Pages

Subscribe:

Tuesday, September 26, 2006

البوليكة الكبيرة


أرنو إلي بحر عميق
اسبح ضد تيار اليسار
اصد لعنات اليمين
اهزم غضبي علي الطريق
وحينا اهزم في الفراش
انظر إليك
لا أري لعينيك بد
قلب تحجر
مستبد
إذن
قشطة
فل يا بت
وم انهارده ما فيش غرام
واسمعي مني الحوار
لا ني مش ناوي اعيده
انا كنت عامل كالحمار
لما يمشي ويا سيده
م انهارده
التعامل خد وهات
أنا اصلي مش محتاج لخوتة
ومش فاضي لدلع البنات
ويلعن ابويا
ان يوم رجعت وقلت لك
اسف حبيبتي .. ننسي اللي فات
.
.
هي مقدمة ليست ذات قيمة
ولذلك اقول .. اما بعد / اعلنت وزارة الشئون الاجتماعية في الحكومة البرجوازية للطبقة البلوتارية في دولة خد وهات بقياده الزعيم الي مات ادم المصري اطال الله في عمره وابقاه زخرا لنا و للبلاد
ان تعلن عن حاجتها لشخصيات من الجنس اللطيف لشغل الوظائف التالية
.
.
اولا وظيفة الام


شروط الوظيفة
السن .. لايقل عن اربعين سنه
المؤهل : دكتوراه في الحب والحنان
لا تقل الخبرة عن عشر سنين ممارسة للمهنة

.
مميزات الوظيفة
نشيلك في عنينا وفي قلوبنا طول عمرنا
تامري امرك مطاع
تحلمي .. حلمك اوامر
تتطلبي لبن العصفور يحضر عشانك
لو تامري نجيب لك م القمر حته
مهما تعملي فينا حقك علينا الطاعة


.
عيوب الوظيفة
دايما تسمع شكاوي .. ولازم تحل
تحاول ترضي ابنها باي شكل من الاشكال
لازم تسهر عليه في مرضه .. ولازم تراعيه كمان
لازم تشيل عنه كل الهموم
معطاءة بلا حدود
حنانها ليس له حد
غير مسموح لها بالضجر ف وجه ابنها ابدا
تحاول ان تعبر له عن مدي حبها له باستمرار

.
ثانيا وظيفة الحبية


شروط التقدم للوظيفة
السن لا يقل عن 18 سنه ولا يزيد عن 20 سنه
ان لا يكون سبق لك خبرة في هذا المجال مطلقا
ممكن نسمح بمفاوضات
تكوني حلوة .. روشة .. مش نكدية .. مثقفة .. بتحب الشعر بتاعي أنا بس
اللون مش مهم

.
مميزات الوظيفة
قلبي ليكي .. روحي ليكي .. عيوني ليكي
كل يوم تسمعي قصيده حب
اخاف عليكي من الهوا الطاير
تطلبي عيوني اديهالك هدية واتحايل عليكي تخديها كمان
وعد مني تحسي بالامان


عيوب هذه الوظيفة
دايما وابدا تحسسيني اني الوحيد اللي في قلبك
احس اني كونك ودنيتك
تفكيرك يبقي فيا أنا بس
قلبك يكون ليا أنا بس
احس معاكي بالامان

.
ثالثا : وظيفة الزوجة

شروط هذه الوظيفة
السن لا يقل عن 18 سنه ولا يزيد عن 20 سنه
المؤهلات .. ما جستير تربية اولاد
مهارة عالية في تحمل مشقات اسرة
حلوة ..
ممكن نتفاوض .. اهم شيئ مش نكدية .. مالهاش دعوة باخواتي .. ولا بقعدتي ع القهوة ماشي؟

.
مميزات هذه الوظيفة
اضمن لكي حياه كريمة .. ومستوي اجتماعي ربنا يسهل ويكون عدل
انشاء الله نخلف وتبقي ام ... وربنا يسهل هالك وتبقي جده
لا مانع إذا اردت العمل
اوعدك انك تحسي بالامان
تامين مستقبلك بالشكل اللي يرضيكي

.
عيوب هذه الوظيفة
تسهر علي راحتي .. وتحاول ان ترضيني
اهم شيء في حياتها أنا والاولاد
لازم تسمع الكلام إذا مناقشنا ما وصلتناش لحل
كتومة اسرار .. تحب امي وتخدمها
مالهاش دوعة باخواتي خالص .. مفهوم


.
وظيفة الاخت

شروط الوظيفة
السن لا يقل عن 14 ولا يزيد عن 25 سنه
ان تتمتع بذكاء اجتماعي جيد
مثقفة ومش نكدية
ما تضربشي اسفينات عند ابويا هه مفهومة دي

.

مميزات هذه الوظيفة
تجدي اذان صاغية في أي وقت لسماع أي مشكلة
راي يفيدك في أي شيء
قلب يخاف عليكي .. ويهمه مصلجتك
نصايح ببلاش
مسؤل عنك مسؤلية كاملة
دروس توعية ثقافية في مشاكل الدنيا والحياه ببلاش برده

.
عيوب هذه الوظيفة
غصب عنك لازم تسمعي الكلام
قد تشعري ببعض الضيق من كثرة الاوامر
لازم تاخدي المشورة في أي امر يخطر علي بالك
لازم تعملي براي أنا ده في حالة إذا ما تعارض مع رايك

.
وظيفة الصديقة

شروط هذه الوظيفة
السن لا يقل عن 18 سنه ولا يزيد عن 25 سنه
مش نكدية .. مثقفة
لا تؤثر علي حياتي الشخصية

.
مميزات هذه الوظيفة
صديق مرح ومخلص
يقدم لكي نصائح بلا مقابل
لن امثل لكي اي جهة رقابية مهما كانت
يمكن ان تناقشيني في مشاكلك بحرية

.
عيوب هذه الوظيفة
ان تتحمل المضايقات التي قد تصدر اثناء تعكر مزاجي
ان تكون ذات قدر عالي جدا من الليونة والمرونة في التعامل
عليها ان تكون جاهزة في اي وقت للخوض في اي حديث مهما كانت خطورته
يمكن السماح من حين لاخر بعض المزاح

.
وظيفة الزميلة

شروط هذه الوظيفة
اي حاجة مش هختار

.
المميزات
زميل مخلص لا يتدخل فيما لا يعنيه
كل العلاقة محصورة في مطاق العمل فقط

.
العيوب
لن اسمح بتهريج من اي نوع
لن اسمح بتطفل من اي نوع
لن اسمح بتهاون في كسر الحدود

علي من تجد في نفسها القدرة علي التقدم الي شغل اي من الوظائف السابقة فعليها ان تقدم اوراقها الي الادارة وسوف فض المظروفات في موعد اقصاه ثلاث سنوات من الان .. وهذا ايمانا منا بضرورة عمل المراة .. ومحاربة للبطالة وايمانا منا بان الدين لله والوطن للجميع لم نضع اي شروطا من الدين او اللون لاعاقة المتقدمين لشغل هذه الوظائف ..عسي ان ينفعنا بها الله ويضعها في ميزان حسناتنا يوم القيامة انشاء الله


والسلام
مع تحيات الادارة العامة
للشئون الاجتماعية

ادم المصري

ـــــــــــــــــــــــــــــــــــــــــــــــــــــــــــــــــــ

علي هامش الاعلان .. لقد رات الادارة انه نظرة لقلة الاعداد المتقدمة وكثرة اعداد الوظائف الخالية لدينا .... انه تم السماح للتقدم باكثر من وظيفتين .. علي الا يكون بينهم تناقض في المهام والوظائف اي انه يحق للحبيبة ان تتقدم لوظيفة الزوجة ,,,

وهكذا .. والسلاااااام

29 comments:

سندباد مصري said...

ادم

انت حسستني انك قاعد علي جزيره لوحدك

ربك والحق

يمكن معاك حق

بقولك ايه

متنشر الأعلان ده في الجرنال

واراهنك

هتلاقي ناس تتصل وتس~ل عن المرتب

ودعواتي ليك

اذا لقيت واحده من الي بيتقدمولك شبه

جوليا روبرتس

متنساش اخوك

قصدي اخواتك

في

مجلس اداره سندباد

admelmasry said...
This comment has been removed by the author.
الوردة السوداء said...

طبعا مش محتاجة اقول ان الشروط كلها منتشبكة علية
مش كنت تسيب طيب رقم التليفون

أنت فكرتنى بعمك منير وهو بيقول حد عايز قلب فاضى
أنت شايف الحياه وردى

وعموما مش هنختلف يعنى
ابقى سيب رقمك ياعم
لكن انت اللى جبته لفسك

إيمــــان ســعد said...

هو اللى عجبني بصراحة فى الاعلان
الصراحة المطلقة

يعني جايب من الاخر

عشان مفيش واحدة تجيي تتقدم لاحدى الوظائف و يحصلها صدمة بعد كده

فكرتني لما كنت باقول انا معجبة بميكافيلى مش عشان مبدأه الانتهازي الغاية تبرر الوسيلة

لكن عشان كان صريح ان يعبر عن اللى عايزه من غير رتوش

تحياتي و اتمنى تلاقي اللى انت عايزاه

Anonymous said...

عزيزى ادم
وصلت الى مدونتك بالصدفة البحتة ولكنها فعلا صدفة خير من الف ميعاد


خفة دمك مش معقولة بجد



بس للدرجة دى المرأة فى حياتها كلها تحتاج الى التغير الكامل

طب ما تراجع نفسك قليلا ربما يكون المشكلة فيك مش فيهم



عموما اسلوبك رائع فعلا

ربنا يوفقك

ارق التحايا

رمضان كريم

MAKSOFA said...

عنايه الأستاذ أدم المصري
تحيه طيبه وبعد
أتقدم لعنايتكم
بطلب وظيفه
الأم
وأعرفكم بان كافه
المؤهلات المطلوبه
متوفره لدي
وتفضلوا بقبول فائق
الأحترام

... said...

والله يا آدم انت تحفة

كل سنة وانت طيب

انا جيت بس اقوللك رمضان كريم

:)

الوردة السوداء said...

ابسط ياعم
كل الى معلقينلك بنات
هيص بقى

admelmasry said...
This comment has been removed by a blog administrator.
admelmasry said...

الورده السودا
طب وانتي ما سيبتيش رقمك ليه في الاستقبال
.. ثم ايه بقي اللي نعلقين بنات .. هتغير من اولها ولا ايه ؟
الغيرة دي في انهي وظيفة ؟
ههههههههه
بقولك ايه يا ورده
انا ممكن اعينك بمرتب حلو .. فكري
وانا تحت امرك


بنت سعد
مياكفلي مين .. وميكا ماوس مين .. انا عايز م الاخر .. انا اضمنك مرتب مغري بس انتي فكري
تحبي اختارلك انا الوظيفة .. ولا تختاريها انتي ؟
انا تحت امرك
:حركة
غمزة خبيثة من العين اليمني مع ابتسامة ضغيرة


جينا
والله انا اللي بجد اللي حصلي الشرف .. وانا ما قولتش ان البنات عايزين تغيير .. هما عاجبني كده زي ما هما .. لاني بصراحة حاببهم كده ههههه
مش هتقولي بقي تحبي تشتغلي ايه ؟


مكسوفة هانم
نود ان نختركم علما
بانه تم قبول اوراقك
وهي الان في قسم المراجعة
وسوف نوافيكم بالاخبار اذا وافقت الادارة الكريمة علي تعيينك في وظيفة ام
والسلام



حلم
الله اكرم يا جميل
ايه مش هتشاوري عقلك
لسه عندي وظايف خالية
هاه ؟
والمرتبات تجنن .. بس وافقي



الورده السودا
صباحه قر يا سيدي
ههههههه
اشتغلي عندي في اي وظيفة من دول .. وانا اظبتك
ههههههههه

إيمــــان ســعد said...

هههههههه

و الله من غير غمزة و لا ابتسامة خبيثة


على 1 / 10 كده اكون خلصت من امتحانى و ابقى اقولك

يلا في رعاية الله

تحياتي

توهة said...

طب .... طب يا استاذ ادم منكرتش المؤهلات إبتدائيه يعنى ولا ايه

وبعدين اعتقد ان وظيفة الصديقه غير موجوده على الواقع

مش عيب توعيدوا الناس بوظايف مش موجوده

مش عارفه اتقدم فى ايه

بلاها ياعم دى شغلانه


انا اقعد فى البيت احسن اربى بلوجات وخلاص



كومنتات بقى



فانتازيااااااااااااااااااااااا
فانتازياااااااااااااااااااا

anameen said...

واللة ياادم يا بني كل اللي اقدر اقولة ربتا يرزقك بحوا تخلصنا منك وتقضي عليك وتخليك ما تعرفشي تمسك قلم

اذن قشطة

Dananeer said...

ماشى يا آدم
تفتكر النسخه الحريمى حتكون عامله ازاى
و شروطها فى كل وظيفه ايه
صحيح مين جدو وتيتى دول

Anonymous said...

صباح الخير.. التدوينة دمها خفيف.. بس مش شايف ان الخيط الرابط مابين كل الوظائف المعلن عنها هو انها كلها بتدور حول ذاتك؟؟

سابرينا said...

ادم
منك لله
مفيش فايدة فيك
اقتلك ولااعمل اية

LAMIA MAHMOUD said...

ماشي يا عم اللذيذ .. حلوة الوظايف بس ما قولتش المرتبات على كام عشان الواحد لو اتقدم لحاجة يبقى عارف الاعباء اللي حيتحملها في مقابل اية .. وعموما هي التدوينة لذيذة ودمها خفيف .. ولمضة زيك

سندباد مصري said...

اخص عليك

انا وسخ ولا عندي نيه وسخه

طيب

خد عندك

انا مش وسخ

ونيتي مش وسخه

ومسمحلكش انك تقولي حاجه زي كده ولو علي سبيل التهريج

ماشي

ولو مش ماشي اشرب من البحر

يا ابو جزره

يلا مشوفكش عندي في التدوين عشان مهزأقش

يلا

Anonymous said...

جميل اسلوبك ودمك خفيف جداااا انا بحس ان انا قاعده معاك من اسلوبك المهم ايه الوظايف اللي فاضيه عشان اقدم ورقي ؟؟؟؟

كلبوزة لكن سمباتيك said...

لا لا لا ملكش حق يا ادم ليه كده تزعل سندباد
بجد انا كمان زعلت احنا كلنا اصحاب و بنهرج سوا بس مفيش داعي ندوس جامد
اتصلحوا بقي و صلوا علي النبي
----
اما عن الوظايف فمش حعلق لحد ما اللبن يرجع صافي و الحليب يبقي قشطة

عباس العبد said...

نسيت اهم وظيفة
وظيفة الموزة ( بتشديد الزين )
فعلا ... اى دولة محتاجة حاجة زى كده
بس فى الغالب ... محدش حيتقدم
مش علشان ... الوظيفة مش ولابد
لكن لأن كلهم متعينين

كلمتين جد
الشعر تحفة .... كمل
فأنت على الطريق الصحيح

Nouran said...

ايه يا عم ده كل سنة وانت طيب يا جدو ده اول حاجة وازاي عندك 104سنة وعايز زوجة وحبيبة ما بين 18 و 20سنة ده انت غريب اوي
وايه حكاية ملهاش دعوة باخواتك دي ايه الموضوع

اما انا فمش هتقدم لوظيفة طبعا سني مش مناسب لعدة وظائف ما عادا الاخت وانا مليش مزاج يبقى ليا اخ ولد يعكنن عليا ويمشي رايه ده يبقى اخ سخيف الحمد لله اني معنديش اخوات صبيان
كل سنة وانت طيب يا باشا

Unknown said...

حلوة جرعة الصراحة والتحليل الإجتماعى الدقيق
لكنك نسيت وظيفة البنت
تحياتى

voice of love said...

ايه يا واد الشقاوة دى
كل سنة وانت طيب يا مبدع

saso said...

آدم انا مش بعد بوست المرأة سايباك بتزرع لو تطرح يا ريت
كتبت الإعلان دة كله امتي دة انا علي ماخلصتة كنت ابتديت اكرة الوظايف كلها وبافكر استقيل

صحيح.. لية وظيفة الأخت قافلة علي 25سنة متفتحها شويه انت هتخسر اية
انا كدة فاضلي سنة ومينفعش ابقي غير ماما
يلا ماما ماما مش مشكله
البارت الاولاني قبل الاعلان مشكلة :)

admelmasry said...

بنت سعد
خلاص هعمل لك .. حجز وظيفة لحد
1/10


ابيتاف
الاعلان نزل يا سكر .. فين اوراقك بقي


كروان
حيلك حيلك .. مالك وخدانا ع الحامي ليه
ثم مين قالك ان انا باعمل وظايف زي الواقع


انا مين
يارب يا خويا يارب


دنانير
انا جدو وانا بابا وانا ماما وانا نور وجدي
ثم مواصفات ايه تاني عايزاها .. كل ده مش مكفي


واحده
الان فقط ندمت علي عدم ارتدائي القبعة .. لاني اريد الان ان احني لك احتراما
لقد تعلمت الان ان لا اسمع كل الكلام مادام هناك من قد يعي



صابرينا
ههه
اه والنبي اقتليني .. والنبي اتخانقي معايا
والنبي اعملي اي حاجة


لاميا هانم
هههههههه
المرتبات هتكون حسب اوامر السياده
اطلبي واحنا ما علينا سوي التنفيذ
بس انتي اطلبي يا جميل


سندباد
ههههههههه
موت بفرستك بقي


any mous
ربنا يخليكي يا جميل .. انا قعدت ادور في اوراقك ضمن اوراق الناس اللي جت مش لاقيها .. ايه ؟
ليه ما قدمتيش لحد دلوقتي


كلبوزة
انتي فهمتي غلط
ده العادي بيني وبين سندباد


عباس بيه
انا قولت الحبيبة
الحبيبة هي الموزة .. بتشديد الزين برده
وشكرا علي نصيحتك الشاعرية



نوران
يا روح قلبي .. انا اغير الشروط خالص واخليكي انتي تحطيها علي كيف كيفك
لو عجبك وظيفة بس شاوري عليها وانا تحت امرك
ايه رايك في وظيفة الام ؟
عايز اعرف رايك بسرعة علشان دي محجوزة



ابو امل
واحشني جدا .. يا شاعر ياجميل
بس بنت ايه .. انا مالي بالبنات دلوقتي
انا لسه في عز شبابي
انا عندي 104 بس .. لسه فين اما اتجوز .. واخلف
ربنا يدينا ويديك طول العمر




vioce of love
وانتي طيبة يا جميل
والنبي يا فويس
انا كتبت عنك كونت حلو في بوست وانتي قفلتي التعليق عليه ... اديني الكومنت وبعد كده اقفليه تاني
اعاااااااه



ساسو
تحبي وظيفة ايه وانا افصلها عشانك
احنا ماشيين بمدا
الزبون دايما علي حق .. وشكرا ع البارت اللي فوق

خجل said...

انا كنت عامل كالحمار
لما يمشي ويا سيده



مش كانت تبقى احلى لو
:
دا اناكنت زي الحمار
لما يمشي ويا سيده

عموما بوست حلو ياض

سندباد مصري said...
This comment has been removed by a blog administrator.
aMiR-El ZaLaM said...

دانت وصلت غصب عن أى حد إنك تبقى آدم...


دانت آدم فعلاً....

إيه يا أخى إحتكار الحريم ده !!!

لذيذ...لذيذ بجد :ي