الكليات مابتلّعشي وزرا ..امال مين اللي بيطلّع ؟

من كام يوم كده بابا كان عمال يسمع التلفزيون

اصل بعيدعنك التلفزيون بتاعنا بيجيب صوت بس

المهم الوقت إتأخر .. وحسيت ان التلفزيون كان شغال لوحده وماحدش بيسمعه

(حلوة دي ..ما حدش بيسمعه )

المهم روحت اشوفه في اوته (اقصد غرفته ) المهم لقيت بابا رايح في النوم

قلت له هتنام يا بابا اقفل التلفزيون ؟

قالي ماشي

لسه هقفل وسمعت حاجة غريبة

اقول لكم بقي يا خوانا سمعت ايه

قال ايه كان فيه برنامج وشكله كده المذيعه واحده ست من صوتها ..والضيف كان وزيرة القوي العاملة

عائشة عبدالهادي

المهم وانا ايدي رايحه ناحية الزرار ..سمعت المذيعة بتسأل الوزيرة ..مؤهلك ايه ؟

سؤال جريء

استغربت من جرؤة المذيعين المصريين بصراحة ..وكان عندي فضول اني استني اسمع الاجابة

الاجابه كانت اغرب .. لان الوزيرة قالت : اسفة مش هقول

طبعا صدمت وكانت الصدمه اكبر لما ردت المذيعه وقالت : احترم صراحتك

ولم تكتفي الوزيرة المبجلة بذلك بل قالت : انا قفلت الموضوع ده من زمان ثم التعليم اللي انا اتحرمت منه عوّضته في ولادي واخذت تستعرض الشهادات اللي حصل علياه اولادها

وكأن اولادها هما اللي اتعيّنوا في الوزارة مش هي

واخيرا رمت القنبلة في وشي و وش كل من شاهدوها حيث تحدت اي مخلوق ان يناظرها في اي موضوع مهما كان وادّعت ان لديها القدرة علي مجاراته بل والتفوق عليه

واخذت المذيعة تقول علي لسانها هذا التحدي الي الجمهور مباشرة ... والمصيبة ان يسقف لهاكل من كانوا بالحضور

هنا اريد انا اسأل ما هو الطريق الذي يمكن للمرأ ان يسلكة حتي يصبح وزيرا بدون ان يحمل مؤهل جامعي

انا مستعد ان اترك كلية الهندسه من اليوم (بالمناسبة انا في تانيه قوي هندسة حلوان ) واسلك نفس الطريق الذي سلكته الوزيرة

ارجوا من كل من يقرأ ان يدلني

حد بقي يقولي اعمل ايه عشان اكون وزير ... احنا بيطلع ميتين ابونا في الكليات

وصحيان الصبح

وحضور محاضرات

وامتحانات

اشي عملي علي شفوي علي تحريري علي كويز في المحاضرة علي ميت ترم علي ترم وفي الاخر ما بنطلعشي وزرا

نعمل ايه يا ستي الوزيرة

فكرة جاتلي وانا قاعد بافكر

ايام العقاد .. عباس العقاد عارفينه ؟

المهم .. ايامه ..لوحد كان ماشي في الشارع ..وقابل اي بياع روبابيكيا .. مالوش في الثقافة وسأله عن العقاد

هل حد منكم يجيله هاجس او شك ان الراجل ده يقول ما سمعتش عن الاسم ده قبل كده !!

بلاش

ايامنا دلوقتي ..بعض الدكاترة والباحثين بيعتمدوا في كتبهم علي مراجع كتبها العقاد نفسه .. والمراجع دي ماحدش يقدر يشكك فيها اول ما يسمع اسم العقاد

لكن عايشه عبد الهادي عملت ايه ؟

ايه هو انتاجها الفكري او الادبي او العلمي .. اللي ساهمت بيه في اثراء فكر بني البشر

بلاش

امشي في الشارع وقول لاي حد عيشه عبد الهادي ..لو استغرب قول له

عيشه عبد الهادي .. عيشه عبد الهادي يا راجل

لو ما قالكش كلمة قبيحة ابقي انا غلطان

نرجع للبدايه من تاني ... عيشه عملت ايه عشان تبقي وزيرة وانا اعملة من بكرة وظز في الكلية وفي اللي عايزين تعلموا