Pages

Subscribe:

Sunday, March 25, 2007

صعبان عليا حالي

مش عارف ابتدي منين .. من اول ما روحت السنه اللي فاتت اعمل بطاقة انتخاب
ولا من قبلها حبتين .. لما جمعونا في الجامعه عشان يحمسونا ننتخب
وف الاخر طلع التليفزيون وزارة اعلام .. والقسم وزارة داخلية
كنت عبيط وقتها .. كنت فاكر ان الاتنين ليهم علاقة ببعض
.
.
ولا ابتدي بكرامتي اللي باحس في كل وقت قد ايه هي متهانه في البلد دي
بلطجية في المنطقة .. عايز يثبت رجولته علي واحد اصلا مالوش في الخناق
و بلطجية في الشوارع ..بس الفرق انهم لابسين ميري
عايزين يثبتوا رجولتهم .. اللي فشلوا يثبتوها في البيت
وكاني بقيت حقل تجارب
اللي عايز يثبت رجولته .. م الاخر بقيت ملطشة
.
.
كنت ناوي اروح الاعتصام بتاع انهارده
قريت عند نوارة اللي هي جبهة التهييس الشعبية
حيرتها و خوفها .. من الاعتصام
وكذلك قريت عنه في مدونة بنت سعد
كنت خايف جدا
امي اللي فقدت اي محاولات تغيير الوضع الحالي من ابويا
وحطت كل امالها عليا .. قال ايه لما اتخرج
وابويا .. اللي نفسه ومنا عينه يشوفني راجل وباكسب
واخواتي البنات .. واخويا اللي لسه عيل شقي
.
.
جالي هاجس وقالي انت بقيت عبد لحد تاني غير ربنا
انت بقيت تعبد اصنام البشر العصرية
واني هاقعد ادور لــنفسي علي الف حجة وحجة
بعد كدا
انهارده ابويا وامي واخواتي
بكرة الشغل ومراتي والعيال
وطول عمري هافضل سلبي
اتحمقت قوي
وبرده خوفت جدا
.
.
لكن لما اتصلو بيا صحابي
اقصد حد عزيز عليا جدا .. واللي زي اختي تمام والله وربنا يعلم
قالت لي يا ادم ما تنزلشي
انت لسه طالب
احنا خلصنا خلاص
العساكر معاهم كارت اخضر .. واحتمال اني لو روحت معاهم .. ماادخلشي الترم التاني كمان
حسيت قد ايه اني ضعيف
وقليل الحيلة
الكلمة دي كان بيقولها لي دايما سندباد
يقولي عارف ياد يا ادم انت ايه مشكلتك ؟
اقوله قول يا فليسوف .. يقولي عيبك انك قليل الحيلة
كل مرة يسالني نفس السؤال
ارد بنفس الاجابة .. يقوم رادد هو عليا بنفس الرد
دلوقتي بس انا اتاكدت اني قليل الحيلة
.
.
انهاردة اشتريت جريدة المصري اليوم
وانا باتمني من ربنا انهم يكونوا جمعوا كل اخبار الفترة اللي فاتت
في العدد دا .. اصلي باشتريها كل فين وفين
بس المرة دي كنت عارف انها مهمة عشان الاعتصام
لقيت فيها دليل من جهاز الاعلام بتاع وزارة الداخلية
علشان يدل الناس ازاي تدي صوتها ساعة الاستفتاء
.
.
الدليل بيشرح للناس تعمل ايه خطوة بخطوة
لدرجة ان اخر خطوة بيقولك
بعد ما تخلص .. تمشي من اللجنه وتروح
قعد اضحك جدا وانا بقرا لاصحابي النقطة دي
فيه كمان نقطة بتقول ان الكفيف او اصحاب الاعاقات
يقدروا بردوا يدوا اصواتهم
انه يقول رايه لرئيس اللجنه في ودنه
من غير ما حد يسمعه
وهو هيكتبهاله
طبعا دي اللي كانت قنبلة ضحكتني جدا جدا
قولت لاصحابي في الكلية
طب ما نخليها بالتليفون اسهل
وهو رئيس اللجنه دا برده راجل ثقة
ولا يعتبروا مصر كلها عامية
وكلنا نروح نوشوش رئيس اللجنه
.
.
انهارده روحت البيت ع الساحه سته تقريبا
لقيت النور قاطع من تلات سعات تقريبا
والتليفون شارحه
لقيتها حالة عامة في المنطقة
مش بيتنا بس ولا الشارع بس
جه في دماغي علي طول الاعتصام
قولت ممكن يكونوا قاطعين النور عشان الناس ما تابعشي اللي بيحصل
ع الدش ؟
ومعقولة قطعوا التليفونات عشان ما حدش يتصل بحد ؟
بصراحه التفكير دا تفكير شغل عصابات وجواسيس
لكن هو اللي جه في دماغي
خصوصا اني فاكر ان ساعه احداث طابا والتفجيرات
كنت باتفرج علي مسرحية لمحمد صبحي
وبعدين قطعوها فجأة
وجابو فيلم تسجيلي .. لابو الهول .. حاجة عبط مش كدا
قال ياعني عشان تتطفي التلفزيون
.
.
ابويا كل يوم يسالني ياعني ايه مواظنة
عمال يسال اسئلة كتير مالهاش علاقة بالموضوع
بس انا مش عارف ارد عليه لاني عارف قد ايه هو تعبان
ابويا اللي كان الكل بيحلف بشياكته
وبلبسه الغالي .. دلوقتي بقي يلبس اي حاجة
ويمشي باي حاجة
خلاص الراجل تعب جدا ونفسه.. لا دا بيحلم باليوم اللي ممكن فيه يستريح
.
.
كل مرة يسالني
ايه مواطنه دي
هي المواطنه .. ان شاب زيك اصرف عليه لحد ما شنبة يخط في وشة ويطلع ما يلاقيش شغل ؟
المواطنه ان التعليم في بلادنا بايظ ؟
لمواطنه ان شاب زيك يخرج يقعد جنبي ومش عارف يتجوز ؟
ايه هي المواطنه ؟
اقوله ياعم الحاج .. هدي نفسك
الكلام دا مش لينا .. احنا مالنا
هي دي كانت بلادنا .. يقولي تعرف ايه السبب في الحال اللي احنا فيه ؟
اقول ايه ؟
يقولي عشان مافيش تداول للسلطة ؟
اقوله والله انت زي العسل
.
.
مرة واحد صاحبي كان بيتريق علي بتوع مجلس الشعب
كنا بنسال ياعني هما وصلو لحد فين في تعديلات الدستور ياعني
فرد بكل ثقة كدا : هما مين ؟
فطبعا بكل استغراب شديد قولنا .. مجلس الشعب طبعا
فضحك بسخرية وكمل كلامة كانه شايفنا عبط ياعني او احنا فاهمين غلط
وقال : طب وهما مالهم .. دا ايه قلة الادب دي
طبعا انا خدت منه الكلمة ووقعت في الارض من الضحك
قالي يابني انت فكرك بتوع مجلس الشعب يغيروا ولا بيعملوا حاجة ؟
دا كلام فارغ
.
.
ابويا .. انا اسف ليك جدا ؟
امي .. انا اسف ليكي جدا ؟
صحابي .. سامحوني جدا ؟
مش انا الشخص اللي انتوا معلقين عيه امالكوا
انا حد قليل الحيلة
حد عايش يومه ميت
والسلااااااااااااااااااااااااااااااااااااااااااااااااااااااااااااااااااااااام

14 comments:

ياقوت said...

انا بحبك يا ادم
بلاش كلام فى السياسة

صفصف لادي said...

ازيك يا ادم
ميصعبش عليك غالي حتى لو كان حالك سيدنا علي عليه السلام قال لو كان الفقر رجلا لقتلته واختك تحب تزود عليها انه لو كان العجز،لو كانت قلة الحيلة،لو كان الياس ،كل هؤلاء لو كانوا بشرا لكنت قتلتهم
الصبر لا دواء الا الصبر..
ما امره لكن لا حول ولاقوة الا بالله صلي علي صاحب الشفاعة و على ال بيته
تحياتي يا عزيزي

micheal said...

أدم
متعملش في نفسك كده ..كلنا محروقين بس بجد نصسحه من أخ مخلص ليك بلاش نزول في اعتصامات أو مظاهرات لاني سامع ان كلاب الامن لن يرحموا أحدا و احنا عاوزيينك
تحياتي لك و أرجو عدم اعتبار رأيي جبن لاني فعلا بحترمك جدا

بعدك على بالى said...

انت مش قليل الحيلة، ولا عمرك حتكون، وبلاش والبنى تقنع نفسك بكلام تعيس مالوش معنى، والاستفتاء مش مقياس تختبر بيه ارادتك، لان مصر كلها قليله الحيلة، حتى اللى طلعوا مظاهرات واعتصامات وشجبوا واعترضوا و... هواء
ولا حيؤثر مع الحكومه حبيبتنا الكلام ده، هم بس غاوين يذلونا شويه يمكن مش شايفنا مذللوين كفايه، رغم انهم مش محتاجين يعملوا المسرحيه دى، ما الدنيا شغاله معاهم الله ينور وبيسحلونا زى ماهم عاوزين...

على فكرة كلامى ده مش سلبيه، ولا نيله، ولو شايفة ان نزولنا حيقدم او يؤخر كنت شجعتك.. يمكن لو كتبت شعر حيؤثر اكتر من نزولك انت شخصيا..

تحياتى وهون على نفسك

نبيــذ said...

المشكله انى حاسه بنفس الاحساس

لا مجال للعزاء

أُكتب بالرصاص said...

يا دكتور أدم

ومين بأيده حيلة



ما باليد حيلة

ولكن

ادينا بنقووول

إزيك كده



هاتروح والا لا ؟

tamer said...

شوف ياادم

مفيش واحد عاقل يروح ويرمى نفسة فى النار

لازم نفكر اللى احنا هنعملة دة هيغير حاجة ابدا

بالعكس هيضيع مستقبلى حتى لو انت مش مقتنع بكدة بس هو دة الواقع اللى احنا عايشين فية


خلص دراستك واشتغل وبعد كدة شوف حياتك السياسية لو حابب يكون ليك دور

ولاتشيل ولاتحمل نفسك

لكل وقت ادان

تحياتى

يا مراكبي said...

إنت جيت للي هايفيدك .. أنا هأقول لك خبرتي في معنى كلمة المواطنة

المواطنه هي إنك تضطر تتغرب وتسيب أبوك وهو راجل مسن ومحتاجك .. ولا إنت قادر ترجعله .. ولا هو قادر يقولك إرجع .. وتمر الأيام لحد ما واحد فيكوا يموت والتاني يتحسر عليه إنه ما شبعش منه في أيامه الأخيرة

طارق مكى said...

دعاء


اللهم أني أشكو إليك ضعف قوتي وقلة حيلتي وهواني عن الناس أنت ارحم الراحمين ورب المستضعفين وأنت ربي إلى من تكلني ؟ إلى قريب يتجهمني أم إلى عدو ملكته أمري إن لم يكن بك علي غضب فلا أبالي غير أن عافيتك هي أوسع لي أعوذ بنور وجهك الذي أشرقت به الظلمات وصلح عليه أمر الدنيا والاخره أن ينزل علي غضبك أو يحل بي سخطك لك العتبى حتى ترضى ولا حول ولا قوة ألا بك"

حت يفرج الله علينا

aMiR-El ZaLaM said...

عارف يا آدم؟
أنا أدام الناس مش بتصعب عليا نفسى نهائى والله

بالعكس الناس بتعتبرنى شخص مغرور
مش فارق معايا حاجه

عايش لمُجرد إنى عايش وبس...

بس تصدق يا أخى صعبت عليا نفسى أوى لما قريت البوست ده !


عارف؟؟

أيوب عُمره ما قال إن الصبر طول

وأنا كمان والله عمرى ماقولت إن الصبر طول

إتفرج ع اللى بيحصل وأسكت

يمكن تستفيد...

يمكن تموت !

وأكيد سواء إستفدت أو مُت
.
.
.
إنت الكسبان

shayma said...

ادم
البوست بتاعك حزنى اوى ,لانه فكرنى بخيبتنا الى بحاول انساها, احنا فعلا مفيش فى ادينا حاجه احساس بالعجز وقلة الحيله حيخنقنى بس هنعمل ايه؟..على راى ياقوت بلاش كلام فى السياسه لانه لا هيقدم ولا هيأخر.تحياتى
ويا عم المراكبى بكيتنى

hend said...

ده مش حالك لوحدك ده حال كل شباب وشبات البلد بقينا عبيد للخوف مقيدين بسلاسل ومش قادرين نتحرك ومحدش بيفكر يكسرها غير وتلاقى الضعف والخوف ماليه

Ezzo said...

يا أحمد باشا
فلما ضافت حلقاتها فرجت
وكنت أظنها لا تفرج

الصب شيم الأحياء وانت لسه ما موتتش
عافر يا جميل واصبر
ومسيرها بإيدك وبإيدي وبإيد ناس تانية
كتيييير زهقت
هنغير أكيد بس قدم المشيئة

dr_diamond86 said...

كلنا نفس الرجل
كلنا حاسيين نفس العجز
نفس الشلل ف أرواحنا المحبوسة بجد
محبوسة باحلامنا اللى بنبعد عن السياسة وبنمشي جنب الحيط علشان نحققها واحنا عارفين ان بعدنا بيبعد احلامنا اكتر
بس القيود حوالينا بجد اكبر
اهالينا اللى بنخاف عليهم من البهدلة اكتر من نفسنا
حياتنا اللى معشنهاش ونفسنا نعيشها
ياااااااااااااااه
حاجات كتييير
انا كمان عاوزة اعتذر لكل اللى فكر انى عندي الشجاعة ف يوم للاعتراض
افتكر ان شجاعتى دي بقت اكتر شئ بافتقده واكتر شئ محبوس جوايا
كلنا هذا الرجل
متزعلش نفسك
كلنا انت