Pages

Subscribe:

Sunday, August 17, 2008

اختبار عجبني جدا

امبارح كنت باعمل تشات مع احد الاصدقاء
وطلبت مني اعمل الاختبار دا
هو دمه خفيف وعجبني
ياريت اللي يبقي يقراه يجاوب علي نفس الاسئلة معايا
وهيبقي يعرف الاجابات في اخر البوست
.*******************
هو المفروض اختبار نفسي بس فكر كويس قبل ما تجاوب
بص ياسيدي .. دلوقتي انت في غابه
اوصف شكلها ايه ..وايه احساسك وانت جواها..يعني فرحان ..زعلان..قلقان ..مطمن

غابة غابة ياعني وحوش وحيوانات وكدا ؟؟
غابه ايوه
هتخيل نفسي زي طرزان وقاعد في بيت الشجرة
ومتصاحب علي كل الحيوانات وعمال اتنطط علي الشجر
زي طرازان بالظبط وهكون فرحان
خليك فاكر اجاباتك كويس
اوك
.
وانت ماشي في الغابه دي لقيت فنجان
ياسلام تهريج بقي
ماتعلقش كتير
اوك
اوصف شكله ايه... وانت ماشي هتاخده معاك ولا لا
هو الفنجان اشكال ياعني ماهي كوباية صغيرة ليها ايد
بس اعتقد اني هاخدة معايا ، بس اكيد هاستغرب هو جه منين في الغابة دي
وهدور يمكن يكون فيه اغراب واعمل فيها شروك هولمز الادغال
.
ماشي ... وانت مكمل مشي لقيت اسد ، هتتعامل معاه ازاي
هكون طبعا مصاحبة من قبل كدا واول مااشوفة هاقولة ازيك يا اسد
هايقولي ازيك يا دومي ، وناخد بعض بالحضن اكيد ياعني الفترة اللي هقعدها
هناك هتعمل عشرة بيني وبين الحيوانات
طيب يا دومي هههههههه
هههههههه
.
بعد ما اتعاملت مع الاسد بالطريقه اللي انت اختارتها
وانت ماشي لقيت بحيره .. هتتعامل معاها ازاي
يعني هتنزلها..هتقعد عليها..هتتجاهلها تماما ؟؟؟
مممممممممممممم دي اللي غريبة
اكيد ياعني قعادي في الغابة
هيخليني عارف مكان البحيرات والانهار وكدا
وساعتها هيكون امر طبيعي اني الاقي البحيرة
ياعني مش هلاقيها صدفة
بفرض انها قدامي دلوقتي .. يبقي انا رايح وقاصدها
طيب ماشي مش صدفه انا بسال هتتعامل معاها ازاي
هنزل بقي واستحمي فيها وكدا لكن مش هتكون هي اللي بشرب منها
.
اوكي .. الجزء التاني بقى في الاختبار
.
يانهار دا طويل قوي
دلوقتي انت في صحرا
زي ماوصفت الغابه واحساسك وانت جواها
اوصف الصحرا واحساسك وانت جواها
صحرا ؟؟؟
هتخيل نفسي عنترة بن شداد في الفروسية بس طبعا
مش في الحته اللي اهله بتذله فيها
وطبعا عندي خيمة وبعير كتير ورجال كتير وانا سيد القبيلة
طيب يا جامد هتكون حاسس بايه
طبعا هكون مفشوووخ من الفرحة
بقولك بعير وفارس ورجال وخيمة ملك يابنتي عايزاني اعيط بقى .. ؟؟
.
طيب يا والدي وانت ماشي لقيت سلم
هههههههههههههههههه دي اشتغالة بس عادي
لا والله
بقولك السلم ده لو وقفت عليه هيشيلك
ولا لا ..وانت ماشي هتاخده معاك ولا لا
مش سلم خشب ياعني ؟؟؟؟؟
ماهو مش اكيد سلم في الهوا كدا ثم الصحرا مافيهاش مباني
خلينا نتفق انه سلم خشب
وبما اننا في صحرا يبقي من اللي بيستعمل في الحرب
بتاع الابراج اللي كانت في فيلم صلاح الدين دي
هاخد السلم طبعا وافحصة واحاول اعرف بتاع مين واخد حذري
لاتكون غارة م الفرس او الرومان
.
وانت مكمل رحلتك دي لقيت صندوق
شكله ايه الصندوق ده..ولو فتحته هتلاقي فيه ايه
مممممم صندوق بس المفروض اني مش في رحلة
المفروض اني عايش هناك مش كدا ولا ايه ؟؟؟
اه ماشي
اوك .. شكل الصندوق هيكون حاجة كدا اثرية مثلا
بس علي شكل عربي اصيل
وهفتحة الاقي فيه رسالة كدا من جدي السابع او التامن عشر
بيقولي فيها خريطة الكنز
.
ماشي وانت ماشي لقيت حصان
ميت طبعا
لا .. عايش هتتعامل معاه ازاي ؟؟؟ وهيامن لك ولا لا ؟؟
بس دا اكيد هيكون تايه من صاحبه
لان الصحرا والبدو لازم يكون معاهم حصنه
وبما اني سيد قبيلة وغني بقي
مش هريل علي حصان اول ما اشوفة
لكن هحاول ادور في المكان
يمكن يكون فيه حد كان راكبه وحصلت له مشكلة
ولو مش بتاع حد
لو مش بتاع حد اكيد هاخدة
مش هاسيب له اكل واسيبه في الصحرا ياعني
هيآمن لك؟
اعتقد انه بما اني عايش في الصحرا
هيكون عندي خبرة بقي في التعامل مع الحيوانات دي
هيأمن لي بسهولة مافيش خطورة ياعني
.
ماشي اخر سؤال .. وانت ماشي لقيت سور ؟؟
طويل وعريض وانت مش شايف اخره لا طول ولا عرض
هتتعامل معاه ازاي ؟؟
هتفتح فيه فتحه..هتقعد جنبه تستنى الفرج
هتمشي جنبه لحد ما تجيب اخره ؟؟
دا اصعب سؤال قوي
بس هتخيل نفسي دونكيشوت
وانا علي الحصان بالبدلة المدرعه
وورايا جيوش مجيشة وعدد وعتاد
وهنفتح فيه فتحه طبعا ونحاول نشوف وراه ايه
اوكي ماشي
.
ايه الحياة بقي
اقولك بقى دلالات الحاجات
.
الغابه والصحرا
دول هم حياتك اللي انت عايشها افتكر بقى اجاباتك واحساسك وانت جواهم
.
نبتدي بقى بالحاجات اللي كانت في الغابه الاول
.
الفنجان
هو الناس اللي انت بتقابلهم
.
الاسد
هي المشاكل اللي بتقابلك في حياتك هتقولك اهلا ازيك يا دومي فاكر انت طبعا
هههههههههههههه اه فاكر
.
البحيره
هي حياتك العاطفيه
اه دي مهمة .. تعاملي معاها اللي انا قولته معناه ايه؟؟
انت قولت هتنزلها
.
الحاجات بقى اللي في الصحرا
.
السلم
هم صحابك
هههههههههههه قطعه من عتاد العدو
اه شفت
.
والصندوق
هو انت واللي جواه (الكنز) هو اللي جوالك
.
والحصان
شريك الحياه
.
والسور
ده القدر..بكره ..المستقبل
طريقة تعاملك معاه هي نفس طريقة تعاملك مع المستقبل
.
اللي يعمل فيكو الاختبار دا يبقي طمني علي صحته

15 comments:

dramaqueen said...

هييييييييييييييييييييييييييييييية
انا اول رد

جوا الغابة هاكون مبسوطة لانى هاتفرج على شجر كتير بس هاكون حذرة وانا ماشية عشان الزواحف والحيوانات

الفنجان هاخدة معايا
لما اشوف الاسد هاحدفه بالفنجان يمكن يصيب ويبعده عنى

البحيرة ممكن العب فى المية شوية واتفرج عليها
جوا الصحرا هاكون حاسة بفراغ لكن هاكون مبسوطة انى لوحدى
السلم مش هاعمل به حاجة وهيكون تقيل عليا فهاسيبه وامشى
الصندوق اكيد هاخده معايا اكيد هيكون له منفعة

واااااااااااااو حصان
انا باحب الحصان
هاركبه

واة هيأمن لى عشان انا مش هاضربه

السور هاحاول استكشفه يمكن فى فتحه وانا مش شايفاها لو مش لقيت هافضل ماشية لحد اخرة



تفتكر فى امل انى اعيش يا دكتور ؟؟؟؟؟؟؟؟
البوست لذيذ اوى يا ادم
تسلم ايدك

dramaqueen said...

هو الاختبار دة بجد يا ادم؟؟؟؟؟؟؟؟؟

كلبوزة لكن سمباتيك said...

ده حرق دم يا ادم
اختبار ايه؟
بقى انا سلم؟؟
انا
؟؟
ارفض و اشجب و اعترض


تحياتي

Anonymous said...

على فكرة
ده موضوع طريف جدا
كنت قرفان وزهقان ولما قريته ضحكت
اشكرك والله يا أحمد

Anonymous said...

على فكرة
ده موضوع طريف جدا
كنت قرفان وزهقان ولما قريته ضحكت
اشكرك والله يا أحمد

Anonymous said...

على فكرة
ده موضوع طريف جدا
كنت قرفان وزهقان ولما قريته ضحكت
اشكرك والله يا أحمد

Anonymous said...

سو كيوت خالص البوست ده

وميرسى موت على البوست المحير دة

إنسان || Human said...

على الفكرة الإختبار ده في غاية الذكاء..والرموز اللي فيه منطبقة في معظم الأحيان
وصفي للغابة
أكيد مش هاتختلف كتير عن الغابات اللي بنشوفها أشجار وحيوانات مفترسه وهحاول أتعامل معاها وأتأقلم عادي جداً لأن أكيد فيه الكويس والخطر
أكيد هاكون مش مطمن
............
لقيت فنجان
أكيد هاستغرب إيه اللي حطه هنا , ممكن أتخيل إن حد نساه كان عامل رحله ولا حاجه....أكيد شكله فنجان عادي بيد
ممكن تكون عليه بعض الزركشات والرسومات الجميله
وأكيد هاخده , بس بعد ماأغسله كويس عشان أستعمله
,,,,,,,,,,
الأسد
أكيد هاجري أو أتسلق أي شجرة , لأنه أخاف أنه ياكلني
...
البحيرة , بما إني مابعرفش أعوم
إذن في البدايه هاكون حذر جداً في التعامل معاها , لذلك ممكن في البداية أبلبط برجلي بس في الميه , وبعد ما أتأكد إن مفيش تماسيح بعد فتره طويله وأنزل أعو بعكمان بعد ما أتكد كمان إن البحيره مش غويطه ومأغرقش
..........
صحرا
أكيد هاكون رايح أستجم شويه وأقضي وقت زي رحلة سفاري كده , وهاكون عندي خيمه وحصان لاني بحبهم جداً
أكيد إحساسي هاكون مستريح بس في نفس الوقت هاكون قلقان من العقارب والثعابين

.......
السلم
سلم خشب , ممكن يكون وقع من عربية ولا حاجه معدية عربية أو ناس كانت مخيمه قبلي
.........
الصندوق
الصندوق أكيد هايكون كبير وشكله قديم , وهافتحه ألاقي في كنوز وياقوت
......
حصان هاتعامل معاه إزاي ..بما إني عندي واحد هحاول أروضه وأتعامل معاه
أكله وأخده معايا لو مالقيتش حد جمبه
هو أكيد مش هياخد عليا على طول بس هحاول أجذبه وأتعامل معاه كويس
.......
السور
لو مالقيتش أخره بعد فتره هحاول أتسلقه لو معرفتش أحاو أفتح فيه فتحه

توهة said...

يااااااااه انت طمنتنى على حياتى قوى

اولا فى حالة الغابه انا كنت خايفه ومتوتره وكلها اشجار كتيفه منسدله على الارض تحوى بالوحشه والحمد الله
والصحرا كنت حاسه فيها بالعطش والارهاق بس ماكنتش خايفه زى الغابه

وسواء الفنجان ولا السلم لم أثق فيهم تماما وقررت انى اسيبهم واكمل طريقى شئ مبشر للغايه يعنى ماليش صحاب

والاسد حل من الاتنين يإما اهرب وده احتمال ضعيف بإما أرميله قطعة لحمه مش عارفه انا جبتها منين لقتها فى جيبى تقريبا
والحصان تخيلته حيكون هادى معايا مش عارفه ليه بس انا بحب الحصنه جدا حطبطب على رقبته وهو مستسم لى واركبه وامشى به

البحيره قررت وبصراحه ده قرار انا مستغرباله انى اشرب منها إفترضت انها عذبه مش عارفه ليه على الرغم انى لم اثق فى الفنجان

والصندوق طبعا من النوع العربى الاصيل المزخرف والمطرز واول ما افتحه حلاقى كنز كتير ويلمع انا جوايا كنز ؟؟؟
بعيده دى شويتين تلاته

وأخيرا السور طالما مالوش بدايه او نهايه قررت انى اتسلقه لحد ما اوصل لقمته مهما كان طوله


بس الاختبار ده اكيد مش صح فى الاخر كده بقى ؟؟؟؟؟؟

admelmasry said...

شكرا لكم جميعا وخصوصا اللي عمل الاختبار دا
.
.
دراما كوين
__________
اجاباتك .. جميلة
شكل صحابك "" الفنجان " هيصدو عند المشاكل
(( الاسد ))
وبما انك بتحبي الحصنه ولعبتي في البحيرة يبقي هنطمن علي حياتك العاطفية
.
.
.
كلبووزة
ــــــــــــ
انت متضايقة ليه .. ياريتك كنت عملتي الاختبار





استاذ سيد الوكيل
ــــــــــــــــــــ
ازي حضرتك يا استاذ .. دا شرف ليا طبعا وجودك هنا
تحياتي



ستايل بيوتي
ـــــــــــــ
اهلا وسهلا يا فندم
شرفني وجودك بجد .. وياريت يكون مستمر



اتش .. يو مان
ــــــــــــــــ
اجاباتك منطقية جدا
اظاهر انك عقلاني جدا في حياتك .. تحياتي يا مان






تووووووووهه
ــــــــــــــ
سيبك من كل حاجة
حياتك مضطربة مش مهم
مافيش صحاب .. برده مش مهم
لكن المهم .. ان حياتك العاطفية ان شاء الله سليمة والحمد لله
ودي اهم حاجة طبعا .. دا المستقبل يا فندن

Zanooba (Zeinab sab9n) said...

يا مراحب يا مراحب بكل السادة الحلوانية معرفش إيه سر الإنشكاح اللي بيجيلي أول ما بشوف حد من جامعة حلوان :) يعني مفرود تنولني الشرف و تضعني في السدة الحلوانية :) ...و المدونة دمها زي
السكر و البوستات كلها أحسن من بعضها
أتمنى دوام التواصل ..و مستنية جديدك ...سوري على الإطالة بس أنت عارف أول زيارة بقى

يا مراكبي said...

بطل البتاع الي إسمه شات ده عشان هيجيبلك الكافية وإنت لسة في مقتبل الحياة .. لسة بدري عالجلطة والشلل الرعاش

Anonymous said...

المصرييييييييييييي آدم
بعد دراسة متأنية لبلوج كابتشينو ونسكافيه وجدنا انك كنز لا يمكن التفريط فيه ( والا هنكون زي الهبل بتوع برج بيزا النائل ) ولذلك نتشرف نحن أسرة مجلة ع المكشوف الالكترونية بدعوتك لرئاسة قسم كامل في مجلتنا المتواضعة الشأن
ولك منا اطيب التحيات لك ولقلمك العبقري
www.3almakshoof.fr.cc

Anonymous said...

الجميل آدم المصري
تحية للقلم الواعي والموهبة الملفتة للنظر
سعدت لقراءة مدونتك وسعدت لمعرفة بعضا من جوانب شخصيتك
وسعدت أكثر عندما علمت بصورة غير مباشرة انك من المترددين على ساقية الصاوي
ارجو ان يسعدني الحظ اكثر واكثر واراك هناك
تشرفني زيارتك لي
www.7enetwg3.blogspot.com
مدونة صديقة جميلة ايضا
www.nosro7.blogspot.com

شجره الدر said...

واد ياادم دا جنان رسمى يابنى
انا عارفه الاختبار دا من زمان اوى
وبيتهيائلى والله اعلم انو مالوش دعوه بعلم النفس اصلا بس لذيذ وربنا
دوومى ها
وحشتنا يادومى
هتاخد الاسد بالحضن
اللهم لا اعتراض
تحياتى يابنى