تعليقا علي ماحدث في انتخابات المهندسين

امبارح كان عمري عشرين 

امبارح كان انتخابات نقابة المهندسين لاول مرة من اكتر من 17 سنه ... 25/11/2011 يوم لن ينساه التاريخ .. كان مليونية الفرصة الاخيرة .. والاخوان نظمت مليونية الاقصي .. وكان ليلة راس سنه هجرية جديدة .

.

اول مرة في حياتي اروح انتخابات .. واول مرة اشوف الحبر الفسفوري .. لا وايه حضرت الفرز كمان بعض اللجان باعتباري احد المرشحين .. انا كنت نازل في الانتخابات بتاعت النقابة .. بس انا كنت قدمت تنازل لمجموعه المستقلين اصدقائي المناضلين اللي تعلمت معاهم ياعني ايه انتخابات عن الكرسي بتاعي في الشعبة  .. لما قالولي محتاجينك في النقابة الفرعية ما اتخرتش 

.

انا ماديتش صوتي لنفسي في الشعبة التزاما بالقايمة اللي وافقنا عليها كلنا ... كنت حاسس ان اليوم دا مش بتاع مصالح ولا ينفع فيه انانية ... لازم كلنا نصغر قدام الهدف الكبير وهو روح الاغلبية 

.

تواجد الاخوان كان بكثاافة شديدة جدا ... رغم انهم كانوا مختفيين طول الاسبوع اللي فات وقت الضرب ما كان شغال في التحرير ... الشيء اللي خلي اكتر الناس تزهق وتروح اصلا ... لكن بغض النظر عن مين كسب ومين خسر يبقي شيء واحد ومهم 

.

النقابة رجعت حرة لينا .. والمهندسين اليوم في عيد 

.

اعتقد ان طالما بقي فيه مجلس نقابة منتخب .. بقي فيه ضهر للمهندسين نقدر نتسند عليه .. ونقدر نطالبه بحلول لمشاكلنا .. ونقدر نحاسبه لو اخطا .. ونقدر نكافئة لو كان ادائه مميز 

.

انا مهندس وافتخر ... وايمانا منى بمعني الديموقراطية وايمانا مني بشرعية صندوق الانتخابات ... انا سادعم نقيب المهندسين مهما كان اسمه