Pages

Subscribe:

Thursday, July 29, 2010

مجذوب حقيقي

انا الصوفي اللي بيدور عليكي
بين جموع الناس
مشدود عقلي ومتكتف
بالصورة والاحساس
واخد عهود ويمين
والعهد عند الله
قلبي يصوم الحب
ميت مالهش حياه
مرهون علي وجودك
وبوجودك
ومين يلقاه
مجذوب حقيقي صحيح
زاهد اي مال او جاه
مطلوق علي العالم
ابحث في تربته
وسماه
عن كائنه مختلفة
مخلوقة من دهب
او ماس

14 comments:

توهة said...
This comment has been removed by the author.
توهة said...

دهب او ماس ودي حتنقب عنها في انهي منجم بقي
: )

بس ايه ده فين ادم وكتاباته
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

admelmasry said...

هههههههههههههههههه
مش عجباكي ولا ايه ؟؟؟؟
.
.
.
ولا انت بترديهالي ياعني اكمني قولت ما انبهرتش عندك ؟؟؟
ماشي ياستي ماشي

يا مراكبي said...

الله
قصيدة رقيقة جدا
وممكن تكون الحبيبة دي موجودة فعلا بجد
وهتلاقيها

أيوة كده ارجع لأيام زمان

توهة said...

تصدق فكره : ))))

لا والله مش كده انا قريتها اكتر من مره علي كذا يوم حتي قبل ما تعلقلي علي البوست بس مش حاسه بيها معرفش ليه

هي كويسه بس ما انتختش مزاجي كالعاده
واحنا متعودين منك علي الحاجات الصادمه
ولا ايه

هي فعلا زي ماقال مراكبي رقيقه

بس زي ما قلتلك قبل كده الكاتب من حين لأخر بيحب يقلل التون بتاعته عادي ده مقبول بس القارئ ديما متوقع الافضل
وده ظلم حقا : )

توهة said...

يعني كلنا ظالمين ومظلومين في نفس الوقت: ))

كلام وخلاص said...

لطيقة
:))
لولا الامتحانات و مودها الحزاينى اللى بتخلى الشعر و الضحكة الرايقة و احيانا كمان التنفس رفاهية كنت قولتلك ليه الحب مرهون بالدروشة و الاحجار الكريمة و شدته من ارتفاع الكام سم اللى بيرفعوا الواحد عن الارض
بس اعانك الله على بحثك
تحياتي

OldCatLady said...

و أخيرا بعضا من الشعر....

تكريس الجهود و المشاعر و كل شئ فى انتظار من ستأتى دوما مهما بدا مقدمها بعيدا و ضربا من ضروب الهذيان....أحترمه تماما

ذاك الأمل... :)

عجبانى جدا جدا جدا

سلامات

admelmasry said...

يا مراكبي
ــــــــــ
يا هندسة تسلم
ربنا يخليك



تووووهه
ــــــــــ
علي فكرة البوست بتاعك الاخير حلو وابهرني
اما اشوف بقي تعليقك هيبقي ايه ؟؟؟




كلام وخلاص
ـــــــــــــ
احيانا مود الامتحانات يتطابق مع مود واحد في الجيش ... ياريت تبقي تطمنيني علي نتيجتك
ليه بقي الحب مرتبط بالدروشة تعني الحب بلا اي هدف او غاية .. الاحجار الكريمة محاولة لوصف المحبوبة بشي غالي طبعا المحبوب لا يقدر بثمن ولكن لان القياس اصبح مادي فبقي المشبة به مادي ايضا
الموضوع كبير كبير
شكرا لمرورك شرفتيني والسلام

admelmasry said...

صيدلانية
ـــــــ
والنبي قولي لصاحبتك بتاعت الزقازيق لحسن بتردلي تعليق بتعليق
شكرا لمرورك

توهة said...

اذا كان كده بقي القصيده فوق الخيال
الخطير الغير الممكن الغير المعقول في اللا وعي المحصور داخل انبهاري المكتوم
: )

يا عم ادم ضميري مش للبيع : )

شكلها حتقلب خناقه : ))

admelmasry said...

يا فندم ماحدش قال حاجة يا فندم
ولا حد يقدر يقول
.
.
.
وربنا يكفينا شر الخناقات يارب
تحياتي
والسلام

جلال كمال الجربانى said...

صوفى وبتدور على ذهب وماس
عجبى
بس جميله

وكل عام وأنت بخير حال

dramaqueen said...

حلو اوى البوست يا ادم
كل سنة وانت بالف خير