Pages

Subscribe:

Wednesday, July 26, 2006

توابع

توابع احه
سيبت الشغل هيييييه **
كنت فأر التجارب **
ماذا حدث بعد ما قلت احه **
ارتحت والله **
اقرا الموضوع في مدونة

Friday, July 21, 2006

فقط وحصريا

فقط وحصريا
تشهد مدونة اتحاد مدونين لا وطن ولا دين مولد

Monday, July 10, 2006

ملعون

ملعونه الدنيا اللي مخليه الكل عبيد
ملعون مدينه نصر الشارع فيها كأنه جديد
ملعونة المُزة الحلوة اللي تخليني اعيد وازيد
ملعونة الشقة الحُق بتاعتي عشان نطراني بعيد
ملعونة وشوش الناس حواليه خلاص مش شايف وش جديد
ملعون الشعر بكل بحوره الراكده المركب واقفة تملي بعيد
ملعون اللي يخوفني بكلمة بخ في شارع ضلمة وركن بعيد
مافاضلشي غيري ألعنه
موش هلعنه

Thursday, June 29, 2006

هههههههه اشتغلت

اليوم وبكل فخر وعنطزة
اروي لكم يوميات
واحد اشتغل انهاردة بس في محل عصير
" ههههه اشتغلت " وهذه كانت الضحكة البلهاء التي ابتدا بها يومه هذا الشاب المسكين
لو رجعنا ورا حبتين ( فلاش باك ) كان يا ما كان يا سعد يا اكرام ما يحلي الكلام إلا بذكر النبي عليه الصلاة والسلام والمسيحي برده يمجد سيده .. نبدأ؟
ماشي ... الحكاية تبدي بشاب غلبان مسكين كان نفسة يشتغل اي حاجة .. وهو ماشي يدور في المحلات علي اي بارقة امل ( مش امل بنت الجيران ) لقي يافطة ضغيرة قوي قوي قد الكف تقريبا ... مكتوب عليها مطلوب عمال ...لما حقق في المكان لقاه غريب ( اصله مش من هنا ده من هناك ) لقي فواكة اشكال والوان وكلها سبحان الخالق العالم والذي علم الانسان مالم يعلم ... فواكه بلاستيك .. ما اعرفه عن هذا الشاب المسكين ( في الاخر هبقي اقول اعرفه منين ) شده الخجل والكسوف .. من اين له ان يأتي بالجرأة التي تجعلة يحرك ساقيه في الهواء ليدخل محل لبيع الفواكه البلاستيكيه
ولكن هبطت السكينه من السماء ( الصراحة هي كانت مطواه بس مشيها سكينه ) المهم دخل هذا الشاب المسكين وقابل مدير المحل واخبرة بالظروف والجوابات والذي منه ... وعلي اثر ذلك عرف مدير المحل ان هذا الشاب المسكين في كليه من كليات القمة .. وايضا عرف هذا الشاب العبيط بقي ان الفواكه البلاستيكيه لزوم العرض والمنجهه والفشخرة فقط
وعلي اثر ذلك استلم هذا الشاب المسكين الشغل ..... وكان انهارده اول ايامه هييييه
اصلي بصراحة شديده فرحت من كل قلبي لهذا الشاب البائس الذي عاني كثيرا كثيرا حتي اشتغل ( اصله كان كل يوم بيحكيلي ) ونا بصراحة كنت بواسيه .. المهم راح بدري علشان يعمل جو ... قال ياعني واد واخد الامور جد الساعة تسعة بالظبط كان واقف ادام باب المحل العجيب .... وطبعا المحل كعادته فتح في الميعاد المظبوم البتاع كل يوم الساعه عشرة ونص
لا تتعجبوا وتسألوا ( طب والشاب الغلبان ده عمل ايه ؟ ده مش من هنا ده من هناك ؟ ) اجيب عليكم واقول انه فضل واقف ادام المحل لحد ما الشمس قورته
قعد في المحل سبع سعات تقريبا ما بين روح هات كذا او خد المسّاحة وامسح المحل او انه يقف علي البنك ويصب الطلبات للزباين ... بصراحة علي حسب كلامة كان اليوم كويس جدا جدا جدا بالنسبة له .. والشابـين اللي معاه برده ولاد حلال ومؤدبين ومش بيرخموا عليه لانهم برده عرفوا انه طالب في احدي كليات القمة ( مش قمة الزباله التانيه اسمها قمامة ) المهم بعد ما خلصت الوردية جه المدير وادله عشرة جنيه هاهاهاهاهاهاها
حبه عرق من الصبح لحد الساعة اربعه العصر بعشره جنيه ...... يابلاش مين يزود ما فبش
طبعا صاحبنا كان طاير م الفرحة اليوم لسه بحالة ياتري اوح فين واجي منين وازاي يا ابو الافكار هتفرتك المبلغ الكبير ده
عشرة جنيه .. عشر جنيهات .. خمستين .. جنيه وجنيه وجنيه وجنيه وجنيه وجنيه وجنيه وجنيه وجنيه وجنيه
طبعا هداه تفكيرة انه يروح البيت ويتسريح علشان يعرف ينزل بكرة الشغل بدري ... لكن طول ما هو ماشي كان يخبط علي رجله الشمال ناحية جيب البطلون ويقول في سره هنا ترقد عشرة جنيه

Tuesday, June 20, 2006

لقد اصبحت كهلا في العشرين

لا ادري صراحة ما اود ان اقول كل ما اعرفه اني هنا قد ازيح بعضا من الهموم عن قلبي
احس احيانا اني كهلا في السبعين ... يحمل هموم لو وزعت علي ابنائي (بني ادم ) لفاضت وبحثنا عن مستوردين
اخذت الاجازة .. واصبح الفراغ يملئكل وقتي .. كنت اعتقد اني سوف افعل كذا وكذا .. ولكن تاتي الرياح بما لا تشتهي السفن
حاولت جاهدا ان ابحث عن عمل .. ولكن بلا جدوي .. تهرّب مني والدي عندما فاتحته في الامر
لقد طلبت منه ان يبحث عند اصحابة وزملائه في مهنته ..( التطريز) علّني افلح واتقن الصنعة .. ولكن كان لسان حاله يقول
لما ابقا افلح انا اشوفلي شغل ابقا اشوفلك . وعندها تركت لقدمي العنان تبحث في شوارع وسط البلد عن اي وظيفة مهما كانت .. فكرت في كل شئ .. اذا اراد احدكم ان يعرف
اخر ساعة يطلب موظفين .. ولكن يشترط ان يكون قد انهي الخدمة العسكرية محل حلواني لا اتذكر اسمة .. يطلب بائع ايس كريم وبائع عصير .. ولكن بعد السؤال يريده ذو خبره في التصنيع
احدهم اخذ اسمي ورقم التليفون .. عل ّ وعسي لا استطيع ان انفخ الهواء الان كي ازيح انقباض صدري .. لا استطيع ان اتخيل نفسي بعد عشرين عاما مازلت اطلب من والدي مصروفا
كي اخرج مع اصحابي كي اذهب للتدريب ( اتدرب في السكة الحديد وبعدها ماصنع الحديد والصلب ) طلبات الكلية
كي اخرج من البيت كي اقابلكم علي النت وفي المقابل انا اري ان اخوتي لا يخرجون ابدا ولا ينفقون شيئا وانا امامهم المبذر المسراف لقد جف الدم في عروقي لم يعد به نبض . شاب شعري وانحني ظهري وانكمش جلدي وشاخت اسناني
لم اعد شابا ... لقد اصبحت كهلا في العشرين اخيرا ما استطيع ان اقوله .. اني لن امل من البحث والثدوير .. يمكن ان يجدني احدكم في محلات وسط البلد .. قد يجدني واقف علي ثلاجة ايس كريم ابيع له الايس كريم وفي وجهي ضحكة تنم عن غبائي او يجدني اقف بين يديه اقول له نحب تشب ايه .. ثم اتي له بفاتورة باهظة واساله .. من غير مية ؟
او عندما يدخل محل ملابس قد اكون انا من يبحث له عن طلبه .... المهم اني في كلا الحالات لا اعتبر نفسي اقل من احد
لن اعرفكم ولن تعرفوني بالطبع ... ولكن عندها ساضحك من قلبي ولسان حالي يقول .. ياد ما تخليك جدع وشوف لابوك شغلانه معاك

Saturday, June 10, 2006

اخيرا كتبت التاج

بصراحة مش عارف اقول ايه ... اخذت الدعوة من فرهنهايت وبعدك علي بالي ولهذا اكتب
لم اكتب عندما اخذت الدعوة لسببين
الاول : ما كانشي معايا فلوس اقعد في الكافيه تاني علشان الوقت خلص
الثاني : هو نفس السبب الاول
المهم ... انا قبلت اني اعري نفسي ادامكو خلاص !! .. ما حدش يستغرب دي الحقيقة احنا في التدوينة دي بنعري نفسنا ادام بعض عشان كده انا مش هستكفي بالاسئلة بتاع التاج بس ... ما هو طالما هنقلع .... نقلع بضمير ولا ايه ؟
المهم انا هسأل وانا هجاوب
ايه اللي ممكن يخليني اكون مبسوط شوية ؟
لما احس اني صح في موقفي
لما اعرف بنت حلوة
ايه اللي يخليني اتضايق ؟
لما احس انه لسة ما فيش فايدة
لما البت الحلوة اللي عرفتها تسيبني
اكتر شيء يقلقني الايام دي ؟
خايف لحسن اعيد السنة دي ... دي تبقي حوسة
اهلاوي ولا زملكاوي ؟
كل معلوماتي عن الكورة انها مدورة
ايه اللي ممكن تعمله لو اصبحت غني غني فاحش ؟
يووووووه ده انا اعمل كتير
اولا : كان نفسي اعمل دار نشر كبيرة .. وانشر لكل اصحابي اللي يستحقوا النشر .. واعمل ليها صالون ثقافي كبير يكون كعبة للادباء والنقاد
ثانيا : نفسي اعمل حزب كبير ... واسمية عمق الحياة .... لا هسمية حزب اشعب ويبقي حزب م الشعب وللشعب ويكون حزب علماني ويكون له صحيفة تفهم الناس ياعني ايه علمانية
ثالثا : اجر قاتل محترف ... يخلص علي كل الشيوخ اللي في البلد دلوقتي
رابعا : هغير خريطة مصر دي كلها ... مش هخلي ولا منطقة عشوائية فيها ... وهبتدي بحدايق المعادي
ايه اخر حاجة قريتها ؟
فؤاد حداد الاجزاء الكاملة .... قصيدة اتكتبت سنة خمسين بتشتم في الملك ( حسني مبارك ) بالظبط
اخر فيلم شوفته ؟
ايون
اكتر صاحب بتحبه ؟
بموووووووت في محمد لطفي .. ومايكل
علي فكرة الناس كلها معتبراني ابنه ( محمد لطفي ) ... وانا كمان
مش عارف الناس خدت بالها الاول ولا انا اللي خدت بالي .... هو اليومين دول بيمر بحالة اكتئاب ... علشان شوية مشاكل
والله بدعي ومن قلبي ربنا يفكها عليك يا ابني
اكتر شيء بيخنقني في الحياه ؟
بصراحة هما خمسة .. اكتر تلاته خنقني اتنين البيت والبيت
ايه اللي ممكن يغيظك يا ادم ؟
لما اشوف بنت حلوة جدا بتعامل الناس وهي عارفة انها حلوة .. بصراحة باضف ادام دلعها
ايه اللي ممكن يفرسك يا ادم ؟
لما اشوف بنت حلوة جدا .. كل الناس عارفة انها حلوة وبيعاملوها علي انها حلوة ... لكنها ما تعرفش انها حلوة .. الصراحة بامووووووت م النوع ده ... بيبقي برئ قوي زياده عن اللزوم
بتحلم بايه يا ادم ؟
احلم اني اكون رئيس جمهورية مصر العربية ... واكون قائد ايه يحلف الناس بحياتو... واعمل اصلاحات مالهاش اول من اخر
والتاريخ ما يبقاش وراه شغلانه غيري
واخلي الاقتصاد حديد ... واعمل وحده بين العرب كلهم مع الحفاظ علي قومية مصرية دون الاذابة في المجتمع العربي ... غير اني هظبط جنوب افرقيا ( السودان ولاصومال واثيوبيا وكلو
واعمل قوة كبيرة جدا اكبر من امريكا وروسيا .. واصرف ع البحث العلمي كثير
وارجع العلماء بتوعنا يشتغلوا في ارضهم وكده يا عني
ايه اللي بخليك تكتئب يا ادم ؟
لما اعرف كويس اني حلمي مش هيتحقق
ايه كده كفاية ولا لسه ..؟
اما اشوف
في كام سؤال كده
ايه الموقع اللي انت لسة كنت فاتحة من شوية ؟
بلوج بعدك علي بالي ..... علشان اغش الاسئلة
ايه اخر صوت سمعته ؟
صوت الناس اللي بتتخانق تحت في الكافيه ..... اصل انا في الدور التاني
اي اخر ريحة شمتها يا ادم ؟
ريحة السجاير في الكافية
نفسك فس دلوقتي السعة دي ؟
اكون مخلص مذاكرة بتاعت مادة بكرة
وايه كمان ؟
كوباية شاي
بس ؟
وشوية بقسماط
_____________________________
اظن انه كفاية كده ...... امرر بقي لمين لمين
سندباد .. حبيب قلبي
احمد حسن ... نظرة للخلف
اتفوخس ..... واللي اختفي ومش عارف اجيبه منين

Thursday, June 08, 2006

ومعرفتش اهرب يا جدعان

كنت تلقيت مؤخرا تدبيسا من فرهنهايت ... للكتابة في التاج
..
وقد وصلني الان تدبيس من بعدك علي بالي
.
ومع الالحاح .. وبناء علي رغبة الجماهير
سوف اكتب التاج
ولكن امهلوني وقتا كي ابحث عن الاحابة فالاسئلة صعبة جدا
ولكن قبل هذا وذاك .... هناك ما كنت انوي اكتبه ولكن سوف يتعطل بفعل التاج
حكايات بني الاهبل ... العدد الاول
حكايات بني الاهبل ... العدد الثاني

Sunday, June 04, 2006

الاجابة

اجابتي علي السؤال السابق تتلخص في اربعة جمل
ـــــــــــــــــــــــــــــــــــــــــــــــــــــــــــــــــــــ
الانسان بدون العلم حيوان ناطق
الانسان بدون الحرية حيوان اخرس
الانسان بدون العلم والحرية .. مجرد حيوان
بالعلم والحرية تصبح الحيوانات اكثر رقيا

Monday, May 29, 2006

اسأل واجيب .. العدد الاول

ما الفرق بين الانسان والحيوان ؟
هل للحيوان عقل ؟
...................... الحــــيــــوان
يجوع .. فيأكل
يعطش .. فيشرب
يخاف .. فيهرب
يتعب .. فينام
ينام .. فيستريح
يستريح .. فيهدأ
يهدأ .. فيأمن
ويكره .. فيُعادي
ويصاحب .. فيحب
يحب ..فيتزوج
يتزوج .. فينجب
ينجب .. فيربي
يربي .. فيعلم
يعلم .. فيأدب
يأدب .. فيحسن الـتأديب
ما الفرق بين الانسان والحيوان ؟

Sunday, May 28, 2006

تعتعة نفسية

ليس من حق شجرة التوت
..
ان تطمح في ان تكون شجرة تفاح
..
ولكن من حقها ان تكون شجرة توت حلوة

Tuesday, May 23, 2006

مش عارف اسميها ايه؟

معرفش ليه .. كل اما اموت
ليه باتخنق
يا التربة فيها شيء خنيق
او الكفن هو اللي قارص حبتين
في كل مرة كنت ادور ع السبب
لكن فشلت
وف مرة قررت اني اموت
وبدون عجب قلت اما اراقب من بعيد
ح اغير التربة الخنيقة
واشتري لي تراب جديد
وابحبح الكفن اللي قارص
علّ وعسي
يمكن تكون العلّة فيه
بردك فشلت
ساعتها وطّى عليا واحد
م الغلابة الميتين
قال لي يا صاحبي ما تحاولش
ياما ناس قبلك حاولت ولكن
كل دول يا صاحبي قبلك دَوَروا
لكن الحقيقة بالف وش
ف ما تحاولش
و اوعاك تغش
انت اللي محظوظ حبتين
ع الاقل .. فيه حد قالك ما تحاولش
ما هو لو حاولت
يمكن تصادف يوم فتلقي العيب منين
ولو عرفت .. ياحلو تنسي
مش هترجع
والميتين هيزيدوا واحد

Saturday, May 20, 2006

نفسي اعيش في حالة حب

بحبك بمعني كلمة حب
بحبك في كل نبضة قلب
بحبك حب فاق الحد
في قلبي الشوك في قلبك ورد
واحبك فوق واحبك تحت
واحبك جذر واحبك مد
واحبك سُنه واحبك فرض
واحبك جمعة واحبك سبت
واحبك اربع واحبك حد
واحبك تلات واتنين وخميس
وبعديكي ما حبش حد

Saturday, May 13, 2006

نصب الصوان

نصب الصوان
والمشنقة متعلقة فوق الحيطان
الحبل نازل م السما
والمرجحة .. قبل الزمان ده بميت زمان
نصب الصوان
خشبة الميت قديمة واتهرت
حتي الكفن دايب ياناس
وماعدشي نافع يتدفن ميت جديد
نصب الصوان
الفجر .. خان
الصبح .. خان
وانا والزمان .. اعداء صحاب
نصب الصوان
والميت الليله قتيل
يامين يغسل
يامين يكفن .. آآآآ ه يامين ؟
الدم غطي م الركب
حتي الجبين
الروح بريئة والجسد
متعاص في طين
وانا والحنوتي لوحدنا
والشر كان يلعب بنا
تتباع بكام جثة قتيل
لو مات دفاعا عننا ؟
نصب الصوان
واترصص الخلق الكتير
صفين كبار من ع الجناب
والدمع يحفر في الخدود
والعين كتاب
سهل القرايه
بس مين م الناس قراه
الله
الله عليك .. الله
صدق العظيم
الفاتحة
انتم سبقتم اما نحن الاحقون
يوم الخميس ما فيش قرص
التربة فاضية
الدود جعان
وعشان كده
فُــضّ الصوان

Sunday, April 30, 2006

كواليس ثورة

كواليس ثورة
شعر بالعامية المصرية
سعات كتير ابقي كدا
ما .. اعرفشي ليه
ما .. حد بيقول لي إحترس
دايما حياتي مجهده
دايما كدا .. يومي غِـــلــس
محتار يا ناس بين دا- ودا
مش عارف ابقي المختلس
شرفي ما جبنيش غير ورا
بردك زهقت
فمش همثل دور مرا
ومش همثل دور مرا
كيلي طفح .. علقم شربت
اصلي السبب
انا اللي كنت البهلوان .. ما اعملش غير المسخرة
لكن خلاص آن الاآوان .. وبإيدي هعمل مجزرة
هحلم بدور حبيب وسيم
جاي من بلاد اللندرة
بيدوبوا فيه كل البنات
نظرة عيونه مسكرة
كلامه يبقي من سكات
الامر عالي المقدرة
لكن صحيح .. ازاي هثور ؟؟؟
دي مشكلة
لا عمري كنت بانط سور
ولا بحب البهدلة
طب هعمل ايه ؟
ولسة فاضل كام دقيقة
علي إنصراف باقي الحضور
ياعني كات حابكة معايا الثورة في قفل الستار
يانفسي بصي
استنظري طلوع النهار
وبوعدك إني هثور
إزاي هتبقي ما تسأليش
لكن هثور
وإنشاله يبقي الكون دمار
او اشعل الدنيا حريق
وحبقي رعد .. وحبقي نار
أرجوكي بس استنظري .. طلوع النهار
اصل انهارده
قبضية الشهر الجديد
ولسة ما دفعتش ايجار
وابني اللي لسة في الحضانة
لازم اجيب له المريلة
ولازم اجيب له الكراسات
وبنتي سارة سبوعها بكرة
مين اللي هيجيب الموغات
وامي العجوزة
اخاف عليها
لو يوم قالولها
ابنك ياحجة
شدي حيلك اصله مات
ومراتي برده
لسه شابة
حرام عليا .. اسيبها تبقي ارملة
بعد اما اموت
ما الثورة دي .. اخرتها موت
استغفر الله العظيم
استغفر الله العظيم
سعات كتير ابقي كدا
ما اعرفش ليه
ما حد بيقولي احترس

Friday, April 28, 2006

اخر خبر

ما اعرفش ده خبر ولا اشاعة
وان كانت فجديرة بالاهتمام
ما حدث هو اني داخل اعلق في اخر بوست في مدونة .... خربانه يا جدعان بتاعت وليد
كان الموضوع عن اضطهاد الحكومة للقضاه
وفوجئت بان شخص ما قد علق علي الموضوع ... وذكر في تعليقة ان مالك صاحب مدونة
من ضمن المعتقلين
قولوا معي ع الحكومة .. حسبي الله ونعم الوكيل

Monday, April 24, 2006

شوية اخبار سريعة

في البداية كده هقول حبة اخبار سريعة طازة
لسة دلوقتي حاصل تلات تفجيرات في جزيرة دهب مات اربعتاشر حتي هذه اللحظة ويوجد سبعين جريح
علي لسان الداخلية وموش علي ضمانتي
داليا فؤاد رجعت يارجالة ومتنكرة في صوت الحب والينك موجود ضمن باقي اللينكات للعايز
اتحاد المدونين رجع وبقوة عن ذي قبل
في صورة في هذه المدونة تحمل العنوان بالضغط عليا سوف يتم الانتقال
حاليا انا زهقان قوي ومضايق
حسيت انه خبر ولازم اقوله
جدول الامتحانت نزل .. وامتحاناتي يوم 27/5/2006 والعملي قبليها باسبوع
يوم الخميس الجاي 27/4/2006 رايح دريم في رحلة مع الكلية
حجيب الموبايل قريب
ومش حدي النمرة لحد .. علشان مش عايز وجع دماغ
انهارده الاتنين يوم شم النسيم
حاسس ان ممكن يكون فيه ناس ماتعرفشي

Wednesday, April 19, 2006

كل اعوانك خانوك يا ريتشارد

لم اتوقع .. ولو في احلامي ما حدث
اشكركم حميعا من كل قلبي
دائما ما تثبتون لي اني دائما
مـــغــفــل
حتي لا اثير اشمئزاز الاخرين .. فهذا هو الموضوع في عجالة
لقد انشئت مدونة جديدة سميتها
اتحاد المدونين لا وطن ولا دين
ارسلت دعوات للانضمام لكل من ابدي موافقة للمشاركة
وفوجئت بان حذفت المدونة
بكل ما كتب فيها
من مواضيع
شكرا لكم مرة اخري
لن اصبح مغفلا بعد اليوم

Monday, April 17, 2006

افهمومها .. بقي

حدث في الاونة الاخيرة شيء عبيط جدا
الناس بتتعامل معاه عادي جدا
وكأن الشيء ده مش عبط ولا حاجة
وكأني الوحيد اللي شايفه عبط
فده منطقي جدا انه يسوقني الي الحقيقة المرة
الا وهي
اني انا اللي عبيط
سيطر مؤخرا علي حركة التدوين بعض الشلل اللي هما فاكريين التدوين ده عبارة عن لعبة مسلية .. اخش اتعرف علي بنات وفي ده واشاغل في ده .. واذا كان مدون جديد
تقوم طبعا المدو نين اللي سجتهم .. واللي شاغلتهم في تسجيدك بالطبع
ايه خلاص الكل بقي رومانسي
كل المواضيع واحدة ايه كل اللي شاغلنا مواضيع من نوعية
الجرح
الحب
الالم
الوحدة
بصراحة حاجة تثير القرف وتبعث علي الاشمئزاز .. بقيت اقرف من اغلبية المدونين كل المدونات تقريبا واحدة نسخ مكررة .. ايه ياجماعة
فين الناس .. فين الناس ... فين الناس
شلل تخش تعلق لشلل .. وتقول كلام عبيط يثير الاشمئزاز .. من نوعية
بارك الله فبك
بوست جميل
وفقك الله
ولا اكننا في منتدي وكل واحد حاطط مواضيع .. وعايز يحصد اكبر زيارة لمواضيعه .. ايه ؟
لو عايز ناس تعلق بكلام من هذه النوعية .. فالمنتديات علي قفي من يشيل
لا وايه .. المصيبة الكبري
لقد وصل عدد التعليقات في بعض المدونات الي الرقم خمسين .. لا بل تخطاها في بعض الاحيان
قبل ان يتهمني البعض بالغيرة .. او ان ذلك هم سببة بحجة انهم من احدثوا رواجا في حركة النت .. او المدونات فاحب ان اجيب
اغلب المعلقين .. مدونين ايضا .. ينتظروا من علقوا لهم ان يعلقوا لهم في مدوناتهم
هناك ايضا طريقة اخري في زيادة اعداد التعليقات وهي .. ان يقوم صاحب المدونة في التعليق كل فرد في تعليق خاص به .. يهدف بذلك الي جمع اكبر عدد من التعليقات .. وذلك حتي يكسب مدونته شهرة مزيفة ... مؤقته لبعض الوقت
لا ليس هذا فحسب بل تجد ان التعليقات اصبحا غرفا للشات .. والتحاور عن اشياء ليس لها علاقة بالمرة لا من بعيد ولا من قريب للموضوع المطروح للنقاش .. فتجد في بعض المدونات تعليق ورد صاحب المدونة ثم رد صاحب التعليق الاول ثم رد صاحب المدونة علي التعليق التاني وهكذا في سيمفونية مكررة باخت حتي مملت تكرارها
اري من وجهة نظري ان المدون شخصية تري ما لايراه الاخرون .. عندما يطرح موضوعا للنقاش .. فلا بد ان يكون هذا الموضوع جدير بالفعل ان يناقش ..
واجد ان المعلق علي اي موضوع .. هو بالفعل يقوم بدور المتلقي .. هذا اذا خلعنا علي المدون لقب مبدع
فعلي هذا المتلقي .( المعلق) ان يكون علي قدر المسئولية .. وان يكون تعليقة علي مدي استيعابه للموضوع .. وليس مجاملة .. او احسن له ان لا يعلق مدام الموضوع لم يمسه من الداخل .. ولا ينزل بمستواه لمجاملة شخص ما .. ليس فقط ليشئ الا انه سوف يعلق لي في مدونتي
ابدا هذا المبدا مرفوض ..
ايضا رسالة الي كل مدون .. ان لم يكن الموضوع جادا .. يهم اطراف عده .. يحتاج فعلا الي الناقاش .. فلا تدع له مجالا للنقاش
وقف موقفا فيه تثبت انك جدير بلقب مدون

Saturday, April 15, 2006

اسمع كلامك اصدق .. اشوف امورك استعجب


المفروض ان دول هما الناس اللي زعموا انهم خايفين علي احساس المسلمين من اساءة الدنمارك للرسول دي الطيارة الملكية من بره

اما دي فيهي الطيارة الملكية من جوة .. تخيلوا ان دي طيارة

تخيلو تمنها كام

تخيلو التمن ده يشبع كام جعان من بلاد العرب والمسلمين

تخيلو التمن ده كان عمل ايه في قضية فلسطين المعلقة

اتركم الان مع الطيارة للتتخيلو


ايه مش مصدقين .. ؟ لا صدقوا

هي دي الطيارة الملكية .. طبعا عارفين مين الملك

زلا دي محتاجة قوالة

بجد مش لاقي كلم اوصف بيه

المفروض اني اقول لنفسي .. طب وماله يا اخي ما ربنا ادله

ما

بفرجهاش علي نفسه ليه بقي وعلي اللي حواليه

وارجع اقولي .. طب وربنا اداله منين .. مش من فلوس الغلابة

والله انا بحسد ولا حاجة .. لكن طالما هو راجل خايف علي احاسيس المسلمين كده

ليه ما خافش علي المسلمين الغلابة الللي بيموتوا كل يوةم في الصومال علشان مافيش اكل

حاجة تغيظ مش كده

ثم

وبعدين .. ايه المفروض نعملة .. نجري تاني ورا اي تصريحات من النوع الخايب اللي ممكن تعملها البلاد اللي فاكره نفسها الممثل الوحيد للمسلمين .. لا طبعا

فاللي بيته من ازاز ما يحدفشي الناس بالطوب

Tuesday, April 11, 2006

يااااااااه .. زي ما كون تعبان وارتحت

يااااااااه .. زي ما كون تعبان وارتحت
.
.
.
.
بجد فعلا زي ما كون تعبان وارتحت ... لا دي كلمة قليله
الي كل من اعتز بصداقتهم ..
اتمني ان لا افقدهم ابدا
اليكي راح اغير المحتوم .. اكثر من اختي
اليك احمد حسن ... اخويا الكبير طبعا .. ما تزعلش لو كنت الصغير
دكتور
ابراهيم
سندباد
اشكركم جميعا
اليوم استطيع بكل حريه ان اخذ نفسا عميقا من الرئتين لا يشاركني فيه دخان السجائر
اليوم .. عيد ميلادي
لقد ولدت من جديد .. ناقي بلا اخطاء
لقد اغتسلت من اخطائي اذن
تحية من قلبي يا بيسو .. يا حمد .. يا خيال الظل
بجد لولاك لكنت فضلت بوشين .. كنت هحتقر نفسي .. انا اليوم فخور باني ادم
ادم المصري
فخور اني اعترفت لنفسي بكلام .. كنت بخجل من بعض الناس انهم يعرفوه ... كان مقصور علي بعض الاشخاص اللي بيعملو كده برده لانهم مش هيقدروا يعايروني
انهارده ما فيش حد ماسك عليا زلة
انهارده انا رجعت من الحج ... وقفت علي عرفات ... اغتسلت من كل زنوبي .. عملت اللي كنت خايف اعمله من زمان
اصدقائي اشكركم شكرا لا ينتهي
اليوم فقط اتضحت ليا المعاني واكتشفت الحقيقة
عرفت من هم الاصقاء
عرفت من هم لاعداء
عرفت من هم الاخوات
احمد حسن
راح اغير المحتوم
من انهارده هيبقي اسمكوا ..... اخويا واختي اللي ما جبتهمش امي
حسيت اليوم باحساس النقاء اللي مش قادر اوصفه ...
بجد ممكن الانسان يحس انه بعد عشريييييييين سنه من ارتكاب معاصي .. فجأة كده بقي ابيض
ياااااااااااااااااااااااااااااااااااه ... زي ما اكون تعبان وارتحت
صدقوني انا فرحان جدا انهارده وفرحتي ما تتوصفش
بعد كده انشاء الله اوعدكم
لا تشاؤم بعد اليوم
لا خصومة بعد اليوم
تسامح الي الابد
حب الي الابد
صداقة الي الابد