Pages

Subscribe:

Thursday, February 18, 2010

الحلم .. الواقع

طول عمري باشوف للحلم الوان
وبشوف الواقع كالسجان
فدخلي الواقع قوة الحلم
اصبحت بخاف الحلم كمان
.


لقد دعاها اليوم الي سالنترو .. دون غرض محدد .. بدون اي تعمد لشيء كعادته .. باستغراب شديد حتي انه إندهش من نفسه ، كان هو اول كافيه يتبادر الي ذهنه عندما فكر ان يدعوها للخروج معه
.
لايعرف لماذا سلانتروا بالذات ، هو الذي كان لايشعر بطعم الشاي الا من علي قهوة حقيرة لا يزيد فيها ثمن الكوب عن جنيه واحد .. هل بسبب تيسر حالته المادية بعد الشغل الجديد وسياسته الجديدة في إدارة حياته ... ام انه يعلم ان مستواها الاجتماعي او حتي المادي لن يسمحا له ان يصحبها في مكان اقل من سلانتروا او شبيه به
.
اول ما تجالسوا بادرته قائلة : كل سنه وانت طيب .. انا عارفه ان انهارده عيد ميلادك ، ثم اخرجت له هديتها .. ساعة انيقة لا يقل ثمنها عن الفين من الجنيهات علي حسب تقديره هو .. لا يجيد التثمين اغلي شيئ اشتراه كان" الموبايل ابو كاميرا الجديد"ه
.
نظر اليها وابتسم ثم قال:ه
طول عمري كنت بحلم ، كنت بحلم مثلا اني وانا ماشي تعدي بنت جميلة وغنية تحاول تنتحر فاقوم انقذها ،، واكون باعرف ارسم فلما تيجيلي صدفة -عشان تشكرني طبعا- تشوف صورتها فتحبني ، واحبها
وابوها يجيلي ويتحاليل عليا اني اسيبها لاني مش من مستواها فاتعذب وهي كمان تتعذب .. واخر الحلم .. لما انجح بقي وابقي مهندس كبير ومشهوروكل الناس عارفاني -مش عارف ازاي- يجيلي عقد بره واسافر ، يقوم ابوها يرحمها من عذابها ويجيبهالي عند الطيارة ونتجوز
.
او اني اسافر شرم الشيخ اشتغل وابني مسقبلي فقابل مزة جامده جدا وغنية جدا تحبني واحبها ..واحاول اشتغل احسن بقي عشان اعجبها ..واعمل مشروع هناك .. يساعدني فيه رجل اعمال ما بـيخلفشي فيشوفني ابنه مثلا -ايوة زي حسن حسني بالظبط- هي بقي تشاركني فارجع مصر بقي وانا معاي فلوس كتير ومتجوز موزايا جامده طحن
بس دا ما كانش بيحصل ، عارفه ليه
لاني ببساطه .. عمري ما كنت بامشي وسط العربيات .. طول عمري بامشي ع الرصيف .. حتي لو مي عز الدين حاولت تعدي الشارع .. هكون بعيد ومش هالحق انقذها
ويوم ما فكرت اسافر عشان اشتغل فعلا .. سافرت راس البر .. حيث الاسرة عندما تريد ان تشتري حلويات .. تجيب اتنين كيلو مشبك من عند بلبول تفتكري اسرة زي دي ... هيخلفوا مين ياعني عشان احبها
.
اما معاكي انت .. وانت بالذات حلوة ، وغنية .. وزي ما بيقول الكتاب فعلا ، بحس اني خايف .. مرعووب ، ميزة الحلم انه مايتحققش ، لكن لما فجأة كدا نلاقي الحلم بيتحقق قدامنا واحنا لا اوليا ولا انبيا .. لازم نقلق ،،، تعرفي .. !!!!ه
يمكن عشان لا انقذتك من عربيه وانت بتعدي ولا شوفتك في شرم .. تكون دي المشكله .. الله اعلم
.

6 comments:

Anonymous said...

حلوه أوي ياأحمد
بياترتس

توهة said...

tabe3y en el bany adm lamma yet7a22alo 7elm aw nesf 7elm 7atta bye2la2 ,,,,,,,,,,,,,, bas eih akhret el 2ala2 gher 3adam esteqrar ...... 3esh el la7za b la7ztha w ettakel 3ala allah : )

enta khallast gesh walla lessa ???

fen aradeek nowwwwwwwwwww????

ادم المصري said...

بياترس
متشكر جدا بياترس


تووهه
عدم الاستقرار بييجي لما يحصل غرق مفاجا للقوانين الطبيعية
الحلم .. كونه حلم .. لانه في خيالنا بس

والواقع .. كونه واقع .. لاننا بنعيشه

بيحصل القلق نتيجة خلط بين الاتنين .. وتشويش بيخلي البني ادم مش فاهم

انا لسه ف يالجيش علي فكرة
شكرا لمرورك
تحياتي

Sharm said...

حلوة

يا مراكبي said...

أنا ما بحبش ان البوستس اللي في المدونة تتنقل لنوت في الفيس بوك لأن التدوين نشر للعامة وفرصة الإطلاع والوصول إليه في محركات البحث أكبر لكن النوت في الفيس بوك بتكون محدودة النشر للخاصة من الأصدقاء المضافين

وعموما هأنشر نفس تعليقي هنا للتوثيق برضه

بغض النظر عن ان اللقطة اللي في المشهد ده هنا حقيقية أو نص حقيقية .. لكنها بجد جميلة جدا

كان البطل حاطط أحلام يقظة لطرق متعددة معينة تخليه فجأة يغتني فجأة (حلم أغلب الناس) وبالتالي لما اتفاجئ بحالة مختلفة تماما في الواقع غير الطرق اللي هو كان بيحلم بيهم .. خاف .. خاف قوي .. خاف لتضيع من ايديه

aMiR-El ZaLaM said...

تصور إنك بعد سنة أو إتنين بس هتلاقى كل الحلم ده أصبح فى طى النسيان بالنسبة لك ؟؟
تصور ممكن لا
الواقع مش سجان ياأفندينا
إحنا اللى دايماً حابسين نفسنا بنفسنا جوا دوامة مش عارف ليه !
أنا و إنت و هى و كلهم
فـ الآخر بنلوم الواقع :ي
تخيل يا أخى إمبارح بالليل بس راجعت حياتى كدا من فترة لقيت نفسى إنى ماشى مش عارف إزاى ف الدنيا دى :ي
عمالين نكتب و نحط خطط و أهداف وخلافه و لما كل ده مينفعش نلوم الواقع ، مش يمكن الأهداف هى اللى غلط م الأول ؟؟
مش يمكن الأسلوب فى تحقيقها وتنفيذها هو اللى غلط ؟
بغض النظر عن أشياء معينة مُسيرين فيها طبعاً
متخافش ياعم إنت . . متخافش
هيحصل إيه يعنى ؟؟
يحصل اللى يحصل . .
ده كله ميمنعش إن البوست حلو وشدنى أقرأه
تحياتى ياآدم