بوست عودتي
.
رجعت من المنوفية الحمد لله
.
بداية احب اشكر سيادة الرئيس
اطال الله لنا في عمرة وابقاه زخرا لنا وللبلاد
.
حلوة الكلمة دي ؟ دي تسجيدة
عشان التقيل جاي ورا
.
وما ادراك ماذا يوجد ورا ؟
سوف نبدا العد التنازلي للحكي
.
اول يوم كالنا كوسة .. ودي كانت حاجة غير مطمئنة بالمرة
المحلات كلها كانت قافلة علشان حسني مبارك جاي
اهل المدينة مش طايقين سيرتنا .. لاننا وقفنا حالهم
المدينة مترشقة فراشة .. متعلق عليها يفط ترحيب بسيادة الرئيس اسم النبي حارسه وصاينه
.
المدينه بصراحه شوارعها بتبرق كدا والارض نضيفة كدا
ولا كله كوم .. والاسفلت بتاعهم كوم تاني ... ما يعملشي طينه في المطرة .. تصوروا ؟
طبعا حسني مبارك جه يوم السبت اللي هو تاني يوم
طبعا عساكر امن الدولة واقفين بطول الطريق زي عواميد النور علي الصفين
جوة الاستاد اللي هايشرفه بسلامته كان موجود الحرس الجمهوري ؟
طبعا الاسطح كانت مترشقة قناقصة ماسكين عدسات مكبرة
انا كنت ماشي في طابور العرض .. كنت حالف اني ماعبروش اسم النبي حارسه وصاينه بس لما لقيته بيشاورلي اه والله كان بيشاورلي افتكرت حديث الرسول (ص) اذا حييتم بتحية .. فحيوا باحسن منها .. ايوالله بس كدا .. قمت بقي مشاورلوا ومهيصل له .. وضارب له تعظيم سلام كمان
طبعا بعد ما مشي بسلامته .. اتشالت اليفط اللي مغرقه البلد .. والاسفلت رجع طبيعي زي ما كان ( بيعمل طينه في المطرة) والمحلات فتحت والناس ظهرت في الشوارع وكان الناس دي طلعت من تحت الارض
.
.
واحنا هناك كان معايا اتنين تلاته حزب وطني .. عاملين فيها عارفين كل شيء
فاكرين انهم بيصورونا وبيسجلوا لنا في كل حته .. حتي في الحمام
ياراجل دول كانوا خايفين من عواميد النور لايكون عليها كاميرات .. ولا الشجر لايكون حد مستخبي فيه
ياعني كان اسبوع رعب
.
.
كان معايا واحد بيعمل صحيفة الحائط .. خادته وقلنا نتمشي .. فطقت في دماغي فكرة .. قلت ايه ايه رايك نعمل ريبورتاج مع الناس في الشارع .. ونعرف ايه انطباعهم م الاسبوع دا .. قالي ماشي
.
اول واحد
ــــــــــــــــ
كان شغال في صيديلة .. كل معلوماته عن الاسبوع ان فيه ناس من جميع الدول جايين هنا
دا طبعا باعتبار انه ما خرجشي من دولة المنوفية طول حياته قبل كدا
.
التاني
ـــــــ
كانت عيلة ام وبنتين .. الام جاية من امريكا الاتنينة من عشرين سنه .. وطمش شايفة حاجة اتغيرت في البلد اما بنتها اللي في الدبلوم شايفة ان اللي المباني الجديدة زي الاستاد والفندق بتاع الطلبة دا حجات برة ع الكورنيش مش جوة
لان فيه جوة حته اسمها العزبة ودي كلها بلطجية .. اما قبلي فهي منطقة نص نص .. اما بنتها اللي في الثانوي .. شايفه ان مجينا جه عليهم بخسارة
.
عملنا ريبورتاج مع الطلبة الضيوف
ـــــــــــــــــــــــــــــــــــــــــــــــــــــــــــ
اولا بنات جنوب الوادي
ــــــــــــــــــــــــــــــــــــــــــ
ما شكروش في اي شيء
الاكل زبالة
السكن زفت
التنقلات صعبة .. عشان نروح من كلية لكلية لازم نركب مواصلات لان مافيش حرم هناك اصلا
.
.
ثانيا شباب من بن سويف
ـــــــــــــــــــــــــــــــــــــــــــ
والله كانوا مدبين جدا
كل حاجة في المعقول بس في حجات صغيرة كدا
الاكل مش حلو
السكن مش نضيف
التنقلات صعبة
الجداول غلسه لان كل الانشطة في وقت واحد
مافيش خريطة للمدينة
.
.
واحنا ماشيين لفت نظرنا عمال من البلدية ماشيين يحطوا القراطيس الحمرا بتاعتهم دي في الارض .. وبسؤال احد العمال بتعملوا كدا ليه فرد علينا وقال .. اصل جمال بيه جاي واحنا بنعلم الطريق تاني
فقولت له تاني ؟
قالي اه .. لان لما علمناه لابوه .. اتمسح
.
.
كان فيه عسكري مرور وقفنا وسألناه ..راجل طيب بصراحه كل اللي يعرفة ان الريس جه امبارح .. وجمال بيه جاي يوم التلات انشاء الله
.
.
وحنا راجعيين ركبنا تاكسي .. وبسؤال سائق التاكسي بصراحه اتضح انه موظف في وزراة الزراعه وبيشتغل سواق تاكسي بعد الظهر ولما سالناه عن حال البلد قال ان البلد والله حلوة وكويسة
الكورنيش دا كان معمول من زمان من الزيارة اللي فاتت ياعني
وفيه هنا احسن شبكة مواصلات في الجمهورية
بصراحه كان راجل زي العسل وعشان كدا كنا عايزين نبلغ عنه بتعهمة الجمع بين وظيفتين
.
.
يوم الاربع بقي كانت المسابقة بتاعتي .. جه الباشا .. احمد بخيت والباشا سيد حجاب .. وكان فيه قصيدين من كل جامعة مبعوتين اريسطوا صاحب مدونة اريسطو هو اللي خد المركز الاول والميدالية الذهبية في القصيدة الاولي .. وانا خدت المركز الاول والميدالية الذهبية في القصيدة الثانية
وبعد ما اتصورت مع كل الضيوف .. الحمد لله الصور اتمسحت كلها اهيء اهيء اهيء
.
.
يوم الخميس خدونا نشجع الفريق بتع كرة القدم بتاعنا .. اكمنه وصل للنهائي .. طبعا دي مهزلة .. قال ايه انا اتفرج علي كورة .. لا وايه في استاد كمان
معايا واحد صاحبي قالي تعرف ياادم انا عمري ما شوفت كورة في الاستاد .. دي فرصة حلوة عشان اعرف الفرق .. قوله .. تعرف انت بقي انا دي اول مرة اتفرج فيها علي ماتش كورة اصلا
.
.
بصراحه واحقاقا للحق بصراحه هو الاكل هناك مش قد كدا
بس كان كتييييييييييييير بالزوفة ياعني
كل يوم كان فيه فراخ ولحمة
واللي عايز ياخد تاني من غير بونات ولا حاجة
وفي العشا الاكل يشبع تلاته
دي امانه بصراحه و لازم نقولها
كفاية كدا بقي عشان البوست م يبقاش طويل
بس اوعدكوا لما اجيب ما تبقي لدي اصدقائي من صور .. سوف انشرها انشاء الله















