ميثاق شرف للمهندسين

صراحه عندما انظر الي عموم المهندسين واتفكر في حالهم .. يغضبني كثيرا مشاهد استنكر حدوثها من قبل المهندس الذي يعد اكثر طبقات المجتمع فكرا وعلما ، وهو المعد فعليا للقياده مهما تكن الظروف ومها تكن الضغوط

يقلقني بشده ذلك التفرق والاختلاف حتى علي ابسط القواعد واكثرها بداهة ، واكاد افكر في مصلحة من ان يبقي المهندسين في مصر بهذه الصورة ، متشرذمين متفككين وكأن احدا يريد ان يبلغنا رسالة ما ... هؤلاء هم مهندسون مصر .. فما بالكم بجموع الناس .

اذا تطوع احد منا الان وتفضل بعمل استطلاع ما ، بين فئة من مختلف تخصصات المهندسين ، للاجابة عن سؤال واحد وحيد ،، الا وهو : الي ماذا يطمح مهندسين مصر بعد عشرة سنين مثلا ؟؟؟؟

لوجد اختلاف كبيرا جدا ولحصل علي اجابات مختلفة باختلاف عدد اعضاء التجربة في هذا الاستطلاع ،، لماذا لا يتجمع المهندسون جميعا علي عقل رجل واحد ... ويتوحد هدفهم ورؤاهم فتتضافر جهودهم للووصل الي هدفهم المبتغي والمراد ... خصوصا انهم هم الاولى والاجدر ان يقودوا الامه في هذه المرحلة التاريخية العصيبة في تاريخها الجديد والقديم

لذلك حلمت ذات يوم .. ان استطلاع رأي جرى يستهدف فئة معينه من المهندسين .. عن احلامهم وامالهم وكلها هموم عامة تخص المجموع وليس الفرد .. واذ بالاجابات متطابقه ليس فقط متشابهه وكأن المهندسين جميعا علي قلب رجل واحد في عقل رجل واحد علي اختلاف اتجاهتهم الفكرية وتياراتهم السياسية واهدافهم الشخصية يجتمعون احلام واحده تخص المجموع (( الامه )) وكأنهم جميعا متفقين علي حد ادنى مشترك يجمعهم علي الرغم من كل هذه الاختلافات . ولما لا وهم اعلى فئات المجتمع فكرا وثقافة ،،

ولكن من اين يأتي ذلك ان كان لكل مجموعه منا كمهندسين مصدرهم الخاص الذي يقيسون عليه مدى الصحة والخطا في الحكم علي الامور وكأن لكل منا الكود الخاص به الذي يقيس به مدى الصواب والخطاء علي الرغم انه ومن المفترض اننا جميعا تلقينا برنامج تعليمي واحد .

ما احلم به ... اشبه بالكود المصري في الهندسة مثلا ... اذا حدث اختلاف فني بين اتنين من المهندسين كلاهما علي صواب .. فحتى يحل هذا الاختلاف عاده نرجع الي الكود المصري او اي كود متفق عليه اخر ... اني احلم بكود مثل هذا ،، ولكنه اخلاقي . يرد المهندسين الي قاعده مشتركة ننطلق منها جميعا كل حسب فكره ، نحو هدف واحد نبغيه جميعا .. وهو ان تكون مصر دولة ذات رياده في كل المجالات

لماذا لا يكون هناك ميثاق شرف عام يرسم ملامح الشخصية التي يجب ان يكون عليها المهندس المصري ،، ويحدد المسئوليات التي يجب ان تتحملها مهنة الهندسة في مصر .

ميثاق شرف عام يجيب علي اسئلة من نوعية : كيف يجب ان يكون المهندس المصري ؟؟؟؟ و ما هي المسئوليات المفترض ان يتحملها من يعمل في مهنة الهندسة بمصر ؟؟؟

اذا وصلنا في وقت ما .. وكانت اجابات المهندسين عموما في كل ربوع البلاد علي اختلاف عموم التخصصات واحدة فاعتقد وقتها .. ووقتها فقط يستطيع المهندس انطلاقا من معرفته بهويته .. ومعرفته بواجباته ... ان يتحمل مسئولية قياده هذا الوطن الي التقدم والرخاء ،، وللحديث بقية

احمد رافت

الجمعه 20/5/2011

ثقافة الحد الادنى - تفصيل بعد اجمال

عن ثقافة الحد الادنى اتكلم

.
هذا المقال تأخر كثيرا ولكن كان لابد منه ،، كنت قد استعرضت سابقا حديثا عن ما يسمي بثافقة الحد الادني ... ونقول هنا انه لم يضع كل انسان منا .. المعايير والمقاييس والتي بناء عليها يقرر فيختار مستوي الخدمة او السلعه المطلوبة .. فانه مرارا وتكرار كمن اشترى الوهم .. ويصبح هو المسؤل الاول في عملية النصب التي سوف يصبح هو اول ضحاياها بالطبع .. والوطن هو الضحية الكبرى
.
ثقافة الحد الادنى هي مبدا يجب علي الانسان ان يدرك جيدا انه سوف يضحي كثيرا من اجله . ولكنه سيشعر بفخر واعتزاز بكرامته عندما يمتلك تلك القوة التي تمنحها هذه الثقافة شعورك بكونك انسان هو شعور لا يضاهي باي احساس اخر .. انسان خلقه الله وكرمه فلا يقدر اي انسان اخر ان يهينه او يذله تحت اي مسمى او ادعاء .. لا تساعد احد في ان يستغل فقرك وحاجتك ، ليبيع لك سلعه ما او خدمة ما ، انت تعلم انها رديئة ولا ترقي لسد حاجتك ,, بحجة انها رخيصة الثمن او قليلة التكاليف
..

يجب عليك الرفض رفضا باتا ان لم تناسب هذه الخدمة او هذه السلعه الحد الادني الذي تقبله

مثال (( العملية التعليمية والسلعه الناتجة منها))

السلعه الناتجة من العملية التعليمية هي الطالب المدرسي ... علي المجتمع ان يرفض رفضا باتا المستوى التعليمي الذي يقدم لابناءه ان لم يناسب هذا المستوي التعليمي ذلك المستوى الذي يطمح اليه المجتمع ويقبله لابناءه ... تحت اي مسمي او
ادعاء مهما كان ، .. ندرة موارد ... صعوبة تمويل ... فقر ايا ماكان تماما كما يصوم الاب والام احيانا لتوفير اللقمة لابناءهم ... يجب علي المجتمع ان يصوم ان جاز التعبير حتي يوفر الحد الادني المقبول لمستوي الخدمة التعليمية المقدمه لابنائه ... لانهم هم المستقبل وهم الامل في الغد



مثال اخر (( من احتكاكات الحياة ))

من منا لم يتعرض لمضايقات سائقي الميكروباص .. من فرض اجرة زياده .. او معاملة غير ادمية ... ان كانت ثقافة الحد الادنى هي السائدة عن جموع الناس .. فلن يقدر هذا السائق ان يفرض عليهم رغباته او سلوكياته سوف يضحي الناس قليل .. ولكن لن يجبرهم سائق المكروباص علي الانحشار بطريقة غير ادمية او ان يجعلهم يدفعون زياده عن اجرتهم ... ولكن تهاونهم في حقوقهم وتنازلهم عن قدر من كرامتهم هو ما يشجع سائق الميكروباص علي التمادي اكثر واكثر .. وهو كله ثقة ويقين ان العربية هتتملي هتتملي ولو مش عاجبك انزل يابيه ... ومن هنا تتم صناعه الدكتاتور


مثال اخر (( له جانب اقتصادي ))


نذكر جميعا تلك الصفقة المشبوهه ،، صفقة الموبايلات الصينيه .. التي ما لبثت ان اغرقت السوق المصرية حتى بات كل فرد منا يحمل تليفون او اثنين ... ثم فاجئتنا الحكومة .. بفصل الخدمة عن تلك العدد التليفونية لانها غير مطابقة للمواصفات وانها تحمل ارقام سريال متشابهه ... من الخاسر هنا غير المواطن البسيط الغلبان ... اعتقد ان تلك جريمة اخري تضاف للحكومة السابقة .... ان كانت الحكومة تطبق ثقافة الحد الادنى ،، كأن تختبرها مثلا ثم تقول هل هي مطابقة للمواصفات ام لا .. لكانت منعت تلك التليفونات الصينيه من الدخول اصلا الي السوق المصرية ... ولكانت رحمت الاقتصاد المصري من النزيف المرهق لعدة دولارات لصالح من ؟؟ الله اعلم .... ولكن لانها تعلم انه لا محاسب ولا رقيب وانه وبعد ان يستفيد المستفيد من تلك الصفقة الوهم .. سوف
تعمل علي الغاء الخدمة لتلك التليفوانات فلن يضيرها شيء




ان الله خلق الانسان وكرمه تكريما ورفعه فوق كافة المخلوقات كافة .. وعلي الانسان ان يحافظ علي تلك المكانة من خلال رفضة ان يتنازل عن مكانته كانسان كرمه الله علي كافة المخلوقات ورفعه فوقها جميعا .. ساحاول في موضوعات لاحقة ان استعرض

بتفصيل جوانب تلك الثقافة التي ادعو اليها ... ثقافة الحد الادنى .. وكيف لنا ان نصنع حد ادني في التعليم لا نرضي باقل منه .. وحد ادني من الصحة لا نرضي باقل منه الي كل نواحي الحياة عموما

ثقافة الحد الادنى ... يجب ان تكون نابعه من الاحساس بالفخر لانتمائك لمصر

اعتقد انه يجب التركيز علي رفع مستوى الوعي الثقافي من خلال صناعه حد ادني لمستوي خدمات الحياة بشكل عام لدي الوعي الفردي للمجتمع .. ان يصبح لكل مواطن ثقافة الحد الادني لمستوي الخدمة المقدمة .. اي كان نوعية هذه الخدمة ( تعليم – صحة – سياسية - .. حتي ان كانت نظافة

.
في حياة كل المجتمعات المتقدمة هناك كبوة ما .. اليابان والمانيا خير مثال في عصرنا الحديث .. رغم الوهن الشديد الذي اصاب كل منهما خلال الحروب العديدة التي خاضوها .. الا ان ثقافة كل من الشعب الياباني او الالماني تأبي الا يكون يكون هناك حد ادني يقبله اليابانيون او الالمانيون في المعيشه .. وهو ما جعلهم يرفضون الخنوع والخضوع للوضع الذي فرض عليهم بعد الحرب العالمية الثانية بالنسبة لتققسيم المانيا او حتي بعد القاء القنبلة النووية علي اليابان .. فاحساسهم بالفخر والاعتزاز بوطنيتهم جعلهم مصرين علي الاحتفاظ بمكانه مجتمعهم بين كافة مجتمعات العالم .. وهذا ما خلق تلك الطفرة والتحول السريع بالفعل .. فهذه الثقافة هي ما جعلت المانيا او اليابان تقفز في خلال الثلاثين عاما الي مكانهما الطبيعي في مقدمة الدول الصناعية الكبري .. و بما اننا امه لها حضارة تزيد عن سبعه الاف عام فاننا احق واجدر واولى بتلك الروح وتلك الثقافة
.
هذا النوع من الثقافات موجود بالفعل داخل مصر ولكن علي نطاق ضيق جدا .. في الصعيد تلك المجتمعات التي تعيش حياة قبلية الي الان او حتي في المدن في تلك العائلات العريقة والتي ترفض الاختلاط ... هذا النوع من الاعتزاز بالاصل والمنبع والنشأه يجعله يحسب الف حساب لمكانه هذا التاريخ في كل خطوة يخطوها .. ولكن اذا ما عملنا ((ZOOM OUT)) لنضع مشهدا اكبر من القبيلة او العائلة داخل الصورة ... مشهد يضم مصرا باكملها .. يتضاءل هذا الشعور بالفخر ،، لاننا نفاجئ اننا ننتمي الي كيان ميت .. او بالاحري كيان قتل ... فمصر باتت في الاثلاثين عاما الاخيرة رمزا لكل ما هو فاسد
.
دعونا نعمل سويا علي خلق روح الانتماء لكيان عظيم هو مصر .. ولن يخلق هذا الشعور من خلال الخطب الرنانة والشعارات الجوفاء ... بل سيخلق من خلال .. التواصل مع كل صفحات التاريخ المشرف والذي تحفل به مصرنا العريقة صاحبة اقدم حضارة عرفها التاريخ ... دعونا نتذكر مكانتنا بين الامم ونرفض كل الرفض ان نقبل دونها ... دعونا نفخر بمصريتنا مرة اخري ... يقول خيري شلبي الروائي المصري العظيم ان الاحساس بالانتماء يخلق الشعور بالواجب .... وتاريخنا المصري العظيم يحفل بتلك الصفحات المشرفة والتي تنير للعالم اجمع الالف السنين القادمة

قراءة اخري للاحداث-1

النظام الحالي اثبت انه يتمتع بشعبية زائفة لا تمت للحقيقة بصلة ... وليس كما قالها عادل امام .. ان شباب المظاهرات لا يمت لشعب ام الدنيا بصلة . اعتقد انه بات وصحا لكل قاصي او داني ان الكابوس الذي بات قابعا علي انفاسنا عدة عقود ان اوانه

.

الثورة الشعبية يوم 25 يناير ومكملتها العظيمة يوم 28 يناير لولا هذا اليوم ما كنا اكتشفنا خيانه حبيب العدلي الرجل الاول في النظام الشائخ ذلك اليوم سوف يحفر في التاريخ بحروف من نور لن يمحي من الذاكرة ابدا .

.

لي راي بسيط فيما حدق وكيف حدث ولكم ان تعتبروه ساذجا فهذا ما اري

.

1- يوم 25 يناير انفجرت كل ربوع مصر بالمطاهرات تطالب باسقاط النظام الذي لا يمقل اي مصري علي ارض مصر .. وبسبب تعالي النظام واستكباره علي الشعب لم يلتفت اليها ولم يعير تلك الجموع الغفيرة التفاتا .. بل اطلق بلطجيته عليهم يضربوهم ويسحلوهم في الشوارع

.

2- ولان الشعب تعود دائما ان هذا النظام لا يسمع ولا يري ولا يتكلم .. خرجت انتقاضة الغضب يوم 28 تصرخ بكل قطرة دم فيها تطالب باسقاط الرئيس واسقاط رموز هذا النظام ... كان الشباب يبدو مصمما علي الا تراجع ولا استسلام وهو ما لا يعهده ضباط امن النظام ولا بلطجيته فبدت المواجهات ساخنه .. ولم نتراجع ختي بعد سقوط المئات من قنابل الغاز واصابة الالاف منها .

.

3- شعر النظام ان ساعه خلاصة حانت .. وانه لا وقت لديه وانه قد قاب قوسين او ادنى ... اعطى اوامره لمعاونيه .. حبيب العادلي كلب النظام المدلل (14 سنه وزير داخلية ) ان ينفض السيناريو المتفق عليه في مثل هذه الظروف . الا وهو .....

___________________

اطلاق الاوامر لكل ظباط الامن بالاختفاء فجاة

فتح السجون كلها بالامر المباشر في نفس التوقيت

____________________

دعونا نفنط نتائج هذه الافعال فقط ,, وهو اختفاء الامن واطلاق المجرمين في الشوارع

.

1- احراج الجيش واظهارة غير قادر علي السيطرة او بث الامن في نفوس الشعب ... انتقاما من الشعب الذي انفجر فجاة واخذ يفتك بكل ما له علاقة بالداخلية من بعيد او قريب .. من اقسام شرطة او مجالس محلية او نيابات او محاكم او سيارات كل ما له علاقة بالداخلية

.

2- امهال الرئيس مزيدا من الوقت لدراسة الوضع الحالي لوضع خطط جديدة تتعامل مع مقدرات الموقف الحالي واللعب بالسياسة لكسب اي امل في البقاء

.

3- محاولة بث الرعب في نفوس الاهالي واولياء الامور اهالي هؤلاء الشباب ليتم الضغط من هذا الجيل البائس الذي كان يراهن عليه النظام انه لن ولم يتحرك وان الخنوع الصفة السائدة فيه ... عن طريق ترويع الاهالي بالمجرمين وكذلك اطلاق شائعات ساذجة مثل تلوث المياة وانتحال مجرمين لثصفة ممرضات تعطي مصلا ساما او محرر وصل نور يحمل وصولات مزورة

.

4- محاولة استخدام هذه الفوضي لتصدير الارهاب الاسلامي وكانه المدبر والمفكر والمحرك لهذا الثورة الشعبية كبديل في حالة سقوط النظام في محاولة كسب تاييد القوي الخارجية

.

5- ايضا اللعب علي وتر المؤامرة الخارجية والقلة المندسة المتربصة بالبلاد والتي تعمل علي تخريب اكبر دولة عربية في المنطقة لتبقي مثل تونس ومحاولة تصدير تونس علي انها مثل للفوضي ... واننا ان لم نلزم بيوتنا لنحميها من البلطجية سوف نتحول مثل تونس لا محالة .

.

اعتقد ان النظام كان يستخدم السلاح الوحيد المتبقي لديه لتنفيذ هذا المخطط القذر وهو التلفزيون المصري وللاسف نجح وبجدارة

.

.

يتبع

ساعه لقلبك

يحكي ان شابا توجة الي خطبة فتاه

فقال له ابوها انت عندك شقة

قاله لا

فقال له يبقي اكيد شغال شغلانه محترمة بتقبض كويس وهتجيب الشقة قريب ؟

قاله برده لا

قاله يبقي انت اكيد وارث فلوس كتير من اهلك ؟

قاله لا برده

قاله امال انت جاي ليه يابني

قاله انا جاي اقولكم ما تعملوش حسابي في الجوازة دي

اديني عقلك

اديني عقلك وامشي حافي

.

بقي حادثة اتوبيس سياحي في اسوان

سيبك من بتاعة المنيا .. شكلها قضاء وقدر

وشبكة تجسس في القاهرة

وحادثة تفجير في اسكندرية

.

.

كل دا صدفة يحصل في وقت واحد

قبل انتخابات الرياسة ؟؟؟؟

.

.

حد يفهمني يا جدعان

.

مش بعيد بكرة الشعب هو اللي يطلب من الريس

انه يمد العمل بقانون الطوارئ

ربنا يستر

احيه يابو سوسو احيه

جاسوس ايه ياعم وبتاع ايه انت بتاكل م الكلام دا قال جاسوس قال ... قال ايه مسكنا جاسوس كان بيتجسس لصالح اسرائيل .. ياسلام .. اه والله
.

انا نفسي حد ابن حلال يقولي ايه عندنا مستخبي عشان حد يتجسس عليه دا الدنيا عندنا مفتوحة ع البحري وانا راجل في سويسرا وعارف كل حاجة .....دا الامريكان في سويسرا اكتر من المصريين نفسهم يا جدعان .

.

يالهوي .. اسرائيل الكخ دي بتجسس علينا احنا ؟؟؟؟؟ والنعمة اه .... طب دي صديقة ياعني مافيش بينا اي مشاكل .. ثم هي ايه الحكاية هو كل سنه نقفش لهم كام جاسوس كدا ولا ايه ... احنا كدا مقطعين ارزاق والنعمة العالم كدا بيتوهم هتتقفل مننا

.

صراحه صراحه كدا انا مش داخلة عليا حكاية الجاسوس دي .. جاسوس ايه وبتاع ايه .. يا جماعه صلو ع النبي

.
بقي النظام اللي فشل يوفر رغيف العيش ... قادر يمسك شبكة تجسس لصالح اسرائيل

.

النظام اللي فشل يوفر انبوبة البوتجاز ... قادر يمسك شبكة تجسس لصالح اسرائيل

.

النظام اللي فشل يعمل شبكة كهربا في اكبر دولة عربية ... قادر يمسك شبكة تجسس اسرائيلية

.

النظام اللي فشل يطلع جامعه واحدة ضمن اول خمسميت جامعه علي مستوي العالم ... بقي عنده تكنولوجيا تخليه قادر يمسك شبكة تجسس لصالح اسرائيل

.

النظام اللي فشل يسيطر علي اسعار السوق خصوصا المجنوة يا قوطة ... قادر يسيطر علي شبكة تجسس لصالح اسرائيل

.

النظام اللي فشل يعمل شبكة مواصلات مرورية ادمية في القاهرة .. قادر يمسك شبكة تجسس لصالح اسرائيل

.

النظام اللي فشل في السيطرة علي بلطجة الانتخابات ... قادر يسيطر علي جواسيس اسرائيل

النظام اللي

.

لا والاكادة ان الناس رايحة مع الهوجة .... ويظل النظام هو حامي الحمى ورافع لواء الامن والامان داخل نطاق الجمهورية .... ماشاء الله عليه بيمسك الاسرائيلين الوحشين المتفوقين علينا في كل المجالات وارجوك بلاش تعد لحسن العد بيجيب النحس .. كفاية سبع جامعات اسرائيلية ضمن اول خمسميت جامعه لحظ رقم سبعه دا رقم يهودي مقدس

.

كل دا كدا والله اعلم مش عارف ليه حاسس انه فرشة لانتخابات الرياسة القادمة ان شاء الله ... مافيش مانع من كام ماتش كورة سخنين زي الاهلي والزمالك ... ومتابعه لاخبار شيكابلا .. علي كام حادثة ارهابية ... علي كام خبر قبض علي كام جاسوس لصالح اسرائيل ... الناس تتلهي ويفضل قانون الطوارئ شغال

.

والناس برده بتاخد علي قفاها .. لا والاكادة برده ان الناس مستنية لما ييجي واحد صالح يحكمهم ... طب منين .. ماهو من اعمالكم سلط عليكم

احنا مستنين حد ينزل من السما .. يقولنا يا مصرريين ... انتوا استحملتو كتير وانا نازل اخلصكوا من العذاب دا كله ... انيهاهاهاهااه

نقوم نفرح بقي ونقول هيه .. يقولنا ما تفرحوووووووووش قوي كدا .. انا عزرائيييييييييل انياهاهاهاهاهاهاهاها

.

.

كاتنا خيبه في كل حاجة .. قال مصرين حضارة وتاريخ عايشن علي اوهام يا ناس وياريت نفوق .. قطر فازت بحق تنظيم المونديال اللي خدنا فيه صفر .... الواقع بيقول حاجة وكلامنا بيقول حاجة تانية خالص

ياريت الناس تفوق بقي وتبطل نوم في العسل يمكن يمكن ... ييجي بعد خمسين سنه كدا جيل يقدر يعمل حاجة

فضفضة

احيانا بيت عطار بيكون مش مترتب شوية ... والقمر بعيد عن مكانه حبتين ... والشمس في بيتها الجنوبي مش الشمالي

.

وعشان الاسباب دي ...والاسباب دي بس .. سعات بكون قرفان حبتين .. ماليش نفس ممكن .. زهقان جايز .. اهو مقريف والسلام

.

ولان البيت الجنوبي للشمي لما يتقاطع مع البيت الشرقي لعطارد .. خصوصا لما يكون القمر قريب .. مش حلو علي واحد زي حلاتي بيتأثر بسهولة من اي نزلة برد .. فما بالكوا بقي ببيت الشمس الجنوبي

حاجة تحزن انا عارف .. بس هعمل ايه ادي الله .. وادي حكمته

.

لما تنزل من بيتكوا الصبح والدنيا ليل .. دي شيء عادي جدا في مصر علي فكرة وبيحصل معايا كل يوم .. وشيء لا يدعو للغرابة اطلاقا ... خصوصا ان الليل والصبح عملتان لوجه واحد واهو كله ماشي وياريت ما حدش يدق

.

لما تحس ان دماغك بتزن .. اوعي تقلق .. بتحصل زن في الدماغ كدا زي زنة اللمبة الفلورسنت القديمة اللي التنس بتاعها قديم ومعفن .. ولو ولعتها خمس دقايق تحس بانفجار في نفوخك .. فتضر تستحمل الضلمة لانك مش قادر تستحمل الدوشة .. تخيل بقي الزنة دي بتحصل في دماغك .. وانت مش قادر تفصل كوبس دماغك .. لانها بتزم وهي مضلمة اساسا .. سبحان الله البني ادم دا عجيب والله

.

.

غالبا انا مش هراجع اللي انا كتبته دا .... انا اصلا مش براجع الا نادرا وحتي لو راجعت دايما بيكون فيه اخطاء املئية غير مقصودة .. دا لان الكي بورد بتاعي زرارية تقيلة فغالبا هكون دوست علي الحرف بس الحرف ما انطبعش

المشكلة دس بتواجهني لما اكتب الباسورد بتاعي انا عامل باسورد كبير ورخم . عشان كنت خايف لحسن امن الدولة تسرق مدونتي بعض موضة سرقة المدونات .. لكن اظاهر انهم طنشوا خالص حكاية المدونات دي بعد ما الناس اتجهت كلها علي الفيس بوك .. غريب الفيس بوك دا موقع غريب جدا لكنه قادر يجمع كل كمية البشر دي داخل اطار واحد .. ويحصل بينهم تبادل معلوماتي سريع

ياتري ايه الي ممكن يعمل بين الناس في العالم الواقعي ... الاخلاق ممكن الدين عمل دا في يوم من الايام ... بس المشكلة ان الناس اليومين دول بقت مسرووعه علي الفلوس وماعندهاش وقت للدين او لاي شيء تاني

الفلوس وبس ... لدرجة ان انهارده واحد ياخد خمسة مليون جنيه مرتب دا شيء عادي وكانه هايروح السوبر ماركو بمليون مثلا ومليون ايجار الشقة ومليون عشان المعايش النور والكهربا ومدارس الاولاد ... حاجة تجيب شلل اطفالي بصراحه

...

بس دا حتي الشلل الاطفالي ربنا يحميهالنا ماما سوزي منعته من مصر خلاص .. حتي المرض بقينا مش لاقيينه في الزمن الفل دا .. ربنا يرحمنا احسن

.

.

حول البوست اللي مش فاهم منه حاجة دا

محاولة لفهم لوحة التجريد

المفروض ان المقال محاولة لفهم لوحة التجريد بتاعت فاروق حسني وزير الثقافة ... طب انا باتحدي واقطع دراعي من لغاليغه لو حد كان فهم حاجة .. الست اللي اتحفتني بكتابة هذا المقال قعدت تقول كلام كبير قوي يصعب علي امثالي فهمه بصراحه ... من نوعية .. طاقة الالوان واتجاه الخطوط والمكان والزمان وحجات كبيرة قوي قوي

.

عشان ما نطولش دا كان نص الشرح بتاعها

مثلما ندرك قوة الوانها .. ندرك ايضا كم الطاقة بها .. كأنه ينبثق من عالم سفلي ذهني جامح .. مكون من مزيج من تدفقات اللاوعي اللحظي اثناء عملية الابداع والحساب الذهني

.

انا نفسي افهم ايه هو العالم السفلي الذهني الجامح دا .. ولا ايه هي تدفقات الاوعي اللحظية اثناء عملية الابداع او الحساب الذهني .. ياعني ازاي تفتق ذهنها عن اختراع مثل هذه العبارات والالفاظ انا مش فاهم

.

وهذا التقابل بين الضدين .. اللاوعي والذهني .. نراه في اللوحة امامنا بهذا الكبح الشديد من الفنان لطاقة اطلقها هو بفرشاته محمله ببقعه اللون الاحمر المتوهج .. ثم ليوقف الفنان انطلاقها ويعرقل امتدادها بتلك الزاوية العملاقه شبه المقوسة السوداء لاعاقة انطلاقة الاحمر ... بل انه يوقف اتدفق الاحمر بخط افقي قاطع ابيض اللون جعل المساحة الحمراء اسفله تكاد تتجمد

.

انا حاسس ان الهانم بشترحلي هو راسم ايه وتقولي افهم يا حمار ... انا شايف شاخبطات وتقولي زاوية مقوسة .. ما انا عارف ياختي ... ياعني ايه بقي الزاوية المقوسة في الرسم التجريدي ... ياعني انا امي لما تشوف فار في الحلم مثلا ولا دم تقولي اصل الفار في الحلم معناه افسر ايه والدم معرفشي افسر والفلوس معرفش افسر ايه .. رموز برده ... بس ليها معاني عند اللي بيفهمها ..... لكن الزاوية المقوسة دي معناها ايه يا ولية

.

وقد اوقفها عن الحركة تماما في حالة من الاحتجاز الحراري ... بل ان المساحة السوداء بدت كانها مارد يفور غضبا ويشكل قاطع في ايقاف تدفق الاحمر المتوهج .. وكأنه القبض علي طاقة الذات

.

اانا اقولك انا اظاهر الوزير زملكاوي .. وزعلان لان الاهلي بيكسب .. فاخترع وحش من خيالة اضخم من الاهلي اللي عمال يكتسح دا .. ولانه نفسه يشوف الاهلي منكسر مرة ... رسم الاحمر حته فسوة صغيره في اللوحة والمارد بتاعك دا ناوي يكله ... اسمعي مني المرة وهيطلع كلامي صح ان شاء الله

.

ومن التقابل ايضا داخل اللوحة انه جعل خلفية التقدم العاطفي .. والكبح الصارم له بلونين رائعين مريحين للعين من الازرق السماوي والاخضر الزرعي .. في نقاء شديد ... والي اقصي اليمين بدا شريط الارضيه الراسي الشبه بيضاء كأنها تستفيق في شبه براح فضائي مريح للعين

.

يا روح امك جبتي الكلام دا منين ... انا دماغي اتحورت ... هي مين اللي تستفيق يا ولية ... هي كانت شاربه حاجة ...ثم ايه شبه البراح الفضائي دا يا جدعان اروح اموتها ياعني

.

هذا التناقض بين الخلفية المسالمة وبين ما يحدث في المقدمة .. يمتع الذهن والعين بدراميتهما العالية .. ولكننا لايمكن تفسير ما يحدث حرفيا لانهما نتيجة انفعالات لحظية عالية .. وقد لا يدرك الفنان نفسه كيف وصلت به لوحته الي هذه المنطقه ... لذلم من يري لوحة تجريد دون ان يعطي لنفسه فرصه تأملها يقول انه لم غير الوان

.

ياعني في الاخر حتي الوزير نفسه مش عارف هو رسم ايه ... وما حدش هيقدر يقولنا هو ايه المرسوم ..واللي مش عاجبه يشرب م البحر بقي

___________

الكلام بالاحمر من نص المقال المشنور ا فعلا بجريد الاخبار المصرية هنا
اليوم الاربعاء المواق 8/12/2010 ... اما التعليق مني انا

كاتبة المقال .. الناقدة اللوزعية صاحبة الطلعة البهية ... فاطمة علي وياما لسه هنشوف وياما

ملحمة السراسوة

تأسرني وتخطف لبي .. حلوة تخطف لبي دي .. باعتبار ان معايا شوية لب بقي وهي عماله تخطف مني ... المهم كنت بقول تأسرني وتخطف لبي .... تلك القصص والسير عن الجدود الاقدمين

.

مش اقدمين بكتير ياعني .. وانما ايام ما كان فيه نخوة ورجولة واخلاق .... باستعجب جدا من اللي بيقول ياريته كان جه في زمن في اخلاق او رجولة

واحد قالي كدا .. قولت له هو الزمن ماله ؟ ... احنا اللي يا إما عندنا اخلاق يا إما ما عندناش ... ومين دراك يمكن تكون ايام صدر الاسلام ولا حاجة .. فتـتـنـش ايه ولا حديث في اخلاقك البايظة دي يبقي ربنا غضب عليك للابد

.

فكرة ان فيه كبير .. جد اكبر اخ اكبر .. كبير العيلة .. الناس بتسمع كلمته ولا تردهاش ... مش خوف منهم ولا قلة حيلة .. انما حبا له .. واعترافا منهم بقدره .. لانه فعلا يستاهل

منصب الكبير دا ماكنش يشترط السن علي فكرة في اغلب الاحيان .. ولكن بالقدرة علي مواجه المشاكل ومصاعب الحياة

.

كان فيه تربية بحق وحقيق .. ماكنش الاب بيعلم ابنه .. ازاي يتكلم في حضرة الكبير او ازاي يرد علي امه او ازاي يعامل اخوه الكبير .. او حتي ازاي يعامل المسن او الضعيف

دا لان الابن بيشوف ابوه بيتصرف ازاي مع كل دول وهو تلقائيا بيقلد ... ماكنش حد يستوعب انه مثلا انه هيجي اليوم .. والابن يرفع صوته علي اخوه الكبير .. ما بالك باللي بيحصل اليومين دول مع الاب والام

.

كان فيه حد ادني من التربية .. (((((( الاخلاق)))))) .. من فوقها كان يبدا عملية التعليم ... فكان الشاب مستواه تربويا اعلي بكتير حتي لو مادخلشي مدارس .. اساسا كانت غالية

انما انهاردة ... بقي فيه جهد مبزول اساسا عشان نربي العيل .. ان دا يصح .. ودا ما يصحش ... وبعد ما يعرف نبتدي نعلم .. طبعا بنطلع جيل غير منتمي لاسرة .. بالتالي غير منتمي لبلد

.

كان زمان الانتماء للقبيلة او للعائلة حاجة كبيرة جدا .... بيخلي كل فرد فيها مسئول عن كل فرد فيها .. ولازم لو واحد انحرف الكل يحاول يصلحة لانه في وش العيلة .. دا بيخلق انتماء اكبر للقرية .. ثم انتماء اكبر للبلد

.

.

انهارده بعض الناس ساكنة ما تعرفشي مين ساكن معاهم في العمارة .. وفين وفين لما حد بيشوف اهله اساسا ... بحس ان اللي احنا عايشين فيه دا .. نتيجة اننا تخلينا عن منظومة الاخلاق اللي كان بتحمينا وتنظم علاقتنا ببعض

.

اي رواية بتحكي بشكل او باخر عن فكرة الكبير اللي بيلم ويحاجي علي عيلته بتخطفني جدا ... وتخطف اللب بتاعي برده .... ملحمة السراسوة هي رواية .. اقل ما توصف به انها ساحرة سحر لم اجد له مثيل الا في عزازيل بالظبط ... ملحمة السراسوة للكاتب المحترف .. احمد صبري ابو الفتوح .... يحكي فيها عن فترة من تاريخ مصر الذي لا يدون في كتب او مجلدات ... وانما يحفر في جدار القلوب وحنايا الذكريات .. من خلال معاناة عائلة .... تمتد جذورها الي ما قبل حقبة محمد علي .. في سرد متصل حتي الوقت الحاضر

.

اعتقد انه هكذا التاريخ كما يجب ان يكون ... كما اراد يحي الفخراني .... ليس التاريخ مجرد احداث مرتبطة بتواريخ وايام ... وانما هي نتاج معاناه وتجارب ناس عاشت من زمن .. حبت وكرهت وتحاربت وتصادقت وكان لها مصالح مع اخرين وكذلك عداءات .. لهم حضارة .. ثقافة فنون ... هكذا التاريخ كما يجب ان يكون

.

تحياتي لاحمد صبري ابو الفتوح .. وتحياتي للسراسوة ... انجبت من صنع لهم تراثا

هسهس قبل النوم

قعدت فترة كبيرة افكر في امكانية ان الواحد يتجوز اربعه .. وكانت الفكرة عجباني جدا لدرجة اني بدات اقنع بيها كل حد افاتحه في الموضوع

.

اولا امي باعتبار انها صدقيتي ياعني

سالتها ايه رايك في اللي يتجوز اتنين .... كانت الاجابة سريعه وبدون تفكير يبقي منافق وبــ وشين

قولت لها امال لو حيتجوز اربعه

ما ردتيشي بصراحه .. هي خبطت علي صدرها مع شهقة يا لهوي ... دا طفس بقي

.

اصدقائي المقربين بصراحه ماحدش فادني بشيء

اللي قالي مش هتقدر

واللي يقول صعب

واللي شايف ان الموضوع مستحيل

.

ماحدش فكر تفكير عملي جاد في امكانية حدوث الفعل نفسه .. اللي هو الجواز من اربعه ... بدات الحكاية معايا لما حسيت اني اكيد بعد الصبر والاستحمال اللي مستحملة دا كله ان ربنا اكيد هيكافئني وهيجوزني جوازة حلوة .. بعد كدا بدات اطمع .. طب ليه واحدة .. ليه ما تبقاش اربعه ؟؟؟؟ مافيش حاجة كبيرة علي ربنا

.

اولا انا شايف ان الجواز من اربعه دا في مصلحة الاتنين الراجل والست دا في حالة ان الجواز اساسا وسيلة وليس غاية .. يهدف بيها اقامة اسره صاحلة داخل مجتمع صالح

يبقي اي فعل يتم داخل الاسرة دي .. لا يجب ان يتصف بالانانية ... اعتقد هنا هانسمع صراخ من الاخوات العزيزات وهيقولوا اهه اديك بتناقض نفسك صبرا صبرا يا ال ياسر .... بنقول ان اي فعل يتم داخل الخلية الصغيرة دي لا يجب ان يتصف بالانانية .. ياعني كل واحد لازم يضحي بجزء من راحته في سبيل انجاح الغاية الاسمي والهدف الاكبر .. الا وهو انتاج اسرة صالحة نافعه للمجتمع

.

ولان طبيعه الحياة ملولة ،، متغيرة باستمرار .. يمل الرجل سريعا زوجته وذلك يحدث حتي مع اجمل الجميلات .. فلا الحلاوة بتنفع ولا الجمال بيفرق وع الاصل دور

.

الامثلة كتيرة ولا حصر لها لكن مش وقت امثلة .... الجواز من اربعه دا بيحل مشكلة الملل دا ... دايما الراجل رايح لمراته مشتاق لها .. وهي دايما مستعده ومتهيقه له .

.

تخيلوا معايا هذا المثال ... لو كشاف عمره الافتراضي عشرين سنه .... وحطيناه في اوضه عشان ينورها ... كمية النور اللي هتخرج في اول سنه غيرها بعد خمس سنين ... غيرها بعد اول عشر سنين .. غيرها بعد اول خمستاشر سنه .. علي اخر خمس سنين يكون تعب جدا وبقي مش قادر

لكن لو الاوضه دي بتنور باربع كشافات بالتبادل واحد ينور الباقي مطفي ... هتلاقي ان شدة اضاءة المصباح لحد نهاية عمره الافتراضي قوية وتكفي

.

نفس الحكاية ... الزوجة بالشكل دا عمرها ما تكبر قبل اونها او تعجز قبل الراجل زي ما هو متعارف عليه في مجتمعنا .. عشان كدا الراجل بيتجوز واحدة اصغر منه بكتير ... لانها واسف للتعبير .. مش هتستهلك لحد ما تنفذ طاقتها ... لحد ما تكبر في سنها هتفضل قادرة علي العطاء

.

طبعا الموضوع مش سهل ولا بسيط .. خصوصا في مجتمع زي مصر .. لو مراتك شمت ولا حست انك هتتجوز عليها قول علي نفسك يا رحمن يارحيم

دا غير ان تكاليف جوازة واحدة بلوة مسيحة ومنيلة بنيلة اساسا ... ما بالك بتكاليف اربع جوازات ؟؟؟؟

.

والله انا شايف ان الراجل لو قدر يعيش الاربعه في شقة واحدة .. يكلوا مع بعض علي طبلية واحدة ... العيال كلهم يتربوا مع بعض .... في الحالة دي والحالة دي بس ممكن اسمح له انه يتجوز اربعه

.

افتكروا معايا الشرط الاساسي اللي احنا اتفقنا عليه

هو الغاية الاسمي ... عمليه انتاج اسرة ناجحة تصلح لبناء مجتمع ناجح ... في حالة فصل البيوت عن بعض حتي لو كانت ادوار في عمارة واحدة ... بقت الاسرة مفككة .. وفي الحالة دي يبقي الجواز كان لسبب الطفاسة فعلا .. غير ان العيال هتتربي وكانها اغراب عن بعض

.

يبقي الشرط المعلق عليه ان الراجل يتجوز اربعه هو قدرته علي انه يعيش الاربعه في شقة واحدة وانه يقدر يولف بينهم بيحيث انهم يقبلوا الوضع دا

.

.

ولكن الوضع دا اصعب ما يمكن ... دا المقصود .. عشان الموضوع ما يبقاش سبهلله برده

كون الراجل يلاقي اربع ستات تقبلوا انهم يكونوا ضراير انجاز .. مش صعب قوي في الايام لو كان مقتدر خصوصا في الظروف المنيلة اللي بنعيشها

كون الراجل يقدر يقنعهم انهم يعيشوا في شقة واحده .. دي المعجزة بذاتها .. ويستحق عليها نوبل

كونه يقدر يولف بينهم بشكل يجعل البيت هادئ ومستقر وبلا اي خناقات ... اعتقد انها معجزة اخري كمعجزات موسي مثلا يستحق عليها مش نوبل بقي .... اكيد خاحة لسه ما اخترعوهاش

.

.

والله انا شايف برده ان مافيش حاجة بعيدة علي ربنا ... ياعالم مش يمكن بعد الصبر دا كله .. يرزقني بالاربعه فعلا .. مين عارف

ابناء الصمت

ولان الذاكرة تبلى ولا يبلى الزمن ، ولان الارض تشربها الدماء-كما قال الشاعر- ولان الالم لا يرسخ الا في القلب وحده .. نقش هذا التاريخ داخل حنايا جدار القلب ليعاند الزمن ويتحدى النسيان .. مطلا برأسه من حين لاخر لكل من اراد ان يعرف .. فقط ان تتوفر لديه نية المعرفه

.

ابناء الصمت هم هؤلاء الابناء الذين فرض عليهم الصمت الابدي اما خوفا او كرها او عجزا عن تحريك ساكنا ما كان ، فرض عليهم العمل بلا توقف او تزمر او حتى ابداء الضيق فقط لان اباءهم نزعوا السنتهم من حلوقهم ولم يعطوا لهم حقا في التفكير مجرد التفكير في الفعل .. فقط عمل دؤوب

.

ابناء الصمت رجال صدقوا ما عاهدوا الله عليه ... حملوا وزر اباءهم بطمعهم وجشعهم وزيفهم وادعائاتهم بعد ان نخر السوس عظامهم ولم يبقي لهم غير افواه فقط تثرثر عبر جرائد امموها باسم الثورة .. واذاعات سيطروا عليها باسم الثورة ... ليتحولوا هم الي فرعون الثورة

فياتي عام 67 ليقول لهم ارجعوا اماكنكم ما انتم الا بشر قد خلت امم قبلكم ليسوا بمعجزي اسرائيل بشيء

.

ابناء الصمت هم جيل دفعوا بدمائهم التي شربتها الارض من زمن واختلتطت بماءها الجوفية فنبتت لنا حشيش سيناء العظيم الذي ذهب بعقول اولادهم وكان هذا ما حاربوا من اجله

.

ابناء الصمت هم رجال دفعوا ثمن اطماع جيل كان سبب في نكسة اجيال اتت ومازالت تاتي .. مدفوعين بنار الثأر التي تأكل القلوب وتدمي العيون .. بصراخ اليتامي والثكالي والجرحي والمكلومين والشهداء

.

ابناء الصمت هي رواية لمجيد طوبيا .. تروي تاريخا اخر حفر قي قلوب كل بيت وكل اسرة فقدت حبيب او زوج او ابن او اخ في حروب الاستنزاف في 67 تروي تاريخا اخر لم يكتب ولن يكتب في كتب الحروب ولن تجده الا في ذكريات القلوب التي اكلتها نار الحرب عبر ست سنوات من العذاب راح ضحيتها خير شبابنا

.

وفي ظل اكتواء شباب خضر عودهم غر قلوبهم علي رمال سيناء يستعرض لنا مجيد طوبيا اجواء القاهرة المليئة بالعهر والفساد والمخدرات والرشاوي والاطماع .. ممثلة كل موهبتها جسدها اليانع ،، رئيس تحرير يعمل مبرراتي للحكومة .. وزير مرتشي ... مناضل راي ان النضال علي الاسرة اكثر راحه من عناءالهتافات الشعبية ... وكأن اولادا اخرين غير اولادنا هم يحاربون عن ارضا اخري غير ارضنا

.

اري نفسي بين هؤلاء اموت احتراقا من اجل غاية لن اراها ولن انعم بها ولن ينعم بها اي من احفادي . بل هي لهؤلاء اصحاب المليارات من ذوي الكروش المنتفخة والصدور العارية

.

جيل يسقط في الخطيئة ليدفع جيل اخر الثمن .. وفي كل مرة الثمن غالي جدا .. كتب علي جيلي ان يدفع الثمن كما كتب علي جيل الرواية ان يدفع ثمن قادة النكسة الذين اوهموا الشعب اننا قوي لا تقهر واننا ننتصر ليس الا سوي اننا مصريين

.

مجيد طوبيا اعتقد اني اعيد اكتشافه من جديد اعشق انبهاري بالاشياء رغم كوني اعيش في زمن المعجزات فلا غرائب ولا عجائب اللهم دمها علي نعمة واحفظها من الزوال

عام تلفزيوني جديد

كل عام وانتم جميعا تنعمون بالخير اعاده الله -رمضانا- علينا جميعا بخير ودمتم !!

.

رغم اني كنت فقدت قدرتي علي متابعه اي مسلسل او برنامج في رمضان او حتي ان تروادني فكرة الاهتمام باي منها .. نظرا لظروف انعدام الوقت وكذلك ظروف التلفاز المستفز الذي يجبرك علي مشاهدة قناة بعينها اذا اراد .. او يفسح لك الطريق لرؤية عدد اكبر لا يتعدي اصابع اليد الخمس اذا اراد ايضا .. وبالاضافة الي انعدام وجود الدش والذي بات سبب اندهاش كل من يعرف ذلك عني نظرا لاننا علي اعتاب الفية ثالثة وهكذا بقي .. المهم اني قررت هذا العام بما تفسح لي من وقت وجهد متابعه اي منها وعبثا حاولت وباءت محاولاتي بالفشل

.

فالكم الضئيل الذي الحقه بعد فوات الاوان يصب في نفسي النفور والشعور بالقرف .. يالا الخسارة

.

من اولى المسلسلات التي كنت قررت بيني وبين نفسي متابعتها .. عايزة اتجوز .. لغادة عبد العال .. هكذا هو عندي هند صبري ممثلة مجتهدة ولكني انسب نفسي لنفس الفضاء التدويني الذي تنتمني له غادة فبشكل تلقائي ومن ناحية الولاء لهذ الصفحات المنثورة في ذلك الاثير قررت المتابعه ،، اعلم جيدا ان غادة خلقت قصة في غاية الروعه فكنت متابعا جيدا لما كانت تكتب كمدونات .. حتي عندما طبعت كتابها وانتشر انتشارا سريعا فهذا وان دل فيدل علي جودتها كحكـّاية رائعه .. ولكني فوجئت بسناريو مهترئ وحوار لمجرد الحشو ليس الا ... ويقع عبء التمثيل باكمله علي تلك الغلبانه هند صبري .. اقول من كل قلبي ان هندا اثبتت انها فعلا ممثلة جديرة بالاحترام وانها تحملت وحدها عبء تمثيل مسلسل بكامله لا اكاد ارى غيرها .

.

سامح حسين .. ايضا ممثل موهوب ... ولكن الاكلشيهات الجاهزة والقوالب الحاضرة التي ما ان يـُفرغ فيها علي مقاس البطل ثم يـُحشر فيها حشرا لا تناسبه اطلاقا .. فلو اطلق لابداعه العنان لاخرج كنزا بداخله .. ادعوه الا يستسهل ولا يستعجل

.

ايضا من ضمن الاشياء التي ثارتني البارحة ذلك المسلسل الكرتوني ولاد الايه .. والذي يتحدث عن لاعيبي كرة القدم .. البارحة كانت حلقة مستفزة جدا .. الفريق كله متوقف لانهم لن يلعبون بالفانلة الحمرا .. حسن شحاته حلف واطلق اغلظ الايمان انه لن يتابع الفريق اذا لم يلعب بفانلته الحمرا .. حتي ان الموضوع يصل لسمير زاهر والذي بدوره يصعده للسيد علاء ثم الي الريس مباشرة

وكان مشكلة لعب الفريق بالفانلة الحمرا تستعدي فعلا تدخل الريس ليحلها .. ثم اريد ان استفسر عن دور الاستاذ علاء في الموضوع اساسا .. ما هذا القدر من الاستخفاف بهموم ومشاكل البسطاء .. خلاص بقي الريس ساب محدودي الدخل وساب مشاكل العيش والمساكن المتوسطة ومتابعه برنامجة الانتخابي وبرنامج توريثه السلطة لجمال وفاضي يحل مشاكل المنتخب .. اللي زعلان عشان مش هيلعب بالفانلة الحمرا .. طب ما طالما الريس فاضي كدا .. طب يبص لنا شوية بنظرة عطف وحنية احنا الغلابة المطحونوين المسحلوين الذين سفوا واكلوا وشربوا ثم هضموا تراب هذا الوطن

.

.

الكلام لو انفتح مش هيخلص وللحديث بقية

تحياتي

وكل سنه وانتو طيبين

مجذوب حقيقي

انا الصوفي اللي بيدور عليكي

بين جموع الناس

مشدود عقلي ومتكتف

بالصورة والاحساس

واخد عهود ويمين

والعهد عند الله

قلبي يصوم الحب

ميت مالهش حياه

مرهون علي وجودك

وبوجودك

ومين يلقاه

مجذوب حقيقي صحيح

زاهد اي مال او جاه

مطلوق علي العالم

ابحث في تربته

وسماه

عن كائنه مختلفة

مخلوقة من دهب

او ماس

خمسين سنة سنيما ... خمسين سنه عبط

خمسين سنه تلفزيون مصري

بمناسبة مرور خمسين سنه علي اول بث تلفزيوني ، يحتفل التلفزيون المصري عن طريق بث قناه جديدة تعيد نشر الارشيف القديم للتلفيزيون

حاسس ان الاحتفال معمول عشان يعايروا بيه الناس .. مذيعين تافهيين وفنانين اتفه ، وناس معتوهه بتتفرج وكله شلل في شلل ، دا حتي الاعلانات بتاعت الافلام والمسلسلات اللي هتيجي مستفزة

المذيعه بتكلم الضيف وتفكره بفضل التلفزيون عليه وازاي انه كان حتة حشرة قبل ما يطلع في التلفزيون وانه بقي مشهور بمجرد ما ظهر في التلفزيون المصري ..

فاكر اول يوم طلعت في التلفزيون المصري ، اكيد فرقت معاك ، طبعا اتعرف مش كدا

ايه الاستخفاف دا ، والا لما تسال ايه رايك في كلام الناس الوحشة .. اللي بتقول علينا كذا وكذا .. وكاننا بنحتفل عشان نغيظ الناس الوحشة

اعلان عن مسلسل لاسماعيل يس فيه المذيعه تقول ، حد كان يعرف اصلا ان له مسلسل ... ناقص تقول احمدوا ربنا بقي فرجناكوا علي مسلسل لاسماعيل يس اهه ... طب دي غلطة مين اساسا ، ان يبقي فيه ارشيف مهم ومحترم يحترم المشاهد في المقام الاول ويتساب يبوز عشان نتفرج علي عته وشلل افلام ومسرحيات تصيب الكابه

الاحتفالية لا تتعدي كونها احتفالية علي مستوي حدائق المعادي كدا بين شلة اصحاب ، جايين يفتكروا شباباهم ويجتروا ذكريات الماضي ليس الا

بتخيل بقي الناس الوحشة اللي احنا بنعايرهم دول لو فكروا يحتفلوا بيوبيل ذهبي او فضي انه هيكون احتفال لن يقل عن احتفالات المهرجانات العالمية الكبيرة كان مثلا او الحجات دي

ومش هيبقي علي مستوي مجموعه افراد تطلع تتكلم عن بداية حيتها في التلفزيون زي نيللي اللي فاكرة نفسها لسه عيلة طالعه تتكلم بمنتهي السذاجه ومنتهي السطحية وكانها ياعيني هتعيط والكلام بيهرب منها

اعتقد اني كنت هشوف مشاركة من كل تليفزيونات العالم ، وفنانين العالم وانفتاح علي القرية الصغيرة ، في محاولة لوضع تليفزيون الناس الوحشة دول علي خريطة الميديا العالمية ... لكن اراهن لو واحد في مانبوزيا حس بحاجة هنا

كل ما اتفرج علي مذيع مصري او فنان مصري احس بالبالشلل الرباعي اللي بخلي رجلي تلزق ف افاية دا ،،، وباتمزج قوي لو اتفرجت علي فنان سوري في اي حوار لانه بيحسسني قد ايه ان المذيع المصري غبي برده حاجة تخلي الواحد يعشق تراب بلده والله

خروجا عن النص

ممتعضا لتعويمة معدتي المملوءة عن اخرها بسبب اكله غريبة لم تهضم من سعات كثيرة ... محاولا التصنع بشرب سيجارة لا يصيبني منها الا بضع انفاس صحيحة ويضيع الباقي هباءا محترقا بين اصابعي .. مستمعا لعبد المطلب .. وحبيبه الساكن في السيدة .. اكتب

.

تنتابني حالة قرف شديدة من جراء الملل القاتل الذي بات يفتك بكل اواصر مقومات الحياة الاولية علي كوكب الارض اساسا .. هذا باعتبار ان اي مصري يشترك معي في ظروفي .. فان كوكب الارض بالنسبة له هو حدود شارعه المتواضع .. هذا مع اعتبار بعض الترف ايضا .. هناك اناس اختزلت العالم كله في حدود منزلهم فقط

.

الكلام كثير والمعاني تائهة والافكار مشوشة .. والعقول التي اختبأت تحت عدة طبقات من القار والزفت مزايا عبقريه لذلك الكائن العجيب الملقن بالمصري، لذلك اتقن المصري الحديث السطحية باستفزاز يظهرجليا في كل افعاله حتي انه اصبح يستنكر علي المصري القديم كل ذلك الترف المتجلي في قضاء وقت كبير جدا في اعداد قطعه فنيه او ما شابه ... فلا بالدقة او الجودة وحدها يحيا الانسان بل بالخبز فقط

.

مضحكا جدا لشخص معوق ذهنيا مثلي ... ويدفعه للتسائل لماذا يتفنن الرجال في كتابة نمر تليفوناتهم المحمول علي الحمامات العمومية للرجال ايضا موجهين الاعلان لانثي تحب تيجي . طب ما اللي هيخش راجل برده .. ولا عشان يبقي شكله حلو ولا ايه ؟؟
.

ضحت كثيرا عندما قال صاحبي الحشاش الصايع .. مشيرا لاحد لاعبي كورة القدم عندما كنت جالسا مع صاحبي المحترم ابن الناس الكويسين ،، محاولا لفت انتباهي عن ذلك ابن الناس الكويسين .. اخد يمدح احد لاعبي الكورة التي يحفظ اسمائهم عن ظهر قلب ويقول .. لا بس حريف حريف حريف .. اخد الكورة علي صدرة طلعها من مرخيرة .. عندها لم يتمالك صاحبي ابن الناس الكويسين .. الذي كان اخذ رشفة من الكولا بفمه .. فخرجت من ودانه

.

ظهر مؤخرا حديث طويل ولغط كثير عن الاخطبوط المعجزة بول .. الذي يتنبأ بحوادث في المستقبل ... اخر ما تنبأ به الاخطبوط المعجزة كان فوز اسبانيا علي المانيا ... عدوى الدجل والشعوزة انتقلت الي الغرب ايضا .. مش بعيد اوباما يقلع ملط ويمشي في الشارع وييقولو عليه ولي وهينشر الديمقراطية في كل شعوب الارض

ياربي سترك

كلها كام ساعه

ويبدا الامتحان

.

وربنا يستر

اليوم دا فاصل في عمري

يارب سترك

نفسي ارجع تاني خام

قلي ضاق م السخام

.

للاسف

.

بقيت اشوف الاساءة

.

للاسف

.

كنت فاكر م الحداقة

اني اشوف المستخبي في الكلام

.

للاسف

نفسي ارجع تاني خام

قضبان جليدية

قضبان جليدية

كذلك اري السجن الان .. غرفه معتمة ذات قضبان جليدية ، يراها المار ماء لا تحبس ولا تمنع .. واراها فلاذية تمنع عني حتى بعض هواء يكفي لنصف عملية تنفس كاملة ، عظيمة هي الالام عندما يكتمها القلب فتصبح بعيدا عن اي متنفس لها .. تحيا بخياشيم حزن مغمورة في بحر من الاشجان والاوجاع

.

ممل هو الروتين .. ولكنه مريح في نفس ذات الوقت ... يحيل المرأ منا الي آله صماء لا تعي ما تفعل... حتي تفعل ما تعي ... لدرجة ان المرأ منا قد يصحوا من نومه إذ يفاجئ بنفسه انه قد صحا منذ فترة وارتدي ملابسه وذهب الي عمله وهو لا يدري كيف

.

في مثل تلك الظروف الغير طبيعية علي المرا ان يحيا بمشاعر محايده تماما ،ان يحيا بلا التزام او وعد واجب التنفيذ لانه في هذه الحالة.. المرأ لا يضر نفسه فقط بل يضر اخرين .. لذلك عليه توخي الحذر جيدا

.

الانتظار شيء قاتل جدا خصوصا ان كنت تعلم اين ومتي وماذا تنتظر ، نعمة الغيب نعمة عظيمة حقا .. احمد الله عي جهلي بيمعاد وفاتي والا كان صاحبني الجنون من زمن

.

لا وجود لشيء اسمه ظروف حسنه ،،،، لان الظروف جميعها علي غير الهوي .. وطالما هي علي غير الهوي فهي ظروف سيئة ،،،، انا لا اعترف بهذا التصنيف ، لانه لاوجود لظروف مهيئة لمرام المرأ مهما كان محظوظا .. بل الحظ الحقيقي هو في الاصل ذكاء نادر يمكن المرا من استخدام كافة ظروفة (( كمعطيات )) بشكل دقيق جدا لينجح في حياته والحصول علي نتيجة مرضية (( البرهان)) ،،تشعر بها ذاته .. يصعب علي الاخرين فهم عبقريته فتسهيلا منهم او كسلا دعنا نقول .. يسمونها حظ

.

دعونا نسقبل يوما جديدا بأمل جديد .. ولنري هذه الحياة كطائر عنقاء ضخم .... لا بد ان يحترق حتي يولد من جديد .. فلا داعي اطلاقا لان نحزن ان رايناها تحترق ... بل علينا ان نفرح لذلك ... لانه دليل بشر

البحث عن جدوى الاشياء

البحث عن جدوى الاشياء

اصبح همي الشاغل الان ، هو البحث عن جدوى الاشياء .. ما الفائده من تكرار فعل روتيني اعتدت القيام به لمجرد العادة .. حتي تلك الافعال الطارئة او الموسمية احيانا باتت في نظري بلا جدوى

.

اعرف في قرارة نفسي انها مرحلة مؤقته تلك الرؤية الضبابية وان هناك مغزى ما من كل شيء .. ولكني اعرف ايضا في قرارة نفسي ايضا .. ان هذا المغزى المستتر في كل شيء لن يعنيني مطلقا باي شيء

.

لدرجة ان هناك اسئلة مقلقة تستفز استقراري وبياتي الشتوي الصيفي .. لتبث في حاله اخري من الثورة والرفض التام لكل تلك المسلمات التي باتت من القوانين الطبيعية المستحيل مراجعتها (العبادات ، الذات ، الصح ، الخطا ، الممكن ، المستحيل .. وغيرهم كثير

.

اشعر مؤخرا بتوتر كبير وتشتت عظيم في الافكار اريد ان اتكلم في كل شيء رغم اني لا اعبء باي شيء .. تلك الحالة الغريبة التي تنتابني من حين لاخر اعلم جيدا انها ستفرز شخصا اخر مختلفا عما كان سابقا .. انتظر ذلك المخاض البطيء المستفز .. لا اظر لاي وجهة مطلقا ، تاركا كل القوي الغريبة تتصارع داخلي لا انحاز لاي منها .. متشوقا لمعرفة النتيجة مثلي كمثل اخرين لم يعرفوني من قبل ... متحريا للاندهاش