Pages

Subscribe:

Friday, December 31, 2010

احيه يابو سوسو احيه

جاسوس ايه ياعم وبتاع ايه انت بتاكل م الكلام دا قال جاسوس قال ... قال ايه مسكنا جاسوس كان بيتجسس لصالح اسرائيل .. ياسلام .. اه والله
.
انا نفسي حد ابن حلال يقولي ايه عندنا مستخبي عشان حد يتجسس عليه دا الدنيا عندنا مفتوحة ع البحري وانا راجل في سويسرا وعارف كل حاجة .....دا الامريكان في سويسرا اكتر من المصريين نفسهم يا جدعان .
.
يالهوي .. اسرائيل الكخ دي بتجسس علينا احنا ؟؟؟؟؟ والنعمة اه .... طب دي صديقة ياعني مافيش بينا اي مشاكل .. ثم هي ايه الحكاية هو كل سنه نقفش لهم كام جاسوس كدا ولا ايه ... احنا كدا مقطعين ارزاق والنعمة العالم كدا بيتوهم هتتقفل مننا
.
صراحه صراحه كدا انا مش داخلة عليا حكاية الجاسوس دي .. جاسوس ايه وبتاع ايه .. يا جماعه صلو ع النبي
.
بقي النظام اللي فشل يوفر رغيف العيش ... قادر يمسك شبكة تجسس لصالح اسرائيل
.
النظام اللي فشل يوفر انبوبة البوتجاز ... قادر يمسك شبكة تجسس لصالح اسرائيل
.
النظام اللي فشل يعمل شبكة كهربا في اكبر دولة عربية ... قادر يمسك شبكة تجسس اسرائيلية
.
النظام اللي فشل يطلع جامعه واحدة ضمن اول خمسميت جامعه علي مستوي العالم ... بقي عنده تكنولوجيا تخليه قادر يمسك شبكة تجسس لصالح اسرائيل
.
النظام اللي فشل يسيطر علي اسعار السوق خصوصا المجنوة يا قوطة ... قادر يسيطر علي شبكة تجسس لصالح اسرائيل
.
النظام اللي فشل يعمل شبكة مواصلات مرورية ادمية في القاهرة .. قادر يمسك شبكة تجسس لصالح اسرائيل
.
النظام اللي فشل في السيطرة علي بلطجة الانتخابات ... قادر يسيطر علي جواسيس اسرائيل
النظام اللي
.
لا والاكادة ان الناس رايحة مع الهوجة .... ويظل النظام هو حامي الحمى ورافع لواء الامن والامان داخل نطاق الجمهورية .... ماشاء الله عليه بيمسك الاسرائيلين الوحشين المتفوقين علينا في كل المجالات وارجوك بلاش تعد لحسن العد بيجيب النحس .. كفاية سبع جامعات اسرائيلية ضمن اول خمسميت جامعه لحظ رقم سبعه دا رقم يهودي مقدس
.
كل دا كدا والله اعلم مش عارف ليه حاسس انه فرشة لانتخابات الرياسة القادمة ان شاء الله ... مافيش مانع من كام ماتش كورة سخنين زي الاهلي والزمالك ... ومتابعه لاخبار شيكابلا .. علي كام حادثة ارهابية ... علي كام خبر قبض علي كام جاسوس لصالح اسرائيل ... الناس تتلهي ويفضل قانون الطوارئ شغال
.
والناس برده بتاخد علي قفاها .. لا والاكادة برده ان الناس مستنية لما ييجي واحد صالح يحكمهم ... طب منين .. ماهو من اعمالكم سلط عليكم
احنا مستنين حد ينزل من السما .. يقولنا يا مصرريين ... انتوا استحملتو كتير وانا نازل اخلصكوا من العذاب دا كله ... انيهاهاهاهااه
نقوم نفرح بقي ونقول هيه .. يقولنا ما تفرحوووووووووش قوي كدا .. انا عزرائيييييييييل انياهاهاهاهاهاهاهاها
.
.
كاتنا خيبه في كل حاجة .. قال مصرين حضارة وتاريخ عايشن علي اوهام يا ناس وياريت نفوق .. قطر فازت بحق تنظيم المونديال اللي خدنا فيه صفر .... الواقع بيقول حاجة وكلامنا بيقول حاجة تانية خالص
ياريت الناس تفوق بقي وتبطل نوم في العسل يمكن يمكن ... ييجي بعد خمسين سنه كدا جيل يقدر يعمل حاجة

3 comments:

توهة said...

بعد السلام

علي فكره انا شايفه الفشل اللي عددته ده مش حاجه كده غير مقصوده وانهم محتاسين غلابه ده مقصود ده هم كده نجحوا في انهم ماعملوش حاجه ...ناس مش هاممها الا نفسها مش فارق معاها الشعب طالما هو مرتاح حيشغل باله ليه بقي يالبقر

وعلي ماتستغربش ان ممكن يكون لهم اكبر نظام اسنخباراتي او علي الاقل نظام محترم لان ده يخص امنهم الشخصي برده بس بيسمخدموه علي مزاجهم وفي الوقت اللي يعجبهم ما هم برده مش عبك عشان يامنوا لاسرائيل اه حبايب بس الحرص واجب ..انت متخيل يعني ان امريكا ملهاش جواسيس في اسرائيل والعكس يابني حايجي الوقت وكل دوله دلوقتي يتساند التانيه حيكلوا بعض فيه
وعلي فكره برده مصر لها نظام امني داخلي محترم جدا ولا اي دوله متقدمه
النظام مش غبي ولا عبيط بس بيعاملنا علي اننا الاغبياء وبدأوا يصدقوا فعلا اننا اغبياء بدليل اللي حصل غي الانتخبات نصب عيني عينك وبقولك الانتخبات نزيهه !!؟؟؟؟
بس انا مؤمنه ان ما طار طير وارتفع الا
كما طار وقع علي جدور رقبته

المهم ... كل سنه وانت طيب يا برنس

تحياتي

ادم المصري said...

لك التحيات مثيلها واكبر كمان
.
.
انا مش موافقك علي فكرة في حكاية نظام امني قوي دي معلشي انا في الجيش وعارف
.
.
اكبر مثال بسيط ممكن يبين لك المخابرات بتاعتنا شغاله ولا لا ... اللي حصل في السودان
كارثة بكل المقاييس
.
المخابرات اتفاجأت بالبلطجية هناك زينا زيهم بالظبط .. ودا كلام من جوة
.
.
حتة بقي نظام امني يحمهيم والكلام دا اساسا هما مش محتاجين واوعي تصدقي ان اي حد في النظام له ولاء للنظام ولو بتلاته تعريفه
ياعني اول ما هييجي الطوفان
.
.
البلد هتغرق هتغرق
والنظام اللي كابس علي نفسنا دا هيختفي بقدرة قادر زي ما حصل لجيش العراق بالظبط
.
.
حتة جواسس لامريكا في اسرائيل او العكس دا وارد وبيحصل
بس دول دولتين متقدمتين واحدة منهم عايشه علي قفا التانية بس فيه ندية
.
.
لكن بين مصر واسرائيل الندية هنا من انهي نوع
.
دا لما بيموت لنا عسكري ع الحدود اسرائيل ما بتكلفش خاطرها وتعتذر
اسرائيل اللي اتخطف لها اتنين عساكر دكت لبنان دك
.
.
سيبك انت النظام دا لو نجح في عمل شيء واحد ااكد لك انه كان هيلمع فيه ويظهره عشان يبرر جلوسه علي الكرسي المده دي كلها
دا نظام بيعاني من التخمة

.
.
تحياتي
لمناقشاتك وحشة كبيرة
ياريت ما تقطعيش الزيارة

توهة said...

ممكن يكون كلامك صح في جتة الاستخبارات دي ان لو امريكا غضبت علينا يبقي يلا السلام ده اكيد يعني ومقصدتش بقوة الاستخبارات ان لحماية النظام او البلد ده لحماية مصالح شخصية فقط
وبعدين انت متصور ان موت عساكر علي الحدود حيهز شعره في راسهم ولا يهمهم مش بعيد يكونوا مبركين العمليه اساسا

والنظام الامني اللي اقصده اللي هو ضد الشعب اللي بيقبض علي المعارضين او الي اخره من الاشياء ده اكيد قوي جدا بدليل ايام موضوع الارهاب والتفجيرات اللي كانت بتحصل دي قدروا يقضوا عليها لوحدهم بقي بمساعدة حد المهم انهم متمكنين في الناحيه دي

انت لسه في الجيش ربنا يعينك

انت بس نزل مواضيع سخنه وانا حهري البلوج بتاعك رغي : )
وانت كمان متقطعش الزيارة

تحياتي