Pages

Subscribe:

Sunday, February 15, 2009

مظلوم الحب تملي معانا
ولا احنا يا دنيا عشان قاسيين
دايما ظالمين ؟؟

مجروحة الغنوة تملي
بوتر العود المتعود طعم الاحزان

الورد ..ر
الشوك واقف حواليه حارس ددبان

والضحك ..ر
ان كان طالع م القلب
تملي تصاحبه دموع
فافضل قلقان

مش عارف ليه
دايما افراحي تكون مزروعه ف غيط احزان

مش آمن ليه غدرك يا زمان
عن دنيا الحقد الكدب الكرة الزيف الدم هاصوم
هاصرخ .. بالصوت العالي وازوم
انا مش بلياتشوا .. انا مش اراجوز

انا شاب صحيح
لكن بعنايا صبحت عجوز
يمكن كان عمري قصير لكن
من يوم ما وعيت ع الدنيا دي
وانا وسط الاحزان مغروز

انا عايز اقول
وبصوت عالي
للناس ف الدنيا دي بحالها
ان انا انسان
ومافيش طب ممكن
لو ينفع
او حتى يجوز
العالم لازم يتفهم
ان انا انسان

انسان وبسيط جدا خالص
والله بسيط جدا خالص
من حقي الحلم الحب
من حقي اعيش
وما تنكرنيش
اسوار وحدود وسجون وحيطان
لا بحب اتفزلك واتنطط علي خلق الله
ولا حبش اعيش ف الدور برده
ورزقي علي الله

لكن .. ر
متمسك جدا بحقوقي
ومبادئ مزروعه ف دمي
الناس .. من طين
والطين اوطان
والذل ان كان بيطول ايام
وشهور وسنين
فالناس عمرها بيطول ازمان

والصبر دا لعبة اطفالنا .. ر
الرضع
نصبر ع السو ونتسابق ... ر
مين اللي هايصرخ ف الاول
ويقول زهقان

ف بلادنا الطفل اما بيولد
بنأذن ف شماله اقامه
ويمينه ادان

ف بلادنا الطفل اما بيولد
يتعلم يضرب بحجارة
فيصيب ويموت الف جبان

ف بلادنا الطفل اما بيولد
نزرع في عنيه
نعناع وريحان

ف بلادنا الارض اما بتعطش
تشرب م الدم

ف بلادنا الطفل اما بيولد
بيشيل علي كتفه جبال الهم

ف بلادنا الارض البور .. ر
مش بور
ف بلادنا الطين ف الارض غيور
برده بيصبر .. لما ولاد السو تغور

5 comments:

انا حره said...

ياااه ياادم بجد حلوه اوى من احلى الحاجات اللى قريتها ليك

فيها كام جمله جامدين اوى

تسلم ايدك

نوري said...

اللـــــــــــــــــــــه
جميله قوي يا ادم
بجد تحفه
اجمل حاجه فيها
انها بتمسك من بعيد
او يمكن بيد خفيه بتشجعك وتطبطب عليك

بست وشز فور يو

فتــافيت (رحاب الخضري) said...

بجد تحفة انت فنااااااااااااان
قريب اوي من الابنودي
انت رائع والكلام والاحساس والتسلسل

ايه ده بجد .. فعلا انت 1500 بجد خبرة وابداع

تقبل مروري الاول ونييييييفر الاخير ان شاء الله

وسعدية جدا بزيارتك .. ويارب تكرر

شجره الدر said...

زى ماتعودت عليك من يوم ما عرفتك
الكلمات القويه والمعانى المعبره جدا
افتقدتك وافتقدت المجتمع التدوينى كله
لكن مش ف ايدى
عجبنى البوست تحياتى

محمد أبو الفتوح said...

تحفه