.JPG)
عمري مافكرت انتحر
عمري مافكرت انتحر
بس اما شوفت عنيكي كان
لازم افكر .. الف مرة
قبل ما احلم بالحياه
عايز اموت فيكي واسافر
جوة دمك .. في الوريد
شريان حياتك
اتوصل .. منك إليا
فاسمحيلي
هعيش حياتك من جديد
بدون كلام ومقدمات
انا يا حببتي .. هعترف
انا اصلي كنت ومن زمان
عاشق قديم
لكني لما اشوف عنيكي
بانخطف
فاعمل لئيم
قال ياعني مش فارق معايا
لكني بارجع وانكشف
انا اصلي بابقي في حضرتك
انسان غريب
ومختلف
ده انت القمر منك يا غالية
بينكسف
فازاي حكابر يا حببتي واعترض
والقمر ذات نفسه
عاجز يعترض
قلبك شمل كوني بنورك
باشكره
حلمي اسافر جوه منه
واعبره
واعدي فيكي الف شط والف مرسي
واتوه في بحرك
وانخطف
وعمري ما ارسي
قلبي ينادي
ماليت سماها وبحرها
حب وحنا
كده انت راضي ؟
فقول يا قلبي برده لسة
صورتك سراب
معرفش ليه دايما بعيد
صوتك صدي .. جاي م الفضا
دايما شريد
معرفش ليه حواليكي هالة مبعدة
لمسة حنان
من ايد حبيب
يمكن عشان كونك ملاك جاي م السما
يمكن اله الحب في العصر الجديد
انا اصلي عاجز اوصفك
كل الصفات عاجزة تحدد ملمحك
وانا كل مرة المحك
باشوف جديد
ساعات اشوف ملاك
وطاير في السما
فارد جناح الحب فوق كل البشر
وسعات بشوف حورية من
حور الجنان
بيضا ولا التلج في لحظة شتا
وكمان باشوفك سيندريلا
راكبة علي حصانك اميرة
مستنظرة فارس شجاع
وكمان باشوفك ورده في
عروة جاكته
حاطك عريس .. ليلة فرح
انا قلبي وياكي انشرح
والحب في عنيكي انطرح
والحب في عنيكي انجمع
والحب في عنيكي انقسم
والحب في عنيكي انضرب
.
الحب في عنيكي انطرح
........ للعاشقين حل
الحب في عنيكي انجمع
....... قلب العزول مَّــل
الحب في عنيكي انقسم
....... عشان يكفي الكل
الحب في عنيكي انضرب
........ طلقة تصيب الذل
24 comments:
لااااااااااااااا
دا كده سحر بجد
ايه يا ابني دا
بجد جميل يا ادم بجد
لذيذ وليك شخصيه في الكتابه
هىىىىىىىىىى
آدم انت وقعت ولا ايه؟ ايه الكلام الحساس دا ما كنت عاقل
بس آدم
ييمكن عشان كونك ملاك جاي م السما
يمكن اله الحب في العصر الجديد
مفيش ملايكة ع الارض فى الواقع لكن فى الخيال انت بتشوف الناس ملايكه
عموما
تحياتى ا
على الرغم من انى حسيت فى الاخر انى فى حصة رياضه واترعبت وقلت اكيد مسأله كلاميه جايه ورا بس الحمد الله عدت وإتحلت
بس البوست حلوة
فانتازياااااااااااااااااااااااا
فانتازيااااااااااااااااااااا
حلو البوست جدا ودمه خفيف لدرجة اني سمعت صوت الكلام وانا بقرأه
موضوعات مدونتك كمان جميله وبالذات موضوع يا بني ادمين العالم اتحدهاللي بتقول فيه الكلام الكبير بتاع من امتى مجتمع المدونين بينقسم ليلى وحنفى ولا هلال وصليب
وتحيا كل الحاجات
كراكيب كركوبة
فعلا اثبت انك عاشق قديم.. مخضرم فى فنون العشق والهوى .. جميلة تلك العيون التى اخرجت من داخلك كل هذه المشاعر والأحاسيس...
جميله أبياتك حساسة وشقية وشجية، زى ندى الصبح ونسمة هواء الفجرية
جميل ياشاعر
تحياتى
اية يا ادم... قعدتك معايا علي الحقيرة فجرت جواك حاجات جميلة
اي خدمة يا عم
بس مادام الموضوع كده انا هاعملك جدول علشان نقعد فيه علي الحقيرة مع بعض
يخرب بيتك
أنا مبسوط جدا لأنى بادىء أشوف بعينى الدنيا و الشعر هيبقى شكله إيه بعد كام سنه
إنت باهرنى لأنى كنت فاكر إن انا لوحدى و كويس قوى إنى لقيت جنبى علشان نكبر بعض
إسترسال هايل فى الكتابه
صور جمياه قوى بس يعنى منها مكرر و متقال
نهايه فوق الرائعه
إدعيلى و أنا طبعا هادعيلك و ياريت تكلمنى ع الموبايل
0109189140
و أحلى سلاااااااام
حلوه قوى قوى قوى يا آدم
فيه بعض الكلام اللى جاى ورا بعضه متكرر شويه بس بجد ده مش مقلل قوى يعنى من القصيده و بجد معى طول القصيده إلا إنى ماحستش إنك بتكرر معانى أو إنك مش لاقى كلام تقوله أما بقى بالنسبه للختام فبجد حاجه روعه جدا
بجد مافيش فيها حاجه تتقال
آدم الطريقه اللى إنت كتبت بيها الختام دى ليها أسم ياريت لو تفكرنى بيه؟
جامد يا باشا
برافو ادم
احساس عالى من القلب بغض النظر عن الاسلوب
تحياتى
كتابتك فيه اسلوب راقى جدا جميل بجد
نزلت بموضوع جديد تعالى شوفه
ههههههههههه
اشكركم جميعا
تونا
لا سحر ولا شعوذة .. دي خفة ايد
مورجن
جوتن مورجن يا ست البنات .. هو باين كده شكلي مفضوح ياعني
هههههههههه
فانتازيا
انا كل خوفي اني احب المرة الجاية بالتفاضل والتكامل ساعتها القصيده هتبقي صعبة قوي
كراكيب
اشكرك جدا علي زوقك .. وعجبني جدا ان كلامي العبيط ممكن يعجب ناس حلوين زيك
بعدك علي بالي
اااااااااه
اقولك ايه واعيد لك ايه
وانا اللي كنت باشا وبيه
ولما بعدتي
معرفش اللي حاصلي ايه ؟
بجد وحشاااااني
كورتيكس
ملهمي
ايه رايك بقي .. باتعلم بسرعة ؟
حبيبي
اوعي تغيب لحسن غيابك مر
زابقي عدي وابقي مر
محمد ابو الفتوح
اشكرك جدا جدا جدا
وبناء عليه احب اقولك
اهو انت اللي يخرب بيتك
هههههههههه
سيفت النمرة
.. ههه
الفنان هيثم
شد حيلك بقي ولحن
ههههههههه
جبلاوي
فينك ياعم والله وحشني
بقالي كتير ما شوفتكش
بس منور
مفلس افندي
ماشي ياعم وجب الزيارة
كويس يا ادم انا شايفك اتحسنت كتير عن الاول وده فى حد ذاته كويس
لكن ياترى هل ده موجود فعلا ولا هو حل لمشكلة معينة
يا رب اشوفك دايما على خير
.والسلام
يا سلام ايه الكلام الكبير ده يا عم اينعم قلبت حصة رياضة ف الاول بس بجد حلوة ما انت بتعرف تكتب حجات حلوة اه مش ع ايامك يعني بتاعة شاب صغنون مش عنده 104 سنة :)
ادم.. انت احسن من المرة اللي فاتت - بوست نكستي - اللي كانت رائعة اصلا
اسمحيلي هاعيش حياتك من جديد دي قوية جدا جدا:) بس لو مش هتزعل يعني البارت اللي تحت مش بقوة الجزء الأول
من اول ليلة فرح مش آدم اللي فالاول اللي كتب اعدي فيكي الف شط والف مرسي
ابيتاف
اشكرك كثيرا علي رايك
فكما تعلمين هو مهم بالنسبة لي
كاست واي
بصراحه مش عارف ؟
حاول انت تقارن بين حالتي دلوقتي وحالتي الاول .. ولا ايه ؟
نوران
تعرفي ايام العشرينات ؟
ايام سعد زغلول ومظاهرة تساعتاشر ؟
عارفهاها
يوميها كنت لسه شباب وصحة .. كنت اخد السلم جري .. كنت بقول كلام يا بت يا نوران
لكن هنقول ايه
الصحة دي بتاعت ربنا
والسلام
ساسو
علي فكرة انا بقيت استني تعليقك علي اي قصيدة .. لاني بقيت متاكد من راي وزق حقيق مستمتع بالشعر
قليل جدا اللي بيتكلم وه فاهم اصلا
لكن انا معاكي
الحته اللي تحت كان فيها نوع من استعراض العضلات شوية
اهو بشوف نافسي ههههههه
والسلام
تسلم ايديك يا ابني
هو ده الشغل
ادم باشا
مين دي بقي سعيده الحظ يا نجم؟
بزمتك عمرك ما فكرت تنتحر
ديه يا ولدي الف به أفكار
طيب
انا عارفك كويس وعشان عارفك كويس
مش عاجبني البتاع ده
اه والله مش عاجبني خالص
حاسس انك مش حاسس بالكلام
مركبه تركيب
لا أنا غلطان
طيب ايه رأيك أني مش غلطان
وأنا عارف أنا بقوله ايه
لما أشوفك
وقعتك سودا
والسلام
اكتب بالرصاص
اللي يسلمك يا باشا
محمد مفيد
هههههههه
خمن كده ؟
سندباد
ابوس ايدك ارحمني انصفني
ده انا غلباااان
بصراحه انت فاجئتني
لم أتوقع منك كل هذة الرومانسيه والكلام الحلو
كل ده كنت مخبيه فين
هههههههه
في جيبي
شكرا مكسوفة
تسلم ايدك
جميله اوىوعجبانى
عمري مافكرت انتحر
بس اما شوفت عنيكي كان
لازم افكر
حلوة اوى
وانا كتبت قصيده جديده ..
قصيدة جميلة للغاية
و رشيقة الكلمات
تحياتى
الله الله الله
Post a Comment