Pages

Subscribe:

Thursday, December 29, 2005

وطي راسك يا ابن الكلب ... انت في عهد الاستعمار



صحيح أنا من ساعة أول يوم في الثورة بنت الاحبه دي وأنا ماسمعتش انه عدي علينا يوم حلو ... زى ما تقول كده مصر خلصت من احتلال الإنجليز علشان ربنا يبتليها باحتلال المصريين

من يوم ما ربنا خلق مصر دي واحنا كشعب ما كانش لينا أي راي في اللي يحمكنا ...... الفرعون كان أله ابن اله ...... دخل الهكسوس مصر واستعبدوا أهلها
خَلصّنا عم أحمس منهم علي خير ...... واستعبدنا هو

جات الإغريق هنا ....... ما عرفش أحمس وولاده يعملوا حاجه ........ لحد ما جه الرومان وطلعوا دين ابونا في البلد الكفرانة دي

جالنا عمرو بن العاص وقلنا اهو احسن م اللي قبله ......... وتوالت الخلافات ...... الأموية ع العباسية ع الفاطمية ع الأيوبية ع المماليك
ع الطولونية أهي من ضمن المماليك برده ... ع حبه فرنسويين ع شويه عثمانيين علي إنجليز علي أسرة محمد علي ... علي ثورة يوليو

بصراحة البلد دي تعبت قوي وطلع ميتين أبوها
كفاية عليها كده سبوها تستريح بقي
والله حرام حرام حراااااااااام
الشاعر الكبير امل دنقل من حوالي اكتر من تلاتين سنه قالنا كل الكلام اللي بيحصل ده ...... ولا واحد فينا سمع هو بيقول ايه .... اسمعوا انتو كده

أمل دنقل في قصيده بعنوان : تعليق علي ما حدث في مخيم الوحدات

(1)

قلت لكم مرارا
أن الطوابير التي تمر
في استعراض عيد الفطر والجلاء
( فتهتف النساء في النوافذ انبهارا )
لا تصنع انتصارا
إن المدافع التي تصطف علي الحدود
لا تطلق النار ... إلا حين تستدير إلي الوراء
إن الرصاصة التي ندفع فيها ....... ثمن كسرة والدواء :
لا تقتل الأعداء
لكنها تقتلنا .. إذا رفعنا صوتنا جهارا
تقتلنا .. وتقتل الصغارا !
(2)

قلت لكم في السنة البعيدة
عن خطر الجندي
عن قلبه الأعمى ، وعن همته القعيدة
يحرس من يمنحه راتبه الشهري
وزيه الرسمي
ليرهب الخصوم بالجعجعة الجوفاء
والقعقعة الشديدة
لكنه إن يحن الموت
فداء الوطن المقهور والعقيدة :
فر من الميدان
وحاصر السلطان
واغتصب الكرسي
وأعلن (( الثورة )) في المذياع والجريدة

(3)

قلت لكم كثيرا
إن كان لابد من هذه الذرية اللعينة
فليسكنوا الخنادق الحصينه
( متخذين من مخافر الحدود .. دورا )
لو دخل الواحد منهم هذه المدينة :

يدخلها .. حسيرا
يلقي سلاحه علي أبوابها الأمينة
لأنه لا يستقيم مرح الطفل
وحكمه الأب الرزينة
مع المسدس الملي من حزام الخصر
في السوق
وفي مجالس الشورى
قلت لكم ...
لكنكم .. لم تسمعوا هذا العبث
ففاضت النار علي المخيمات
وفاضت ... الجثث !!
وفاضات الخوذات ... والمدرعات
كتبت في سبتمبر 1970

11 comments:

لا أحد said...

بدية شعر أمل دنقل أكبر من أكتب فيه تعليق
ولكن لم أكن متصورا أن يوجد انسان يصف الخروج من وطئة الملكية مهما كانت السلبيات باسم الثورة بنت الاحبه" يا سيدي لنعد قليلا الي الوراء لو لم يأت جمال عبد العناصر بأفكار الأشتراكية ومجانية التعليم لكنت انت الي الان "" أجري"" ترتع في عزبة الباشا يسروالك المرقع
يا سيدي اتفق معك ان البلد طالع ميتين ابوها ولكن لايعني ان نتفه من تاريخنا .. الناس بدور علي تاريخ واحنا بنشتمه

admelmasry said...

والله ان جيت لجمال فأقول

جمال عبد الناصر راجل كويس ... وحلو .. وامور ...

عمل مجانية التعليم
بني السد العالي
بني برج القاهرة
امم قناة السويس
عمل قانون الاصلاح الزراعي
ارسي افكار الاشتراكيه
جاهد لبناء الوحده الوطنيه

حلو قوي وده كلام جميل جدا ... ما حدش يقدر يقول عليه تلت التلاته كام

لكن يبقي السؤال .. انا
( ادم )
جمال عبد الناصر عملي ايه ؟
والنبي مش عايز شعارات .. والتعليم والمجانيه والاشتراكيه و المهلبيه والكلام ده كلوا

جمال عمل لنفسه ولعيلته وللتاريخ
وإلا كان أيه السبب في اعتقاله لمحمد نجيب وتحديد اقامته في عزبة النخل لحد ما مات ... ولا كان ايه السبب في موت عبد الحكيم عامر .... اوعي تقولي ده انتحر

جمال عبد الناصر عمل زي محمد علي
محمد علي عمل مذبحة القلعه وجمال مذبحه عابدين


بالنسبه لعمنا وعم الكل انور باشا السادات

حرر سينا في سنه تلاته وسبعين
عمل الانفتاح وقال ان اللي مش هيغتني في عصرة هيفضل فقير
عمل اتفاقيات سلام في المنطقه

لكن بقي ييجي السؤال المهم

انور عمل ايه ليا انا
( ادم )
ببعض العلومالرياضيه البسيطه المستخدمه في عمليات الحساب نجد انه ما عمليش حاجه

اولا: حرب تلاته وسبعين لم تكن جرب تحرير
ولكن كانت حرب تحريك
ياعني احنا ماكناش ناويين نحرر ولا حاجه الاوامر ان احنا نخش كام كيلو علشان نعرف نفاوض عالباقي

ثانيا : الانفتاح ده كان معمول علشان
حبه حراميه يسترزقوا منه لا انا ولا انت طلعنا منه بحاجه

ثالثا : الادعي والامر انه اطلق في
وجهنا .... وحش كبير .. وعدو خطير
اسمه الاخوان المسلمين

نيجي بقي لبابا مبارك ...... اظن ان كلنا عارفين هو عمل ايه في البلد وده مش محتاج حد يتكلم عن انجازاته اقصد افساداته

Anonymous said...

عزيزى


كلامك رغم ما فية من هجوم الشرش الا

اننى اتفق معاك فى بعضة والبعض الاخر لا اتفق فية معاة

البلد عايزة نهضة كبيرة

ياريت تقدم لينا اية الحل عشان نستفاد بخيرات مصر

ونشوفها احسن بلد

من هو الاقدر على حكم مصر

وفقنا الله لما فية الخير
مع خالص تحياتى

admelmasry said...

مره ابراهيم عيسي بتاع الدستور
قال الحل
والحل سهل بسيط
احنا عايزين واحد يكون فعلا صادق في اخلاصه للوطن
عايزين واحد يدافع عن الشعب
الشعب هو اللي يختاره
الشعب هو اللي يوكله كمحامي عنه فقط امام محمكه العدل الكبري

مش عايزين واحد يختصرنا فيه
مش عايزين حكايه انا الكل يبقي في واحد
وان الزعيم هو الاب
وهو الوحيد القادر علي رؤيه مصلحه البلاد

لازم يبقي فيه مشاركه من جميع طوائف الشعب
ومساحه من التأثير علي اصحاب القرارات
لازم المزاطن العادي الغلبان يحس الريس ده واحد شغال عنده

بيدير له املاكه
( المال العام )
اكمن هو مش فادي حبتين ..... ويكون له حق الاعتراض لو لقي ان الريس بيدير الاملاك غلط
او ان فيه شبهة سرقه بتحوم حواليه

لازم البلد تكون كلها موجوده وما نتجاهلش حد فيها

مسلم
مسيحي
راجل
ست
طفل
شاب
عجوز
غني
فقير
فلاح
عامل
مثقف
عالم
يميني متطرف
يساري متطرف
شيوعي
اشتراكي
علماني
اخواني

لا احد يملك الحق في الحكر علي حرية كل هؤلاء من الابداء بأرائهم

ولا احد يملك الحق في مهاجمة فئه عينها واطلاق العنان للحكر علي رئيها بدون وجه حق

او حتي حظر اي نوع من انواع الفكر الموجوده في المجتمع واطلاق التهم الظالمه لمجرد انه اختار نوع معين من الفكر وانتمي اليه

Anonymous said...

ياعم اررحمنا مفيش حاجه حلوه

سندباد مصري said...

مبدايا انا عراف حاجه حلوه الدندورما
رغم انك ياواد يا احمد قولت كلام حلو
لكنك ببساطه وقعت في نفس الخطاء الذي وقع فيه ابراهيم عيسي برضه انت عايز واحد يحكم واحد يسمع راي الأخر وميهجمهوش جميل لكن هينفذ راي مين في الأخر مبروك يا اخمد انت اخدت مات ( فكريا )

admelmasry said...

اليك يا حساااام اللعين
انا عمري ما جبت سيرة اسمي الحقيقي في البلوج ولو سمحت ما تتكررش

يا اخ سندباد
والنبي مش عايزين فلسفه
انت لو كنت قريت الكلام كويس كنت هتعرف اني مشعايز واحد يختصرنا فيه انا قولت عايز واحد نوكله احنا محام عن الشعب للشعب الحق في سحب التوكيل او الغائه في اي وقت

Anonymous said...

خلاص ياعم متشكرين على حسن الاستضافه
على فكره الشيطان هو اللعين
ومتشكر مره تانيه!!!!!!!!!!!!!!!

admelmasry said...

انا اسف يا عم خلاص ماتحبكهاش قوي كده
انا لسه قايلك ماتنحش
انت ما قريتش اول موضوع ولا ايه

خدها كده ببساطه وماتسألش
مشي الحال وماتسألش
وياعم حقك علينا .. وماتزعلش

Ho$$am Ahmed said...

ازعل منك ازاى مقدرش
بس متخليش حياتنا مش
احنا معاك وهنقراء لك بس متكئبهاش

admelmasry said...

الموضوع ده بصراحه موضوع رخم
هي الثورة حلوة ولا بنت كلب
محدش عارف
الكل بيفتي
موضوع زي ده ما ينفعش يبقي حلو
لازم يكون رخم
بس اوعدك انك بعد كده هتلاقي حاجه حلوة