak mabte3rfsh tekteb dah..mn rdk 3la tamr el3afefe..bgad gamda..e7na mesh noqad ya3ni 3shan n2deha kalam kber..aham 7aga en ele7sas soto 3aly :)

cast2way said...

ابدعت يابن المحظوظة
انا بقيت معجب بيك
الحق نفسك واستخبى

good job adm

والسلام

sarah la tulipe rose said...

كان نفسي اجيب الملح .. من كل حبات العرق

تعبير جديد عجبني
كان نفسي و كان نفسي
فعلا كلنا بنقول كان نفسي اعمل بس ماعملتش بس ماعرفتش بس ماقدرتش

مش حاعمل فيها شمشون انا منهم باحاول اه اعمل بس باتراجع اول ما تظلم الدنيا باحاول مالعنش الظلام ساعتها و ادور علي الشمعة بس بادور ساعات غلط ممكن ادور كتير و الاقيها في ايدي و كان المفروض ادور علي كبريت مش شمعة

ليه فعلا عند اول ازمة بنقف و نبكي و نقول كان نفسي
المفروض مانستناش حاجة تيجي لان كل حاجة نسخة من جودو الذي لا يأتي صمويل بيكيت قالنا كدة و احنا ماسمعناش
المفروض بقي نعمل و خلاص مانستناش نشوف نتيجة عملنا لاننا حانضيع الوقت في الانتظار
القصيدة جميلة و عجبتني فعلا

admelmasry said...

وئام
شكرا يا جميل
علي كل كلمة كتبتيها وتعبتني لحد ما قريتها
ومش هقول كده لتامر تاني


كاست واي
شكرا ياابن الذين
ههههههه
واوعدك اني هستخبي
وهبقي اقولك ع المكان بعدين

سارة
اعتقد ان صمويل بكيت عندما قال ذلك كان يعلم جيدا ان كل العالم ينتظر جودو

بختلاف ثقافاتنا وعاداتنا كل منا له جودو الخاص به

لعل مستقبلي هو جودو لعل الخلاص هو جودو لعل الراحة هي جودو لعل الموت هو جودو

ولكن هذه هي حكمة الرب

ان نعيش الحياه كلها في انتظار جودو الذي لا ياتي

ويكون الجزاء في قدر ما تم .. هناك من ينتظر وكفي وهناك من يذهب الي جودو حيث يقبع

أُكتب بالرصاص said...

ادم
الكلام ده من كتاباتك؟؟

إن كان كده
بصراحة
تبقا


واحد دماغ كبيرة

احييك


فعلا عجبتني بشكل

:)

admelmasry said...

لا اطمن

من كتاباتي

Anonymous said...

آدم ازيك
الحقيقة انا كان المفروض أزعل من كلامك بس انا طيب شوية
المهم
انت عكست الموضوع يا صاحبي لأني لما هقول
إن القصيدة دمها خفيف
أو لذيذة ده ميبقاش نقد على قد ماهو انطباع
بس انت لو ركزت في التعليق
هتلاقيني كاتب ـ لغتك ـ
يعني جانب من جوانب القصيدة اللي بيعتمد عليه أي شاعر
وأخيرا
أنا لما بتعجبنيش قصيدة مبلاقيش حاجة أقولها أصلا
ومبكتبش تعليق من أساسه
انما بجد الأسلوب في دي شدني
ياريت تكون فاهم وجهة نظري

admelmasry said...

اسف جدا يا شاعر

ودا طبعا م العشم