نعمة الارشيف

*

احلي حاجة في المدونة ... هي انك تمتلك ارشيف ، وخصوصا لما يكون ارشيف كبير ومحترم ومليان بلاوي زي الارشيف بتاعي هنا ، سنتين طبعا ما اقدرش استهون بيهم ، متعة كبيرة جدا وانت عمال تتصفح ماضيك كله ، يوم بيوم ، وتفتكر اليوم دا كنت مبسوط ، اليوم دا كنت متضايق ... اليوم دا كنت هتطير من الفرحة ، اليوم دا كان هاين عليك تدمع ولكنك مش قادر

*

كدا انا تميت سنتين كمدون ، ياعني من حقي اعمل عيد ميلاد تاني ، بس المرة دي كنت عايزه يكون مختلف ، امبارح فضلت اقرا الارشيف بتاع المدونة بتاعتي ... جبته من البداية ، من اول شهر ، من اكتوبر 2005 ، لحد يومنا هذا ... كل بوست ليه معايا قصة لوحده ، ياااااااااااااااه ولا لما اجي اقرا الكومنتات علي البوستات اللي باحبها واشوف ازاي الناس كانت موافقاني ، او الناس المعارضاني ، واتفرج علي اسلوبي في الكتابة ، بصراحه حسيت فعلا ياعني ايه يكون عندك ارشيف عمره سنتين

*

باحس بمتعه شديدة لما احس اني كنت باعرف اكتب من زمان ، ياني من بدايتي في البلوج وانا اسلوبي في الكتباة حلو وسعات بطلع اساليب جميلة ، بصراحه لما باتفرج عليها اتني باكون مبسوط جدا ، انا سعات باكتشف نفسي من جديد ، واستغرب جدا من نفسي ، معقولة انا كنت بافكر كدا ، معقولة انا عملت دا ، سعات باكون مبسوط جدا اني تفكيري كان سليم وانا صغير من سنتين طبعا ، وسعات باقول معلشي ماهي البداية بقي ، جميل جدا ان الواحد يكون عنده ارشيف جوه المدونة ... ياريت كان عندي ارشيف لحياتي ، اقدر ارجع ليه وقت ما انا عايز ، واتفرج انا كنت عامل ازاي في ماضيه

*

احيانا الواحد منا لازم يبص لنفسه شوية ، ولكن الدنيا بتكون عاملة زي لعبة الشطرنج ، طول ما انت لسه في الدور مش بتاخد بالك من الفرص اللي بتجيلك واللي انت بتضيعها ، لكن ياسلام لو تقدر تسجلك كام دور كدا ، تتفرج عليهم وقت ما يتسني لك تتفرج ، بجد هتفرق كتير جدا جدا جدا مع كل واحد فينا ، اكيد ساعتها كل واحد هيعرف نفسه علي حقيقتها ، لانه هيشوف نفسه قدامه بتتصرف التصرفات النابعه منها وممنه بيها ، لو هي صح اكيد هيفخر بنفسه زي ما انا عملت وانا باقرا الارشيف ، لو هي غلط .... هيحاول يصلحها بعد كدا ويقول معلشي اصلي كنت صغير وقتها ... زي ما انا قولت برده وانا بقرا الارشيف

*

وانا باقرا الارشيف افتكرت مواضيع جميلة جدا جدا جدا .... كتبتها بدون اي اعداد او ترتيب ، وفوجئت انها مكتوبة باسلوب جميل جدا ، لدرجة اني انا نفسي سعات باعجب بنفسي ، ولما اجي اقرا الكومنتات ، بافرح زياده ، بصراحه نعمة الارشيف دي المفروض انها مضافه علي باقي النعم اللي ربنها اديهالنا ، ولازم جدا نشكره عليها ، لانها علي الاقل تقدر تبعث روح الفرح والسعاده في نفس اي حد فينا ولو لحظات ، وصدقوني بتفرق في شخصية البني ادم جدا ، انه يشوف نفسه علي حقيقتها قدامه