سفاح المعادي بين الحقيقة والخيال

سفاح المعادي .. بين الحقيقة والخيال
..

..

..
صحيت الصبح علي صوت امي وهي بتصحيني بالعافية

.
اصحي يا ادم
ليه يامه .. انا امتحاني الساعة واحده هتصحيني ليه دلوقتي
ياد اصحي عشان عايزاك
والله انا حاسس انه مقلب وهطلع حاجة هايفة
لا والله دا شيء مهم
ايه ياستي اديني قمت
مش توصل اختك المحطة ؟
نعم يا روح .... قصدي بتقولي ايه ما سمعتش ؟هي مش عارفه المحطة لا سمح الله
اصل والله امبارح قالولي حاجة خطيرة قالقاني والنبي يادام
ياعني امه لا الله الا الله اللي ماشية دلوقتي ورايحه الامتحان الراجل مش هينقي منهم غير بنتك ؟

معلشي يابني عشان خاطري
حاضر يامه انا عارف هي ليله مقندلة
.

واحنا في الشارع وبجر ناعم وقلبي بيقع في رجليا
سالت اختي
.

هي ايه الحاجة الخطيرة اللي سمعتها امك
بيقولوا ان السفاح قتل واحده علي كوبري المطبعة امبارح .. شق ضهرها بالسكينه
ياسلام
اه .. انا مش عارف هو كوبري المطبعه ولا الكوبري الحلزوني اللي عند جامع الفتح
اه ..وبعدين
لا .. هي ماما قلقانه وخلاص
طيب
مش امبارح العيال الصغيرين بتوع ابتدائي مشيوا ورا ( فلانه ) وجريوا وراها وقعدوا يقولوا السفاح اهوه هههههههه
ههههههههههه .. بجد مش معقول ؟ تلاقيهم افتكروها السفاح بس متنكر اكمنها منقبة ياعني
.

كملنا في طريقنا للمحطة
واحنا ماشيين
عدي من جنبنا موتوسيكل
لقيت اختي انفضت كدا واتخضت فسالتها فيه ايه

.
في ايه يا بنتي
اصلهم بيقولوا ان السفاح بيركب موتوسيكل .. انا لو كنت لوحدي والله كنت صرخت
هما مين اللي قالوا انه راكب موتوسيكل
الناس طبعا .. ايه الزكاوة دي
طب احترمي نفسك انا اخوكي الكبير
اه معلشي .. لا ماخذة
طب والناس بقي شافته علي كدا ؟
مش عارفه والله اهي الناس بتقول
طيب
.

وصلنا قرب المحطة كدا
فكنت بصراحه كسلان جدا وسقعان جدا
فكنت عايزها تمشي لوحدها تكمل دول خطوطين
.

بقولك ايه الناس اهيه امم كملي بقي
يادم انت اتجننت استني هتسيبني هنا ... لالالالا
طب طب خلاص .. اهوه يلا يا عبيطة يا خوافه
اه يا خويا خوافه بس اعيش
طب مع السلامه يا ستي
ايه مش هتدخلني المحطة
انتي شكلك بترسمي اني ادفعلك حق التذكرة صح
هههههه .. ياعني لو تحب
لا كفاية لحد هنا يلا حلي حلو في الامتحان بقي
.

الغريب في الامر بقي اني روحت امتحاني
وجيت ع الساعة خمسة كدالقيت اختي في البيت
طب ما هي جت م المدرسة لوحدها اهيه
ولا شافها سفاح ولا نيلة

تهيييييييس

معقولة الدنيا هي اللي كدا ؟

ولا احنا اللي اصلا نستاهل كدا ؟

ان بصراحه مش متاكد من الحكاية دي

لكن لو جينا للحق

فاحنا من جوة

مش قد كدا

ياعني كل واحد فينا

فيه كدا وكدا وكدا

بس بالرغم من كل دا

احنا برده ما نستاهلش يحصل فينا كدا

ايه دا ظلم دا

ماهي ناس كتير عايشين كدا

اشمعني احنا اللي بنشتكي بقي

ولا عشان احنا عالم خيخية كدا

بصراحه انا لافاهم ولا عارف ولا داري باي شيء

.

.

.

.

انا عارف دوايا

انا ممكن اقول شعر ؟

ياعني هاكتب كتير المرة دي

اصلي بصراحه لما اكون مش عارف اعمل حاجة

باقول شعر

يؤسفني ... اني اقولكم شعر

حلوة يسفني دي

اه حلوة

اذن .. قشطة

.

.

.

احساس عقيم

احساس عقيم
احساس عقيم صاب البشر
احساس بخنقه بتخنقك
وتشل قلبك .. بين ضلوعك
تسجنك
وتسد جوعك بكام آهايه صغيره
وشندوتش من سد الحنك
احساس عقيم
احساس متخبي جوه جلد وشنا
جوه الجوانتي
في ساعه برد والشتا
عمال يقرص في الجتت
قال ياعني الجوع ما بيعضش جسمنا
لا في حتت ... ولا في حتت

.

.

مبروك .. غيرنا الدستور

مبروك ياخوانا الدستور
مبروك يا خوانا .. ودستور
يجعــل كلامنــــــــا خفيـــف
لا كلام بيلف
ولا بـيــــدور
ولا يتكلــــــم
ولا بيثــــــور
كــلام جامــد
كلام محصور
جوة قلوب ... ومقفولة
الناس عشقت الأولـــي
بعد ما فهمــت الفولـــه
بلا جزيرة بلا نيلة
تعالوا نغير السيرة
قوم يابا وطفــي النور
كفايانا كلام مأثـــــور
ويلا ننـام بلا رجعــــة
أمانيكـم أوام رجعــــة
وباين عليها مذهولــة
بعد ما شافت الصورة
وهزمها علــو الســور

مبروك يا خوانا الدستور

.

.

من ضمن الفنون

بـقــول الـرقـــص عـيــــــب
قـــالــــو لــي الـرقـص فــن
قـــولــــت لــهـــم فـــن إيــه
وده كــلـــه هــــز وســـــط
.
قــالــو لـــي الـهـــــــز برده
مــــن ضـمــــن الـفـنــون
إزاي تــعـــرف تــــهـــــــز
بـيــحـكــمــهـــا الـقـانــــون
إزاي تــعـــــرف تــلاغــي
وتــديـــــــــــر الـشـئـــــون
و إزاي تـبـقـــي صــايــــع
تــاكــــــــل الـزبــــــــــون
كــــــــــــل ده أســــــــاس
مـتـظـبــــــــط ... مـــــوزون
و مــا فـيــش مـكــان لــزيـك
يــغـيـّــر الـمـفــهــــــــــــــوم
.
أذهـلــنـــــي هــــذا الــحــــال
كــــلام عـبـيـــط مــجـنـــــون
ده بـــايــــنـــه واد مــحـتـــال
ســوابـــق ورد ســـجـــــــون
.
عـمـــال يــألـــــــف عـبــّــــر
كـــلام مـريـــــض وسـقـيــــم
و عــايــــزنــا نـكـــون بــقـــر
نســـمـــــع ونـقــول أمـيـــــن
.
لاه ... و ألــــــــــــــــــــف لا
و إنـشــالـــه تــبـقــي مـيــن
أنا هـرفـض أعـيـش في شـق
و مــعــايـــا الـبـنـــي أدمـيــن
.
ولازم تـعــــــــرف إنـــــــك
راجــل مــريـــض غـلـبـــــان
هــحـتــرمــــك لاجــل سـنـــك
اكـــمـــــن أنــــــا إنـســـــــان
.
لـكــن تــقــــــولـــــي رقـــص
و كــــلام مـا هـوش مـوزون
فانا هرفض أعيش في هجص

وهــارفــض ألـبــس قـــــرون

.

.

.

اي خناقة .. انا دلوقتي ممكن اكون الي حد ما

نوعا ياعني

حبة كدا متظبط

معلشي

حاول يابني تاخد مضاد حيوي علشان البرد ما يبوظشي دماغك

حاضر

علي فكرة ؟

ايه ؟

وتحت فكرة ؟

الله ؟

وجنب فكرة و وراها

انت بتهيس بقي

اه .. اشمعني انت

طب انصحك انا كمان تاخد مضاد حيوي

حاضر

لا لا ثم لا ولا

.














..






.
.
احه للضغط الامتحاني
.
احه للصداع
.
احه للبرد
.
احه للمذاكرة
.
احه للنت اللي بيقطع
.
احه للكليه
.
احه لملازم المراجعات
احه للمعيدين

قولي قبلة

قـــــولـــــي قـــبــلــــة

.

عندك استعداد تحبي

حد مش هيقول بحبك

عندك استعداد تحبي

حد طالع دين ابوه

يكون في علمك

مش لوحده

هو واللي خلفوه ؟

حد بائس

حد يائس

حد كاره للحياة

حد لما يـيـجي يفرح

يملي كل الدنيا اه

حد لما يـيـجي يبكي

الدموع مغرقاه

حد واقف بين نارين

حد قلبه بين وبين

ومستحيل هيبدي بين من البنين

مستحيل

مسنحيل يقدر يغشك

عندك استعداد تحبي

حد مش هبقول بحبك

بصي انا .. حد طيب

مرة قالوا اني وسيم

كتير قالوا لي اني كريم

وصحابي ياما اتمألسوا

وقالوا عليا .. شاعر عظيم

كل دول ناس طيبين

ناي من زمان

ناس كدابين

يخدعوكي في الكلام وملونين

اسمعي مني الحقيقة مجردة

انا .. مش كدا

انا حد عادي جدا

حد خلقة ربنا

لما ييجي الصبح باصحي

ولما الليل بنام

وشعري دا .. مش حاجة ذرة

دا كلام زي الكلام

والحب عندي .. حاجة مرة

فيه اسية .. وفيه الام

قال لازم اضحك لما اشوفك

تـنسي فيا معني خوقك

وابقي بردك

وابقي حرك

وابقي تحت الشمس ضلك

وابقي دم بيمشي فيكي

وتبقي دم بيمشي فيا

ولو تغمض يوم عنيكي

يبقي لازم حلم فيا

ولو اغمض يوم اشوفك

ماليا كل الكون عليا

لا

مين هيضمن كل دا

صعب جدا اضمنه

عايز اقولك .. اني مش مالك مصيري

عاز اقولك .. ان كلي ملك غيري

عايز اقولك

اني مستحيل هافكر

يوم اقولك قلبي حبك

عندك استعـداد تحبي

حد مش هبقول بحبك

هاه سمعيني الوقتي ردك

ولا اقولك

شاوري قلبك

وابقي قولي بكرة ردك

عندك استعداد تحبي

حد مش هيقول بحبك

حالات

حـــــــــــــــــالات

.

_1_

.

عندما يتملكك شعور طاغي بالكتابة ثم تشرع في مسك الورقة والقلم .. ثم تغلق عينك اليمين وتسرح الي اعلي ثم لاتجد شيئا تكتبه .. فهي بلا شك حالة فراغ دماغي

نصيحة مني اوعي تحشيها

.

_2_

.

عندما تريد ان تذهب الي السنيما اليوم من شلة من الاصدقاء .. باعتبار ان اليوم هو ضمن ايام العيد ويجب عليك الفرحة ثم ما تلبس ان تتذكر انك لا تملك حق التذكرة .. فهي بلا شك حالة فراغ جيبي

ونصيحة مني اتلم واقعد في البيت

.

_3_

.

عندما تذهب الي اقرب سنترال ثم تشري كارت شحن محترم ابو عشرة جنية او تكون اكثر شياكة وتحول لنفسك خمسة جنية رصيد .. لترسل بهم رسائل قصيرة ورنات .. ثم تجده فجاة في عز الحاجة ان رصيدك خلص .. فهذه وبلاشك حالة نحس شديدة

ونصيحة مني .. بيع الموبايل لاتنحس الشركة

.

_4_

.

عندما تتذكر ان خامس يوم العيد هو عيد ميلادك .. وان عليك الذهاب الي الكلية لحضور بعض المحاضرات وشراء مع المذكرات .. وانك لازم تذاكر حتي في عيد ميلادك تبقي دي حالة رخامة

نصيحة تدعي علي امك وابوك انهم خلفوك في اليوم دا

فضفضة واحد لسه عيان

_1_

.

عادة انا مش من النوع اللي بيحب يكتب بوست يقول للناس فيه .. كل سنه وانتوا طيبين .. لاي عارف ومتاكد ان كل اللي هيعلق هيقولي كل سنه وانت طيب .. ياعني زي ما بيقولوا كدا .. بنغني ونرد علي روحنا

.

_2_

.

بقالي كام يوم كدا منقطع عن النت .. مش بايدي والله كان نفسي اكتب حجات كتيييييييييييير جدا .. باتمني لو عندي دلوقتي خمست تلاف مدونة انشر فيهم كلهم مرة واحده كل اللي عايز اقوله .. ولكن عارف انه لا تاتي الرياح بما تشتهي السفن

.

_3_

.

انشغلت كتير في دوامة التوهان .. كنت متشوق لحفلة هيثم .. ورهبة الامتحان .. اللي هسقط فيه انشاء الله بس دعواتكم معانا .. كان نفسي اكتب شعر جديد .. فيه حجات كتيرة كتبتها كنت عايز انشرها ياعني انا هنشر حجات صوغنططه كدا علي قد البوست ما يسمح علشان م يبقاش طويل

يا عصفور ليه هشّـوك

سيبت العشة وليه مشّـوك

اوعاك تزعل لا يغشوك

احسن تعرف مين بيحبك

ومين في العالم دول كرهوك

هي الدنيا يا صاحبي كدا

فيها الورد .. وفيها الشوك

.

_4_

.

بيقولوا في كتب الطب والعلم والصيدلة .. ان الانسان ممكن يقعد اسبوع كامل بلا طعام .. ولكنه لا يستطيع ان يظل يوما 24ساعه دون الماء اليوم بكل فخر اود ن انبئكم اني كسرت القاعدة .. فانا قعدت تلات تيات بلياليهم .. ميت .. وبعدين صحوني .. اول ما صحيت .. هما اتخضوا فماتوا ... قمت انا دخلت ع المطبخ وقعدت اكل الاكل بتاع تلات تيام

.

_5_

.

اخيرا احب اقول .. اني ممكن اغيب وقت اكبر من الوقت اللي فات .. وقت اضافي ! وقت مستقطع ! وقت باثر رجعي ! وقت بدون حد اقصي ! علي راي ادهم .. نراكم في المسرات انشالله

العالم كله بيشوف هيثم

بصراحه مش لاقي كلام تاني اعلق بيه بعد غياب طويل جدا ... كان نفسي اكتب حجات كتيرة قوي .... شعر جديد ومقالات معينه عايز افضفض بيها لروحي .. لكن الخبر دا .. احلي من اي شيء تاني ممكن ابوح بيه لنفسي او لاي حد .. هيثم فنان ممتاز يستاهل اكتر من كدا بالاف المرات .. انا فخور جدا اني باقول وسط صحابي .. الفنان دا .. اللي طالع في الجرنال دا .. واللي بكرة اسمه هيبفي اكبر اسم انشاء الله صاحبي .. مين عالم

بكرة يا هيثم .. مش هنعرف نخترق الزحمة اللي هتكون حواليك ولا البودي جارد علشان نعرف نسلم عليك حتي .. بس انا عارف انك ابن حلال .. وهتبقي تسلم علينا بعد الناس ما تروح وبعد البودي جارد تمشي .. عشان احنا صحاب .. مش كدا ؟

جوايا كلام كتير قوي قوي قوي عايز اقوله بس مش عارف اعبر عن اللي جوايا .. الشعر واقف علي لساني يا فنان .. انا فرحان جدا دا جدا .. انا بعد ما رجعت من حفلة هيثم اللي في الساقية .. كنت ماشي باتطوح .. تابويا فكرني شارب حشيش .. هيثم !!! .. روح يا شيخ الله يعمر بيتك .. انت خدت فيا ثواب .. انا كنت فقط الامل في اي صوت جديد ومسيقي حلوة بجد

يمكن قراءة الموضوع من هنا ايضا

الي كل الشعب المطحون

الي كل الشعب المطحون

الي احه

الي الالف : ارفض

الي الحه : حدوث

الي هاء : هذا

.

.

.

احه .. احه

قوم واتنحي

كل سجونك راح نفتحها

خلي الشعب دا يخلص منك

ياللي نظامك ضار بالصحه

.

*******

.

انسي قصورك وانسي قلاعك

كل الشعب الطيب باعك

افرد يالا بسرعه شراعك

كل سنينك هــنطوحها

.

*******

.

تسجد تركع ليهم بره

واحنا بتسحل فينا يا عرّه ؟؟؟

مصر الحرة هتفضل حره

واحنا بموتك هنريحها

.

*******

.

انسي ان احنا عبيد وجواري

وانسي ان انت ف برجك عالي

كل الشعب بصوته العالي

قالك احه واحه واحه

.

*******

.

يا مكـتـفــنـا برزق حبال

شقه وزوجه ولسه عيال

هذا القيد خلاص قد زال

واتجمعنا بقولة احه

.

.

.

ادم المصري

اول دكتور احه

اول عاشق احه

ولما ابني المقام

هبقي اول وليّ لاحه

احـــــــــــــــــه ببلاش

احه ببلاش .. يا ولاد الوسخه
.

فكرت مليا قبل ان اكتب موضوعي هذا .. احترت بين الاسماء كثيرا .. كان يراودني اسما .. اعتقد انه جذاب هو الاخر (احه بالانجليزي يا ولاد الوسخه ) لا اعرف لماذا اذيل كلماتي ببعض السباب .. ولكني استلذ بذلك جدا .. واجدها متعه لا تفوقها شيء .. واتخيل كل من له قلب رهيف .. يمر بالصدفة هنا .. فيجد مثل هذا الكلمات .. فاتخيل شكله ومقدار الصدمه علي وجهه فانكب ضاحكا لا يستطيع الحزن مهما تفاني في عمله ان ينال من مزاجي شيئا
.
بعد ندوة علاء سيف في الساقية ( للعلم : علاء سيف هو صاحب مدونة علاء ومنال ) وما اثير من جدل واضح حول موضوع البذاءات في المدونات كيف ان البعض لا تروقه الكلمات التي نسوقها معشر البذائين علي صفحات مدوناتنا .. ادي ذلك بالطبع الي احياء روح ( الاحه ) بداخلي .. حتي باتت هي الاخري تستنكر غاضبة اتهامات البعض الباطلة لها
.
اثار علاء .. موضوع مهم .. الا وهو .. هل البذاءات هي مجرد الفاظ .. ام معاني .. وهنا لاحت الابتسامه في وجه ( احه ) المسكينه .. وصرخت بعلو صوتها وتقول يحيا العدل .. يحيا العدل .. فانا لم احث ابدا علي معني بذيء علي العكس اطلاقا .. فانا احث علي الشموخ وعدم الهوان وعدم الخنوع والتصدي للظلم .. وهي كلها صفات النبلاء الكرام .. لم اجد ما اقوله لها هذه المسكينه الجريحة الفؤاد التي مازالت تبكي وتنتحب الي الان
.
اثناء تصفحي داخل اروقه صفحات بعض المجلات المشهورة .. وجدت شيئا اثار حفيظة ( الاحه ) بداخلي .. وجدتها تستنكر علي الناس الصلف والجمود .. وكيف لهم ان يكيلون بمعيارين .. كيف لهم ان يسمحوا للغرب .. ان يتراقصوا علي انغام ثراثنا المجيد .. وكيف لنا ان نترك لهم شخصيتنا يعبثون بها كما يحلو لهم
.
سالتها يا ايتها ( الاحه ) الجميلة .. القريبة الي قلبي .. ماذا بك ايتها السمراء .. سمار النيل .. ايتها الخمرية .. بلون الطين .. قالت لي والدموع تنهمر من علي وجنتيها .. كيف لنا ان نتنازل عن هويتنا .. وكيف لنا ان نكيل بمكيالين ونظلم انفسنا ونعطي الحق كله مع الزياده لاهل الغرب .. الغاصبين
.
قلت لها كيف ذلك يا جميلة .. ارجوكي لا تذيدي من شقاءي

.

قالت بصوت عذب يملئه الحنين : كيف لهؤلاء المجرمين السفاحين القتلة .. اصحاب القلوب الغليظة .. اصحاب الاخلاق الوضيعة ان يحرموك من قولي وانا روحك .. وانا انفاسك .. وانا دماءك في الاورده .. ثم يسمحون للاخرين وعلي الملئ ان يقولني .. بفم اعوج قبيح استنكره .. أني لاحب الي نفسي ان اُنسي في طيات الزمن العاتي .. ولا اخرج الا علي لسانك انت حبيبي ومعشوقي الاول
.
قلت لها .. فم اعوج ؟ كيف ؟
.
قالت يذهب المرأ .. من اخوانك واصحابك الذين يبادلونك السباب في السر .. ويعلنون مودتك في العلن .. ليشتروا بجنيهات عده .. جريدة اسبوعية تنشرني لهم علي الملئ .. وبلهجة انجليزية .. قلت لها كيف ؟ .. كيف ذلك وانا الدكتور الوحيد في هذه البلاد ؟
.
قالت لي .. انظر بنفسك واحكم ؟

.

.

وعندما نظرت الي الكلمة .. لم اجد ما ارد به علي نفسي .. او ما اواسي به هذه ( الاحه ) المكلومة الجريحه .. فردت هي وبكل كبرياء .. انا الان .. اوجه الي كل العالم سؤال

قلت وما هو سؤالك يا اقرب الناس الي قلبي ؟

.

.

ليه الواحد يروح يشتري .. الجرنال باتنين جنيه .. عشان يقرا كلمة ( احه ) بالانجليزي .. بالرغم . انه ممكن ييجي عند حبيبي .. ادم هنا في البلوج ده ويقراها ببلاش ؟

.

اصاب السؤال زهول كل من سمعه .. لم يجد احد الرد المقنع علي عشيقتي وحبيبة فؤادي .. ولازم الجميع الصمت

.

.

الي لقاء اخر

لماذا احه .. يا ولاد الكلب ؟

ادم المصري

اول دكتور احه

اول عاشق احه

ندوة علاء سيف في الساقية

روحت امبارح الساقية

.

حضرت ندوة علاء سيف

اللي كانت عن المدونين

.

شوفت هناك بيسو خيال الظل

اللي اثبت لي فعلا .. ان لا عندي خيال ولا نيلة

لاني طبعا شوفته غير الصورة اللي كانت في دماغي اطلاقا

تقريبا هو شاب من سني ياعني

.

شوفت تونا الجميلة جدا

واللي وعدتني انها هترجع تكتب تاني

لانها بجد وحشاني مووووت

.

كان معايا هناك سندباد مصري

وكاست تو واي

وقريب هينزل موضوع مدعم بصور عن الندوة

.

علاء اتكلم في موضوع صدق المونين

البذاءات التي قد تحتويها المونة

ازاي القارئ يحاول يعرف اذا كانت المدونة كذابة او لا

وهكذا ياعني

.

انا حسيت ان الندوة ناجحة جدا

. لحد ما واحد عادي لا يعرف اي شيء عن الموضوع

غير انه من رواد الساقية

سمع انه فيه ندوة قال يحضر

وحاول يفهم الموضوع من كلامنا

فحب انه يتبرع سيادته ويقول الحل

والحل كان من وجهة نظره في الحجاب للبنات

.

طبعا علاء اتنرفز .. وكانت هتشعلل

بس هو برر موقفه انه الاستاذ المبجل خرج عن الموضوع

الاساسي للندوة .. وان علاء ما عندوش استعداد

يكون محايد في موضوع ومنحاز لاخر

.

المهم .. انا شوفت ماما علاء .. ست جميلة جدا جدا

وتحسها امك اول ما تشوفها علي طول

.

اتكلمت هناك .. للي راح وما شافنيش

ودافعت عن حرية الكتابة باي شكل وباي طريقة

لان المدونة مش بتخش بيتك بالعافية

لو مش عجباك .. اقفلها

وقلت ان المدونات مش مطالبة انها تقدم حلول

كفاية انها .. قدرت تقول يا جماعة فيه مشكلة

مش شغلتها بقي انها تقدم حلول

.

المهم انا حبيت اسولف عن الندوة علي راي

فانتا

لانها قالت لي ابقي اسولف عنها في بوست

كدا حلو يا فانتا ؟؟؟؟؟؟

.

يلا بقي

سلام

بعد القلوب

في بوست سابق لي .. كتبت

بعد الاماكن

.

.

.

هذا البوست السابق .. لم اكن اكتبه الا بعدما شعرت باحساس خاص .. اردت التعبير عنه في مساحتي الخاصة .. التي لا يشاركني فيها احد

.

سمحت للعابرين ان يشاركوني احساسي .. بالايجاب او القبول .. ولم اعترض ، ولكني فوجئت ومن دون قصدي اني قد اثرت حفيظة بعض العابرين ، اعتذر لكم جميعا ان كان هناك شيئا ، في احساسي الخاص ، والذي عبرت عنه في مساحتي الخاصة ، قد اثار حفيظتكم

.

السيد المبجل .. سيزيف .. صاحب الصخرة .. شرفني كثيرا اني كنت موضوعا ومادة للكلام والتعبير ، فتقريبا ومن دون قصد مني اغضبته ، وانا لم اقصد هذا بالفعل ، بعد الاماكن هي حالة ، هي احساس ، هي شعور ، لم ولن اطالب بتعميمه ، ولن اطالب احدا ان يشعر مثلي ، او ان يري مثلي ، او ان يحب مثلي

.

كنت انوي بعد سرد حالتي عن بعد الاماكن ان اكتب عن موضوع اخر .. ولكن عاجلني به سيزيف .. حتي اوضح للاخرين وجهة نظري .. كنت اود الكتابه ايضا في

.

بـــــعــد الــقــلـــــوب

.

علي غرار بعد الاماكن ايضا

كنت جالسا في احدي الكافاتريات بالكلية .. وعندما امعنت النظر في الثنائيات الذاهبة والمترجلة امامي .. تذكرت بعد الاماكن .. وتذكرت كيف للانسان المصري ،ان يترك نفسه لتلعب به نفس تلك العادات القديمة التي لعبت باجداده .. الا وهي وهم الاستقرار عند اول محطات الطريق

.

توهم الاجداد .. ان العالم كله في حوض النيل .. لم يتحركوا بعيدا .. حتي باتت مصر تختنق باهلها .. حتي بالرغم من كونهم يرون الصحراء امامهم واسعه الا انهم يحبون الاستقرار بجانب الحياة السهلة

.

يري الشاب في اي كلية فتاه .. تعجبة .. يميل اليها .. سوف اتكلم هنا عن المشاعر الصادقة من كلا الطرفين ، يفاجئ هو الاخر انها تبادله نفس الشعور .. لا يفكر في مستقبل العلاقة .. يتابادلان الاثنان حبا وهياما طيلة سنوات الدراسة .. حتي يفيقان علي الوهم المر

.

كل منهم يحلم بالطرف الاخر فارس احلامه .. كل منهم يتخيل الاخر .. وهو في سن كبيرة .. جد لاحفاد يملؤن الدنيا عرضا وطولا .. ولكن ما تلبس ان تنفك العلاقة الوهمية بعد اول مشاكل تصادفهم

.

لقد رايت كثيرا في كليتي يجعلني احكم وانا واثق في حكمي .. عندما يغضبون من بعضهم .. ترتدي البنت الحجاب .. تسير وحيدة حتي من دون زميلاتها البنات .. نجد نصائح الوعظ والارشاد الديني تكرر في فمها .. تحذر من اختلاط البنات بالشباب .. ثم اجد وانا الابله الوحيد الذي يصدق .. انها لم تكن الا زوبعه نشبت نارها وانطفئت سريعا وعادت المياه الي مجاريها

.

لا اعرف لماذا يشعر كل منا .. بان ما هو مقدم عليه هي اخر مراحل حياته .. تناولت المكان في البوست السابق .. لانبه .. ان منا من يعتبر بيته الذي يعيش به هو مقبرته الذي يموت فيها .. يحاول جاهد صنع ذكريات بالغصب .. حتي يشعر بالحنين .. ايضا عندما يرق قلبه لاول فتاه يراها .. يتخيلها زوجته ام اولاده

بالرغم ان بيته .. القديم يتركه ويذهب لاخر .. واول فتاه يراها .. لن تكون زوجته .. هنا اقارن ثانية بيننا وبين امة يقال عنها امة من الرحل

.

تغير المكان لاي اسرة هو باسهل الامور لديهم .. قد يمارسون الجنس .. ولكن لا احد منهم يتوهم ان من يمارس الجنس معها هي رفيقة الحياة والاخرة .. فكلا الطرفين .. يدركان تماما .. انها مرحلة عابرة لكليهما .. لا يقما الدنيا ولا يقعدوها .. لفراق احدهما الاخر

.

نحن من يملك ان يريح نفسه .. ولكن بإردتنا الكلية .. نعذب انفسنا .. بصنع ذكريات ليس لها قيمة الا مزيدا من الاشتياق والحنين الي وقت مضي .. لن يعود

.

.

*****************************

.

ما سبق كان احساسي انا الشخصي .. لا ادري لماذا قلت ذلك

هل لاني لم اقم بعلاقة عاطفية مثلا مع احدي زميلاتي ؟

اتراها الغيرة من اصدقائي الذين اقاموا علاقات ؟

.

لا ادري حقا !!!!!ز

جيبت كيبورد جديدة

انيههاهاهاهاهاهاهاها

.

جيبت كيبورد جديده ومش هكتب بكيبورد الويندو تاني

.

انيهاهاهاهاهاهاهاهاهاهاهاهااه

.

علي اري العالم الكبييير قوي دا

بصراحه مش فاكر اسمه ايه ؟

.

اللي اخترع الحاجة المهمة قوي دي

.

بس بصراحه برده مش فاكر هو اخترع ايه

.

المهم ... لا حياة بلا كيبور

لا حياة بلا كموبيوتر

لا حياة بلا نت

.

انا مدون

اذن

انا موجود

.

علي الهامش احب اقول بشري لكل المدونين

حاجة مهمة جدا

الساقية عالمة حلقة نقاش عن موضوع

المدونين .. مالهم وما عليهم

يوم الخميس

7/12/2006

بعض مني اثناء ضيقي

بعض مني اثناء ضيقي

.

.

ـ1ـ

طلعت الاول علي جامعة حلوان في مسابقة الزجل

ياعني اللي هيروح اسبوع شباب جامعات المنوفية هيلاقيني هناك

.

.

ـ2ـ

قاعد في امان الله .. باتفرج انا والحاج علي التلفزيون

يا حاج : مش ادم طلع الاول في الجامعة في الشعر

الحاج : ممم

ياحاج : مش تقوله حاجة كده .. دا هيسافر المنوفية

الحاج: اه .. انا كل ما اقوله يروح مشوار تبقي حجته المذاكره

انما للجامعة حلو .. ماشي ماشي

.

.

.

ـ3ـ

اعتقد ان جميع المؤشرات تنبئ بان حالة الشعر المصري

او الشعر عامة في الحضيض والحمد لله

لما واحد زيي ياخد اول جامعة

تبقي الحكاية كووووووسه

.

لما واحد زيي يمثل جامعة حلوان

في اسبوع شباب الجامعات

تبقي جامعة حلوان دي

مافهاش رجالة

.

.

ـ4ـ

انهارده الخميس

اخر امتحانات الميد ترم

اتخانقت خناقتين لحد دلوقتي

وربنا يستر

عشان الرابعه بتولع خلاص

ايه ؟

التالته ؟

لا دي ولعت من زمان .. وانا رايح اشعللها بقي

.

.

ـ5ـ

بكرة الجمعة

اعتقد ان بكرة هيكون يوم مهم جدا

الساعة اتناشر تقريبا

هيكون فيه حدث مهم .. جدا

بيستعد الناس تقريبا

للصلاه

.

.

تحياتي القلبية للجميع .. اتمني للمتزوجين يوم خميس رائع .. من دون حسد ولا قر .. يارب كل واحدة متجوزة تصحي تلاقي نفسها الصبح حامل ، حامل ، حامل .. ولا عزاء للمقاتلين

جديد

اقرا في اتحاد مدونين

لا وطن ولا دين

.

.

.

اتحاد ايه يا ولا الوسخة

هيثم محفوظ في الساقية

.

.

للعلم : هيثم محفوظ هو نفسه صاحب مدونة صبا

خطبة الريس

خطبة الريس

.

مش الريس خطب امبارح

ايه ده هيتجوز علي سوزان في السن ده ؟ اما رجاله ناقصة صحيح .. يلا عقبال كتب الكتاب ياعم

كتب كتاب ايه الله يخرب بيتك هتودينا في داهية

ايه بس ؟ جري ايه ؟ مش بتقول خطب ؟

ايوه خطب في الناس .. انا قعدت طول اليوم سعادتك ادام التلفزيون احاول اعرف الرس قال ايه ... ابدا

اعدت بتركيز شديد جدا ... يتزاع ع القناه الولي معاه ع التانية معاه كنت وراه بالمرصاد .. اني افهم حاجة .. ابدا

قولت طبعا العيب مش في الريس

طبعا

طيب ياخويا دا اللي انت فالح فيه المهم .. ماكدبتش خبر قولت اجيب الجرنال .. افهم كلام زي الناس العاقلين .. قمت جيبت مين ياخويا

جيبت مين ؟

جيبت المصري اليوم

طب كويس بيقولوا عليه مستقل

اه انا سمعت كدا برده المهم .. اقلب الجرنال يمين شمال ياخويا .. مالاقيش حاجة ... وراح عليا الجنيه

كل ماهونالك بس ان الريس بيقول انه هيفضل يحكم طول ما لسه في نفس

قولتييييييلي ...

ايه قولتلك ايه ؟

اصل امبارح .. البلد كلها كانت واقفة .. مبني وزراة الصحة كله فضوه .. ممنوع دخلو اي حد ولا حتي الموظفين .. انا قولت دا ارهاب ولاحاجة جايين عشان المجمع .. افتكرتهم مش عارفين العنوان

الكلام دا فضل لحد الساعة اتنين بعد الضهر ياعني الناس خدت اجازة بلاش .. الله يخليك ياريس

اه وايه كمان

اسكت .. شارع قصر العيني دا كله كان مقفول .. لحد شارع العروبة ييجي ساعة كدا ..وميدان عبد المنعم رياض

ماله راخر ؟ مش بتاع التحرش ده ؟

اه هو فضوه

ايه ؟ ميدان عبد المنعم رياض ؟ ازاي ؟ والناس راحت فين ؟

انا مالي انت بتسألني انا ؟

كمل

اه .. وكل العربيات اللي كانت واقفة انتظار علي الارصفة اتسحبت

يانهار يانهار ؟ دا انا نايم في العسل بقي ؟

امال انت فاكر ايه ؟ لا خد الكبيرة دي بقي ؟

قول يا سيدي

محطة السدات ومحمد نجيب

مالهم راخرين ؟

اتقفلو .. وماحدش كان بيخرج ولا بيطلع منهم خالص .ههههههههههههههه

بتضحك ؟

اه هههههههههههههههههه

الا قولي صحيح .. انا ماشوفتش صوان ولا رقاصة ولا فرقة .. انا كنت شايف بلاليص بس .. هو كان بيخطب من غير فرح ؟

كنت شايف ايه ؟ بلاليص ؟ عندك حق .. هما كده فعلا .. عمار يا مصر

هو فيه ايه ؟

هــــو فـــيـه ايـــه ؟

.

.

شهادة مواطن بريء

ـــــــــــــــــــــــــــــ

.

اعتقد اننا بتنا نعاما .. لا نحن في الاصل نعاما بل نكذب علي انفسنا بكلام معسول ، لم اكن انوي الكلام ، ولكن قدر الله ما شاء فعل ، لذلك هذا قدر كل من سيقرأ

.

اولا الحدث : يقال انها حادثة تحرش بوسط البلد

ـــــــــــــــــــــــــــــــــــــــــــــــــــــــــــــــــــــ

.

التحرش !! .. لم يكن التحرش بالفتيات بشوارع القاهرة بالشيء الجديد اطلاقا علي اي حال ، فقط اعتادت القاهرة وضواحيها ذلك النوع من المعاكسات ، وبالاخص تلك المناطق النائية وتلك شديدة الزحام

.

يقال علي السنة الكثيرين ان هناك شيء غير عادي حدث ، وان المصرين عرفوا بتدينهم وسماحتهم وشجاعتهم وكل الكلمات الاخري التي لم تسعفني ذاكرتي بها وتنتي بـ هم ايضا ، وتستنكركل الاصوات ماحدث لانه ليصح ولا يعقل ان يحدث ما يحدث من المصريين

.

ثانيا : سبب الاعتراض

ـــــــــــــــــــــــــــــــــــــــــ

.

يتلخص اعتراض البعض علي ماحدث في عدم تصديقه ان ماحدث قد يخرج من شعب كالمصريين باعتبار ان المصريين هم ملائكة الله علي الارض _ راي الناس

.

وهناك راي اخر يعترض ويقول انه لم يحدث شيئا علي الاطلاق وتعاملو مع المدونات التي تكلمت عن الموضوع بنظرية المؤامرة وكانها مدونات تبث سموما لضرب السياحة المصرية _ راي الحكومة

.

وجهة نظري

ــــــــــــــــــــــ

.

اعتقد ان ماحدث ليس بالشيء الغريب ، يعزي البعض ان ماحدث ، كان نتيجة الضغوط السياسية والاقتصادية التي وقع فيها الشعب المصري لاكثر من ثلاث عقود

.

اعتقد انا ان الشعب المصري من بداية خلق الحليقة وهو يعاني من الفقر والجوع والمرض .. وذلك تحت حكم الفراعنه والرومان والبطالمة والمسلمين والعثمانين حتي المصرين انفسهم افقروا انفسهم ، يغرق البلد في خيرات وينعم بها الحكام ، في الدولة الفرعونية الطحنيت لا يقوي عليه سوي الامراء والملوك ..وكذلك الحال في كل العصور

.

اذن بالمنطق البسيط نجد ان لا ظروفا ضغطت او عوامل اقتصادية اثرت او شيء الفقر منذ ان خلق الانسان المصري موجود ، منذ ستون عاما تقريبا كان اكثر من 90% من شعب مصر يمشي حافيا

.

اذن ما الجديد .. اشعر انه لا جديد .. فمنذ ان وعي التاريخ لنفسه وكانت اراضينا تسرق وتنهب ونقتل في مخادعنا ، ومنذ ان وعينا نحن للتاريخ ونحن نعيش في ظل دكتاتورية حكام

.

اذن كيف حدث هذا فجاة

ـــــــــــــــــــــــــــــــــــــــ

.

اقول انه لم يحدث فجاة وان الشعارت التي نغني بها علي انفسنا من طيبة وخفة دم وشهامة ورجولة وجدعنة ما هي الاصفات استخدمناها لنجمل بها الوجه القبيح فينا ، فلو ان ما حدث قد حدث بسبب الفقر والبطالة فاعتقد انه كان يحدث اذن من قديم الازل .. حتي ايام الدولة الفرعونية

.

شهادة مواطن

ــــــــــــــــــــــــــ

.

كنت في ميدان التحرير ثاني ايام العيد العيد .. شهدت بنفسي ماحدث وقد نوهت عن ذلك في احدي المواضيع ، شهدت علي الكورنيش ناحية البحر ما يستفز اي شاب منطبق علية بعض من الصفات السابقة وهو بالطبع لم يستفزني

بنت لم تتعدي الثمانية عشر عاما .. اغمي عليها تماما وباتت اختها تصرخ في هيستيرية تامة تطلب النجاة من قطيع يتجاوز الثلاثين لن تتراوح اعمارهم من عشرة الي ثلاثة عشر اعوم

.

الفارق مزهل .. في نظر اي انسان هؤلاء اطفال .. ولكنهم ليسوا كذلك .. اغماء البنت لم يكن ابدا في مصلحتها .. في البداية كانت تقاوم هي واختها .. ولكن بعد الاغماء لم يقاوم سوي اختها التي انهارت هي الاخري

.

تطوع كبيرهم في سندها علي كتفه بحجة انه يشربها كوب عصير .. واخرون بحجة المساعده .. حتي جاء اثنان يقال لهم امن .. يرتدون القميص اللبني والبنطال الكحلي ولا ادري يتبعون اي امن

.

انطلقت في طريقي حيث شارع طلعت حرب .. واما سنيما مترو حدث ما لم اتخيله ، وقف اتوبيس ليس بالصغير حيث وقف اما السينما مباشرة ، ليخرج منه سعد الصغير وجميع رفاقة في الفيلم ليتصلقوا الاتوبيس ويرقصوا فوقه .. حتي بات شارع طلعت حرب كومة من اللحم الملتصق .. وكانت الفتيات تدفعني للتدخل الي الزحام حتي لايفوتها خذ صورة بالموبايل

.

ولن افصح لكم ما قد يحدث في مثل هذا الزحام

.

دعونا نقول احقاقا للحق .. اني لم اري مطلقا الراقصة دينا في الشارع ترقص او تفعل اش شيء ، فانا لم ارها مطلقا ..

.

ايضا هناك شهادة اخري للذي لا يعلم ..كل رواد منطقة وسط البلد هم سكان المناطق الشعبية المتناثرة حول القاهرة والجيزة .. دار السلام ومصر القديمة وغيرهم

.

هؤلاء لا يخضعون لاي سلوكيات عامة بالمرة ولا يمكن ان يتوقع تصرفاتهم علي الاطلاق

.

اخيرا : هو فيه ايه

ــــــــــــــــــــــــــــــــــــ

البارحة استضافت القناة الاولي تقريبا اثنين من المدونات .. احداهما صحفية والاخري طبيبة للاسف لم استطع ان اتبين الاسم ولكن مالاحظتة ان المذيعين كلاهما باتو يكيلون الاتهامات للمدونين

.

وكيف ان التدوين قد يتيح لجماعة محظورة مثلا ان تتكلم ... وان ماحدث في وسط البلد هو فبركة صحفية هدفها ضرب السياحة .. وانه يجب عمل رقابة علي ما ينشر

.

وكان الفكر الرقابي المسيطر علي كل العاملين بالدولة يجب ان يشمل كل شيء .. اذن فهذه هي حقية بلد تحتضر

.

اعتقد ان كل شاب مصري مر علي الدراسة الثانوية يعلم جيدا ما يحدث في محطات المترو اثناء الزاحم المصاحب لموعد خروج المدارس

.

كانت مدرستي في الملك الصالح .. دعيت ذات يوم لنركب في اخر عربة بالقطار لم اكن اعرف لماذا .. عند محطة دار السلام يكون الموقع متميز .. تحت الكوبري .. وظلام دامس بالعربة .. زحام حريمي كافي .. صيد ثمين وافر

.

والي اللقاء

ادراك ماهية

ادراك ماهيــــــة

.

.

شايل فوق جبين القلب
حلمي اللي متزين رقع
كان نفسي اتحول بطل
وازاي وانا عمال اقع ؟
كان نفسي اجيب الشمس .. من قلب السما
تشرب الضلمة
تحول

كل ايامك نهار
كان نفسي اجيب الملح .. من كل حبات العرق
وارسم فوق جبين الشط
قلب اخضر م الخضار
بس كونك كان معاند
عِنده كان واقف قصادي
دمي سال فوق جبينك
شق نهره في الاراضي
كل نبته بــتتولد
شاربه من دمي بكفاية
وانتي لازم تعرفي
من معايا ومش معايا
بلدي يا جناح الحمام
فين بيتربي حمامك
ما بقتش شايف غير زحام
وانطرشت
فين كلامك
بلدي يا حبل اللجام
اسالي راكب حصانك
ليه انخرس صوت اللسان
ليه كبح باديه لجامك
بلدي يا بستان شرار
فين جحيمك
فينها نارك
بلدي ياللي ليلها طال
اسالي راح فين نهارك
بلدي .. اوعاكي الدموع
قلبي مستحيل يوافق
روحي ليكي .. كلي عاشق
قلبي ياما شال بنادق
واسالي الارض الابية
مين بيحفر في الخنادق
واسالي الشمس العاتية
مين معلق في المشانق
واسالي نارك عليا
مين وقودها في المحارق
يا نسايم مستحية
اتقابلنا في المفارق
اقبلي مني الهدية
جبت لك قلبي اللي راشق
فيه رصاص البندقية
جبت لك كل الحقايق
ازعلي مني عليا
واعزريني الظلم حارق
بس اوعاكي الدموع
افضلي دايما قوية
وان نصيبك كان خنوع
واتغصبتي ع البكا
فابكي دمعي من عنيا
ابكي دمعي
من عنايا

حلم نونو قوي

حلم نونو قوي

.

.

أنا : بحلم أدوب ... وسط الديابة الديـبـانيـن

.
هو : إحلم يادوب ... بكام رغيف متغمسين

.
أنا : علي فكرة أنا
ضمن آلاف العاشقة لتـــــراب بـلــــد مـزروع أنيــــن

.
هو : طب وماله ؟

.
أنا : أنــا ابــن نـــاس
والنـاس حمـاس جهـــاد وغـــــد جــاي متجمعيـــن

.
هو : طب وماله ؟

.
أنا : متجمعين
علي كلمـــــة واحـدة من قـلــوب العاشقين
كلمة " بحبك" يا بلد
عاشق ترابك الـولـــد .. إنتي الوتد
أدام الريـح العاصفــة لكــل التــراث
كفاية احتباس

.
هو : اخرس يا واد

.
أنا : كفايـة قلوب تعشق تدوب آهات سكات

.
هو : اخرس يا واد

.
أنا : وكفــاية ناس
صوتها عامل في ودني زن
حتى صورتها في عيني جن
كفاية دول وكفاية دول

.
هو : اخرس بقول

.
أنا: انطق وقول .... كفاية دول وكفاية دول
ووعاك تطاطي

.
هو : اخرس يا واطي

.
أنا : اوعاك تطاطي
لاي واحد رايته زلعــة مش
ما هي أي حاجة عنده هتبقي مش
هتـــقـــول كـــفــــايــــة
يقولها مش
هتــــقــول مـــعــــايـــــا ..؟
يرد مش
يلعن أبو الدود اللي طافح
خرم كل حدود الوش
يلعن أبو الداء اللي سارح
علّم كل الناس الغش
يلعن أبو الشيء اللي خلّى
أغلب كل الناس َملّى

ولا بتهش .... ولا بتنش

بعد الاماكن

بــعــــد الامــاكـــن

.

.

غالبا ما يشعر البعض منا باحساس ما ناحية المكان الذي ولد فيه ، يعشق كثيرا رائحة المكان ، الشوراع ، البيوت ، الحارات ، الناس ، اصوات المارة في الشارع

.

ويظل هذا العشق مفخرة له .. ويشعر وكأنه سمكة لا تستطيع التنفس بعيدا عن مكانه ، ولكن بمرور الايام .. ويتزوج المرء منا ، ويصبح له مكانه الخاص ، مكان اسسه بمجهوده هو ، كل قطعة اثاث فيه له معها ذكرى ، لذلك يرتبط الانسان اكثر بذلك المكان ويعشقه .. لدرجة انه قد يشعر ببعض الارتباك والحيرة اذا جلس وقتا في بيته القديم .. الناس جميعا هكذا

.

اشعر ان للاماكن سحر خاص ، ماذا لو كل مكان من الامكنه تكلم بما يحويه من ذكريات ... يااااااااه .. اظنها سوف تصبح اكثر القصص تشويقا في عمر الانسان

.

ولكن دعوني اقول اني اشعر باحساس مختلف .. فانا اشعر اننا من نعطي هذه الامكنه اكثر من ما تستحق ، نبذل مجهودا في كل ركن فيها كي يصبح لنا ذكري في يوم من الايام

.

لعلها طبيعة في هذا الانسان الذي استقر علي ضفاف النيبل منذ فجر التاريخ .. اول ما تقع عيناه علي مكان ما ، فانه يحلم كيف سيمتد به العمر هو واحفاده في نفس المكان .. ويتذكر بعد الكبر ذكريات الطفولة .. يحكيها لاولاده الذين بطبيعة الحال تنمو لديهم الرغبة في عمل مثل هذه الذكريات

.

تجد الواحد منا اذا ذهب الي رحلة مثلا وقد يقضي اسبوعا فقط .. ياخد معه الكاميرا ليلتقد صورا للذكري .. يجد نفسه يتفاعل بحرارة مع المكان الجديد .. يعلق علي الجدار مرآة لتساعده علي التصفيف والحلاقة .. يبحث من احد المسامير الذي يعمل شماعة جيده لملابسه الرثه فنجده يتذكر كيف انه ضرب علي اصابعة وهو يثبت المسمار .. وكيف لهذا المسمار اللعين قطع ملابسه

.

الفرق بين امتنا وامه يقال عنها هي امة من الرحل .. انهم دوما يعلمون ان هذا المكان مؤقت .. وانه لن يظل فيه كثيرا .. لذلك لا يتعرض لا مشكلة من اي نوع عن ترك المكان ويذهب لاخر اما نحن فنعتقد ان مكان نومنا اليوم هو نهاية المطاف .. لن نبرحه مطلقا .. ولكننا نفاجئ بعد ذلك انه لا يكفي ولا يسع لكل احلامنا التي تنمو كل يوم .. ومن هنا نتعرض لاحساس بالالم نتيجة لاحساسنا الواهم بانا نفقد ذكريات كبيرة

.

ولكن سرعان ما نذهب الي المكان الجديد ونعمل بنفس الهمة لصنع ذكريات جديده .. وهكذا ..هذا ما شعرت به عندما غيرت شكل مدونتي القديمة .. عندما رايت اللون الرمادي الفاتح غضبت كثيرا وتمنيت ان اجد لونا غامقا به دفىء اللون السابق ... ولكن سرعان ما اخذت عيناي التعود علي النظر الي هذا اللون

.

وعندما وضعت الصور ذات اليمين وذات اليسار .. علمت بل تيقنت حالي حال كل الناس في هذه البلد .. ان هذا الشكل هو احسن شكل يصلح للمدونة .. واني كيف لم اعرف هذا منذ وقت