Pages

Subscribe:

Friday, October 21, 2005

النكســــــــة

شيلت نكسة
فوق كتافي
سنين طويلة
بالف بيها
في البلاد
لحد ما إتكسرت ودابت
تحت رجلك يا وداد
وأمريني
اجيب عناقيد الليالي
احطهالك فاكهة
في طبق الزمان
انا اصلي حبة
لولي واقعة
من جبال الذكريات
مستعده تخلي بكرة
يبقي احسن م اللي فات
لكن في حاله
واحده هي
إن بكره يبقي فات

لإن نكستنا اللي عاشت
شايلة لينا عار ودم
لإن نكستنا ما ماتت
و النتيجة الظلم عمّ
ما بخفش من نكسه جمال
مع إنها كانت بدم
انا خفت من نكسه أبويا
لما كان عايش صنم
لما كان راضي بعيشتنا
وهي حتى مش عَدم

لما خاف من بدله سودا
في الشتا
او بيضا لما الشمس حارقة الكون ساعات
لما كان واخد قرار
إن نكستنا إختبار
واجبه يصبر للنهاية
عشان نهايته ما تبقي نار


ما خفتش من نكسة جمال
مع إن لينا فيها طار
ألف طار

إنما .. مين يا عالم إنهارده .. يجيله خاطر الانتصار
مين يا عالم إنهارده .. عنده حلم للسنين
مين يا عالم إنهارده .. فاكر إنه شيء خطير
مين يا عالم إنهارده .. رافض إنه يعيش حقيـر
و ياخد .. حق أبويا اللي إتحرم
حق تقرير المصير

6 comments:

admelmasry said...

ايوة انتوا .. وانت وكل واحد فينا
مين يقدر ..!!

Anonymous said...

teslam edak begad gameeeela
Ayman Abollo

admelmasry said...

الله يخليك يا ايمن تسلم

allfollowsome said...

الناس جواها خوف للاسف
عموما ربك يكرم بالتوفيق

admelmasry said...

الناس كلها خايفه وانا بحلم انه ييجي اليوم ويبقي الناس كلها تقدر تقول كلمة حق

admelmasry said...

اخي احمد فوزي

لو كنت انت شايف انه ممكن اشيل اسمي من هذه القصيده واحط اسم نجم عليها فانا اشكرك جدا علي المجامله الجميلة دي ده مبالغة كبيرة جدا واكبر من حجمي انا ما كنتش احلم بكده


اختي ام المريلة الكحلي

ياستي اشكرك من قلبي لكن برده اطمنك انك بكرة هتخشي الثانوي وتقلعي المريلة وبعديها الجامعه ومش هيبقي فيه زي موحد .. واعتقد ساعتها انك تقدري عاللي مش قادرة عليه دلوقت