Pages

Subscribe:

Thursday, February 26, 2009

عن الهايكستب واشياء اخري

دخلت التجنيد يا جماعه .. وهتجند
.
.
كايوم ولا الف ليلة .. كله عمال يقول ماتخافش انشاله الله تأجيل ان شاء الله تاجيل لحد ما لبست تلات سنين
وتقريبا اللي كان بيدعي دا .. بيقول حاجة علي لسانه وف قلبه حاجة تانية خالص
الله يسامحه بقي اللي كان السبب
.
.
يوم الارجا قالوا تعالو الساعه سبعه
وانا زي العبيط صدقت
واتلطعت ف الشمس مع كل العبط والهبل اللي صدفوا زي
لان الارجا اتقالت الساعه اتناشر
.
.
لغير المثقين او متعددي اللغات احب اشرح لكم
معني كلمة الارجاء
الارجاء دي معناها ف اللغه التاجيل
ياعني اللي ياخد ارجاء يبقي خد تأجيل
ودا اليوم اللي بيسمع فيه كل واحد اذا كان هياخد ارجاء ولا هيلبس
.
.
اول حاجة خدوها بتوع طب كلهاتهم
وبدا علي بتوع هندسة
ما سبابوش حد ف حاله
اول تخصص خدوه هو التخصص بتاعي
يا حسرة عليا يا حسرة عليا
.
.
انا لو كنت دخلت زراعه قسم بطيخ كان زماني ف الجيش
سبحان الله
خدوني اصلا بسبب التخصصات
ولما نادوا ع المواليد
خدوني برضوا
ياعني خدوني مرتين
كاتها نيلة اللي عايزة تجيب عيال
.
.
انا خلاص يا جماعه
هاخش الجيش وهاتجند
وربنا يستر بقي وغزة تحترم نفسها
عشان المشرحه مش ناقصة قتله
مش علي حظ امي انا يقولوا نحارب
.
.
الله يخرب بيتك يا اسرائيل
ملعون ابوكي يا امريكا انت واروبا ف يوم واحد
.
.
كاتها نيلة اللي عايزة الخلف

9 comments:

إبراهيم شعبان said...

على فكرة أنا قضيت جيش تلت سنين ضابط احتياط زي سعادتك، و كل أقدر أقوله لك ربنا يصبرك

انا حره said...

يالا بالشفا هههههههههه

والله هتوحشنا ياادم

هتلبس فى ابريل انت كمان ان شاء الله؟

بس اموت واعرف هما ليه مستقصدين الدكاتره وبياخدوهم كلهم

dramaqueen said...

معلش يا ادم
ربنا يصبرك

متخافش 3 سنين هيعدوا هواااااااااااااااااااا

admelmasry said...

علي الصبي
ــــــــــــ
انتم السابقون ونحنو الاحقون يا حضرة الظابط


انا حرة
ـــــ
يابنتي مش بتوع طب بس
خدوا الناس كلاتهم
طب وهندسة كلهم بدون تنقية
هو انت حد رايح من عندكوا ولا ايه ؟؟
قولي لي انا ممكن اوصي عليه جوة



دراما كوين
ـــــــــــ
ربنا يصبرنا فعلا
متشكر قوي دراما ربنا يخليكي

OldCatLady said...

أوبــــز

جيش و تجنيد

اللهم طلع روحهم.....قال يعنى هما بيطلعو ناس نافعة من الكليات و المدرارس

لما هيفلحولى فى التجنيد

معلش يا بنى....كلمتين كا لازم أقولهم

ربنا يديك الصبر و طولة الروح و النفس

البـــس

يا مراكبي said...

معلش

ما حدش عارف الخير فين

يمكن هو ده اللي فيه الخير بس هتعرف بعدين

عموما كله يهون

بس غريبة .. أنا دعيت ليك ب 5 سنين مش 3 بس؟

admelmasry said...

صيدلانية مطحونة
ـــــــــــــــــ
زي ما كون عريان ولبست
...
متشكر يا فندم علي جرعه التشجيع والتحميس .. مش التحميص مع الفارق طبعا
تحياتي ونجيلك ف المسرات



يامراكبي
ــــــــــــ
احمد باشا القاضي
انا كنت حاسس برده ان فيه حاجة غلط
مش معقولة الناس كلها تدعي تاجيل والبس تلات سنين
اكيد كان حد بيدعي ف سرة
علي العموم ملحوقة
لك يوم برده
هههههههههههه

مصطفى حسان said...

يا بني ربنا يصبرك .. هم تلات سنين هايعدوا بالطول والعرض .. وانا عاوز اقول لك على حاجه بالرغم اني ما دخلتش جيش إلا إني أعتقد ان في حاجه مهمه جداً في موضوع الجيش ده لازم تاخد بالك منها .. وهي إنك لما تتجند عيش كأن حياتك كده وأقلم نفسك على كده ولما تنزل أجازة اتمتع بيها قد ما تقدر .. ولما ترجع تاني إنسى كل حاجه وافتكر بس انك مجند عشان ما تتعبش

شجره الدر said...

ياعينى ياادم
ولا يهمك بكره تخرج والسجن احم قصدى الجيش للجدعان
ولا يهمك ايه يعنى تلاته كانك خدتهم ف جنحه ولا حاجه
وربنا يصبرك يابنى على مابلاك