Pages

Subscribe:

Thursday, February 21, 2008

حالة استثنائية-موز وبرتقال

طبعا انا ناوي اتكلم فعلا عن موضوع الفن والسيما والذي منه .. لكن انهارده حصلي موقف غير عادي واثر فيا بشكل مختلف فحسيت اني لازم اكتب عنه ، انا كنت راجع انهادرة من الكلية ، وللي مش عارف انا كليتي في حلوان ، فانا باركب من محطة حلوان ، كان قاعد جنبي راجل عجوز جايب لبيته موز وبرتقال .. وبعدين فوجئت بيه بيقولي احجزلي جنبك يابني لحسن السكر تعبني وانا رايح الحمام
.
طبعا انا حاولت اقوله خد الحاجة معاك لحسن المترو يمشي لكن هو سبقني ، وفوجئت بيه وقف علي الرصيف التالت وفتح البنطلون فعلا وكان ناوي
يعمل زي الناس .. في نص المترو
.
عند بداية فتح البنطلون ، كان الباب اللي نزل منه قفل ، وعند فتحه نهائيا وبداية عمله زي الناس كان المترو طلع ، وكل ما تخيل الراجل وهو بيشهق الشهقة بتاعت الراحه بعد ما هيعمل زي الناس ويلاقي المترو مشي ، يصعب عليا بصراحه
.
انا قررت اخد الحاجة وارجعله ، بس كان شغلي الشاغل ياتري هييجي في باله انه يستني في المحطة ولا فكر يركب المترو اللي بعده ويحصلنا ؟؟
.
طبعا انا رجعت ومش لقيته ، وكان قدامي حل من اتنين ، ياخد الموز والبرتقال واروح بيهم البيت ، او اوديهم لناظر المحطة يتغدي بيهم هو والعساكر ، وطبعا الحل التاني كان هو الامثل بالنسبة لي
.
بصراحه كنت فاقد الامل اني الاقي الراجل تاني .. وكنت عمال افكر موز وبرتقال مش حجات ممكن تبات ، ياعني لو مجاش خدهم انهارده مش هيلاقيهم بكرة .. نصي بيقولي خدهم .. ونصي التاني بيقولي خلي عندك ثقة في رجال الشرطة اكيد الراجل ممكن يسال هناك
.
وبما اني نساي شديد وياما ضاعت مني حجات في المترو وكنت باتمني ان اللي يلاقيها يوديها للشرطة عشان لما اسال عليها الاقيها فكرت وقولت انا لازم اعمل الحاجة اللي باتمني الناس تعملها معايا في المواقف اللي زي دي
.
رغم اني واثق ان الموز والبرتقال اتاكل خلاص وان الراجل ماشافشي حجاته .. الا اني دايما باكدب نفسي ، واقول لنفسي اني لازم يكون عندي ثقة في الناس .. دا الرسول قال الخير في امتي الي يوم الدين .. واكيد فيه ناس صالحة مش كل البوليس بوليس .. اكيد فيه بوليس مش بوليس بس ظروفه هي اللي خلته يبقي بوليس اكيد فيه ناس كويسه برده
.

10 comments:

الساحرة said...

دة انت طيب جدا هو اللي عند الشرطه بيرجع دة خلاص اتاكل من زمان والراجل هيحرم يدخل الحمام اصلا
تحياتي

خمسة فضفضة said...

السلام عليكم ورحمة الله وبركاته

ما تقلقش ان شاء الله البوليس مش هايطلع بوليس .....هايطلع شُرطه

وعموما زمان الموز والبرتقال في خبر كان

وربنا يعوض علي الراجل وعيلته

Ahmed Mubarak said...

حلوان .. يا سلام احلى ايام كانت
ما علينا

صح كدة
ادي لكل واحد المهمة بتعته . وهوا بينه وبين ربنا هيتحاسب انت كدة اتصرفت صح

تحياتي

dramaqueen said...

كفاية انك ريحت ضميرك وعملت حاجة نفسك فيها
وقبل دة كله رضيت ربنا ومختدش حاجة مش من حقك
يعنى نيتك سليمة
اما الباقى مش بايدك ربنا هو اللى شايفهم وهيحاسبهم

AHMED SAMIR said...

جامدة قوي مش كل البوليس بوليس
تتعمل والله قول مأثور
تحياتي

Anonymous said...

يا تري الراجل زعلان دلقوتي؟


:(

Unknown said...

مش كل البلويس بوليس؟؟؟؟؟

عليا النعمه دماغك دي تتاقل
بالبرتقان والموز
:))

admelmasry said...

الساحرة
ـــــــ
هههههه
والله كان عندي امل انه يرجع س عايز اقولك حاجة .. الراجل اصلا ما دخلشي الحمام .. ودا اغرب ما في الموضوع

خمسة فضفضة
ــــــــــ
وعليكم السلام يا دكتورة .. والله انا عملت اللي كان نفسي يتعمل لو نت انا في نفس موقفه
بس اللي غايظني في الموضوع ان الراجل ما اتصرفشي نفس التصرف اللي انا كنت هاتصرفه لو كنت انا في موقفه
تحياتي يا دكتورة


استاذ مبارك
ــــــــــ
شكلك حلواني قديم .. انت عندك حق ... انا حاولت بصراحه انتهز الفصل دا فرصة واربي نفسي علي حاجة معينه
انا عارف ان سمعه الشرطة في بلدنا مش ولا بد لكن كان لازم الواحد يعود نفسه انه يثق في الاخرين .. رغم ان فيه مقولة تانية بتقول لواحد لازم ما يثقش في الناس لحد ما يثبت العكس .. لكن انا رافضها تماما


دراما كوين
ـــــــــــــ
عندك حق والله ربنا يخليكي يا جميل
متشكر ع الزيارة

احمد سمير
ــــــــــ
ياه قول مأثور ؟
مش للدرجة دي يا باشا ربنا يخليك ويدود لنا زياراتك




ابيتاف
ـــــــــ
يااااااااه
عاش م شافك
والله وحشاني جدا .. اعتقد والله ان الراجل هيبقي متكدر جدا .. خصوصا ان شكل الموز كان يفتح النفس


انونيموس
ــــــــــ
والله واحشني يا دكتور
بس انا كدا مش عارف .. ايه هعيش ؟
دا كيلو البرتقان وصل تلاته جنيه يا دكتور

NoOR said...

تصدق زعلتني منك مع انك حلاونجي و فاهم التيته مترررررررررررررو انت بتقول مترو تلك الوسيله التعذيبيه التعسيفيه .... ياراجل ده انا سمعت ان السادات لغي المعتقلات لما عرف انهم هايفتحوا مترو الأنفاق

المهم ربنا يخليلنا الشرطه و خصوصا بتوع مترو الانفاق ....ده انا حاسس انهم بيغيرو عربيه السيدات علشان يعملوا مقلب و يطلعوا منه بقرشين من الناس اللي مش متمرسه في المترو اصل المترو ده فن

وسلملي عالمترو
و علي الحبيه الغاليه هندسه حلوان ...الهي اصحي في يوم الاقي الكليه نزل عليها شهاب من السماء فتسوي بالأرض

قول آآآآآآآآآآآآآآمييييين

NoOR said...

صحيح هو مش الراجل فك زنقته ...يبقي ارتاح

أنا من موقعي هذا اطالب بعمل حمامات عموميه في عربيات المترو علشان محدش ينسي الموز بتاعه تاني

:)