Pages

Subscribe:

Friday, April 11, 2008

تعليق علي ماحدث داخل المحكمة




العنكبوت النونو
ماهوش نونو
والمطرة مش طايلاه
لافوق السطح ولا حتي ف البدروم
كل العيون شايفينه
وعاملة منه اله
عمره مايمنع ظالم
عن حد كان مظلوم

العنكبوت
ناسج خيوطه
ف قلب سقف المحكمة
كف الميزان ترب
والقبضة كانت محكمة
يوم الحساب قرب
وانشق بدرك ف السما
والقبر فاتح حضن واسع
بتنجذب له
من دون جميع الامكنة

العنكبوت
لف بخيوطة
جثة المسكين ونام
والصبح
بطل تاني يطلع
بانتظام
وان كنت يوم عاشق هواكي
فاسمحيلي
اكتفيت
نفسي اسمع منك اني
اتنسيت
واذكريني بالسلام
واغفري لي
عنكبوتك
اللي قالي
ان عشقك ليا اصلا ... كان حرام

25 comments:

dramaqueen said...

يسعدنى اكون اول رد


وان كنت يوم عاشق هواكي
فاسمحيلي
اكتفيت
نفسي اسمع منك اني
اتنسيت
واذكريني بالسلام
واغفري لي
عنكبوتك
اللي قالي
ان عشقك ليا اصلا ... كان حرام

حرام بجد
كلامك دة جميل اوى
بس عمر العشق ماكان حرام
وعمر الحلم ما كان وحش
والصبح بيطلع ومحدش يقدر يوقفة لكن احنا اللى بنحكم على نفسنا اننا نشوفه او لأ

shaimaa samir said...

بداااااااااااااااية
هيكل مدونتك رااااااااااااااائع
جذبنى كثيييرا

اماعن البوست
فهوجميل
شكرا ليك

Anonymous said...

الموضوع جميل و الاسلوب قوي .. بس هو في سؤال يعني ايه علاقة العنكبوت بالكلام ده: ان كنت عاشق يوم هواكي فاسمحيلي
اكتفيت
نفسي اسمع منك اني
اتنسيت
واذكريني بالسلام
واغفري لي
عنكبوتك
اللي قالي
ان عشقك ليا اصلا ... كان حرام

و برضو بصراحة مش فاهمة ايه هو اللي حصل في المحكمة اللي هو ده تعليق عليه..بس اكيد الكلام جميل جدا و الاسلوب قوي ..بالتوفيق

LaLa

ادم المصري said...

اولا
انا مستعجب جدا
انا منعت الكليك يمين
والتظليل
وكل وسائل النسخ
وبرده الناس بتنسخ الكلام
ياعني ع الاقل بلاش تحسسوني ان فاشل للدرجة .. حتي قدام نفسي ع الاقل
هههههههه
مش عارف اعمل ايه بصراحه
.
.
.
.
دراما كوين
يشرفني يا فندم
انك اول تعليق
طبعا فيه عشق حرام
لما يضر
فالقاعده تقول
انه لا ضرر ولا ضرار



شيماء
ــــــ
متشكر يا فندم دا اطراء جميل جدا اشكرك عليه


lala
ـــــــ
اولا شكرا لمرورك رغم اني كنت اطمع في وضع لينك لمدونتك او حتي ايميل للتواصل
اولا
العنوان ليه؟
لان فعلا فيه حوار في المحكمة
ودا تعليق عليه
في عمل انشاء الله بيكمل اسمه حكايات بني الاهبل

ثانيا
علاقة العنكبوت ايه بالكلام دا ؟
المفروض ان الكلام دا على لساني انا
وبحاول اقولها ان السبب هو العنكبوت



تحياتي للجميع
والسلام

YHYيــوســف الـمصـرى said...

السلام عليكم ورحمة الله وبركاته

ابن منطقتى :) اسف يا ريس انى مقصر معاك ومتقبل اسفك لأنك انت برضه مقصر :)

اول كلمتين افتكرت غنوة العنكبوت النونو سرقت قلبه العنكبوتة مش عارف تعرفها ولا لاء هههههههههه

الموضوع جامد جدا يا ريس بجد

عايز اشوفك قريب ان شاء الله :)

تحياتى

shaimaa samir said...

طب معلشى...
انا عايزة اعرف
ازاى امنع النسخ
لان ده موقفنى انى انزل حاجات كتيييييير
دى فكرة جامدة جدااا
ممكن اعرف...!!!
ولوحد واحد نسخ مفيش مشكلة
ومتحسش ان انك فاشل
لان فى مئات ميعرفووووووش
وفى واحدة زى معرفشى ازاى اعملها
ادينا بنتعلم
شكرا ليك

ياقوت said...

أول مرة اسمعك تتكلم عن الموت
ياترى ايه السبب
أحيييك

ياقوت said...

أول مرة اسمعك تتكلم عن الموت
ياترى ايه السبب
أحيييك

ياقوت said...

أول مرة اسمعك تتكلم عن الموت
ياترى ايه السبب
أحيييك

الباحث عن الحقيقة said...

واغفري لي
عنكبوتك
اللي قالي
ان عشقك ليا اصلا ... كان حرام

.........
نهاية مؤلمة
ملحوظة : ومرفوضة
عشقها ليا وعشقي لها حلال ..لاننا مخلوقين لبعض
العنكبوت هو اللى مش فاهم كده

نوري said...

عارف انا اكتر حاجه مفرحاني ايه
انك رجعت تاني ترد ع الكومنتات
لانه عادة الي بيسيب الكومنتات
بيبقي مش قادر يرد
لانه بيبقي تعبان
بس ده من وجهت نظري

وبعيد عن كل حاجه
انا عجباني بقي فكره
العنكبوت جدا
بجد بجد جديده
وحلوه طريقه كلامك ع لسانه

ويارب بقي ترد ع الكومنت بتاعي
مش تيجي عليا وتبطل تاني

يلابقي(بست وشز فور يو)0

أنونيمس said...

مختلف

أنت المره دي مختلف

العنكبوت في المحكمة؟؟
وايه اللي خللى العشق حرام؟؟؟

ادم المصري said...

يوسف المصري
ــــــــــ
والله ياباشا مش بايدي
كل ماراوح مالقيش تاريخ احس انك مش بتكتب جديد
واتاري البلوج عندك اصلا بينزل البوستات من غير تواريخ
معلشي عندي دي



شيماء
ـــــ
انا تحت امرك
ايميلي في البروفايل
ياريت تبعتي لي ايميل .. وانا هابعتلك الاكواد وطريقة وضعها في البلوج



ياقوت
ـــــــ
اول مرة تسمعني باتكلم عن الموت ؟؟؟
يبقي شكلك ما سمعتنيش قبل كدا
ركز يا بويا هو انا حيلتي غيره
مشرفني دايما
بس عشان خاطري
كفاية دوسه واحده
مش عايزين كومنتات خداعه



الباحث عن الحقيقة
ــــــــــــــــــ
يمكن تكون دي الحقيقة
لكن سذاجة الاخ
خلته يطيع وهو صاغر اوامر العنكبوت العليا
مشرفني دايما




نوري
ــــــــــ
ما تتصوريش والله فرحت قد ايه
ان فيه ناس بتخش عندي
وبتدور ع الردود
ياعني انا كنت مكتفي بتعليقاتهم فقط
لكن اعزريني
الكومنتات بتاعت برافو وجميلة وتسلم ايديك
هارد اقول ايه ؟؟؟
متشكر جدا يا جميل علي مرورك




انيموس
ـــــــ
فعلا .. انا بدور علي الاختلاف دا من زمان
وياريت بجد
احافظ عليه
مشرفني يا دكتور

sabrina said...

أأأأدم
كيفك؟
حبيت أسلم عليك

Tamer Nabil said...

ازيك يا ادم

اخبارك اية

اية بقى الكلام الجامد دة

وبعدين ياولدى عمر العشق ما كان حرام

تحياتى

Bongo said...

البوست ده و اللي قبلة مالهوووومش حل

جامدين جداا بجد

تحياااااااااتي

شيماء الجيزى said...

طول عمرك رائع
فعلا انت شاعر بالفطرة
مشكلتك يا عزيزى انك بتنطق ما فى صدورنا
بشكل يزعج تعبيراتنا
هل تحاول الوصول اللى الكمال الشعرى ؟
ارهقتنى جدا من كثرة الانبهار
فى البوست السابق
والآن
اعذرنى فكلماتك دقيقة ورائعه

احييك بشدة

Human said...

ياسلام يا آدم
أنا مش فاهم آخر جزء ...هي مين دي اللي هاتنساه

توهة said...

ادم ادم ادم

كيفك يا رجل؟؟

هو انا اول ما قريت القصيده فهمتها ان واحد كان بيشق الحقيقه والبادئ ولما خانته استسلم للعنكبوت والقبر

بس لما قريت الكومنتات طلعت قصة حب مش متركبه فى دماغى كده مش عارف ليه

بس بصراحه دى اول قصيده ليك احس ان النغمه فيها ماشيه حلو والحمد الله مافيش شتايم

ودمتم

ادم المصري said...

سابرينا
ــــــــ
تحياتي
يا قمر


تامر نبيل
ــــــ
ازيك يا صديق
لك وحشة جامدة فعلا .. مش انا اللي بقول ان العشق كان حرام
دا العنكبوت



بونجو
ـــــــ
متشكر جدا جدا يا فندم علي زوقك


شيماء الجيزي
ــــــــــــ
يا جميل
دا كلام كبير جدا جدا ربنا يخليكي
ونقدم اللي يعجبك دايما


انسان
ـــــــ
انا
هي هتنساني انا


توووهة
ـــــــــ
ازيك يا فندم
عاش من شاف سعادتك
عايز اقولك
ان اللي فهمتيه من القصيدة هواللي صح
مالكيش دعوة بالتعليقات

rona said...

بجد كلام جميل جدا
عندك حق لا ضرر ولا ضرار

شهر ديسمبر said...

اللى انا جاى اقوله بسرعه وامشى
ان النص حلو بس العنوان
يعنى محتاج تظبيط
ولا انت شايف ايه يانجم

مفقوعة مرارتي من حماتــــــــــــي said...

إذيك ياباشمهندس
مالك أيه الإكتئاب الشغال ده
أعمله تورن أوف

451 فهرنهايت said...

من زمان مادخلتش عندك
والله العظيم لك وحشة
عرفتك ع الفيس بوك بالصدفة البحتة عن طريق صديق ثالث

....
حلوة حكاية العنكبوت ... ومش عارف ليه انت وصفته بالنونو ... أنا شايفه عملاق
يمكن هوة في الحقيقة نونو فعلا
بس كفاية انه حرّم علينا عشق حاجات كتير
...
أتمنى أشوفك ... على أرض الواقع
وتحياتي دوما

ادم المصري said...

رونا
ـــــــ
اذن فنحن متفقين



شهر ديسمبر الفنان
ــــــــــــ
كل حاجة وليهاغاية يا فنان
لما اشوفك هابقي اقولك


واللي مفقوع مرارتها
ــــــــــــــــــ
اهلا اهلا يا فندم اذ نتمني تكون مرارتك بخير
دا الطبيعي دا مافيش جديد ولا حاجة ياعني




الدكتور
ـــــــــ
اهلا اهلا يا باشا
اعلم جيدا انه مش نونو
عشان كدا باقول
العنكبوت النونو
ماهوش نونو
اتمني فعلا اني اقابلك علي ارض الواقع