.JPG)
بعشق وجودك ف الحياة
انت نبع الحب وانت منتهاه
وانت قلب وكان بريء
وانت حضني اللي احتواه
انت عمري اللي ابتدى
انت الحياة
انت العجوز ... بحكمته ف صباه
انت .. اه
***
نبع البراءة والطفولة والصفا
الدنيا رغم وضوحها برده مزيفة
وانت الحقيقة المؤسفة
قلبي اللي من اجلك دمل
دلوقتي من حبك شفا
قلبي
قلبي اللي كان
شايل بتقل جبال هموم
عيل قوي ف حبك
عريان من الاحزان لو شاف ابتسامة
سلطان علي بر الامان .. لو عينه تلمح ضحكتك
فارس قديم ... مغوار بحق
لو قولتي آه
ويحارب التنين
لو قولتي لأ !!
***
قلبي اللي مال
كما جذع المراكب مال
حملته ياما بشقى
وانا قلبي كان .. شيال
والحمل ياما تقيل .. وياما تقيل
وانا قلبي واقف كالنخيل
عمره ما يميـّــل
راجل قوي
راجل قوي
شييل
لكن سعات عيــّـــل
***
بلدي
انا الصوفي
والصوفي انا
انا الصوفي اللي بيدور عليكي بين جموع الناس
مشدود عقلي ومتكتف
بالصورة والاحساس
واخد وعود وعهود ويمين والعهد عند الله
قلبي يصوم الحب
ميت مالهش حياه
مرهون علي وجودك
وبوجودك
ومين يرحمه ويعفوا
لو شاء الكريم ... لهداه
مجذوب حقيقي صحيح
زاهد كل مال او جاه
مطلوق علي العالم
ابحث في تربته وسماه
عنك يا ام الناس
مخلوقة مختلفة
كتلة حياة واحساس
مش شرط الجمال للحب
الشرط واضح قوي
وبسيط
انه يحس القلب
بالطهر والعفه
قلبي ان يلتقيكي صحيح
اعمل له ميت زفه
قلبي اللي كان بتقل الهموم غرقان
ان يلتقيكي صحيح
هيطير من الخفة
بس انت عودي م الغياب
ونا ازرع الفرحة في هم الصحاري الجدب
واخطف الضحكة من وش الصراخ والندب
وابدر البسمة فوق شفايفك حب
احصدها في عيونك
نظرة عليل بالصب
بس انت عودي م الغياب
كوني الوطن اللي بحقيق
قلبي مشتاق للقاء
خارج بلهفة علي الطريق
راصف قلوب الناس عشانك بالورود
فاتح قناني الشوق وهادم في السدود
كاسر حواجز خوف دغدت كل القيود
بس انت عودي م الغياب
احمد رافت
29/4/2011
