Pages

Subscribe:

Thursday, March 22, 2007

تعليق علي ماحدث في مجلس الشعب

ايه الحكاية يا بلد
فيكي الخراب بيحل
عالي صويت كل النسا
صوت الرجال ينشل
فين الايدين .. فين القلوب
داب الخراب في الارض دوب
خلي الاراضي خل
فمين يشيل الوكسة يمشي بيها الف ميل
حتي الزمن اصبح عليل
لون النهار بقي شيء بغيض
نص الحقيقة بيندفن
وكل ليلة بيتعمل للظلم عيد
فين الحمام
اللي انت حالف تطيرة .. ساعه السلام ؟
مات الحمام
والعشه باتت كوم رماد
حتي الساعات كلها وقفت حداد
والحق بات مسجون جوة قفاص من جريد
عاجزة تدخل له الهوا ميت الف ايد
بكرة نموت
بس السؤال اللي انفرض دلوقتي هو
هنرد ايه ساعة السؤال ؟

23 comments:

الوردة السوداء said...

عندك حق ولله
كوي انك فتحت الموضوع واتكلمت

احنا خلاص فى اخر الزمن

FATMA said...

الاغنية حلوة اوي

إيمــــان ســعد said...

رائعة يا ادم

استمر فى التعبير بقلمك
و كن ايجابيا

وفقك الله

عين ضيقة said...

هنرد ايه ساعة السؤال؟؟؟؟؟؟



لما اشوفك على خير ان شاء الله هنتناقش كتير


سلام

طارق مكى said...

مع الحزن على بلد فى مرحلة الدوبان
بس بردو القصيدة جميلة

بياترتس said...

والسؤال ايه بقه؟

Anonymous said...

نرد ايه ع السؤال؟؟؟؟؟؟؟؟؟
ممكن تستعين بصديق

الظاهر إني ده مش حال بلدك لزحدك ده حال البلدان العربية كلها

شكرا ع القصيدة

نهر الحب said...

انا جيت ازور اهه بس ايه الكلام الجميل الحزين ده
ساعة السؤال... لا ادري

Anonymous said...

عبجتني الجزء بتاعة الحمام


اه يا بلد

و العمل؟

ساعه الغروب said...

عارف عادل امام لما قاله
انا كنت فى الحمام ساعتها

ما اعتقدش اننا عندنا اجابه غير دى

عارف تحسهم حد كتب بوست وقفل التعليق


ولذلك
لا تعليق

ربنا يستر من اللى جاى

raspoutine said...

الحمام

انا عارف راح فين الحمام ؟؟

اكلوه البشوات واصحابهم وكان محشى بالفريك

admelmasry said...

اليكم جميعا شكرا عميقا لا ينتهي
لكم تحياتي
والسلااااااااااااام

FATMA said...

ادم انا عايزة لينك الاغنية
و شكرا

الأرمـوطــي said...

والله يابنى استاز ورئيس قسم كمان

change destiny said...

على اللي حصل في مجلس الشعب بس

لو حتعلق في مصر

حتكتب كل يوم قصيدة

توهة said...

حقول ايه غير حسرات حسرات حسرات


اظهار سعاد بقيت عامله اقامه دائمه فى كل بيت دلوقتى ما تلم مراتك يا ادم




وسلاااااااااااماااتى

sydalany-وش مكرمش said...

نت سجلتها بنفسك و لا لقيتها
أنا طلع عيني عليها هي و الأغنية التانية ف فيلم البرئ اللي كانت بتبدأ ب

الدم اللي ف إيديا
بالليل ينده عليا
و يقولي قتلت مين
و يقولي يا إنسان
أميز السجان
إزاي من السجين
......

و سؤال كمان
هو إنت نشرت قصيدة قريب في منتدى بإسمك البلوجري و هو آدم المصري؟؟؟

sarah la tulipe rose said...

وكل ليلة بيتعمل للظلم عيد

فكرتني ب" في كل حارة حسرة و في كل قصر زينة" لنجم

تفتكر في حد بيفكر فعلا حيرد بايه في يوم السؤال ؟
طول عمري مفسي اعرف الحرامي و الفاسد و الظالم شايف نفسه كدة و لا شايف نفسه صح؟ عارف انه حيتحاسب يوم و لا حاسس انه النقاء ذاته
انا ساعات باستغرب اننا بنصحي كل يوم نبص لنفسنا في المراية و منحاسبهاش
تحياتي بقالي زمن ماجيتش بس جيت علي سؤال وقفني فعلا

بعدك على بالى said...

يسلم بقك ياشاعر ياجميل ... فعلا حنرد نقول ايه يوم السؤال؟؟؟

admelmasry said...

توتا
ــــ
لينك الاغنية
وصل خلاص


وش مكرمش
ـــــــ
اه انا فعلا كنت نشرت قصيدة اسمها الفرق صعب
في منتدي قهوة كتكوت


اسف لكل الناس لو ما رديتشي ع التعليقات
اسف مرة اخري
نظرا لظروف خارجة عن ارادتي
تحياتي والسلام

tota said...

ادم
الف ايد خرست مليون لسان معدش قادر ينطق الحق وسط الظلام
لما كل واحد قال بعلو صوته لا كانت النتيجة الف ايد قطعت لسانه وكتمت الكلام فى حلقه
منعوا حتى نسمة الحرية اللى حلمنا نتنفسها لكن كل ليل وله اخر
ولازم يكون فى نهاية للظلم

admelmasry said...

((:

saso said...

اولا : عجبتني وده باقي عادي خلاص
هامسك الخشب متقلقش
ثانيا :مالك يا ادم في ايه ..حاساك متغير او في حاجة شاغلاك او مزعلاك معرفش ليه

ثالثا : اسلوب ردك فوق مفكرني موووووووووت بسندباد ..انت ناوي تختفي زية ولا ايه
كده مش هلاقي مدونين اقرالهم يا ابني

رابعا ::كبرت 400 سنة في الكام يوم اللي اسيبك فيهم؟
:)
ومدونة اتحاد مدونين عملت فيها ايه بعتها؟ المهم جيت اسلم عليك واتطمن وكده